ວູຊູລາວ ຍາດໄດ້ພຽງ 3 ຫຼຽນທອງໃນກີລາຊີເກມ

1.642 06 ທ.ວ. 2019 ວົງຈອນກີລາ
ວູຊູລາວ ຍາດໄດ້ພຽງ 3 ຫຼຽນທອງໃນກີລາຊີເກມ

   ທີມ​ນັກ­ກີ­ລາ​ວູ​ຊູ​ທີມ​ຊາດ​ລາວ ໄດ້​ເດີນ­ທາງ​ກັບ​ມາ​ເຖິງ ບ້ານ​ເກີດ​ເມືອງ​ນອນ​ເປັນ​ທີ່​ຮຽບ​ຮ້ອຍ ພ້ອມ​ທັງ​ຖືກ​ຕ້ອນ­ຮັບ​ຢ່າງ​ອົບ​ອຸ່ນ ແລະ ສົມ​ກຽດ​ຈາກ​ກອງ​ເຊຍ​ກີ­ລາ​ລາວ ໃນ​ວັນ​ທີ 4 ທັນ­ວາ 2019 ທີ່​ສະ­ໜາມ​ບິນ​ສາ­ກົນ​ວັດ​ໄຕ ນະ­ຄອນ­ຫຼວງ​ວຽງ​ຈັນ ຫຼັງ​ສ້າງ​ຜົນ­ງານ​ຍາດ​ໄດ້ 3 ຫຼຽນ​ທອງ ໃຫ້​ທັບ​ນັກ­ກີ­ລາ​ລາວ ໃນ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ XXX ທີ່​ປະ­ເທດ​ຟີ​ລິບ​ປິນ ຮັບ​ກຽດ​ເປັນ​ເຈົ້າ­ພາບ ວັນ​ທີ 30 ພະ­ຈິກ ຫາ 12 ທັນ­ວາ 2019.

   ໂອ­ກາດ​ນີ້​ທ່ານ ອຸ­ດົມ​ສັກ ອຸ­ດົມ​ທອງ​ກະ­ເສມ ປະ­ທານ​ສະ­ຫະ­ພັນ​ວູ​ຊູ​ແຫ່ງ​ຊາດ​ລາວ ໃຫ້​ສຳ­ພາດ​ວ່າ: ສຳ­ລັບ 3 ຫຼຽນ​ທອງ ທີ່​ໄດ້​ມາ​ຄັ້ງ​ນີ້ ເປັນ​ຜົນ­ງານ​ທີ່​ຍັງ​ບໍ່​ດີ​ປານ­ໃດ ເພາະ​ເປົ້າ​ໝາຍ​ຫຼັກ ຢາກ​ໄດ້​ຫຼຽນ​ຄຳ ມາ​ໃຫ້​ນັກ­ກີ­ລາ​ລາວ ແຕ່​ຕ້ອງ​ເຂົ້າ­ໃຈ​ວ່າ​ນັກ­ກີ­ລາ​ແຕ່​ລະ​ຊາດ​ມີ​ການ​ພັດ­ທະ­ນາ​ສີ­ມື​ໄປ​ໄກ ແຕ່​ເຖິງ​ຢ່າງ­ໃດ​ກໍ​ດີ ກໍ​ບໍ່​ໝາຍ​ຄວາມ​ວ່າ​ພວກ​ເຮົາ​ຈະ​ສິ້ນ​ຫວັງ​ໄປ ຍັງ​ຈະ​ພະ­ຍາ­ຍາມ​ສ້າງ​ນັກ­ກີ­ລາ​ໃຫ້​ເກ່ງ​ຂຶ້ນ​ກວ່າ​ເກົ່າ ແນ­ໃສ່​ງານ​ກີ­ລາ​ຊີ­ເກມ​ຄັ້ງ​ຕໍ່​ໄປ ເຮັດ​ໃຫ້​ໄດ້ ແລະ ຍິ່ງ​ໃຫຍ່​ກວ່າ​ເກົ່າ ແຕ່​ກໍ​ຂໍ​ເປັນ​ກຳ­ລັງ​ໃຈ​ຊ່ວຍ​ໃຫ້​ທັບ​ນັກ­ກີ­ລາ​ລາວ​ທີ່​ກຳ­ລັງ​ແຂ່ງ­ຂັນ​ຢູ່​ໃນ​ປັດ­ຈຸ­ບັນ ຂໍ​ໃຫ້​ທຸກ​ຄົນ​ຈົ່ງ​ປະ­ສົບ​ຜົນ­ສຳ­ເລັດ ຍາດ​ໃຫ້​ໄດ້​ຫຼຽນ​ຄຳ​ສົມ​ດັ່ງ​ຫວັງ​ທີ່​ທາງ​ລັດ­ຖະ­ບານ​ຕັ້ງ​ເປົ້າ​ໝາຍ​ໄວ້.

   ທ່ານ ລັງ​ສັນ ມາ​ໂຊ​ພາ ຫົວ­ໜ້າ​ຄູ​ເຝິກ​ກີ­ລາ​ມວຍ​ວູ​ຊູ​ທີມ​ຊາດ​ລາວ ກ່າວ​ວ່າ: ໜ້າ​ເສຍ­ດາຍ​ທີ່​ສຸດ ທີ່​ນັກ­ກີ­ລາ​ວູ​ຊູ​ທີມ​ຊາດ​ລາວ​ບໍ່​ສາ­ມາດ​ເຮັດ​ໄດ້​ຕາມ​ເປົ້າ​ໝາຍ​ທີ່​ວາງ​ໄວ້ ແລະ ສາ­ເຫດ​ທີ່​ນາງ ມີ່​ມີ່ ຍອຍ​ສາຍ​ຄຳ ຮຸ່ນ​ນ້ຳ­ໜັກ 52 ກິ​ໂລ ບໍ່​ໄດ້​ລົງ​ແຂ່ງ­ຂັນ ຍ້ອນ​ວ່າ​ຝ່າຍ​ຈັດ­ການ​ແຂ່ງ­ຂັນ​ມີ​ການ​ປັບ​ປ່ຽນ​ຫຍັບ​ຮຸ່ນ​ຂຶ້ນ​ສູງ​ເກີນ​ໄປ ກໍ​ຄື ຮຸ່ນ​ນ້ຳ­ໜັກ 57 ກິ​ໂລ ເຊິ່ງ​ແຕກ​ໂຕນ​ກັບ​ນ້ຳ­ໜັກ​ຂອງ​ນາງ ມີ່​ມີ່ ຫຼາຍ ເຈົ້າ­ພາບ​ຈຶ່ງ​ບໍ່​ອະ­ນຸ­ຍາດ​ໃຫ້​ເຂົ້າ​ຮ່ວມ​ແຂ່ງ­ຂັນ ຢ້ານ​ເປັນ​ອັນ­ຕະ­ລາຍ​ຕໍ່​ນັກ­ກີ­ລາ ເຖິງ​ຢ່າງ­ໃດ​ກໍ​ຕາມ ພວກ​ເຮົາ​ຈະ​ບໍ່​ຍອມ​ຢ່າງ​ເດັດ­ຂາດ ຫຼັງ​ກັບ​ມາ​ເຖິງ​ບ້ານ​ເກີດ​ຈະ​ຕ້ອງ​ມາ​ເລີ່ມ​ຕົ້ນ​ກັນ​ໃໝ່ ໂດຍ​ເປົ້າ​ໝາຍ​ຫຼັກ​ຈະ​ສືບ­ຕໍ່​ເຝິກ­ຝົນ​ຫຼໍ່​ຫຼອມ​ນັກ­ກີ­ລາ​ໃນ​ຊຸດ​ນີ້ ໂດຍ​ສະ­ເພາະ​ທີ່​ເປັນ​ນ້ອງ​ໃໝ່ ເຝິກ­ແອບ​ໃຫ້​ເຂົາ­ເຈົ້າ​ແຂງ​ແກ່ນ ແລະ ມີ​ປະ­ສົບ​ການ​ທີ່​ສູງ​ທີ່​ສຸດ ເພື່ອ​ກຽມ​ເຂົ້າ​ຮ່ວມ​ຊີ­ເກມ​ຄັ້ງ​ຕໍ່​ໄປ.

   ສຳ­ລັບ​ວູ​ຊູ​ລາວ​ສົ່ງ​ນັກ­ກີ­ລາ ເຂົ້າ​ຮ່ວມ 7 ຄົນ ຈາກ 7 ຮຸ່ນ ກໍ​ຄື ຊາຍ 5 ຮຸ່ນ ແລະ ຍິງ 2 ຮຸ່ນ ຕົວ​ຈິງ​ໄດ້​ລົງ​ແຂ່ງ­ຂັນ​ພຽງ 6 ຮຸ່ນ ສາ­ມາດ​ຍາດ​ໄດ້ 3 ຫຼຽນ​ທອງ ຈາກ​ທ້າວ ຄາ­ວີ ພົມ​ມະ​ຂັນ​ທອງ ຮຸ່ນ 52 ກິ​ໂລ ທ້າວ ໜູ​ຄິດ ລາດ​ຊະ​ເພົາ ຮຸ່ນ 60 ກິ​ໂລ ແລະ ນາງ ລາ­ຕີ ແກ້ວ​ບຸນ​ທັນ ຮຸ່ນ 48 ກິ​ໂລ.

ຂ່າວທີ່ກ່ຽວຂ້ອງ