​ສສ ຫວຽດນາມ ສະແດງ​ສີ​ລະ​ປະ​ວັດທະນະທຳ​ຢູ່ ນວ

591 09 ທ.ວ. 2019 ຂ່າວໜ້າ​ໜຶ່ງ
​ສສ ຫວຽດນາມ ສະແດງ​ສີ​ລະ​ປະ​ວັດທະນະທຳ​ຢູ່ ນວ

   ງານ​ສັບປະດາ​ວັດທະນະທຳ​ຫວຽດນາມ ປະ​ຈຳ​​ສປປ ລາວ  ຈັດ​ຂຶ້ນ​ວັນ​ທີ 6 ທັນວາ 2019 ຜ່ານ​ມາ ຢູ່​ຫໍ​ວັດທະນະທຳ​ແຫ່ງ​ຊາດ ນະຄອນຫຼວງ​ວຽງ​ຈັນ ໂດຍ​ການ​ເຂົ້າ​ຮ່ວມ​ຂອງ​ທ່ານ ບົວ​ເງິນ ຊາ​ພູ​ວົງ ຮອງ​ລັດຖະມົນຕີ​ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ທ່ານ ລາດ​ຊະນີ​ວົງ ອະ​ມະ​ຣາ​ທິ​ທາດາ  ຫົວໜ້າ​ຄະນະ​ກວດກາ​ພັກ ປະທານ​ກວດກາ​ລັດ ນະຄອນຫຼວງ​ວຽງ​ຈັນ ທ່ານ​ນາງ ວິໄລ​ວອນ ຈັນທະ​ລາຕີ ຫົວໜ້າ​ພະ​ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນວ ຫົວໜ້າ​ຄະນະ​ສີ​ລະ​ປະ​​ສສ.ຫວຽດນາມ ແລະ ພ້ອມ​ດ້ວຍ​ບັນດາ​ມວນ​ຊົນ​ເຂົ້າ​ຮ່ວມ.

   ທ່ານ ລາດ​ຊະນີ​ວົງ ອະ​ມະ​ຣາ​ທິ​ທາດາ ກ່າວ​ວ່າ: ໃນ​ໄລຍະ​ທີ່​ຜ່ານ ສາຍ​ພົວພັນ​ແບບ​ພິເສດ ແລະ ການ​ຮ່ວມ​ມື​ຮອບດ້ານ​ລາວ-ຫວຽດນາມ ໄດ້​ກາຍເປັນ​ກົດເກນ ເປັນ​ເງື່ອນໄຂ​ຕັດສິນ​ຊີ້​ຂາດ​ເຖິງ​ໝາກຜົນ​ແຫ່ງ​ໄຊຊະນະ​ຂອງ​ການ​ປະຕິວັດ​ປົດ​ປ່ອຍ​ຊາດ ກໍ​ຄື​ພາລະກິດ​ປົກ​ປັກ​ຮັກສາ ແລະ ພັດທະນາ​ປະເທດ​ຊາດ​ໃນ​ແຕ່​ລະ​ໄລຍະ ມາ​ຮອດ​ປັດຈຸບັນ ໃນ​ເງື່ອນໄຂ​ໃໝ່​ຂອງ​ການ​ສ້າງສາ​ພັດທະນາ​ມູນເຊື້ອ​ດັ່ງກ່າວ ຍັງ​ໄດ້​ຮັບ​ການ​ເສີມ​ຂະຫຍາຍ​ໃຫ້​ກວ້າງຂວາງ ແລະ ເລິກເຊິ່ງ​ຂຶ້ນ​ກວ່າ​ເກົ່າ ຈົນ​ກາຍເປັນ​ສັນຍາ​ລັກ​ອັນ​ງົດ​ງາມ​ໃຫ້​ສັງຄົມ​ໄດ້​ຮັບ​ຮູ້​ຢ່າງ​ກວ້າງຂວາງ​ຄື​ດັ່ງ​ພາລະກິດ​ການເຄື່ອນໄຫວ​ຈັດ​ງານ​ສັບປະດາ​ວັດທະນະທຳ​ຫວຽດນາມ ຢູ່​​ສປປ ລາວ ປະຈຳ​ປີ 2019 ເວົ້າ​ລວມ ເວົ້າ​ສະເພາະ ກໍ​ແມ່ນ​ຄຳ​ຄືນ​ຂອງ​ການສະແດງ​ສີ​ລະ​ປະ​ວັດທະນະທຳ​ຂອງ​ຄະນະ​ສີ​ລະ​ປະ​ແຫ່ງ​ຊາດ ​ສສ ຫວຽດນາມ ທີ່​ໄດ້​ຮັບ​ໃຊ້​ປວງ​ຊົນ​ຊາວ​ນະຄອນຫຼວງ​ວຽງ​ຈັນ ຄັ້ງ​ນີ້ ຖື​ວ່າ​ເປັນ​ການ​ຜັນ​ຂະຫຍາຍ​ແນວທາງ​ການ​ພົວພັນ​ການ​ຮ່ວມ​ມື​ໃນ​ຂົງເຂດ​ວັດ​ທະ ນະ​ທຳ ເປັນ​ການ​ແລກປ່ຽນ​ມໍລະດົກ​ວັດທະນະທຳ ສ້າງ​ຄວາມ​ເຂົ້າ​ອົກ​ເຂົ້າໃຈ ເພື່ອ​ເຮັດ​ໃຫ້​ປະຊາ ຊົນ​ສອງ​ຊາດ​ສະໜິດສະໜົມ​ຮັກແພງ​ກັນ​ຫຼາຍ​ຂຶ້ນ.

     ພ້ອມ​ດຽວ​ກັນ​ນີ້ ກໍ​ເປັນ​ວາລະ​ໂອກາດ​ທີ່​ຊາວ​ນະຄອນຫຼວງ​ວຽງ​ຈັນ ພວມ​ສະເຫຼີມສະຫຼອງ​ວັນຊາດ​ທີ 2 ທັນວາ ຄົບຮອບ 44 ປີ ສະເຫຼີມສະຫຼອງ​ຄ້າຍ​ວັນ​ເກີດ​ຂອງ​ປະທານ ໄກສອນ ພົມວິຫານ ຄົບຮອບ 99 ປີ ແລະ ການ​ກະກຽມ​ສ້າງ​ຂະ​ບວນ​ການ​ເພື່ອ​ຄຳນັບ​ຮັບ​ຕ້ອນ​ກອງ​ປະຊຸມ​ໃຫຍ່ ຄັ້ງ​ທີ VII ຂອງ​ອົງຄະ​ນະ​ພັກ​ນະຄອນຫຼວງ​ວຽງ​ຈັນ ຢ່າງ​ເປັນ​ຂະ​ບວນ​ຟົດຟື້ນ ສະນັ້ນ ການ​ມາ​ເຄື່ອນ​ໄຫວ​ຂອງ​ຄະນະ​ສີ​ລະ​ປະ​ແຫ່ງ​ຊາດ​​ສສ ຫວຽດນາມ​ຄັ້ງ​ນີ້ ຖື​ວ່າ​ເປັນ​ການ​ປະກອບສ່ວນ​ອັນ​ສຳຄັນ ແລະ ໃຫຍ່​ຫຼວງ​ຕໍ່​ການເຄື່ອນໄຫວ​ວຽກ​ງານ​ຂອງ​ພວກ​ເຮົາ.

ຂ່າວທີ່ກ່ຽວຂ້ອງ