ຮັບຮອງ​ການ​ປະ​ເມີນ​ຜົນ​ການ​ປະຕິບັດ​ໜ້າທີ່​ຂອງ​ບຸ​ຄະລາ​ກອນ

1.028 09 ທ.ວ. 2019 ຂ່າວໜ້າ​ໜຶ່ງ

    ກອງ​ປະຊຸມ​ສະໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 6 ທັນວາ 2019 ໂດຍ​ເປັນ​ປະທານ​ຂອງ​ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ  ເຊິ່ງ​ກອງ​ປະຊຸມ​ໄດ້​ພິຈາລະນາ ແລະ ຮັບຮອງ​ເອົາ​ມະຕິ​ວ່າ​ດ້ວຍ​ການ​ຮັບຮອງ​ເອົາ​ການ​ປະ​ເມີນ​ຜົນ​ການ​ປະຕິບັດ​ໜ້າທີ່​ຂອງ​ບຸ​ຄະລາ​ກອນ​ດຳລົງ​ຕຳແໜ່ງ​ທີ່​ສະພາ​ແຫ່ງ​ຊາດ​ເລືອກ​ຕັ້ງ ແລະ ຮັບຮອງ​ເອົາ​ການ​ແຕ່ງຕັ້ງ​ມະຕິ​ວ່າ​ດ້ວຍ​ການ​ຮັບຮອງ​ເອົາ​ບົດ​ລາຍ​ງານ​ການຈັດຕັ້ງ​ປະຕິບັດ​ແຜນການ ການເຄື່ອນໄຫວ​ວຽກ​ງານ ປະຈຳ​ປີ 2019 ແລະ ແຜນການເຄື່ອນໄຫວ​ວຽກ​ງານ​ປະຈຳ​ປີ 2020 ຂອງ​ສະພາ​ແຫ່ງ​ຊາດ.

    ທ່ານ​ນາງ ສວນ​ສະຫວັນ ວິ​ຍະ​ເກດ ເລຂາທິການ​ສະພາ​ແຫ່ງ​ຊາດ ໄດ້​ຂຶ້ນ​ຜ່ານ​ຮ່າງ​ມະຕິ​ດັ່ງກ່າວ​ວ່າ: ກອງ​ປະຊຸມ​ຕົກລົງ​ຮັບຮອງ​ເອົາ​ບົດ​ລາຍ​ງານ​ການຈັດຕັ້ງ​ປະຕິບັດ​ແຜນການ​ການເຄື່ອນໄຫວ​ວຽກ​ງານ​ປະຈຳ​ປີ 2019 ເຊິ່ງ​ສະພາ​ແຫ່​​່ງ​ຊາດ​ສາມາດ​ຈັດ​ຕັ້ງ​ປະຕິບັດ​ຕາມ​ສິດ ແລະ ໜ້າທີ່​ມີ​ຜົນສຳເລັດ​ໃນ​ຫຼາຍ​ດ້ານ ເປັນຕົ້ນ ສ້າງ​ກົດໝາຍ ແລະ ປັບປຸງ​ກົດ ໝາຍ 18 ສະບັບ ໃນ​ນັ້ນ ກົດໝາຍ​ສ້າງ​ໃໝ່ 6 ສະບັບ ກົດໝາຍ​ປັບປຸງ 12 ສະບັບ ແລະ ຮັບຮອງ​ເອົາ​ແຜນການເຄື່ອນໄຫວ​ວຽກ​ງານ​ປະຈຳ​ປີ 2020 ຂອງ​ສະພາ​ແຫ່ງ​ຊາດ ສ້າງ ແລະ ປັບປຸງ​ກົດໝາຍ​ໃຫ້​ໄດ້ 22 ສະບັບ ໃນ​ນີ້ ກົດໝາຍ​ສ້າງ​ໃໝ່ 9 ສະບັບ ກົດໝາຍ​ປັບປຸງ 13 ສະບັບ ເພີ່ມ​ທະວີ​ການ​ພິຈາລະນາ​ບັນຫາ​ສຳຄັນ​ພື້ນຖານ​ຂອງ​ຊາດ ຜ່ານ​ກອງ​ປະຊຸມ​ສະໄໝ​ສາມັນ​ເທື່ອ​ທີ 9 ເທື່ອ​ທີ 10 ແລະ ພິຈາລະນາ​ຜ່ານ​ກອງ​ປະຊຸມ​ຄະນະ​ປະຈຳ​ສະພາ​ແຫ່ງ​ຊາດ ສຸມ​ໃສ່​ຕິດຕາມ​ກວດກາ​ບັນຫາ​ສຳຄັນ​ຕ່າງໆ ເຊັ່ນ: ການຈັດຕັ້ງ​ປະຕິບັດ​ກົດໝາຍ​ທີ່​ຕິດ​ພັນ​ກັບ​ການ​ແກ້​ໄຂ​ຜົນ​ການ​ກວດ​ສອບ-ກວດກາ​ໃນ​ຂົງເຂດ​ກໍ່ສ້າງ​ພື້ນຖານ​ໂຄງ​ລ່າງ​ໃນ​ຂົງເຂດ​ການ​ຈັດ​ເກັບ​ລາຍ​ຮັບ ການຈັດຕັ້ງ​ປະຕິບັດ​ກົດໝາຍ​ທີ່​ຕິດ​ພັນ​ກັບ​ການ​ສົ່ງເສີມ​ການ​ຜະລິດ-ນຳ​ເຂົ້າ​ສິນຄ້າ ແລະ ຕິດຕາມ​ກວດກາ​ການ​ຄຸ້ມ​ຄອງ ແລະ ຊັບພະຍາກອນ​ທຳ​ມະ​ຊາດ ພ້ອມ​ທັງ​ຍົກ​ສູງ​ຄວາມ​ຮັບຜິດຊອບ​ໃນ​ການ​ແກ້​ໄຂ​ຄຳ​ຮ້ອງ​ຂໍ​ຄວາມ​ເປັນ​ທຳ​ຂອງ​ປະຊາຊົນ​ທີ່​ສົ່ງ​ມາ​ໃຫ້​ສະພາ​ແຫ່ງ​ຊາດ​ໃຫ້​ໄດ້​ຢ່າງ​ໜ້ອຍ 60% ຂອງ​ຈຳນວນ​ທັງ​ໝົດ ສຸມ​ໃສ່​ກະກຽມ​ບັນດາ​ວຽກ​ງານ​ຕົ້ນຕໍ​ໃຫ້​ແກ່​ການ​ເລືອກ​ຕັ້ງ​ສະມາຊິກ​ສະພາ​ແຫ່ງ​ຊາດ ຊຸດ​ທີ IX ແລະ ສະມາຊິກ​ສະພາ​ປະຊາຊົນ​ຂັ້ນ​ແຂວງ​ຊຸດ​ທີ II ເພື່ອ​ຮັບປະກັນ​ໃຫ້​ວຽກ​ງານ​ດັ່ງກ່າວ​ທັນ​ຕາມ​ກຳນົດ​ເວລາ​ທີ່​ກົດໝາຍ​ກຳນົດ ແລະ ຮັບປະກັນ​ຄຸນ​ນະ​ພາບ.

    ສ່ວນ​ຮ່າງ​ມະຕິ​ວ່າ​ດ້ວຍ​ການຈັດຕັ້ງ​ປະ​ເມີນ​ຜົນ​ການ​ປະຕິບັດ​ໜ້າທີ່​ຂອງ​ບຸ​ຄະລາ​ກອນ​ດຳລົງ​ຕຳແໜ່ງ​ທີ່​ສະພາ​ແຫ່ງ​ຊາດ​ເລືອກ​ຕັ້ງ ແລະ ຮັບຮອງ​ເອົາ​ການ​ແຕ່ງຕັ້ງ ເຊິ່ງ​ເປັນ​ການ​ປະ​ເມີນ​ຄັ້ງ​ທຳ​ອິດ 69 ທ່ານ ສະເພາະ​ຂົງເຂດ​ສະພາ​ແຫ່ງ​ຊາດ 30 ທ່ານ ໄດ້​ຮັບ​ການ​ລົງ​ຄະແນນ​ສຽງ​ປະ​ເມີນ​ປະເພດ​ດີເລີດ 3 ທ່ານ ປະເພດ​ດີ 27 ທ່ານ ຂົງເຂດ​ສຳນັກງານ​ປະທານ​ປະເທດ ແລະ ຄະນະ​ລັດຖະບານ 28 ທ່ານ ໄດ້​ປະເພດ​ດີເລີດ 3 ທ່ານ ປະເພດ​ດີ 25 ທ່ານ ຂົງເຂດ​ອົງການ​ກວດ​ສອບ​ແຫ່ງ​ລັດ ອົງການ​ໄອ​ຍະ​ການ ແລະ ສານ​ປະຊາຊົນ​ສູງ​ສຸດ 11 ທ່ານ ປະເພດ​ດີ 11 ທ່ານ.

   ພາຍຫຼັງ​ຮັບ​ຟັງ​ລາຍ​ງານ ບັນດາ ​ສສຊ ໄດ້​ພ້ອມ​ກັນ​ປະກອບ​ຄຳ​ຄິດ​ຄຳ​ເຫັນ​ໃສ່​ຮ່າງ​ມະຕິ​ດັ່ງກ່າວ​ຢ່າງ​ກົງ​ໄປ​ກົງ​ມາ​ຈາກ​ນັ້ນ ໄດ້​ພ້ອມ​ກັນ​ພິຈາລະນາ ແລະ ລົງ​ຄະແນນ​ສຽງ​ຮັບຮອງ​ເອົາ​ມະຕິ 2 ສະບັບ​ດັ່ງກ່າວ​ນັ້ນ ດ້ວຍ​ຄະແນນ​ສຽງ​ສ່ວນ​ຫຼາຍ.   

ຂ່າວທີ່ກ່ຽວຂ້ອງ