ແກຣນ​ດີ​​ສ ທາງ​ເລືອກ​ຂອງ​ການ​ພັກ​ແຮມໃນ ໂກ​ຕາ ກີ​ນາ​ບາ​ລູ

1.801 09 ທ.ວ. 2019 ຫົວຂໍ້ຂ່າວອື່ນໆ
ແກຣນ​ດີ​​ສ ທາງ​ເລືອກ​ຂອງ​ການ​ພັກ​ແຮມໃນ ໂກ​ຕາ ກີ​ນາ​ບາ​ລູ

    ຖ້າ​ເວົ້າ​ເຖິງ​ການ​ຂະຫຍາຍຕົວ​ດ້ານ​ອຸດສາຫະກຳ​ການທ່ອງທ່ຽວ ແນ່ນອນ​ໃນ​ນັ້ນ​ກໍ​ຕ້ອງ​ມີ​ອົງ​ປະ ກອບ​ຕ່າງໆ​ເພື່ອ​ເປັນ​ສິ່ງ​ອຳນວຍ​ຄວາມ​ສະດວກ​ດ້ານ​ຕ່າງໆ ເຊັ່ນ: ເສັ້ນທາງ​ຄົມມະນາຄົມ​ທາງບົກ ທາງອາກາດ ທາງນ້ຳ ຕາມ​ຄວາມ​ເໝາະ​ສົມ ແລະ ພື້ນ​ການ​ໂຄງ​ລ່າງ​ດ້ານ​ຕ່າງໆ ລວມ​ໄປ​ເຖິງ​ທີ່​ພັກ​ພາ​ອາ​ໃສ.

    ໂກ​ຕາ ກີ​ນາ​ບາ​ລູ ອີກ​ເມືອງ​ໜຶ່ງ​ຂອງ​ລັດ​ຊາ​ບະ ປະເທດ​ມາ​ເລ​ເຊຍ ຕັ້ງ​ຢູ່​ທາງ​ທິດເໜືອ​ຂອງ​ເກາະ​ບໍ​ແນວ ເປັນ​ເມືອງ​ທີ່​ຕິດ​ກັບ​ຝັ່ງ​ທະເລ ດັ່ງນັ້ນ​ເມືອງ​ດັ່ງກ່າວ​ກໍ​ເປັນ​ອີກ​ປາຍທາງ​ໜຶ່ງ​ຂອງ​ນັກ​ທ່ອງ​ທ່ຽວ​ທີ່​ເຂົ້າ​ມາ​ທ່ຽວ​ຊົມ ເຮັດ​ໃຫ້​ພາຍ​ໃນ​ເມືອງ​ແຫ່ງ​ນີ້​ມີ​ໂຮງແຮມ​ລະດັບ​ຕ່າງໆ​ເກີດ​ຂຶ້ນ​ຢ່າງ​ຕໍ່​ເນື່ອງ ເພື່ອ​ສາມາດ​ຮອງ​ຮັບ​ຈຳນວນ​ນັກ​ທ່ອງ​ທ່ຽວ​ທີ່​ເຂົ້າ​ມາ.

    ແກຣນ​ດີ​​ສ (Grandis) ເປັນ​ໂຮງແຮມ​ໃນ​ລະດັບ​ຕົ້ນໆ​ທີ່​ໄດ້​ຮັບ​ຄວາມ​ນິຍົມ​ຈາກ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ ຖື​ໄດ້​ວ່າ​ຈັດ​ຢູ່​ໃນ​ອັນ​ດັບ 10 ຂອງ​ການ​ຈັດ​ອັນ​ດັບ​ໃນ​ເວັບ​ໄຊ www.luxuryhotelsguides.com ແກຣນ​ດີ​​ສ ຕັ້ງ​ບໍ່​ໃກ​ກັບ​ເດີນ​ບິນ​ໃຊ້​ເວລາ​ເດີນທາງ​ໄປ​ພຽງ 10 ກວ່າ​ນາທີ​ເທົ່າ​ນັ້ນ ສ່ວນ​ຕົວ​ເມືອງ​ແມ່ນ​ຫ່າງ​ຈາກ​ໃຈກາງ​ເມືອງ​ປະມານ 2 ກີ​ໂລ​ແມັດ ທີ່​ສາມາດ​ຍ່າງເລາະ​ສຳ​ຫຼວດ​ຕົວ​ເມືອງ​ໄດ້.

    ແກຣນ​ດີ​​ສ ເອົາໃຈໃສ່​ທຸກ​ຂັ້ນ​ຂອດ​ການ​ບໍລິການ ສາມາດ​ເຂົ້າ​ພັກ​ແຮມ​ໄດ້​ຕະຫຼອດ 24 ຊົ່ວໂມງ ແລະ ມີ​ສິ່ງ​ອຳນວຍ​ຄວາມ​ສະດວກ​ຕ່າງໆ​ໃຫ້​ກັບ​ລູກ​ຄ້າ ເລີ່ມ​ຈາກ​ຫ້ອງ​ພັກ​ທີ່​ມີ​ຫຼາຍ​ລະດັບ​ຫຼາຍ​ຂະໜາດ​ມີ​ທັງ​ໝົດ 188 ຫ້ອງ ດ້ວຍ​ການ​ອອກ​ແບບ​ທີ່​ສວາຍ​ງາມ ເຮັດ​ໃຫ້​ລາຄາ​ເລີ່ມ​ຈາກ 700 ຣິງ​ກິດ (ເງິນ​ມາ​ເລ​ເຊຍ) ປະມານ 1,48 ລ້ານ​ກີບ ຕົນ​ເຖິງ 2.800 ຣິງ​ກິດ ຫຼື ປະມານ 5,93 ລ້ານ​ກີບ​ຕໍ່​ຄືນ ພ້ອມ​ນັ້ນ​ຍັງ​ມີ​ຫ້ອງ​ກາ​ການ​ເຊົ້າ ອາການ​ຄ່ຳ ຫ້ອງ​ອອກກຳລັງ​ກາຍ ສະ​ລອຍນ້ຳ​ທັງ​ເດັກນ້ອຍ-ຜູ້​ໃຫຍ່ ທີ່​ທ່ານ​ສາມາດ​ລົງ​ຫຼິ້ນ​ນ້ຳ ແລະ ສຳ​ພັດ​ກັບ​ບັນຍາກາດ​ຕາເວັນຕົກ​ໄດ້ ແລະ ສາມາດ​ຮອງ​ຮັບ​ການ​ຈັດ​ລ້ຽງ​ງານ​ດອງ ສຳ​ມະ​ນາ ແລະ ອື່ນໆ.

    ນອກຈາກ​ສິ່ງ​ອຳນວຍ​ຄວາມ​ສະດວກ​ທີ່​ກ່າວ​ມາ​ຂ້າ​ເທິງ​ນັ້ນ ໂຮງແຮມ​ຍັງ​ຕິດ​ກັບ​ຮ້ານ​ຊັບ​ພະ​ສິນ ຄ້າ Suria Shaba ເພື່ອ​ສ້າງ​ຄວາມ​ສະດວກ​ສະບາຍ​ໃຫ້​ກັບ​ນັກ​ທ່ອງ​ທ່ຽວ​ໃນ​ການ​ຈັບ​ຈ່າຍ​ສິ່ງ​ຂອງ​ຕ່າງໆ. 

    ຈາກ​ທີ່​ຕັ້ງ ຄວາມ​ເອົາໃຈໃສ່​ດ້ານ​ການ​ບໍລິການ ເຮັດ​ໃຫ້​ຜູ້​ທີ່​ເຂົ້າ​ໄປ​ພັກ​ເຊົາ​ໄດ້​ໃຫ້​ຄະແນນ​ດ້ານ​ຄວາມ​ສະດວກ​ສະບາຍ​ຂອງ​ຫ້ອງ​ພັກ ທີ່​ຕັ້ງ ຄວາມ​ສະອາດ ຂະໜາດ​ຫ້ອງ ການ​ບໍລິການ ຫຼາຍ​ກວ່າ ເລີ່ມ​ຈາກ 92-99 ຄະແນນ ເຊິ່ງ​ສະແດງ​ໄດ້​ວ່າ​ເປັນ​ໂຮງແຮມ​ທີ່​ໄດ້​ຮັບ​ການ​ຕອບ​ຮັບ​ເປັນ​ຢ່າງ​ດີ​ຈາກ​ລູກ​ຄ້າ ກໍ​ຄື ນັກ​ທ່ອງ​ທ່ຽວ​ທີ່​ເຂົ້າ​ມາ​ພັກ​ເຊົາ.

    ຜ່ານ​ການ​ສຳ​ພັດ​ກັບ​ບັນຍາກາດ​ຕົວ​ຈິງ ໃນ​ໂອກາດ​ເຂົ້າ​ຮ່ວມ​ງານ​ອາ​ຊຽນ​ມິດ 2019 ທີ່​ທາງ​ອົງ​ການທ່ອງທ່ຽວ​ມາ​ເລ​ເຊຍ ຈັດ​ຂຶ້ນ​ໃນ​ເດືອນ​ພະຈິກ​ຜ່ານ​ມາ ຜູ້​ຂຽນ​ເຫັນ​ໄດ້​ວ່າ ຕະຫຼອດ​ສອງ​ຄືນ ການ​ບໍລິການ​ແມ່ນ​ໄດ້​ຮັບ​ຄວາມ​ເອົາໃຈໃສ່​ເປັນ​ຢ່າງ​ດີ ແລະ ພໍ​ສັງເກດ​ໄດ້​ວ່າ​ມີ​ນັກ​ທ່ອງ​ທ່ຽວ​ທັງ​ເປັນ​ກຸ່ມ​ທົວ ຫຼື ນັກ​ທ່ອງ​ທ່ຽວ​ທີ່​ໄປ​ດ້ວຍ​ຕົນ​ເອງ​ຫຼັ່ງໄຫຼ​ເຂົ້າ​ມາ​ພັກ​ບໍ່​ຂາດ​ສາຍ.

    ນັ້ນ​ຖື​ວ່າ​ເປັນ​ການ​ບໍລິການ​ຂອງ​ໂຮງແຮມ​ໃນ​ຕົວ​ເມືອງ​ທີ່​ອຸດສາຫະກຳ​ທ່ອງ​ທ່ຽວ​ມີ​ການ​ຂະ ຫຍາຍ​ຕົວ ຖ້າ​ຈະ​ທຽບໃສ່​ປະເທດ​ເຮົາ​ກໍ​ຄົງ​ຈະ​ຢູ່​ຄົນ​ລະ​ຂັ້ນ ເພາະ​ຂຶ້ນ​ກັບ​ຄວາມ​ເຕີບ​ໃຫຍ່​ດ້ານ​ການ​ທ່ອງ ທ່ຽວ ອີກ​ຢ່າງ​ໜຶ່ງ​ການ​ໂຄສະນາ​ປະຊາສຳພັນ​ເຫັນ​ໄດ້​ວ່າ​ເຂົາເຈົ້າ​ເອົາໃຈໃສ່​ເປັນ​ຢ່າງ​ດີ ເພື່ອ​ເຮັດ​ໃຫ້​ສັງຄົມ​ສາມາດ​ເຂົ້າ​ເຖິງ​ຂໍ້​ມູນ​ຂ່າວສານ​ກ່ຽວ​ກັບ​ການ​ບໍລິການ​ຂອງ​ໂຮງແຮມ ນອກຈາກ​ຜ່ານ​ສື່​ສິ່ງ​ພິມ ໂທ ລະ​ພາບ ວິທະຍຸ​ແລ້ວ ເຂົາເຈົ້າ​ຍັງ​ອາ​ໃສ​ສື່​ສັງຄົມ​ອອນ​ລາຍ​ຊ່ວຍ​ໃນ​ການ​ໂຄສະນາ ເລີ່ມ​ຈາກ Face book Twitter Google ທີ່​ສາມາດ​ເຊື່ອມ​ເຂົ້າ​ໃນ​ເວັບ​ໄຊ​ຂອງ​ໂຮມ​ແຮມ ເພື່ອ​ສາມາດ​ຈອງ​ຫ້ອງ​ພັກ​ໂຮງແຮມ​ໄດ້​ງ່າຍ​ຂຶ້ນ. 

ໂດຍ: ສ.ຣາ​ຊະ​ສີ ບົດວຽງຈັນ (ທຸລະກິດ-ສັງຄົມ)

    

  

 

ຂ່າວທີ່ກ່ຽວຂ້ອງ