ອາ​ເມ​ຣິ​ກາ ມອບ​ເຄື່ອງ​ກວດ​ເລືອດ​ບົ່ງມະຕິ​ໄຂ້​ມາລາ​ເລຍ

750 09 ທ.ວ. 2019 ຂ່າວໜ້າ​ໜຶ່ງ
ອາ​ເມ​ຣິ​ກາ ມອບ​ເຄື່ອງ​ກວດ​ເລືອດ​ບົ່ງມະຕິ​ໄຂ້​ມາລາ​ເລຍ

     ລັດຖະບານ ສ ອາ​ເມ​ຣິ​ກາ ສືບຕໍ່​ມອບ​ເຄື່ອງ​ກວດ​ເລືອດ​ເພື່ອ​ບົ່ງມະຕິ​ໄຂ້​ມາລາ​ເລຍ​ແບບ​ໄວ 100.000 ຊຸດ ທີ່​ໄດ້​ຮັບ​ການ​ສະໜັບສະໜູນ​ຈາກ​ອົງການ​ພັດທະນາ​ສາກົນ ສ ອາ​ເມ​ຣິ​ກາ (USAID) ໂດຍ​ຜ່ານ​ໂຄງການ​ລິ​ເລີ່ມ​ມາລາ​ເລຍ​ຂອງ​ປະທານາທິບໍດີ ສ ອາ​ເມ​ຣິ​ກາ (USAID PMI) ໃຫ້​ສູນ​ໄຂ້ຍຸງ ແມ່​ກາ​ຝາກ ແລະ ແມງໄມ້ ກະຊວງ​ສາທາລະນະ​ສຸກ ເພື່ອ​ແຈກ​ຢາຍ​ໃຫ້​ສຸກສາລາ ແລະ ໂຮງໝໍ​ທົ່ວ​ປະເທດ ໂດຍ​ສະເພາະ ເຂດ​ທີ່​ມີ​ການ​ລະບາດ​ສູງ​ຂອງ​ໄຂ້​ມາລາ​ເລຍ.

    ພິທີ​ມອບ-ຮັບ​ເຄື່ອງ​ຊ່ວຍເຫຼືອ​ຈັດ​ຂຶ້ນ​ວັນ​ທີ 6 ທັນວາ 2019 ຢູ່​ສູນ​ໄຂ້ຍຸງ​ແມ່​ກາ​ຝາກ ແລະ ແມງໄມ້ ມອບ​ໂດຍ​ທ່ານ​ນາງ ຣີ​ນາ ບິດ​ເຕີ ເອກ​ອັກ​ຄະ​ລັດ​ຖະ​ທູດ​ອາ​ເມ​ຣິ​ກາ ປະຈຳ​ລາວ ແລະ ຮັບ​ໂດຍ​ທ່ານ ພູທອນ ເມືອງ​ປາກ ຮອງ​ລັດຖະມົນຕີ​ກະຊວງ​ສາທາລະນະ​ສຸກ ມີ​ຫົວໜ້າ​ສູນ​ໄຂ້ຍຸງ ແມ່​ກາ​ຝາກ ແລະ ແມງໄມ້ ພ້ອມ​ດ້ວຍ​ພາກສ່ວນ​ກ່ຽວຂ້ອງ ເຂົ້າ​ຮ່ວມ.

    ທ່ານ​ນາງ ຣີ​ນາ ບິດ​ເຕີ ກ່າວ​ວ່າ: ການ​ຊ່ວຍເຫຼືອ​ຄັ້ງ​ນີ້​ສະແດງ​ໃຫ້​ເຫັນ​ການ​ຮ່ວມ​ມື​ຢ່າງ​ສະໜິດ​ແໜ້ນ ລະຫວ່າງ​ລາວ-ອາ​ເມ​ຣິ​ກາ​ໃນ​ຂະແໜງ​ສາທາລະນະ​ສຸກ ເພື່ອ​ບັນລຸ​ເປົ້າ​ໝາຍ​ການ​ພັດທະນາ​ຂອງ​ລັດຖະບານ​ລາວ ເຊິ່ງ​ຕົນ​ເຊື່ອ​ໝັ້ນ​ວ່າ​ພວກ​ເຮົາ​ຈະ​ສາມາດ​ລົບ​ລ້າງ​ພະຍາດ​ມາລາ​ເລຍ​ໃຫ້​ໝົດ​ໄປ​ຈາກ​ລາວ​ໃນ​ປີ 2030 ໄລຍະ 10 ປີຜ່ານມາ ຄົນ​ເຈັບ​ພະຍາດ​ມາລາ​ເລຍ​ໃນ​ລາວ​ໄດ້​ຫຼຸດ​ລົງ​ຢ່າງ​ຕໍ່​ເນື່ອງ ແລະ ລັດຖະບານ​ລາວ​ກໍ​ໄດ້​ເຮັດ​ວຽກ​ຢ່າງ​ຕັ້ງໜ້າ​ໃນ​ການ​ລົບ​ລ້າງ​ພະຍາດ​ດັ່ງກ່າວ ເຊິ່ງ​ເຮັດ​ໃຫ້​ກໍລະນີ​ຜູ້​ຕິດເຊື້ອ​ຫຼຸດ​ລົງ 80% ຈາກ​ຈຳນວນ​ສູງ​ສຸດ 50.000 ກໍລະນີ ໃນ​ປີ 2014 ທີ່​ມີ​ການ​ລະບາດ ມາ​ເປັນ 8.920 ກໍລະນີ ໃນ​ປີ 2018 ແລະ ແຕ່​ນັ້ນ​ມາ​ຄົນ​ເຈັບ​ໄຂ້​ມາລາ​ເລຍ​ກໍ​ສືບຕໍ່​ຫຼຸດ​ລົງ ໂດຍ 9 ເດືອນ​ປີ 2019 ຈຳນວນ​ຄົນ​ເຈັບ​ເຫຼືອ 5.120 ກໍລະນີ ເຊິ່ງ​ສ່ວນ​ຫຼາຍ​ແມ່ນ​ຢູ່ 5 ແຂວງ​ພາກ​ໃຕ້.

ຂ່າວທີ່ກ່ຽວຂ້ອງ