ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 04-12-2019

1.386 04 ທ.ວ. 2019 ຫົວຂໍ້ຂ່າວອື່ນໆ

   ຄໍ​ລຳ​ເກົ່າ​ເຈົ້າ​ເດີມ​ປະ­ຈຳ​ວັນ​ນີ້ ຂໍ​ສະ­ເໜີ​ເລື່ອງ​ອີ​ຣານ​ອອກ​ກົດ­ໝາຍ​ຄວບ​ຄຸມ​ການ​ຢ່າ​ຮ້າງ ຕໍ່​ໃສ່​ນະ­ໂຍ­ບາຍ​ເປີດ​ກວ້າງ​ການ​ລົງ­ທຶນ​ຂອງ​ອິນ​ໂດ​ເນ​ເຊຍ ແລະ ເລື່ອງ​ກົດ­ໝາຍ​ຢຶດ​ໃບ​ຂັບ​ຂີ່​ໂຊ​ເຟີ​ລົດ​ຂີ້​ເມົາ ຢູ່​ຫວຽດ­ນາມ.

   ທີ່ ອີ​ຣານ: ໃນ​ກາງ​ປີ 2015 ປະ­ເທດ​ອີ​ຣານ ໄດ້​ອອກ​ກົດ­ໝາຍ​ກ່ຽວ​ກັບ​ການ​ຢ່າ​ຮ້າງ-ເປັນ​ກົດ­ໝາຍ​ໃໝ່ ອ່ຽມ​ທີ່​ມີ​ເປົ້າ​ໝາຍ​ຫຼຸດ­ຜ່ອນ​ອັດ­ຕາ​ການ​ຢ່າ​ຮ້າງ​ທີ່​ພວມ​ແຜ່​ລະ­ບາດ​ໃນ​ບັນ­ດາ​ຕົວ​ເມືອງ​ໃຫຍ່ໆ ຕົວ­ຢ່າງ ໃນ​ປີ 2014 ການ​ຢ່າ​ຮ້າງ​ໄດ້​ກວມ​ອັດ­ຕາ 21% ໃນ​ທົ່ວ​ປະ­ເທດ ເວົ້າ​ສະ­ເພາະ​ໃນ​ກະ​ໂຕ​ນະ­ຄອນ­ຫຼວງ​ເຕ​ເຮ​ຣານ​ເອງ ກໍ​ມີ​ການ​ຢ່າ​ຮ້າງ​ກັນ​ເຖິງ 30 ພັນ​ຄູ່​ໃນ​ປີ​ດັ່ງ­ກ່າວ ໃນ​ນັ້ນ ຮ້ອຍ​ລະ 90 ເປັນ​ການ​ຢ່າ​ຮ້າງ​ທີ່​ຍິນ​ຍອມ​ກັນ​ທັງ​ສອງ​ຝ່າຍ ແນວ­ໃດ​ກໍ​ດີ ການ​ຢ່າ​ຮ້າງ​ໄດ້​ກາຍ­ເປັນ​ບັນ­ຫາ​ທີ່​ສົ່ງ​ຜົນ​ກະ­ທົບ​ທາງ​ລົບ​ຕໍ່​ສະ​ຖາ​ບັນ​ຄອບ ຄົວ ດັ່ງ­ນັ້ນ ທາງ​ການ​ຂອງ​ປະ­ເທດ​ນີ້​ຈຶ່ງ​ຮີບ​ຮ້ອນ​ສ້າງ​ກົດ­ໝາຍ​ເພື່ອ​ແກ່­ຍາວ​ຂັ້ນ​ຕອນ​ການ​ຢ່າ​ຮ້າງ ຄື​ບໍ່​ໃຫ້​ອີງ­ໃສ່​ແຕ່​ການ​ຍິນ​ຍອມ​ຂອງ​ທັງ​ສອງ​ຝ່າຍ ກົດ­ໝາຍ​ໄດ້​ກຳ­ນົດ​ວ່າ ຄູ່​ຜົວ-ເມຍ ທີ່​ຍິນ​ຍອມ​ຢ່າ​ຮ້າງ​ກັນ​ນັ້ນ ຍັງ​ຕ້ອງ​ໄດ້​ເຂົ້າ​ຮັບ​ການ​ປຶກ­ສາ​ຈາກ​ຄະ­ນະ​ທີ່​ປຶກ­ສາ​ຂອງ​ລັດ​ທີ່​ກ່ຽວ­ຂ້ອງ​ກ່ອນ ຈາກ​ນັ້ນ​ຜູ້​ໃຫ້​ຄຳ​ປຶກ­ສາ​ຈະ​ຕີ​ລາ­ຄາ​ລັກ­ສະ­ນະ ຫຼື ພຶດ­ຕິ​ກຳ​ທີ່​ນຳ­ໄປ​ສູ່​ການ​ຂໍ​ຢ່າ​ຮ້າງ​ວ່າ ສົມ​ເຫດ​ສົມ​ຜົນ ຫຼື ບໍ່ ບົດ​ຕີ​ລາ­ຄາ​ດັ່ງ­ກ່າວ​ຈະ​ສົ່ງ­ຕໍ່​ໃຫ້​ສານ​ເພື່ອ​ພິ­ຈາ­ລະ­ນາ​ຕັດ­ສິນ​ກ່ຽວ​ກັບ​ການ​ຂໍ​ຢ່າ​ຮ້າງ​ຂອງ​ຄູ່​ຜົວ-ເມຍ ເວົ້າ​ໂດຍ​ລວມ​ແລ້ວ ກົດໝາຍ​ສະ­ບັບ​ນີ້​ມີ­ໜ້າ​ທີ່​ຕົ້ນ­ຕໍ​ໃນ​ການ​ສົ່ງ­ເສີມ​ສະ​ຖາ​ບັນ​ຄອບ­ຄົວ​ໃຫ້​ມີ​ສະ­ຖຽນ​ລະ​ພາບ ຫຼຸດ­ຜ່ອນ​ອັດ­ຕາ​ການ​ຢ່າ​ຮ້າງ ແລະ ຄວາມ​ຂັດ​ແຍ່ງ​ພາຍ​ໃນ​ຄອບ­ຄົວ ໃນ​ປັດ­ຈຸ­ບັນ​ສັງ­ຄົມ​ໃນ​ອີ​ຣານ ພວມ​ປະ​ເຊີນ​ບັນ­ຫາ​ຄວາມ​ແຕກ​ແຍກ​ໃນ​ຄອບ­ຄົວ ແລະ ທ່າ​ອ່ຽງ​ແຕ່ງ­ດອງ​ຊ້າ​ລົງ​ຂອງ​ຍິງ-ຊາຍ ທັງໆ​ທີ່​ອີ​ຣານ ຕ້ອງ­ການ​ໃຫ້​ຈຳ­ນວນ​ພົນ­ລະ­ເມືອງ​ເພີ່ມ​ຂຶ້ນ​ເຖິງ 150 ລ້ານ​ຄົນ ພາຍ​ໃນ​ປີ 2050 ຈາກ​ກວ່າ 80 ລ້ານ​ຄົນ​ໃນ​ປັດ­ຈຸ­ບັນ.

   ທີ່ ອິນ​ໂດ​ເນ​ເຊຍ: ໃນ​ລະ­ຫວ່າງ​ກາງ​ປີ 2016 ທາງ​ການ​ອິນ​ໂດ​ເນ​ເຊຍ ໄດ້​ເປີດ​ກວ້າງ​ຕື່ມ​ການ​ລົງ­ທຶນ​ຕ່າງ­ປະ­ເທດ ໂດຍ​ອະ­ນຸ­ຍາດ​ໃຫ້​ຕ່າງ­ປະ­ເທດ​ສາ­ມາດ​ລົງ­ທຶນ​ໃນ 50 ຂະ­ແໜງ­ການ ຊຶ່ງ​ເມື່ອ​ກ່ອນ​ໄດ້​ເກືອດ​ຫ້າມ ເປັນ­ຕົ້ນ ແມ່ນ​ຂະ­ແໜງ​ການ­ທ່ອງ­ທ່ຽວ​ຮູບ­ເງົາ ຄົມ­ມະ­ນາ­ຄົມ ແລະ ອື່ນໆ ແນວ­ໃດ​ກໍ​ດີ ນະ­ໂຍ­ບາຍ​ຫຼຸດ­ຜ່ອນ​ນີ້​ຍັງ​ໄດ້​ຈຳ­ກັດ​ທຶນ​ຕ່າງ­ປະ­ເທດ​ຈຳ­ນວນ​ໜຶ່ງ ເຊັ່ນ: ໃນ​ທຸ­ລະ​ກິດ​ການ​ຄ້າ ເອ​ເລັກ​ໂຕຼ​ນິກ­ຂະ​ໜາດ​ນ້ອຍ ໂດຍ​ບໍ່​ອະ­ນຸ­ຍາດ​ໃຫ້​ຕ່າງ­ປະ­ເທດ​ຖື​ຫຸ້ນ​ຫຼາຍ​ກວ່າ 49% ເພື່ອ​ປົກ​ປ້ອງ​ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ກາງ ທາງ​ການ​ອິນ​ໂດ​ເນ​ເຊຍ ໄດ້​ກຳ­ນົດ​ໃຫ້​ໂຄງ­ການ​ກໍ່­ສ້າງ​ທີ່​ມີ​ມູນ​ຄ່າ 50 ຕື້​ຣູ​ເປຍ (1 ໂດ​ລາ​ສະ­ຫະ­ລັດ ແລກ​ໄດ້​ປະ­ມານ 13.500 ຣູ​ເປຍ) ຕ້ອງ​ໃຫ້​ວິ​ສາ​ຫະ​ກິດ​ອິນ​ໂດ​ເນ​ເຊຍ​ຮັບ​ເໝົາ ເຊິ່ງ​ເມື່ອ​ກ່ອນ​ໄດ້​ຈຳ­ກັດ​ຢູ່​ໃນ​ວົງ​ເງິນ 1 ຕື້​ຣູ​ເປຍ ເທົ່າ​ນັ້ນ.

   ທີ່ ຫວຽດ­ນາມ: ໜັງ­ສື­ພິມ​ຜູ້​ແທນ​ປະ­ຊາ­ຊົນ (ສະ­ພາ​ແຫ່ງ​ຊາດ) ສະ­ບັບ​ທີ 591 ທ້າຍ​ເດືອນ​ມິ­ຖຸ­ນາ 2019) ໃຫ້​ຮູ້​ກ່ຽວ​ກັບ​ກົດ­ໝາຍ​ຢຶດ​ໃບ​ຂັບ​ຂີ່​ຂອງ​ຜູ້​ທີ່​ດື່ມ​ສິ່ງ​ມຶນ­ເມົາ​ແລ້ວ​ຂັບ​ລົດ ເຖິງ​ວ່າ​ຈະ​ມີ​ທາດ​ເຫຼົ້າ​ຢູ່​ໃນ​ຮ່າງ­ກາຍ​ຜູ້­ກ່ຽວ​ຫຼາຍ​ໜ້ອຍ​ຊ່ຳ​ໃດ​ກໍ​ຕາມ ກົດ­ໝາຍ​ນີ້​ຈະ​ມີ​ຜົນ​ບັງ​ຂັບ​ໃຊ້​ນັບ​ແຕ່​ປີ 2020 ເປັນ­ຕົ້ນ​ໄປ ນອກ­ຈາກ​ມີ​ກົດ­ໝາຍ​ແລ້ວ ທາງ​ສະ­ພາ​ແຫ່ງ​ຊາດ ຍັງ​ສະ­ເໜີ​ໃຫ້​ພິ­ຈາ­ລະ­ນາ​ມະ­ຕິ​ຫ້າມ​ຈຳ­ໜ່າຍ​ເຄື່ອງ​ດື່ມ​ທີ່​ມີ​ທາດ​ເຫຼົ້າ ລະ­ຫວ່າງ 22 ຫາ 8 ໂມງ​ເຊົ້າ ສະ­ຖິ­ຕິ​ໃນ​ປີ 2017 ຂອງ​ກະ­ຊວງ​ສາ­ທາ­ລະ­ນະ​ສຸກ​ຫວຽດ­ນາມ ຊີ້​ອອກ​ວ່າ ຄົນ​ຫວຽດ­ນາມ ດື່ມ​ເຄື່ອງ​ດື່ມ​ທີ່​ມີ​ສ່ວນ​ປະ­ສົມ​ຂອງ​ທາດ​ເຫຼົ້າ​ປະ­ມານ 305 ລ້ານ​ລິດ/ປີ ເບຍ 4.100 ລ້ານ​ລິດ/ປີ ເຮັດ​ໃຫ້​ຫວຽດ­ນາມ ຕິດ​ລະ­ດັບ​ປະ­ເທດ​ຫົວ​ແຖວ​ໃນ​ອາ​ຊຽນ ແລະ ເປັນ​ທີ 3 ໃນ​ທະ­ວີບ­ອາ­ຊີ ຮອງ​ຈາກ​ຍີ່­ປຸ່ນ ແລະ ສປ ຈີນ.

ຂ່າວທີ່ກ່ຽວຂ້ອງ