ລາວ-ຈີນ ຮ່ວມກັນຈັດງານວາງສະແດງສິນຄ້າ

   ງານ​ວາງ­ສະ­ແດງ​ການ​ຮ່ວມ​ມື​ເຕັກ­ນິກ​ເສດ­ຖະ­ກິດ​ແມ່­ນ້ຳ​ຂອງ ແມ່­ນ້ຳ​ລ້ານ​ຊ້າງ ຈະ​ຈັດ​ຂຶ້ນ​ວັນ​ທີ 25-28 ພະ­ຈິກ 2019 ທີ່​ສູນ​ການ​ຄ້າ ລາວ-ໄອ​ເຕັກ ນະ­ຄອນ­ຫຼວງ​ວຽງ​ຈັນ ເລີ່ມ​ແຕ່​ເວ­ລາ 10:00-18:00 ໂມງ​ຂອງ​ທຸກ​ວັນ ເພື່ອ​ເປັນ​ການ​ສົ່ງ­ເສີມ​ສ້າງ​ສາຍ​ພົວ­ພັນ​ຮ່ວມ​ມື​ດ້ານ​ເສດ­ຖະ­ກິດ ຂອງ​ສອງ​ປະ­ເທດ ເວົ້າ​ລວມ ເວົ້າ​ສະ­ເພາະ ເພື່ອ​ສົ່ງ­ເສີມ​ການ​ຄ້າ​ໃຫ້​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ເປີດ​ໂອ­ກາດ​ໃຫ້​ພາກ​ທຸ­ລະ​ກິດ​ຂອງ​ສອງ​ປະ­ເທດ​ໄດ້​ມີ​ການ​ສືບ­ຕໍ່​ແລກ­ປ່ຽນ​ຂໍ້​ມູນ​ຂ່າວ­ສານ​ດ້ານ​ຕ່າງໆ ແນ­ໃສ່​ຊຸກ­ຍູ້​ທາງ​ດ້ານ​ການ​ຄ້າ ການ​ເຊື່ອມ​ໂຍງ ການ​ຮ່ວມ​ມື​ໃນ​ປັດ­ຈຸ­ບັນ ແລະ ສຶກ​ສາ​ຄວາມ​ເປັນ​ໄປ​ໄດ້ ໃນ​ການ​ລົງ­ທຶນ​ຮ່ວມ​ກັນ​ໃນ​ອະ­ນາ­ຄົດ ພ້ອມ​ນັ້ນ ງານ​ຄັ້ງ​ນີ້​ຍັງ​ມີ​ລັກ­ສະ­ນະ​ແຕກ​ຕ່າງ​ຖ້າ​ທຽບ­ໃສ່​ປີ­ຜ່ານ­ມາ ເຊິ່ງ​ໄດ້​ເນັ້ນ​ການ​ນຳ​ສະ­ເໜີ​ໝາກ­ຜົນ​ການ​ຮ່ວມ​ມື​ຂອງ​ບັນ­ດາ​ບໍ­ລິ­ສັດ ແລະ ໂຄງ­ການ​ຈາກ ສປ ຈີນ ໄດ້​ມາ​ລົງ­ທຶນ​ໃນ​ບັນ­ດາ​ປະ­ເທດ​ຕາມ​ລຳ​ແມ່­ນ້ຳ​ຂອງ ນອກ​ນີ້ ພາຍ​ໃນ​ງານ​ຈະ​ມີ​ການ​ຈັດ​ວາງ­ສະ­ແດງ​ຫຼາຍ​ຜະ­ລິດ​ຕະ​ພັນ​ທີ່​ໂດດ​ເດັ່ນ ມີ​ຊື່​ສຽງ ແລະ ມີ​ຄວາມ​ນຳ​ໜ້າ​ທາງ​ດ້ານ​ເຕັກ​ໂນ​ໂລ​ຊີ ເຊັ່ນ: ວັດ­ຖຸ​ອຸ­ປະ­ກອນ ເຄື່ອງ­ມື​ຮັບ​ໃຊ້​ໃນ​ການ​ກໍ່­ສ້າງ​ພື້ນ­ຖານ​ໂຄງ​ລ່າງ ການ​ຄົມ­ມະ­ນາ­ຄົມ ພະ­ລັງ­ງານ​ໄຟ­ຟ້າ ສິນ­ຄ້າ​ທີ່​ນຳ​ເຂົ້າ ແລະ ສົ່ງ​ອອກ​ລົດ​ໃຫຍ່ ແລະ ບັນ­ດາ​ອຸ­ປະ­ກອນ​ທີ່​ຮັບ​ໃຊ້​ການ​ກະ­ເສດ ທັງ​ໝົດ​ນີ້ ມີ​ເນື້ອ­ທີ່​ວາງ­ສະ­ແດງ 200 ຕາ​ແມັດ.

   ພິ­ທີ​ຖະ­ແຫຼງ​ຂ່າວ​ການ​ຈັດ​ງານ​ວາງ­ສະ­ແດງ​ດັ່ງ­ກ່າວ ຈັດ​ຂຶ້ນ​ວັນ​ທີ 21 ພະ­ຈິກ 2019 ທີ່​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ການ​ຖະ­ແຫຼງ​ໂດຍ​ທ່ານ ໄຊ​ສົມ​ເພັດ ນໍ​ຣະ​ສິງ ຫົວ­ໜ້າ​ກົມ​ສົ່ງ­ເສີມ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ທ່ານ Liu Bin ຫົວ­ໜ້າ​ພະ​ແນກ​ສະ­ພາ​ສົ່ງ­ເສີມ​ການ​ຄ້າ​ສາ­ກົນ ສປ ຈີນ ແລະ ທ່ານ ນາງ ຈັນ­ທະ​ຈອນ ວົງ​ໄຊ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ມີ​ຜູ້​ປະ­ກອບ​ການ​ທຸ­ລະ​ກິດ​ຈາກ​ລາວ ແລະ ຈີນ​ເຂົ້າ​ຮ່ວມ.