ນັກ​ປະພັນ​ລາວ ໄດ້​ຮັບ​ລາງວັນ​ຊີ​ໄຣ 3 ບົດ​ເລື່ອງ

658 09 ທ.ວ. 2019 ຂ່າວໜ້າ​ໜຶ່ງ
ນັກ​ປະພັນ​ລາວ ໄດ້​ຮັບ​ລາງວັນ​ຊີ​ໄຣ 3 ບົດ​ເລື່ອງ

    ພິທີ​ຖະແຫຼງ​ຂ່າວ​ຜົນ​ການ​ເຂົ້າ​ຮ່ວມ​ພິທີ​ມອບ-ຮັບ​ລາງວັນ​ຊີ​ໄຣ (SEA Write) ປີ 2016-2018 ແລະ ລາງວັນ​ວັນນະກຳ​ແມ່ນ້ຳ​ຂອງ​ປະຈຳ​ປີ 2019 ຈັດ​ຂຶ້ນ​ວັນ​ທີ 6 ພະຈິກ 2019 ທີ່​ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ຄຸ້ມ​ສີ​ເມືອງ ຖະແຫຼງ​ໂດຍ​ທ່ານ ທອງ​ໃບ ໂພທິ​ສານ ຫົວໜ້າ​ກົມ​ມໍລະດົກ ປະທານ​ສະມາຄົມ​ນັກ​ປະພັນ​ລາວ ມີ​ບັນດາ​ນັກ​ປະພັນ ນັກ​ກະວີ ນັກ​ຂຽນ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ລາງວັນ​ວັນນະກຳ​ແມ່ນ້ຳ​ຂອງ​ໄດ້​ຮັບ​ການ​ສ້າງຕັ້ງ​ຂຶ້ນ​ປີ 2007 ໂດຍ​ການ​ລິ​ເລີ່ມ​ຂອງ​ສະມາຄົມ​ນັກ​ປະພັນ​ຫວຽດນາມ ລາວ ແລະ ກຳປູເຈຍ ແລະ ໄດ້​ມີ​ການ​ມອບ​ລາງວັນ​ຄັ້ງ​ທຳ​ອິດ​ປີ 2008 ຈຸດປະສົງ​ເພື່ອ​ເສີມ​ສ້າງ​ສາຍ​ພົວພັນ​ມິດຕະພາບ ການ​ຮ່ວມ​ມື​ຂອງ​ນັກ​ປະພັນ ນັກ​ກະວີ​ທັງຫຼາຍ ໃນ​ບັນດາ​ປະເທດ​ທີ່​ມີ​ຊາຍ​ແດນ​ຕິດ​ແມ່ນ້ຳ​ຂອງ ດ້ວຍ​ການ​ມອບ​ລາງວັນ​ວັນນະກຳ​ສ້າງສັນ​ທີ່​ດີເດັ່ນ ແລະ ການ​ສຳ​ມະ​ນາ​ວິຊາ​ການ ເພື່ອ​ການ​ແລກປ່ຽນ​ບົດຮຽນ​ເຊິ່ງ​ກັນ ແລະ ກັນ ມາ​ຮອດ​ປັດຈຸບັນ​ມີ​ນັກ​ປະພັນ ນັກ​ກະວີ ຫຼາຍ​ສິບ​ຄົນ​ໄດ້​ຮັບ​ລາງວັນ​ດັ່ງກ່າວ ປະກອບ​ມີ​ປະເທດ​ທີ່​ມີ​ຊາຍ​ແດນ​ຕິດ​ແມ່ນ້ຳ​ຂອງ​ເຂົ້າ​ຮ່ວມ​ເປັນ​ສະມາຊິກ​ຄົບ​ທັງ 6 ປະເທດ ( ລາວ ຫວຽດນາມ ກຳປູເຈຍ ໄທ ມຽນ​ມາ ແລະ ຈີນ) ແຕ່​ປີ 2015 ເປັນຕົ້ນ​ມາ ເຊິ່ງ​ລາງວັນ​ດັ່ງກ່າວ​ເປັນ​ລາງວັນ​ໜຶ່ງ​ທີ່​ມີ​ຄວາມ​ໝາຍ​ຄວາມ​ສຳຄັນ​ໃນ​ການ​ເສີມ​ສ້າງ​ສັນຕິພາບ ມິດຕະພາບ ແລະ ການ​ຮ່ວມ​ມື​ທາງ​ດ້ານ​ການ​ປະພັນ​ວັນນະຄະດີ​ໃນ​ຂົງເຂດ ທັງ​ເປັນ​ເວທີ​ໃນ​ການ​ພົບ​ປະ​ສົນທະນາ​ເສີມ​ສ້າງ​ຄວາມ​ເຂົ້າ​ອົກ​ເຂົ້າໃຈ​ເຊິ່ງ​ກັນ ແລະ ກັນ ລະຫວ່າງ​ນັກ​ປະພັນ-ນັກ​ກະວີ​ດ້ວຍ​ກັນ​ໃຫ້​ນັບ​ມື້​ກວ້າງຂວາງ​ເລິກເຊິ່ງ​ກວ່າ​ເກົ່າ ເພື່ອ​ພ້ອມ​ກັນ​ກ້າວ​ເຂົ້າ​ໄປ​ຂ້າງ​ໜ້າ​ດ້ວຍ​ອະນາຄົດ​ສົດໃສ ແລະ ໝັ້ນຄົງ ພ້ອມ​ນັ້ນ ກໍ​ເສີມ​ສ້າງ​ອາ​ລິ​ຍະ​ທຳ​ທາງ​ດ້ານ​ຈິດໃຈ ຄວາມ​ຮັ່ງມີ​ທາງ​ດ້ານ​ສິລະ​ປະ​ວັນນະຄະດີ​ໃຫ້​ປະຊາຊົນ​ບັນດາເຜົ່າ​ຂອງ​ຕົນ​ຢູ່​ໃນ​ແຕ່​ລະ​ປະເທດ​ໃຫ້​ນັບ​ມື້​ອຸດົມ​ຮັ່ງມີ​ຢ່າງ​ບໍ່​ຢຸດ​ຢັ້ງ.

   ສະເພາະ​ປີ 2019 ປະເທດ​ມຽນ​ມາ​ເປັນ​ເຈົ້າພາບ​ໃນ​ການ​ມອບ​ລາງວັນ​ວັນນະກຳ​ແມ່ນ້ຳ​ຂອງ ເຊິ່ງ ລາວ​ເຮົາ​ໄດ້​ຮັບ​ມີ 2 ປະເພດ ຄື: ບົດ​ເລື່ອງ​ຍາວ ຈຸດ​ຈົບ​ຢູ່​ຜາ​ຖີ່ ຂອງ​ທ່ານ ແສງ​ຈັນ ສຸກ​ກະເສມ ແລະ ບົດ​ກະວີ ນັກ​ສູ້​ແຫ່ງ​ລຸ່ມ​ແມ່ນ້ຳ​ຂອງ ຂອງ​ທ່ານ ແສງ​ພູໄຊ ອິນ​ທະວີ​ຄຳ.

   ສຳລັບ​ລາງວັນ​ວັນນະກຳ​ສ້າງສັນ​ສຸດ​ຍອດ​ແຫ່ງ​ອາ​ຊຽນ ຫຼື ຊີ​ໄຣ ປີ 2016-2019 ລາວ​ເຮົາ​ໄດ້​ຮັບ​ລາງວັນ​ປະກອບ​ມີ 3 ປະເພດ ຄື: ບົດ​ກະວີ ມູນມັງ ຫຼັງ​ມ່ານ​ໝອກ ຂອງ​ທ່ານ ສຸບັນ ຫຼວງ​ລາດ ເລື່ອງສັ້ນ ແຫວນ​ຄຳ ຂອງ​ທ່ານ ສົມ​ໃຈ ຈັນທະ​ວົງ ແລະ ບົດ​ເລື່ອງ​ຍາວ ແທນ​ຄຳ​ສາລະພາບ ຂອງ​ທ່ານ ນາງ ຜິວ​ລາ​ວັນ ຫຼວງ​ວັນນາ.      

ຂ່າວທີ່ກ່ຽວຂ້ອງ