ຂ່າວຫຼ້າສຸດ

ເປີດຂະບວນການໄຖກົບຕໍເຟືອງ ເພື່ອປັບປຸງບຳລຸງດິນ

767 04 ທ.ວ. 2019 ຂ່າວໜ້າ​ໜຶ່ງ
ເປີດຂະບວນການໄຖກົບຕໍເຟືອງ ເພື່ອປັບປຸງບຳລຸງດິນ

   ຂະ­ແໜງ​ຄຸ້ມ​ຄອງ ແລະ ພັດ­ທະ­ນາ​ທີ່​ດິນ​ກະ­ສິ­ກຳ ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ (ນວ) ໄດ້​ຈັດ​ພິ­ທີ​ເປີດ​ຂະ​ບວນ​ການ​ໄຖ​ກົບ​ຕໍ​ເຟືອງ​ເພື່ອ​ປັບ­ປຸງ​ບຳ­ລຸງ​ດິນ​ຂຶ້ນ​ທີ່​ບ້ານ​ໜອງ​ພົງ ເມືອງ​ຫາດ​ຊາຍ​ຟອງ ໃນ​ວັນ​ທີ 29 ພະ­ຈິກ 2019 ມີ​ທ່ານ​ນາງ ປິດ ພົມ​ເພັດ ຮອງ​ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ທ່ານ ເພັງ ເຊັ້ງ​ຊື ຮອງ​ຫົວ­ໜ້າ​ກົມ​ຄຸ້ມ​ຄອງ ແລະ ພັດ­ທະ­ນາ​ທີ່​ດິນ​ກະ­ສິ­ກຳ ກະ­ຊວງ​ກະ­ສິ­ກຳ ແລະ ປ່າ­ໄມ້ ບັນ­ດາ​ຫົວ­ໜ້າ ຮອງ​ຫົວ­ໜ້າ​ຂະ­ແໜງ ຫ້ອງ­ການ ອຳ­ນາດ​ການ​ປົກ­ຄອງ​ບ້ານ ແລະ ຊາວ­ນາ ເຂົ້າ​ຮ່ວມ.

   ການ​ເປີດ​ຂະ​ບວນ​ການ​ດັ່ງ­ກ່າວ ເພື່ອ​ເຮັດ​ໃຫ້​ຊາວ­ນາ​ຮູ້​ໄດ້​ຄຸນ­ຄ່າ​ຂອງ​ຕໍ​ເຟືອງ ທີ່​ຈະ​ໃຫ້​ຜົນ​ປະ­ໂຫຍດ​ແກ່​ຕົນ​ເອງ ເປັນ­ຕົ້ນ ເປັນ​ຝຸ່ນ ພາຍ­ຫຼັງ​ທີ່​ເກັບ​ກ່ຽວ​ເຂົ້າ​ແລ້ວ​ບໍ່​ໃຫ້​ຊາວ­ນາ​ຈູດ​ຕໍ​ເຟືອງ​ຖິ້ມ​ຄື​ຜ່ານ​ມາ ດັ່ງ­ນັ້ນ ຂະ­ແໜງ­ການ​ກ່ຽວ­ຂ້ອງ​ຈຶ່ງ​ໄດ້​ປຸກ­ລະ­ດົມ​ໃຫ້​ຊາວ­ນາ ຜູ້​ທີ່​ມີ​ເງື່ອນ­ໄຂ​ຫັນ​ມາ​ນຳ​ໃຊ້​ຕໍ​ເຟືອງ​ໃຫ້​ເປັນ​ປະ­ໂຫຍດ ໃນ​ການ​ປັບ­ປຸງ​ດິນ​ໃຫ້​ມີ​ຄວາມ​ອຸ­ດົມ­ສົມ­ບູນ​ສ້າງ​ໃຫ້​ເປັນ​ຝຸ່ນ​ໃຫ້​ຜົນ​ຜະ­ລິດ​ສູງ ຫຼຸດ­ຜ່ອນ​ຕົ້ນ​ທຶນ​ການ​ຜະ­ລິດ ຫຼຸດ­ຜ່ອນ​ການ​ນຳ​ໃຊ້​ຝຸ່ນ​ເຄ​ມີ ເນື່ອງ​ຈາກ​ໃນ​ຜ່ານ​ມາ ກໍ​ຄື​ປັດ­ຈຸ­ບັນ​ຍັງ​ມີ​ຊາວ­ນາ​ຈຳ­ນວນ​ຫຼວງ­ຫຼາຍ​ທີ່​ຍັງ​ບໍ່​ທັນ​ເຫັນ​ຄຸນ­ຄ່າ​ຂອງ​ຕໍ​ເຟືອງ​ເທື່ອ ພາຍ­ຫຼັງ​ທີ່​ກ່ຽວ​ເຂົ້າ​ແລ້ວ​ກໍ​ພາ­ກັນ​ຈູດ​ຕໍ​ເຟືອງ​ຖິ້ມ ໃນ​ເມື່ອ​ໄຮ່­ນາ​ບໍ່​ມີ​ຝຸ່ນ​ກໍ​ພາ­ກັນ​ນຳ​ໃຊ້​ຝຸ່ນ​ເຄ​ມີ ເຮັດ​ໃຫ້​ຕົ້ນ​ທຶນ​ການ​ຜະ­ລິດ​ສູງ ພ້ອມ​ທັງ​ມີ​ຜົນ​ກະ­ທົບ​ຕໍ່​ສິ່ງ​ແວດ ລ້ອມ​ຕໍ່​ເນື້ອ­ທີ່​ດິນ​ນາ​ທີ່​ເຊື່ອມ​ໂຊມ ຕໍ່​ສຸ­ຂະ­ພາບ ແລະ ອື່ນໆ ໂດຍ​ເຫັນ​ໄດ້​ຄວາມ​ສຳ­ຄັນ​ດັ່ງ­ກ່າວ ພັກ-ລັດ­ຖະ­ບານ ກໍ​ຄື ຂະ­ແໜງ­ການ​ກ່ຽວ­ຂ້ອງ​ຈຶ່ງ​ໄດ້​ສ້າງ​ໂຄງ­ການ​ນີ້​ຂຶ້ນ​ມາ ເອີ້ນ​ວ່າ ໄຖ​ກົບ​ຕໍ​ເຟືອງ ແມ່ນ​ເຕັກ­ນິກ​ການ​ປັບ­ປຸງ​ບຳ­ລຸງ​ດິນ​ແບບ   ໃໝ່​ທີ່​ປັດ­ຈຸ­ບັນ​ກຳ­ລັງ​ນິ­ຍົມ​ກັນ​ເຮັດ.

   ທັງ​ນີ້ ກໍ​ເພື່ອ​ເປັນ​ການ​ສ້າງ​ດິນ​ໃຫ້​ມີ​ຊີ­ວິດ ແລະ ຢືດ​ອາ­ຍຸ​ການ​ນຳ​ໃຊ້ ເພີ່ມ​ທາດ​ອາ­ຫານ​ພືດ​ໃນ​ດິນ ເຮັດ​ໃຫ້​ດິນ​ມີ​ຄວາມ​ອຸ­ດົມ­ສົມ­ບູນ​ດີ​ຂຶ້ນ ແລະ ຜົນ​ຜະ­ລິດ​ກໍ​ດີ​ຂຶ້ນ​ໃນ​ແຕ່​ລະ​ປີ ຄື: ຜົນ​ຜະ­ລິດ​ເຂົ້າ­ນາ 1 ໂຕນ ຈະ​ມີ​ຕໍ​ເຟືອງ​ປະ­ມານ 1,5 ໂຕນ ໃນ​ຕໍ​ເຟືອງ​ຈະ​ມີ​ທາດ​ຝຸ່ນ​ເລັ່ງ​ປະ­ມານ 1,2 ກິ​ໂລ ຝຸ່ນ​ໝາກ​ປະ­ມານ 0,9 ກິ​ໂລ ແລະ ຝຸ່ນ​ຮາກ​ປະ­ມານ 17,7 ກິ​ໂລ ເມື່ອ​ທຽບ​ກັບ​ຝຸ່ນ​ທີ່​ຂາຍ​ໃນ​ຕະ­ຫຼາດ​ຈະ​ເທົ່າ​ກັບ​ຝຸ່ນ​ສູດ 15-15-15 ຈຳ­ນວນ 6 ກິ​ໂລ ຝຸ່ນ​ເລັ່ງ​ໃບ​ຈຳ­ນວນ 14 ກິ​ໂລ ຝຸ່ນ​ເລັ່ງ​ຮາກ​ຈຳ­ນວນ 28 ກິ​ໂລ ໂດຍ​ລວມ​ແລ້ວ​ແມ່ນ​ມີ​ຜົນ​ດີ​ຫຼາຍ​ຢ່າງ​ໃຫ້​ແກ່​ຊາວ­ນາ​ເຮົາ ດັ່ງ­ນັ້ນ ການ​ເປີດ​ຂະ​ບວນ​ການ​ໄຖ​ກົບ​ຕໍ​ເຟືອງ​ຄັ້ງ​ນີ້ ເພື່ອ​ໃຫ້​ຊາວ­ນາ​ນຳ​ເອົາ​ໄປ​ເປັນ​ແບບ­ຢ່າງ​ແລ້ວ​ຜັນ​ຂະ­ຫຍາຍ​ໄປ​ສູ່​ຜູ້​ອື່ນ ແລະ ບ້ານ​ອ້ອມ​ຂ້າງ ພ້ອມ​ກັນ​ຈັດ​ຕັ້ງ​ປະ­ຕິ­ບັດ​ໃຫ້​ເປັນ​ຂະ​ບວນ​ຟົດ­ຟື້ນ ແລະ ກາຍ­ເປັນ​ປະ­ເພ­ນີ.

ຂ່າວທີ່ກ່ຽວຂ້ອງ