ຂ່າວຫຼ້າສຸດ

ອາຊຽນ ສ້າງຄວາມເຂັ້ມແຂງປົກປ້ອງສັງຄົມ ສຳລັບເດັກດ້ອຍໂອກາດ

1.209 22 ພ.ຈ. 2019 ຂ່າວໜ້າ​ໜຶ່ງ
ອາຊຽນ ສ້າງຄວາມເຂັ້ມແຂງປົກປ້ອງສັງຄົມ ສຳລັບເດັກດ້ອຍໂອກາດ

   ກອງ​ປະ­ຊຸມ​ລັດ­ຖະ­ມົນ­ຕີ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ ຄັ້ງ​ທີ 10  ແລະ ກອງ​ປະ­ຊຸມ​ທີ່​ກ່ຽວ­ຂ້ອງ​ທີ່ ສປປ ລາວ ເປັນ​ເຈົ້າ­ພາບ ຈັດ​ຂຶ້ນ​ວັນ​ທີ 21 ພະ­ຈິກ 2019 ທີ່​ໂຮງ­ແຮມ​ດອນ​ຈັນ​ພາ​ເລດ ໂດຍ​ເປັນ ປະ­ທານ​ຂອງ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ ທ່ານ​ຮອງ​ເລ­ຂາ­ທິ­ການ​ໃຫຍ່​ອາ​ຊຽນ ຄະ­ນະ​ຜູ້​ແທນ​ອາ​ຊຽນ ແລະ ແຂກ​ຖືກ​ເຊີນ​ເຂົ້າ​ຮ່ວມ.

   ກອງ​ປະ­ຊຸມ​ລັດ­ຖະ­ມົນ­ຕີ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ ຄັ້ງ​ທີ 10  ແລະ ກອງ​ປະ­ຊຸມ​ທີ່​ກ່ຽວ­ຂ້ອງ​ຄັ້ງ​ນີ້ ຈັດ​ຂຶ້ນ​ພາຍ​ໃຕ້​ຫົວ­ຂໍ້ ການ​ສ້າງ​ຄວາມ​ເຂັ້ມ­ແຂງ​ວຽກ​ງານ​ປົກ​ປ້ອງ​ສັງ­ຄົມ​ສຳ­ລັບ​ເດັກ​ດ້ອຍ​ໂອ­ກາດໂດຍ​ເລັ່ງ​ໃສ່ 3 ບັນ­ຫາ​ທີ່​ສຳ­ຄັນ ຄື: ຮັດ​ແໜ້ນ​ວຽກ​ງານ​ປົກ​ປ້ອງ​ສັງ­ຄົມ​ໃຫ້​ມີ​ລັກ­ສະ­ນະ​ກວມ​ລວມ ເທົ່າ​ທຽມ​ກັນ ແລະ ຮັບ­ປະ­ກັນ​ສ່ວນ​ຮ່ວມ ແລະ ໄດ້​ຮັບ​ຜົນ​ປະ­ໂຫຍດ​ຂອງ​ທຸກ​ພາກ­ສ່ວນ​ໃນ​ສັງ­ຄົມ ໂດຍ​ສະ­ເພາະ ເດັກ​ດ້ອຍ​ໂອ­ກາດ ຜູ້​ພິ­ການ ແລະ ຜູ້​ສູງ​ອາ­ຍຸ​ທີ່​ປ່ຽວ­ພອຍ ຍົກ​ສູງ​ການ​ເຂົ້າ​ເຖິງ​ການ​ບໍ­ລິ­ການ ແລະ ການ​ປົກ​ປ້ອງ​ສັງ­ຄົມ​ໃຫ້​ມີ​ຄວາມ​ສະ ດວກ ວ່ອງ­ໄວ ມີ​ຄວາມ​ກຽມ­ພ້ອມ​ຄົບ​ວົງ​ຈອນ ມີ​ຄຸນ​ນະ​ພາບ​ເທົ່າ​ທຽມ​ກັນ ແລະ ຍືນ​ຍົງ ແລະ ເພີ່ມ​ທະ­ວີ​ການ​ພົວ­ພັນ​ຮ່ວມ​ມື ແລະ ລະ­ດົມ​ຂົນ­ຂວາຍ​ທຶນ­ຮອນ ເຕັກ­ນິກ​ວິ­ຊາ​ການ​ຈາກ​ຄູ່​ເຈລະ­ຈາ​ອາ​ຊຽນ ຄູ່​ຮ່ວມ​ມື​ພາຍ​ນອກ ອົງ­ການ​ຈັດ ຕັ້ງ​ສາ­ກົນ ລວມ​ທັງ​ອົງ​ການ­ຈັດ­ຕັ້ງ​ສາ­ກົນ​ບໍ່​ສັງ­ກັດ​ລັດ­ຖະ­ບານ ເພື່ອ​ມີ​ສ່ວນ​ຮ່ວມ​ໃນ​ການ­ຈັດ­ຕັ້ງ​ປະ­ຕິ­ບັດ​ໃຫ້​ບັນ­ລຸ​ຜົນ ສຳ­ເລັດ​ສູງ​ຂຶ້ນ ທັງ​ໄດ້​ສະ­ເໜີ​ໃຫ້​ບັນ­ດາ​ລັດ­ຖະ­ມົນ­ຕີ​ອາ​ຊຽນ​ສືບ­ຕໍ່​ຊຸກ­ຍູ້​ຂະ­ແໜງ­ການ​ທີ່​ກ່ຽວ­ຂ້ອງ ປະ­ຕິ­ບັດ​ແຜນ​ວຽກ​ປີ 2016-2020 ໃຫ້​ມີ​ປະ­ສິດ­ທິ­ພາບ​ກວ່າ​ເກົ່າ ໂດຍ​ສະ­ເພາະ ໃຫ້​ມີ​ການ​ທົບ​ທວນ​ກາງ​ສະ­ໄໝ​ການ­ຈັດ­ຕັ້ງ​ປະ­ຕິ­ບັດ​ແຜນ​ແມ່​ບົດ ການ​ສ້າງ​ປະ­ຊາ​ຄົມ​ວັດ­ທະ­ນະ­ທຳ-ສັງ­ຄົມ​ອາ​ຊຽນ ປີ 2025 ແລະ ໃຫ້​ຄົ້ນ­ຄວ້າ​ລະ­ອຽດ​ໃນ​ການ​ກຳ­ນົດ​ເອົາ​ບຸ­ລິ­ມະ­ສິດ​ສຳ­ຄັນ​ຕ່າງໆ ເຂົ້າ​ໃນ​ການ​ຮ່າງ​ແຜນ​ວຽກ​ໃໝ່ ປີ 2021-2025 ສືບ­ຕໍ່​ນຳ​ເອົາ​ແຜນ​ງານ​ເສີມ​ສ້າງ​ເຊິ່ງ​ກັນ ແລະ ກັນ ປີ 2020-2025 ທີ່​ໄດ້​ຮັບ­ຮອງ​ເອົາ​ໃນ​ກອງ​ປະ­ຊຸມ​ສຸດ​ຍອດ​ອາ​ຊຽນ-ສປຊ ຄັ້ງ​ທີ 10 ຜ່ານ​ມາ ທີ່​ບາງ­ກອກ ເພື່ອ​ນຳ­ໄປ​ຈັດ​ຕັ້ງ​ປະ­ຕິ­ບັດ​ໃຫ້​ປາ­ກົດ​ຜົນ​ເປັນ​ຈິງ ແລະ ສືບ­ຕໍ່​ເພີ່ມ​ທະ­ວີ​ການ​ພົວ­ພັນ​ຮ່ວມ​ມື​ກັບ​ບັນ­ດາ​ປະ­ເທດ​ຄູ່​ເຈລະ­ຈາ​ອາ​ຊຽນ​ບວກ​ສາມ ຄູ່​ຮ່ວມ​ມື​ພາຍ​ນອກ ອົງ​ການ­ຈັດ­ຕັ້ງ​ສາ­ກົນ ແລະ ທຸກ​ພາກ­ສ່ວນ​ທີ່​ກ່ຽວ­ຂ້ອງ ເພື່ອ​ປະ­ກອບ­ສ່ວນ​ເຂົ້າ​ໃນ​ວຽກ​ງານ​ສະ­ຫວັດ­ດີ​ການ​ສັງ­ຄົມ​ໃຫ້​ນັບ​ມື້​ດີ​ຂຶ້ນ.

   ກອງ​ປະ­ຊຸມ​ໄດ້​ແລກ­ປ່ຽນ​ຄຳ​ຄິດ​ຄຳ​ເຫັນ ກ່ຽວ​ກັບ​ວຽກ​ງານ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ​ອາ​ຊຽນ ໂດຍ​ສະ­ເພາະ ວຽກ​ປົກ​ປ້ອງ​ສິດ­ຜົນ­ປະ­ໂຫຍດ​ຂອງ​ແມ່­ຍິງ ແລະ ເດັກ­ນ້ອຍ ການ​ເບິ່ງ­ແຍງ​ດູ​ແລ​ຜູ້​ອາ­ຍຸ​ສູງ ການ​ຊ່ວຍ­ເຫຼືອ​ຜູ້​ພິ­ການ ແລະ ກຸ່ມ​ຄົນ​ທີ່​ດ້ອຍ​ໂອ­ກາດ​ຕ່າງໆ ພ້ອມ​ນັ້ນ ກອງ​ປະ­ຊຸມ​ຍັງ​ໄດ້​ສຸມ​ໃສ່​ບາງ​ບັນ­ຫາ​ທີ່​ສຳ­ຄັນ​ເປັນ ຕົ້ນ ເພີ່ມ​ທະ­ວີ​ການ​ຮ່ວມ​ມື​ຊ່ວຍ­ເຫຼືອ ແລະ ແລກ­ປ່ຽນ​ບົດ­ຮຽນ ກ່ຽວ​ກັບ​ການ​ພັດ­ທະ­ນາ​ກຸ່ມ​ຄົນ​ດ້ອຍ​ໂອ­ກາດ ປະ­ສານ​ສົມ­ທົບ​ກັບ​ບັນ­ດາ​ຂະ­ແໜງ­ການ ແລະ ອົງ­ການ​ຕ່າງໆ​ທີ່​ກ່ຽວ­ຂ້ອງ​ໃນ​ອາ​ຊຽນ ເພື່ອ​ຮ່ວມ​ກັນ​ວາງ​ແຜນ­ການ ແລະ ໂຄງ­ການ​ຕ່າງໆ ເພື່ອ​ຈັດ​ຕັ້ງ​ປະ­ຕິ­ບັດ​ວຽກ​ສະ­ຫວັດ­ດີ​ການ​ສັງ­ຄົມ ແລະ ການ​ພັດ­ທະ­ນາ ໂດຍ​ສະ­ເພາະ ການ​ປົກ​ປ້ອງ​ສັງ ຄົມ​ສຳ­ລັບ​ເດັກ​ດ້ອຍ​ໂອ­ກາດ​ໃນ​ອາ​ຊຽນ​ໃຫ້​ເປັນ​ຮູບ​ປະ​ທຳ​ດີ​ຂຶ້ນ​ກວ່າ​ເກົ່າ ຂະ­ຫຍາຍ​ການ​ຮ່ວມ​ມື​ກັບ​ບັນ­ດາ​ປະ­ເທດ​ຄູ່​ເຈລະ­ຈາ​ອາ​ຊຽນ​ບວກ​ສາມ ບັນ­ດາ​ອົງ​ການ­ຈັດ­ຕັ້ງ​ສາ­ກົນ ອົງ­ການ​ພາກ​ພື້ນ ຂະ­ແໜງ­ການ​ພາກ​ລັດ ແລະ ເອ­ກະ​ຊົນ​ທີ່​ກ່ຽວ­ຂ້ອງ ເພື່ອ​ລະ­ດົມ​ແຫຼ່ງ​ທຶນ ແລະ ເຕັກ­ນິກ​ວິ­ຊາ​ການ​ນຳ​ໃຊ້​ເຂົ້າ​ໃນ​ການ­ຈັດ­ຕັ້ງ​ປະ­ຕິ­ບັດ ວຽກ​ສະ­ຫວັດ­ດີ​ການ​ສັງ ຄົມ ແລະ ການ​ພັດ­ທະ­ນາ​ອາ​ຊຽນ​ໃຫ້​ມີ​ຄວາມ​ຄືບ​ໜ້າ ແລະ ມີ​ຜົນ­ສຳ­ເລັດ​ເປັນ​ຮູບ​ປະ​ທຳ​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ