ປະກາດ​ຜົນ​ສຳ​ຫຼວດ​ພົນລະເມືອງ ແລະ ທີ່ຢູ່​ອາໄສ​ທົ່ວ​ປະເທດ

1.050 09 ທ.ວ. 2019 ຂ່າວໜ້າ​ໜຶ່ງ
ປະກາດ​ຜົນ​ສຳ​ຫຼວດ​ພົນລະເມືອງ ແລະ ທີ່ຢູ່​ອາໄສ​ທົ່ວ​ປະເທດ

    ສູນ​ສະຖິຕິ​ແຫ່ງ​ຊາດ ກະຊວງ​ແຜນການ ແລະ ການ​ລົງທຶນ ຈັດ​ກອງ​ປະຊຸມ​ປະກາດ​ຜົນ​ການ​ຄາດ​ຄະເນ​ພົນລະເມືອງ​ລະດັບ​ເມືອງ 2015-2035 ການ​ວິໄຈ​ພົນລະເມືອງ​ໜຸ່ມ​ໃນ ​ສປປ ລາວ ແລະ ແຜນ​ພັບ​ການ​ເກີດ-ການ​ຕາຍ​ຈາກ​ການ​ນຳ​ໃຊ້​ຂໍ້​ມູນ​ຜົນ​ການ​ສຳ​ຫຼວດ​ພົນລະເມືອງ ແລະ ທີ່ຢູ່​ອາໄສ​ທົ່ວ​ປະເທດ ຄັ້ງ​ທີ 4 ປີ 2015 ຂຶ້ນ​ໃນ​ວັນ​ທີ 6 ທັນວາ 2019 ຢູ່​ນະຄອນຫຼວງ​ວຽງ​ຈັນ ເປັນ​ປະທານ​ຂອງ​ທ່ານ ສະໄໝ​ຈັນ ບຸບຜາ ຫົວໜ້າ​ສູນ​ສະຖິຕິ​ແຫ່ງ​ຊາດ ມີ​ຫົວໜ້າ​ກົມ​ຈາກ​ກະຊວງ​ທີ່​ກ່ຽວຂ້ອງ ຫົວໜ້າ​ສູນ​ສະຖິຕິ​ປະຈຳ​ແຂວງ​ທົ່ວ​ປະເທດ ແລະ ຕາງໜ້າ​ຈາກ​ອົງ​ການຈັດຕັ້ງ​ສາກົນ ເຂົ້າ​ຮ່ວມ.

    ໄລຍະ​ຜ່ານ​ມາ ກົມ​ສະຖິຕິ​ສັງຄົມ ສູນ​ສະຖິຕິ​ແຫ່ງ​ຊາດ ໄດ້​ຈັດ​ຕັ້ງ​ປະຕິບັດ​ການ​ວິໄຈ​ລົງ​ເລິກ ໂດຍ​ນຳ​ໃຊ້​ຂໍ້​ມູນ​ຜົນ​ການ​ສຳ​ຫຼວດ​ພົນລະເມືອງ ແລະ ທີ່ຢູ່​ອາໄສ​ທົ່ວ​ປະເທດ​ປີ 2015 ເຊັ່ນ: ຄາດ​ຄະເນ​ພົນລະເມືອງ​ລະດັບ​ຊາດ ແລະ ລະດັບ​ແຂວງ​ປີ 2015-2045 ເຊິ່ງ​ໄດ້​ປະກາດ​ໃຊ້​ໃນ​ກອງ​ປະຊຸມ​ວັນ​ສະຖິຕິ​ລາວ 27 ມິຖຸນາ 2018 ຈາກ​ນັ້ນ ໄດ້​ມີ​ການ​ຄາດ​ຄະເນ​ພົນລະເມືອງ​ລະດັບ​ເມືອງ​ປີ 2015-2035 ການ​ວິໄຈ​ສະພາບ​ພົນລະເມືອງ​ໜຸ່ມ​ຢູ່ ​ສປປ ລາວ ແລະ ແຜນ​ພັບ​ສະແດງ​ສະພາບ​ການ​ເກີດ-ການ​ຕາຍ​ຂອງ​ພົນລະເມືອງ ເຊິ່ງ​ຈະ​ໄດ້​ນຳ​ສະເໜີ ແລະ ປະກາດ​ໃຊ້​ໃນ​ກອງ​ປະຊຸມ​ຄັ້ງ​ນີ້ ຂໍ້​ມູນ​ດັ່ງກ່າວ​ນີ້ ແມ່ນ​ມີ​ຄວາມ​ຕ້ອງການ​ສູງ​ຂອງ​ຂະແໜງການ​ສຶກ​ສາ ສາທາລະນະ​ສຸກ ແຮງ​ງານ ແລະ ສະຫວັດດີ​ການ​ສັງຄົມ ແລະ ບັນດາ​ຂະແໜງການ​ອື່ນໆ ເຂົ້າ​ໃນ​ການ​ວາງ​ນະໂຍບາຍ ແລະ ສ້າງ​ແຜນ​ພັດ​ທະ ນາ​ຕ່າງໆ.

   ການ​ຄາດ​ຄະເນ​ພົນລະເມືອງ​ແມ່ນ​ມີ​ຫຼາຍ​ວິທີ ແຕ່​ການ​ຄາດ​ຄະເນ​ພົນລະເມືອງ​ລະດັບ​ເມືອງ​ຄັ້ງ​ນີ້ ແມ່ນ​ນຳ​ໃຊ້​ວິທີ​ການ​ຕາມ​ປັດ​ໄຈ​ການ​ປ່ຽນແປງ​ຂອງ​ພົນລະເມືອງ​ຂອງ​ແຕ່​ລະ​ລຸ້ນ​ອາຍຸ ເຊິ່ງ​ເປັນ​ວິທີ​ການ​ທີ່​ນິຍົມ​ກັນ​ໃຊ້​ຫຼາຍ​ໃນ​ທົ່ວ​ໄປ ເພາະ​ເປັນ​ວິທີ​ການ​ທີ່​ໄດ້​ຮັບ​ຜົນ​ຊັດ​ເຈນ​ກວ່າ​ວິທີ​ອື່ນໆ ນອກຈາກ​ນັ້ນ ວິທີ​ການ​ຄາດ​ຄະເນ​ພົນລະເມືອງ​ດັ່ງກ່າວ ຍັງ​ສາມາດ​ຄາດ​ຄະເນ​ຕົວ​ຊີ້​ວັດ​ດ້ານ​ປະຊາກອນ​ໄດ້ ການ​ຄາດ​ຄະເນ​ພົນລະເມືອງ​ລະດັບ​ຊາດ ແລະ ລະດັບ​ແຂວງ ແມ່ນ​ໄດ້​ຄາດ​ຄະເນ​ໃນ​ໄລຍະ​ເວລາ​ແຕ່​ປີ 2015-2045  ແຕ່​ສຳລັບ​ການ​ຄາດ​ຄະເນ​ພົນລະເມືອງ​ລະດັບ​ເມືອງ ແມ່ນ​ໄດ້​ກຳນົດ​ເວລາ​ຂອງ​ການ​ຄາດ​ຄະເນ 20 ປີ ຄື​ຈາກ​ປີ 2015-2035 ເພື່ອ​ຫຼຸດຜ່ອນ​ຄວາມ​ຄາດເຄື່ອນ​ຂອງ​ຜົນ​ການ​ຄາດ​ຄະເນ​ພົນລະເມືອງ.

ຂ່າວທີ່ກ່ຽວຂ້ອງ