ຂ່າວຫຼ້າສຸດ

ຫຼາຍບັນຫາໃນຂົງເຂດສານ ແລະ ໄອຍະການທີ່ ສສຊ ໃຫ້ຄວາມສົນໃຈ

1.731 22 ພ.ຈ. 2019 ຂ່າວໜ້າ​ໜຶ່ງ

   ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ່ 8 ສະ­ພາ​ແຫ່ງ​ຊາດ ຊຸດ​ທີ VIII ວັນ​ທີ 21 ພະ­ຈິກ 2019 ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ໄດ້​ລົງ​ຄະ­ແນນ​ສຽງ​ເປັນ​ສ່ວນ​ຫຼາຍ ຮັບ­ຮອງ​ເອົາ​ບົດ​ລາຍ​ງານ​ຂອງ​ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ແລະ ສານ​ປະ­ຊາ­ຊົນ​ສູງ​ສຸດ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ​ວຽກ​ງານ ປະ­ຈຳ​ປີ 2019 ແລະ ແຜນ­ການ­ເຄື່ອນ­ໄຫວ​ວຽກ​ງານ ປະ­ຈຳ​ປີ 2020 ໂດຍ​ເປັນ​ປະ­ທານ​ຂອງ​ທ່ານ​ນາງ ສີ­ໃສ ລື​ເດດ​ມູນ​ສອນ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ທ່ານ ຄຳ​ສານ ສຸ​ວົງ ຫົວ­ໜ້າ​ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ທ່ານ ຄຳ​ຜາ ແສງ​ດາ­ລາ ປະ­ທານ​ສານ​ປະ­ຊາ­ຊົນ​ສູງ​ສຸດ ເຂົ້າ​ຮ່ວມ.

   ການ​ດຳ­ເນີນ​ກອງ​ປະ­ຊຸມ ສສຊ ໄດ້​ຜັດ­ປ່ຽນ​ກັນ​ຂຶ້ນ​ປະ­ກອບ​ຄຳ​ຄິດ​ເຫັນ​ຢ່າງ​ກົງ​ໄປ​ກົງ​ມາ ຕໍ່​ບົດ​ລາຍ​ງານ​ທັງ​ສອງ​ພາກ ເປັນ­ຕົ້ນ ການ​ແກ້​ໄຂ​ຄະ­ດີ​ຕ່າງໆ​ບາງ​ຄັ້ງ​ຍັງ​ຊັກ​ຊ້າ​ແກ່­ຍາວ​ເວ­ລາ ການ​ເກັບ​ກຳ​ຂໍ້​ມູນ​ບໍ່​ມີ​ການ​ສົມ​ທຽບ​ຄວາມ​ເປັນ​ຈິງ​ຂອງ​ຄະ­ດີ ແລະ ກົດ­ໝາຍ ເປັນ­ຕົ້ນ ຄະ­ດີ​ເກີດ​ອຸ­ບັດ­ເຫດ​ທາງ​ຖະ­ໜົນ​ບາງ​ຄັ້ງ​ກໍ​ບໍ່​ເປີດ­ເຜີຍ ຂໍ້​ມູນ​ຄວາມ​ເປັນ​ຈິງ​ໃຫ້​ຄູ່​ກໍ­ລະ­ນີ ຫຼື ສັງ­ຄົມ​ຮັບ​ຮູ້ ກົດ­ໝາຍ​ຍັງ​ມີ​ຊ່ອງ​ວ່າງ ການ​ປະ­ຕິ­ບັດ​ຈັນ​ຍາ​ບັນ ຈັນ­ຍາ­ທຳ ແບບ­ແຜນ​ວິ­ທີ​ເຮັດ​ວຽກ​ຂອງ​ພະ­ນັກ­ງານ​ບໍ່​ສອດ­ຄ່ອງ ແລະ ບໍ່​ທັນ​ໂປ່ງ​ໃສ ຍັງ​ມີ​ລັກ­ສະ­ນະ​ຄົນ​ເຈົ້າ​ຄົນ​ຂ້ອຍ ຍັງ​ຈຳ­ແນກ​ຊົນ​ຊັ້ນ​ວັນ­ນະ ການ​ເກັບ​ກຳ​ຂໍ້​ມູນ ວິ­ເຄາະ​ບັນ­ຫາ​ຍັງ​ບໍ່​ທັນ​ຈະ­ແຈ້ງ ການ​ປະ­ຕິ­ບັດ​ລະ­ບຽບ​ວິ­ໄນ​ຕໍ່​ພະ­ນັກ­ງານ​ທີ່​ກະ­ທຳ​ຜິດ​ຍັງ​ບໍ່​ໜັກ​ແໜ້ນ ນອກ​ນີ້ ການ​ແກ້​ໄຂ​ຄະ­ດີ​ຢູ່​ຂັ້ນ​ເມືອງ ຂັ້ນ​ແຂວງ​ຕ້ອງ​ມີ​ຄວາມ​ຊັດ​ເຈນ ການ​ຕັດ­ສິນ​ຖືກ­ຕ້ອງ​ໄປ​ຕາມ​ກົດ­ໝາຍ ພາກ­ສ່ວນ​ກ່ຽວ­ຂ້ອງ​ຕ້ອງ​ຕິດ­ຕາມ​ກວດ­ກາ​ຜູ້​ຖືກ​ຕັດ­ສິນ​ຢ່າງ​ລະ­ອຽດ ເອົາ­ໃຈ­ໃສ່​ຢ່າງ​ຈະ­ແຈ້ງ​ຕໍ່​ຜູ້​ຖືກ​ຕັດ­ສິນ ເພື່ອ​ໃຫ້​ມີ​ຄວາມ​ເພິ່ງ​ພໍ­ໃຈ​ໃນ​ການ​ຕັດ­ສິນ​ຄະ­ດີ ແກ້​ໄຂ​ສະ­ຖານ­ທີ່​ຄ້າຍ​ຄຸມ​ຂັງ​ທີ່​ມີ​ຄວາມ​ແອ​ອັດ ການ​ແກ້​ໄຂ​ບັນ­ຫາ​ແມ່­ຍິງ​ຖື­ພາ​ໃນ​ຄ້າຍ​ຄຸມ​ຂັງ ແລະ ອື່ນໆ.

   ຜ່ານ​ການ​ປະ­ກອບ​ຄຳ​ຄິດ​ເຫັນ​ຂອງ ສສຊ ໃສ່​ບົດ​ລາຍ​ງານ​ດັ່ງ­ກ່າວ ທ່ານ ຄຳ​ສານ ສຸ​ວົງ ໄດ້​ຊີ້​ແຈງ​ຕໍ່ ສສຊ ໂດຍ​ໄດ້​ຍົກ​ໃຫ້​ເຫັນ​ການ​ປະ­ຕິ­ບັດ​ພາ­ລະ​ບົດ­ບາດ ສິດ​ໜ້າ­ທີ່​ໃນ​ການ​ຕິດ­ຕາມ​ກວດ­ກາ 3 ໜ້າ­ທີ່ ຄື: ຕິດ­ຕາມ​ກວດ­ກາ​ການ​ເຄົາ­ລົບ​ກົດ­ໝາຍ ປະ­ຕິ­ບັດ​ສິດ​ສັ່ງ​ຟ້ອງ ແລະ ຈຸດ​ອ່ອນ​ຂໍ້­ຄົງ­ຄ້າງ ຄວາມ​ເຂັ້ມ­ແຂງ​ຂອງ​ກົງ­ຈັກ​ການ­ຈັດ­ຕັ້ງ​ຂັ້ນ​ຕ່າງໆ ຂອງ​ອົງ­ການ​ໄອ​ຍະ​ການ ແລະ ຄວາມ​ໜັກ​ແໜ້ນ​ທາງ​ດ້ານ​ຄຸນ​ທາດ​ການ­ເມືອງ ຈັນ​ຍາ​ບັນ ຈັນ­ຍາ­ທຳ ຂີດ​ຄວາມ​ສາ­ມາດ​ຂອງ​ພະ­ນັກ­ງານ​ໄອ​ຍະ​ການ​ຍັງ​ບໍ່​ທັນ​ເຂັ້ມ­ແຂງ ສິ່ງ​ອຳ­ນວຍ​ຄວາມ​ສະ­ດວກ ພື້ນ­ຖານ​ໂຄງ​ລ່າງ ອຸ­ປະ­ກອນ​ຮັບ​ໃຊ້ ກົນ​ໄກ​ປະ­ສານ​ງານ ລະ­ຫວ່າງ 4 ພາກ­ສ່ວນ ຂອງ​ການ​ດຳ­ເນີນ​ຄະ­ດີ​ຍັງ​ບໍ່​ເປັນ​ເອ­ກະ​ພາບ ແລະ ຈະ​ນຳ​ເອົາ 4 ບົດ­ຮຽນ 5 ຈຸດ​ອ່ອນ​ຕົ້ນ­ຕໍ 4 ສາ­ເຫດ​ພື້ນ­ຖານ​ທີ່​ຈະ​ນຳ­ໄປ​ປັບ­ປຸງ​ແກ້​ໄຂ ການ​ຕິດ­ຕາມ​ກວດ­ກາ ການ​ປະ­ຕິ­ບັດ​ກົດ­ໝາຍ​ຂອງ​ອົງ­ການ ສືບ­ສວນ-ສອບ​ສວນ ເຊິ່ງ​ໄດ້​ນຳ​ໃຊ້ 7 ມາດ​ຕະ­ການ ໃນ​ການ​ສະ­ກັດ​ກັ້ນ ໂດຍ​ສະ­ເພາະ ການ​ກັກ​ຂັງ​ເກີນ​ກຳ­ນົດ​ກົດ­ໝາຍ​ໃນ​ການ​ດຳ­ເນີນ​ຄະ­ດີ ກົດ­ໝາຍ​ວ່າ​ດ້ວຍ​ການ​ດຳ­ເນີນ​ຄະ­ດີ​ອາ­ຍາ ມາດ​ຕະ­ການ​ໃນ​ການ​ປິ່ນ­ປົວ​ນັກ­ໂທດ ແລະ ຈຳ­ເລີຍ ໂດຍ​ສະ­ເພາະ ການ​ປິ່ນ­ປົວ​ຜູ້­ຍິງ​ຖື­ພາ​ຢູ່​ໃນ​ຄ້າຍ​ຄຸມ​ຂັງ ໃນ​ກໍ­ລະ­ນີ​ການ​ເຈັບ​ປ່ວຍ​ກະ­ທັນ­ຫັນ ແລະ ປົກ­ກະ­ຕິ ສຳ­ລັບ​ການ​ເຈັບ​ປ່ວຍ​ກະ­ທັນ­ຫັນ​ແມ່ນ​ສິດ ແລະ ໜ້າ­ທີ່​ຂອງ​ເຈົ້າ​ໜ້າ­ທີ່​ຢູ່​ໃນ​ຄ້າຍ​ຄຸມ​ຂັງ ຖ້າ​ຫາ​ກວ່າ​ບໍ່​ສາ­ມາດ​ປິ່ນ­ປົວ​ໄດ້ ແມ່ນ​ໃຫ້​ສົ່ງ​ໄປ​ໂຮງ­ໝໍ​ຂອງ​ລັດ​ໂດຍ​ກົງ ຫຼື ສົ່ງ​ໄປ​ສະ­ຖານ­ທີ່​ສະ­ເພາະ ມາ​ຮອດ​ເດືອນ​ກັນ­ຍາ 2019 ມີ​ແມ່­ຍິງ​ຖື­ພາ​ອອກ​ໄປ​ປິ່ນ­ປົວ 211 ຄົນ.

   ສ່ວນ​ທ່ານ​ປະ­ທານ​ສານ​ປະ­ຊາ­ຊົນ​ສູງ​ສຸດ ກໍ​ໄດ້​ໃຫ້​ຄວາມ​ກະ­ຈ່າງ​ແຈ້ງ ກ່ຽວ​ກັບ​ການ​ຕັດ­ສິນ​ຄະ­ດີ​ຈຳ­ນວນ​ໜຶ່ງ​ທີ່​ບໍ່​ທັນ​ຄົບ​ຖ້ວນ​ຮອບ­ດ້ານ ພາ­ວະ​ວິ­ໄສ​ຕາມ​ກົດ­ໝາຍ ໂດຍ​ສະ­ເພາະ ການ​ຕັດ­ສິນ​ທີ່​ບໍ່​ຖືກ­ຕ້ອງ ແລະ ບໍ່​ເປັນ​ທຳ ເຮັດ​ໃຫ້ ການ​ຕັດ­ສິນ​ແກ່­ຍາວ​ເວ­ລາ ຫຼົບ​ໄປ​ຫຼົບ​ມາ ຕໍ່​ກັບ​ບັນ­ຫາ​ດັ່ງ­ກ່າວ ເປັນ​ບັນ­ຫາ​ທີ່​ສັງ­ຄົມ​ໃຫ້​ຄວາມ​ສົນ­ໃຈ​ຫຼາຍ ແລະ ຕິດ ຕາມ​ການ​ດຳ­ເນີນ​ຄະ­ດີ​ຂອງ​ສານ ເຊິ່ງ​ຄະ­ນະ​ພັກ ຄະ­ນະ​ນຳ​ຂອງ​ສານ​ປະ­ຊາ­ຊົນ​ສູງ​ສຸດ ກໍ​ຖື​ເປັນ​ວຽກ​ງານ​ຕົ້ນ­ຕໍ ເປັນ​ວຽກ​ງານ​ໃຈ​ກາງ­ຂອງ​ສານ​ໃນ​ການ​ຕັດ­ສິນ ແລະ ພິ­ພາກ­ສາ​ຄະ­ດີ ຜ່ານ​ມາ​ສານ​ປະ­ຊາ­ຊົນ​ສູງ​ສຸດ​ໄດ້​ສຸມ​ໃສ່​ແກ້​ໄຂ​ບັນ­ຫາ​ດັ່ງ­ກ່າວ ເພື່ອ​ໃຫ້­ການ​ຕັດ­ສິນ​ຄະ­ດີ​ຮັບ­ປະ­ກັນ​ໄດ້ 2 ດ້ານ​ໃຫຍ່ ຄື: ການ​ຕັດ­ສິນ​ຄະ­ດີ​ໃຫ້​ມີ​ຄວາມ​ວ່ອງ­ໄວ ແລະ ໃຫ້​ມີ​ຄຸນ​ນະ​ພາບ​ຕາມ​ທີ່​ໄດ້​ກຳ­ນົດ​ໄວ້ ໃນ​ມະ­ຕິ​ກອງ​ປະ­ຊຸມ​ສະ­ພາ​ແຫ່ງ​ຊາດ ກ່ຽວ​ກັບ​ສານ​ປະ­ຊາ­ຊົນ ກໍ​ຄື ແຜນ­ການ 5 ປີ ແລະ ແຜນ­ການ​ປະ­ຈຳ​ປີ​ຂອງ​ສານ​ປະ­ຊາ­ຊົນ​ທີ່​ໄດ້​ກຳ­ນົດ​ໄວ້.

ຂ່າວທີ່ກ່ຽວຂ້ອງ