ຂ່າວຫຼ້າສຸດ

ສະຖານີຂົນສົ່ງລົດໂດຍສານສາຍໃຕ້ ເປັນເຂດປອດຄວັນຢາສູບ

1.199 22 ພ.ຈ. 2019 ຂ່າວໜ້າ​ໜຶ່ງ
ສະຖານີຂົນສົ່ງລົດໂດຍສານສາຍໃຕ້ ເປັນເຂດປອດຄວັນຢາສູບ

   ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ຮ່ວມ​ກັບ​ກະ­ຊວງ​ສາ­ທາ­ລະ­ນະ​ສຸກ ແລະ ຄະ­ນະ​ກຳ­ມະ­ການ​ແຫ່ງ​ຊາດ ເພື່ອ​ການ​ຄວບ​ຄຸມ​ຢາ­ສູບ​ໄດ້​ຈັດ​ພິ­ທີ​ປະ­ກາດ​ສະ­ຖາ­ນີ​ຂົນ­ສົ່ງ​ລົດ​ໂດຍ­ສານ​ສາຍ​ໃຕ້ ທີ່​ຕັ້ງ​ຢູ່​ຖະ­ໜົນ 450 ປີ ບ້ານ​ສະ­ພັງ​ເມິກ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ເປັນ​ເຂດ​ປອດ​ຄວັນ​ຢາ­ສູບ​ຂຶ້ນ ວັນ​ທີ 21 ພະ­ຈິກ 2019  ມີ​ທ່ານ ວຽງ​ສະ​ຫວັດ ສີ​ພັນ​ດອນ ຮອງ​ລັດ­ຖະ­ມົນ­ຕີ​ກະ­ຊວງ​ໂຍ­ທາ​ທິ​ການ ແລະ ຂົນ­ສົ່ງ ທ່ານ ພອນ​ປະ­ເສີດ ອຸ​ນາ​ພົມ ຮອງ​ຫົວ­ໜ້າ​ກົມ​ອະ­ນາ­ໄມ ແລະ ກັນ​ພະ­ຍາດ ກະ­ຊວງ​ສາ­ທາ­ລະ­ນະ​ສຸກ ທ່ານ​ອຳ­ນວຍ​ການ​ສະ­ຖາ­ນີ​ຂົນ­ສົ່ງ​ລົດ​ໂດຍ­ສານ​ສາຍ​ໃຕ້ ພ້ອມ​ດ້ວຍ​ຜູ້​ປະ­ກອບ​ການ​ດ້ານ​ຂົນ­ສົ່ງ ແລະ ເຈົ້າ​ໜ້າ­ທີ່​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ວຽງ​ສະ​ຫວັດ ສີ​ພັນ​ດອນ ກ່າວ​ວ່າ: ການ​ກຳ­ນົດ​ເອົາ​ສະ­ຖາ­ນີ​ຂົນ­ສົ່ງ ແລະ ລົດ​ໂດຍ­ສານ​ສາ­ທາ­ລະ­ນະ​ປອດ​ຄວັນ​ຢາ­ສູບ ໝາຍ​ເຖິງ​ບໍ່​ໃຫ້​ມີ​ການ​ສູບ­ຢາ ແລະ ຊື້-ຂາຍ​ຜະ­ລິດ​ຕະ​ພັນ​ຢາ­ສູບ​ພາຍ​ໃນ​ຂອບ​ເຂດ​ສະ­ຖາ­ນີ​ທັງ​ໝົດ​ທີ່​ມີ​ປ້າຍ​ຫ້າມ​ສູບ­ຢາ ຫຼື ບໍ່​ໃຫ້​ຜູ້​ຂັບ​ຂີ່ (ໂຊ​ເຟີ) ຜູ້​ຂັບ​ລົດ​ຕຸກ​ຕຸກ-ຈຳ​ໂບ້ ລົດ​ສາມ​ລໍ້ ແລະ ລົດ­ຈັກ ຮັບ­ຈ້າງ​ທຸກ​ປະ­ເພດ​ສູບ­ຢາ ໃນ​ຂະ­ນະ​ມາ​ປະ­ຕິ­ບັດ​ໜ້າ­ທີ່ ຕະ­ຫຼອດ​ຮອດ​ຜູ້­ໂດຍ­ສານ ກໍ​ບໍ່​ອະ­ນຸ­ຍາດ​ໃຫ້​ສູບ­ຢາ​ໃນ​ຂະ­ນະ​ລໍ­ຖ້າ​ຂຶ້ນ​ລົດ​ຢູ່​ໃນ​ຄິວ​ລົດ​ແຫ່ງ​ນີ້ ຫຼື ຢູ່​ໃນ​ລົດ​ໂດຍ­ສານ​ກໍ​ເຊັ່ນ​ກັນ ສຳ­ລັບ​ຜູ້​ທີ່​ຕ້ອງ­ການ​ຢາກ​ສູບ­ຢາ ແມ່ນ​ໄດ້​ກຳ­ນົດ​ໃຫ້​ສູບ​ຢູ່​ບໍ­ລິ­ເວນ​ທີ່​ຄະ­ນະ​ຮັບ­ຜິດ­ຊອບ​ຈັດ​ໄວ້​ໃຫ້​ສະ­ເພາະ​ເທົ່າ​ນັ້ນ.

  ການ​ຈັດ​ໃຫ້​ສະ­ຖາ­ນີ​ຂົນ­ສົ່ງ​ເປັນ​ເຂດ​ປອດ​ຄວັນ​ຢາ­ສູບ​ຄັ້ງ​ນີ້ ໄດ້​ຕິດ​ປ້າຍ​ຫ້າມ​ສູບ­ຢາ​ພາຍ​ໃນ​ຕົວ​ອາ­ຄານ​ຂອງ​ສະ­ຖາ­ນີ​ລານ​ຈອດ​ລົດ ແລະ ພາຍ​ໃນ​ພາ­ຫະ­ນະ​ຕ່າງໆ ແລະ ຫ້າມ​ບໍ່​ໃຫ້​ມີ​ການ​ໂຄ­ສະ­ນາ ຫຼື ຕິດ​ປ້າຍ​ໂຄ­ສະ­ນາ​ຜະ­ລິດ​ຕະ​ພັນ​ຢາ­ສູບ​ທຸກ​ຊະ­ນິດ​ໃນ​ສະ­ຖາ­ນີ ແລະ ພາຍ​ໃນ​ພາ­ຫະ­ນະ​ຕ່າງໆ ດັ່ງ­ນັ້ນ ຈຶ່ງ​ຮຽກ­ຮ້ອງ​ມາ​ຍັງ​ເຈົ້າ​ໜ້າ­ທີ່ ພະ­ນັກ­ງານ​ປະ­ຈຳ​ສະ­ຖາ­ນີ ແລະ ຜູ້​ຂັບ​ຂີ່​ທຸກ​ຄົນ​ທີ່​ມີ​ພັນ­ທະ ແລະ ໜ້າ­ທີ່ ຈົ່ງ​ໃຫ້​ຄວາມ​ຮ່ວມ​ມື​ປະ­ຕິ­ບັດ​ລະ­ບຽບ​ດັ່ງ­ກ່າວ.

   ສຳ­ລັບ​ການ​ປະ­ຕິ­ບັດ​ລະ­ບຽບ​ຕໍ່​ຜູ້​ທີ່​ລະ­ເມີດ ຖ້າ​ຫາກ​ພົບ​ເຫັນ​ຈະ​ຖືກ​ກ່າວ​ເຕືອນ ແລະ ປັບ​ໃໝ​ຕາມ​ອັດ­ຕາ​ທີ່​ໄດ້​ລະ­ບຸ​ໄວ້​ໃນ​ດຳ­ລັດ​ວ່າ​ດ້ວຍ​ການ​ປັບ​ໃໝ ແລະ ຈະ​ໃຊ້​ມາດ​ຕະ­ການ​ເດັດ­ຂາດ​ຕໍ່​ຜູ້​ລະ­ເມີດ​ລະ­ບຽບ​ການ​ດັ່ງ­ກ່າວ​ຢ່າງ​ເຂັ້ມ​ງວດ ຄື: ຖ້າ​ພົບ​ເຫັນ​ມີ​ການ​ສູບ­ຢາ​ໃນ​ສະ­ຖານ­ທີ່​ຫ້າມ​ສູບ­ຢາ ຄັ້ງ​ທີ 1 ຈະ​ຖືກ​ສຶກ​ສາ​ອົບ­ຮົມ ແລະ ກ່າວ​ເຕືອນ ຄັ້ງ​ທີ 2 ຈະ​ຖືກ​ປັບ​ໃໝ 2 ແສນ​ກີບ ຄັ້ງ​ທີ 3 ຂຶ້ນ​ໄປ​ຈະ​ຖືກ​ປັບ​ໃໝ ຄັ້ງ​ລະ 4 ແສນ​ກີບ ແລະ ຖ້າ​ຫາກ​ພົບ​ເຫັນ​ມີ​ການ​ຂາຍ ຫຼື ຈຳ­ໜ່າຍ​ຜະ­ລິດ​ຕະ​ພັນ​ຢາ­ສູບ​ໃນ​ສະ­ຖານ­ທີ່​ເກືອດ​ຫ້າມ ພາຍ­ຫຼັງ​ຈາກ​ກ່າວ​ເຕືອນ​ແລ້ວ ຄັ້ງ​ທີ 2 ຍັງ​ເຮັດ​ອີກ​ຈະ​ຖືກ​ປັບ​ໃໝ 1 ລ້ານ​ກີບ ຫຼື ມີ​ການ​ລະ­ເມີດ​ອີກ​ເປັນ​ຄັ້ງ​ທີ 3 ຂຶ້ນ​ໄປ​ຈະ​ຖືກ​ປັບ​ໃໝ​ຄັ້ງ​ລະ 1 ລ້ານ​ກີບ.

ຂ່າວທີ່ກ່ຽວຂ້ອງ