ແລກປ່ຽນ​ບົດຮຽນ​ດ້ານ​ວຽກ​ງານ​ການເມືອງ-ແນວ​ຄິດ

599 09 ທ.ວ. 2019 ຂ່າວໜ້າ​ໜຶ່ງ
 ແລກປ່ຽນ​ບົດຮຽນ​ດ້ານ​ວຽກ​ງານ​ການເມືອງ-ແນວ​ຄິດ

    ສະຫາຍ ເຂັມ​ເພັດ ແພງ​ດວງ​ຈັນ ກຳມະການ​ພັກ ນວ ຫົວໜ້າ​ຄະນະ​ໂຄສະນາ​ອົບຮົມ ນະຄອນຫຼວງ​ວຽງ​ຈັນ ໄດ້​ນຳພາ​ຄະນະ​ຜູ້​ແທນ​ເດີນທາງ​ຢ້ຽມຢາມ ແລະ ແລກປ່ຽນ​ບົດຮຽນ​ຮ່ວມ​ກັບ​ຄະນະ​ໂຄສະນາ​ສຶກ​ສາ ນະຄອນຫຼວງ ຮ່າ​ໂນ້ຍ ​ສສ ຫວຽດນາມ ໃນ​ວັນ​ທີ 25-29 ພະຈິກ 2019.

    ການ​ຢ້ຽມຢາມ​ຄັ້ງ​ນີ້ ຄະນະ​ໄດ້​ເຂົ້າ​ຢ້ຽມ​ຄຳນັບ​ສະຫາຍ ເລ ແມ໋ງ ຮຸ່ງ ຮອງ​ຫົວໜ້າ​ຄະນະ​ໂຄສະນາ​ສຶກ​ສາ ສູນ​ກາງ​ພັກ​ກອມ​ມູ​ນິດ​ຫວຽດນາມ ເຂົ້າ​ຢ້ຽມ​ຄຳນັບ​ພົບ​ປະ​ກັບ​ສະຫາຍ​ນາງ ໂງ ທິ ແທ໋ງ ຮັ່ງ ກຳມະການ​ສູນ​ກາງ​ພັກ ຮອງ​ເລຂາ​ຄະນະ​ພັກ ຮອງ​ເຈົ້າ​ຄອງ​ນະຄອນຫຼວງ​ຮ່າ​ໂນ້ຍ ທັງ​ເປັນ​ຜູ້​ປະຈຳການ.

    ພ້ອມ​ນີ້ ຄະນະ​ຜູ້​ແທນ​ໄດ້​ພົບ​ປະ ແລະ ແລກປ່ຽນ​ບົດຮຽນ​ຮ່ວມ​ກັນ ໂດຍ​ສະຫາຍ ເຂັມ​ເພັດ ແພງ​ດວງ​ຈັນ ຫົວໜ້າ​ຄະນະ​ໂຄສະນາ​ອົບຮົມ ແລະ ສະຫາຍ ຫງວ​​ຽນ ວັນ ຟອງ ຫົວໜ້າ​ຄະນະ​ໂຄສະນາ​ສຶກ​ສາ ເຊິ່ງ​ສອງ​ຝ່າຍ​ໄດ້​ແຈ້ງ​ສະພາບ​ການ​ພັດທະນາ​ເສດຖະກິດ-ສັງຄົມ ຂອງ​ສອງ​ນະຄອນຫຼວງ​ໃຫ້​ກັນ​ຊາບ ໂດຍ​ສະເພາະ ແມ່ນ​ວຽກ​ງານ​ເປັນ​ເສນາ​ທິ​ການ ແລະ ອົງການ​ວິຊາ​ສະເພາະ​ໃຫ້​ຄະນະ​ປະຈຳ​ພັກ-ຄະນະ​ບໍລິຫານ​ງານ​ພັກ ດ້ານ​ວຽກ​ງານ​ໂຄສະນາ​ອົບຮົມ ກໍ​ຄື ວຽກ​ງານ​ການເມືອງ-ແນວ​ຄິດ ທັງ​ດຳເນີນ​ການ​ເຮັດ​ວຽກ​ງານ​ຕົວ​ຈິງ ແລະ ທັງ​ຕິດຕາມ​ຊຸກຍູ້ ກວດກາ​ຕີ​ລາຄາ ສະຫຼຸບ​ລາຍ​ງານ​ສະພາບ ແລະ ຮັບປະກັນ​ໃຫ້​ວຽກ​ງານ​ໂຄສະນາ​ອົບຮົມ ກໍ​ຄື ວຽກ​ງານ​ການເມືອງ-ແນວ​ຄິດ​ຂອງ​ຄະນະ​ພັກ​ຂັ້ນ​ຕ່າງໆ ໃຫ້​ໄປ​ຕາມ​ຫຼັກການ​ລວມ​ສູນ​ເປັນ​ເອກະ​ພາບ ສອງ​ຝ່າຍ​ຍັງ​ໄດ້​ປຶກສາ​ຫາລື ແລະ ເປັນ​ເອກະ​ພາບ​ໃນ​ບົດ​ບັນທຶກ​ການ​ຮ່ວມ​ມື ແຕ່​ນີ້​ເຖິງ​ປີ 2020 ເຊິ່ງ​ສອງ​ຝ່າຍ​ເຫັນ​ດີ​ໃນ​ການ​ແລກປ່ຽນ​ການ​ຮ່ວມ​ມື ພັດທະນາ​ກ່ຽວ​ກັບ​ວຽກ​ງານ​ການເມືອງ-ແນວ​ຄິດ ແລະ ທິດ​ສະ​ດີ ວຽກ​ງານ​ວາລະສານ ການ​ຜັນ​ຂະຫຍາຍ​ແນວທາງ​ນະໂຍບາຍ ມະຕິ​ຂອງ​ພັກ​ໄປ​ສູ່​ພະນັກງານ ສະມາຊິກ​ພັກ ແລະ ປະຊາຊົນ.

    ນອກຈາກ​ນີ້ ຄະນະ​ຜູ້​ແທນ​ກໍ​ໄດ້​ເດີນທາງ​ຢ້ຽມຢາມ​ແຂວງ ແຄ່ງ​ຮວາ ແລະ ໄດ້​ພົບ​ປະ​ແລກປ່ຽນ​ບົດຮຽນ​ກັບ​ສະຫາຍ ໂຮ່ ວັນ ມຶ່ງ ກຳມະການ​ປະຈຳ​ພັກ ຫົວໜ້າ​ຄະນະ​ໂຄສະນາ​ສຶກ​ສາ​ແຂວງ ແຄ່ງ​ຮວາ ເຊິ່ງ​ແຂວງ​ແຄ່ງ​ຮວາ ມີ​ເນື້ອທີ່​ທັງ​ໝົດ 5.217,7 ​ກມ2 ມີ​ປະຊາກອນ 1,2  ລ້ານ​ກວ່າ​ຄົນ  ມີ 9 ເມືອງ 2 ນະຄອນ 1 ເທສະ​ບານ ເສດຖະກິດ​ຕົ້ນຕໍ​ແມ່ນ​ມາ​ຈາກ​ທະເລ ແລະ ການ​ເພີ່ມ​ຂຶ້ນ​ສະເລ່ຍ 7,5%/ປີ ລາຍ​ຮັບ​ສະເລ່ຍ 2.800 ໂດ​ລາ/ຄົນ/ປີ ມີ​ສະໜາມ​ບິນ​ສາກົນ ແລະ ມີ​ເສັ້ນທາງ​ຫຼວງ​ເຊື່ອມ​ຕໍ່​ແຂວງ​ພູ​ພຽງ ແລະ ໄດ້​ມີ​ການ​ພົວພັນ​ແຮກສ່ຽວ​ກັບ​ແຂວງ​ອັດ ຕະ​ປື ແລະ ແຂວງ​ຈຳປາ​ສັກ ການ​ຢ້ຽມຢາມ​ຄັ້ງ​ນີ້ ຄະນະ​ຜູ້​ແທນ​ຍັງ​ໄດ້​ຢ້ຽມ​ຊົມ​ສະຖານທີ່​ທ່ອງ​ທ່ຽວ​ປະຫວັດສາດ ວັດທະນະທຳ​ຢູ່​ນະຄອນຫຼວງ​ຮ່າ​ໂນ້ຍ ແລະ ນະຄອນ​ຢາ​ຈາງ ອີກ​ດ້ວຍ.  

ຂ່າວທີ່ກ່ຽວຂ້ອງ