ຈັດແຂ່ງຂັນບານເຕະຮຸ່ນ 12 ປີ ທົ່ວປະເທດ-ງານບຸນເດັກນ້ອຍ

1.319 09 ທ.ວ. 2019 ວົງຈອນກີລາ
ຈັດແຂ່ງຂັນບານເຕະຮຸ່ນ 12 ປີ ທົ່ວປະເທດ-ງານບຸນເດັກນ້ອຍ

   ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ຮ່ວມ​ກັບ​ອົງ­ການ​ໂລກ​ອວຍ­ພອນ ສ ເກົາ­ຫຼີ ຈັດ­ການ​ແຂ່ງ­ຂັນ​ເຕະ­ບານ​ເຍົາ­ວະ​ຊົນ ຮຸ່ນ​ອາ­ຍຸ​ບໍ່​ເກີນ 12 ປີ ໃນ​ຂອບ​ເຂດ​ທົ່ວ​ປະ­ເທດ ແລະ ງານ​ບຸນ​ເດັກ­ນ້ອຍ​ຢ່າງ​ຍິ່ງ​ໃຫຍ່​ຂຶ້ນ ໃນ​ວັນ​ທີ 6 ທັນ­ວາ 2019 ທີ່​ເດີ່ນ​ເຈົ້າ​ອາ​ນຸ​ວົງ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ ບົວ​ລານ ສິ​ຣິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ ສສກ ທ່ານ ກອງ​ມັນ​ຮອນ ຮອງ​ຫົວ­ໜ້າ​ອົງ­ການ​ໂລກ​ອວຍ­ພອນ ສ ເກົາ­ຫຼີ ພ້ອມ​ດ້ວຍ​ຄະ­ນະ​ຜູ້​ແທນ​ຈາກ​ອົງ­ການ​ໂລກ​ອວຍ­ພອນ ສ ເກົາ­ຫຼີ ບັນ­ດາ​ຫົວ­ໜ້າ​ກົມ ຮອງ​ກົມ ຄະ­ນະ​ຮັບ­ຜິດ­ຊອບ ຄູ​ເຝິກ ນັກ­ກີ­ລາ ນັກ­ຮຽນ-ນັກ​ສຶກ​ສາ ແລະ ສື່​ມວນ​ຊົນ ທັງ​ພາຍ​ໃນ ແລະ ຕ່າງ­ປະ­ເທດ ເຂົ້າ​ຮ່ວມ.

   ທ່ານ ວິ­ລະ​ວັນ ບຸນ​ສຸກ​ໄທ ວ່າ­ການ​ຫົວ­ໜ້າ​ກົມ​ພະ­ລະ ແລະ ສິ­ລະ​ປະ​ສຶກ​ສາ ກະ­ຊວງ ສສກ ກ່າວ​ວ່າ: ການ​ແຂ່ງ­ຂັນ​ບານ­ເຕະ​ຄັ້ງ​ນີ້ ແມ່ນ​ມີ​ທັງ​ໝົດ 18 ທີມ​ເຂົ້າ​ຮ່ວມ ທີ່​ມາ​ຈາກ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ນະ­ຄອນ­ຫຼວງ ໃນ​ຂອບ​ເຂດ​ທົ່ວ​ປະ­ເທດ ແລະ 1 ທີມ​ຈາກ ສ ເກົາ­ຫຼີ ແຕ່​ໜ້າ​ເສຍ­ດາຍ​ທີ່​ແຂວງ​ຫຼວງ​ນ້ຳ​ທາ​ບໍ່​ສາ­ມາດ​ເຂົ້າ​ຮ່ວມ​ໄດ້ ໂດຍ​ການ​ແຂ່ງ­ຂັນ​ຮອບ​ຄັດ​ເລືອກ​ແມ່ນ​ຈະ​ໄດ້​ເລີ່ມ​ແຕ່​ວັນ​ທີ 6 ທັນ­ວາ ແລະ ວັນ​ທີ 7 ທັນ­ວາ 2019 ແມ່ນ​ຮອບ​ຊີງ​ຊະ­ນະ​ເລີດ ພາຍ­ຫຼັງ​ມອບ​ຂອງ­ຂວັນ​ລາ­ງວັນ​ຮຽບ​ຮ້ອຍ ແລ້ວ​ແມ່ນ​ສຶບ​ຕໍ່​ຈັດ​ງານ​ບຸນ ເດັກ­ນ້ອຍ ເຊິ່ງ​ຈະ​ມີ​ການ​ແຈກ​ຍາຍ​ອຸ­ປະ­ກອນ​ການ​ຮຽນ-ການ​ສອນ ເຄື່ອງ­ນຸ່ງ​ຫົ່ມ ອາ­ຫານ​ເກົາ­ຫຼີ ແລະ ອື່ນໆ.

   ພ້ອມ​ກັນ​ນັ້ນ ທ່ານ ບົວ​ລານ ສິ­ລິ​ປັນ­ຍາ ກ່າວ​ວ່າ: ກິດ­ຈະ­ກຳ​ໃນ​ມື້­ນີ້ ແມ່ນ​ສຸດ​ທີ່​ມີ​ຄວາມ​ໝາຍ​ຄວາມ​ສຳ­ຄັນ ແລະ ເປັນ​ປະ­ໂຫຍດ​ຫຼາຍ​ຕໍ່​ກັບ​ເຍົາ­ວະ​ຊົນ​ລາວ ໂດຍ​ສະ­ເພາະ​ການ​ພັດ­ທະ­ນາ ແລະ ການ­ສະ­ແດງ​ອອກ​ທາງ​ດ້ານ​ພອນ​ສະ­ຫວັນ​ໃນ​ການ​ຫຼິ້ນ​ກີ­ລາ ພ້ອມ​ດຽວ​ກັນ​ນັ້ນ ກໍ​ເປັນ​ການ​ສ້າງ​ຄວາມ​ສາ­ມັກ­ຄີ​ຮັກ­ແພງ ລະ­ຫວ່າງ​ນັກ­ກີ­ລາ​ດ້ວຍ​ກັນ ໂດຍ​ຜ່ານ​ກີ­ລາ​ບານ­ເຕະ.

ຂ່າວທີ່ກ່ຽວຂ້ອງ