ຂ່າວຫຼ້າສຸດ

ເປີດໄຟສີຟ້າສ່ອງກະຈາຍທົ່ວປະຕູໄຊ ເປັນສັນຍະລັກໃຫ້ວັນສິດທິເດັກ

1.138 22 ພ.ຈ. 2019 ຂ່າວໜ້າ​ໜຶ່ງ
ເປີດໄຟສີຟ້າສ່ອງກະຈາຍທົ່ວປະຕູໄຊ ເປັນສັນຍະລັກໃຫ້ວັນສິດທິເດັກ

   ເນື່ອງ​ໃນ​ໂອ­ກາດ​ສະ­ເຫຼີມ­ສະ­ຫຼອງ​ວັນ​ເດັກ​ໂລກ ແລະ ໃນ​ປີ​ນີ້​ກໍ​ພໍ­ດີ​ເປັນ​ວັນ​ຄົບ­ຮອບ 30 ປີ ຂອງ​ການ​ຮັບ­ຮອງ​ເອົາ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ເດັກ (CRC) ສະ­ຖານ­ທີ່​ສຳ­ຄັນ​ໃນ​ທົ່ວ​ໂລກ ທີ່​ເປັນ​ສັນ­ຍະ­ລັກ​ຂອງ​ປະ­ເທດ​ໄດ້​ກາຍ­ເປັນ​ສີ­ຟ້າ ສຳ­ລັບ​ລາວ​ເຮົາ ໃນ​ວັນ​ທີ 20 ພະ­ຈິກ 2019 ໄດ້​ມີ​ພິ­ທີ​ເປີດ​ໄຟ​ໃຫ້​ແສງ​ສີ­ຟ້າ​ສ່ອງ​ກະ­ຈາຍ​ໄປ​ທົ່ວ​ປະ­ຕູ​ໄຊ ເພື່ອ​ເປັນ​ສັນ­ຍະ­ລັກ​ໃຫ້​ຄວາມ​ສຳ­ຄັນ​ແກ່​ສິດ­ທິ​ເດັກ ມີ​ທ່ານ​ນາງ ບັນ­ດິດ ປະ­ທຸມ​ວັນ ຮອງ​ປະ­ທານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ທັງ​ເປັນ​ຮອງ​ປະ­ທານ​ຄະ­ນະ​ກຳ­ມາ​ທິ​ການ ເພື່ອ​ຄວາມ​ກ້າວ­ໜ້າ​ຂອງ​ແມ່­ຍິງ ແລະ ແມ່-ເດັກ  ທ່ານ​ນາງ ບີ​ອາ​ເຕ ດັດ​ສະ​ເທວ ວ່າ­ການ​ຜູ້­ຕາງ­ໜ້າ​ອົງ­ການ​ຢູ​ນີ​ເຊັບ​ປະ­ຈຳ​ລາວ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ພາກ­ສ່ວນ​ກ່ຽວ­ຂ້ອງ ແລະ ນັກ­ຮຽນ​ເຂົ້າ​ຮ່ວມ.

   ເພື່ອ​ໂຄ­ສະ­ນາ​ສົນ­ທິ­ສັນ­ຍາ ວ່າ​ດ້ວຍ​ສິດ­ທິ​ເດັກ ແລະ ລະ­ດົມ​ທຶນ​ເພື່ອ​ຊ່ວຍ­ເຫຼືອ​ເດັກ ຫຼາຍ​ລ້ານ​ຄົນ​ໃນ​ທົ່ວ​ໂລກ​ທີ່​ຍັງ​ບໍ່​ສາ­ມາດ​ເຂົ້າ​ເຖິງ​ການ​ບໍ­ລິ­ການ​ດ້ານ​ສາ­ທາ­ລະ­ນະ​ສຸກ ທີ່​ເໝາະ​ສົມ​ປັບ­ປຸງ​ວຽກ​ງານ​ໂພ­ຊະ​ນາ​ການ ການ​ສຶກ​ສາ ແລະ ການ​ປົກ​ປ້ອງ​ເດັກ ໃນ​ຖາ­ນະ​ທີ່​ເປັນ​ສ່ວນ​ໜຶ່ງ​ຂອງ​ການ​ສະ­ເຫຼີມ­ສະ­ຫຼອງ​ສົນ­ທິ­ສັນ­ຍາ ວ່າ​ດ້ວຍ​ສິດ­ທິ​ເດັກ​ໃນ​ອາ­ທິດ​ຜ່ານ​ມາ ລັດ­ຖະ­ບານ​ລາວ​ຮ່ວມ​ກັບ​ພາກ­ສ່ວນ​ເອ­ກະ​ຊົນ ອົງ​ການ­ຈັດ­ຕັ້ງ​ສັງ­ຄົມ ແລະ ຄູ່​ຮ່ວມ​ພັດ­ທະ­ນາ​ອື່ນໆ ໄດ້​ຈັດ​ກອງ​ປະ­ຊຸມ​ຄົນ​ລາວ​ຮຸ່ນ ປີ 2030 ຂຶ້ນ​ທີ່​ນະ­ຄອນ­ຫຼວງ​ວຽງ​ຈັນ ເຊິ່ງ​ຜູ້​ເຂົ້າ​ຮ່ວມ​ກອງ​ປະ­ຊຸມ​ໄດ້​ໃຫ້​ຄຳ​ໝັ້ນ​ສັນ­ຍາ ທີ່​ຈະ​ສະ­ໜັບ­ສະ­ໜູນ​ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ຂອງ​ລາວ ໂດຍ​ການ​ບັນ­ລຸ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ 1 ແລະ ເປົ້າ​ໝາຍ​ລະ­ດັບ​ຊາດ​ໃນ​ການ​ຫຼຸດ​ອັດ­ຕາ​ສ່ວນ​ຂອງ​ເດັກ ທີ່​ຖືກ​ກີດ​ກັນ​ດ້ວຍ​ຫຼາຍ​ມິ​ຕິ​ພາຍ​ໃນ​ເຄິ່ງ​ປີ 2030 ເພື່ອ​ລົງ­ທຶນ​ໃສ່​ເດັກ​ໄວ​ລຸ້ນ ແລະ ໄວ​ໜຸ່ມ ເຊິ່ງ​ເປັນ​ພາກ­ສ່ວນ​ສຳ­ຄັນ​ໃນ​ການ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ​ສັງ­ຄົມ​ແຫ່ງ​ຊາດ ຄັ້ງ​ທີ 9 ແລະ ຄັ້ງ​ທີ 10.

   ທ່ານ​ນາງ ບັນ­ດິດ ປະ­ທຸມ​ວັນ ກ່າວ​ວ່າ:  ວັນ​ເດັກ​ໂລກ​ໄດ້​ເນັ້ນ​ເຖິງ​ຄວາມ​ສຳ­ຄັນ ຂອງ​ການ​ໃຫ້​ບຸ­ລິ­ມະ­ສິດ​ແກ່​ເດັກ​ທຸກ​ຄົນ ທຸກ​ພາກ­ສ່ວນ ລວມ​ທັງ​ລັດ­ຖະ­ບານ​ຄູ່​ຮ່ວມ​ພັດ­ທະ­ນາ ແລະ ທຸກ​ຄົນ​ໃນ​ສັງ­ຄົມ​ມີ​ບົດ­ບາດ​ສຳ­ຄັນ​ໃນ​ການ​ກຳ­ນົດ​ບຸ­ລິ­ມະ­ສິດ​ຂອງ​ສິດ­ທິ​ເດັກ ເພື່ອ​ອະ­ນາ­ຄົດ​ອັນ​ສົດ­ໃສ​ຂອງ​ເຂົາ­ເຈົ້າ ຫາກ​ພວກ​ເຮົາ​ໃຫ້​ໂອ­ກາດ​ເທົ່າ​ທຽມ​ກັນ ພວກ​ເຂົາ​ຈະ​ສາ­ມາດ​ພັດ­ທະ­ນາ​ຄວາມ​ສາ­ມາດ​ບົ່ມ​ຊ້ອນ​ຂອງ​ເຂົາ­ເຈົ້າ​ຢ່າງ​ເຕັມ​ສ່ວນ.

   ທ່ານ​ນາງ ບີ​ເອ​ເຕ ດັດ​ສະ​ເທວ ໄດ້​ເນັ້ນ​ວ່າ: ໃນ​ມື້­ນີ້​ພວກ​ເຮົາ​ຢາກ​ໃຫ້​ທຸກ​ຄົນ​ນຸ່ງ​ເຄື່ອງ​ສີ­ຟ້າ ເພື່ອ​ເປັນ​ສັນ­ຍະ­ລັກ​ໃນ​ການ​ສະ­ໜັບ­ສະ­ໜູນ​ສິດ­ທິ​ເດັກ ຫາກ​ທຽບ­ໃສ່​ຫຼາຍ​ປີ­ຜ່ານ­ມາ​ສະ­ຖາ­ນະ​ການ​ຂອງ​ເດັກ​ໃນ​ລາວ ເຫັນ​ວ່າ​ມີ​ຄວາມ​ຄືບ​ໜ້າ​ຫຼາຍ​ດ້ານ ແຕ່​ວ່າ​ພວກ​ເຮົາ​ຍັງ​ຕ້ອງ​ເລັ່ງ​ລັດ​ໃຫ້​ມີ​ການ​ປ່ຽນ­ແປງ​ທີ່​ດີ ສຳ­ລັບ​ເດັກ​ທຸກ​ຄົນ​ກ່ອນ​ປີ 2030 ການ​ສ້າງ​ຊັບ­ພະ­ຍາ­ກອນ​ມະ­ນຸດ​ຂອງ​ລາວ ໂດຍ​ການ​ລົງ­ທຶນ​ໃສ່​ເດັກ​ແມ່ນ​ຂໍ​ກຸນ­ແຈ​ສຳ­ຄັນ​ໃນ​ການ​ຮັບ­ປະ­ກັນ ວ່າ​ເດັກ​ທຸກ​ຄົນ​ຈະ​ໄດ້​ຮັບ​ທຸກ​ສິດ​ກ່ອນ​ປີ 2030.

ຂ່າວທີ່ກ່ຽວຂ້ອງ