ຂ່າວຫຼ້າສຸດ

ຕົ້ນປີໜ້າຈະນຳສະເໜີນະຄອນຫຼວງ ເປັນເມືອງທ່ອງທ່ຽວສະອາດອາຊຽນ

1.161 22 ພ.ຈ. 2019 ຂ່າວໜ້າ​ໜຶ່ງ
ຕົ້ນປີໜ້າຈະນຳສະເໜີນະຄອນຫຼວງ ເປັນເມືອງທ່ອງທ່ຽວສະອາດອາຊຽນ

   ກອງ​ປະ­ຊຸມ​ເຜີຍ­ແຜ່ ແລະ ປະ​ເມີນ​ຜົນ​ມາດ­ຕະ­ຖານ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ ຈັດ​ຂຶ້ນ​ວັນ​ທີ 21 ພະ­ຈິກ 2019 ຢູ່​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ມີ​ທ່ານ ອຸ່ນ​ທວງ ຂາວ​ພັນ ຮອງ​ລັດ ຖະ​ມົນ­ຕີ ກະ­ຊວງ ຖວ​ທ ທ່ານ ຄຳ​ຄູນ ໃບ​ລາ­ຕີ ຮອງ​ຫົວ­ໜ້າ​ພະ​ແນກ ຖວ​ທ ນວ ບັນ­ດາ​ຄະ­ນະ​ກຳ­ມະ­ການ​ປະ​ເມີນ​ຜົນ​ມາດ​ຕະ ຖານ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ ຂັ້ນ​ສູນ​ກາງ ແລະ ຂັ້ນ ນວ ເຂົ້າ​ຮ່ວມ.

   ທ່ານ ອຸ່ນ​ທວງ ຂາວ​ພັນ ກ່າວ​ວ່າ: ດັ່ງ​ທີ່​ຮູ້​ນຳ​ກັນ​ແລ້ວ ບັນ­ດາ​ປະ­ເທດ​ອາ​ຊຽນ ກໍ​ຄື ພາກ​ພື້ນ​ອາ­ຊີ​ອາ­ຄະ­ເນ​ມີ​ທ່າ­ແຮງ​ອັນ​ໃຫຍ່​ຫຼວງ ແລະ ມີ​ຄວາມ​ອຸ­ດົມ­ສົມ­ບູນ​ທາງ​ຊັບ­ພະ­ຍາ­ກອນ​ທາງ​ການ­ທ່ອງ­ທ່ຽວ ມີ​ສິ່ງ​ດຶງ​ດູດ​ທາງ​ດ້ານ​ວັດ­ທະ­ນະ­ທຳ ທຳ​ມະ​ຊາດ ແລະ ປະ­ຫວັດ­ສາດ​ທີ່​ຫຼວງ­ຫຼາຍ ເຊິ່ງ​ສາ­ມາດ​ພັດ­ທະ­ນາ​ໃຫ້​ເປັນ​ຜະ­ລິດ​ຕະ​ພັນ​ການ­ທ່ອງ­ທ່ຽວ ນອກ​ນັ້ນ ຍັງ​ມີ​ສະ­ຖຽນ​ລະ​ພາບ​ທາງ​ດ້ານ​ການ­ເມືອງ ແລະ ເສດ­ຖະ­ກິດ​ມີ​ການ​ຂະ­ຫຍາຍ­ຕົວ​ຕໍ່​ເນື່ອງ ດ້ານ​ພື້ນ­ຖານ​ໂຄງ​ລ່າງ ແລະ ການ­ທ່ອງ­ທ່ຽວ​ໄດ້​ກາຍ­ເປັນ​ຂົງ­ເຂດ​ບຸ­ລິ­ມະ­ສິດ​ຂອງ​ຫຼາຍ​ປະ­ເທດ.

   ມາດ­ຕະ­ຖານ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ ແມ່ນ​ໜຶ່ງ​ໃນ 7 ມາດ­ຕະ­ຖານ​ການ­ທ່ອງ­ທ່ຽວ​ອາ​ຊຽນ ທີ່​ໄດ້​ຮັບ­ຮອງ​ໂດຍ​ບັນ­ດາ​ທ່ານ​ລັດ­ຖະ­ມົນ­ຕີ​ທ່ອງ​ທ່ຽວ​ອາ​ຊຽນ ທັງ 10 ປະ­ເທດ ດັ່ງ­ນັ້ນ ແຕ່​ລະ​ປະ­ເທດ​ຕ້ອງ​ໄດ້​ເປັນ​ເຈົ້າ​ການ­ຈັດ­ຕັ້ງ​ປະ­ຕິ­ບັດ​ຮ່ວມ​ກັນ ມາດ­ຕະ­ຖານ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ​ນີ້ ຈະ​ເປັນ​ເຄື່ອງ­ມື​ທີ່​ສຳ­ຄັນ​ໃຫ້​ບັນ­ດາ​ຕົວ​ເມືອງ​ທ່ອງ​ທ່ຽວ ໃນ​ບັນ­ດາ​ປະ­ເທດ​ສະ ມາ​ຊິກ​ອາ​ຊຽນ ໃນ​ການ​ຊ່ວຍ​ປັບ­ປຸງ​ຄຸນ​ນະ​ພາບ​ການ­ທ່ອງ­ທ່ຽວ​ໃຫ້​ດີ​ຂຶ້ນ ທັງ​ເພີ່ມ​ທະ­ວີ​ການ​ແຂ່ງ­ຂັນ​ດ້ານ​ການ​ຕະ­ຫຼາດ ແລະ ເປັນ​ການ​ຊຸກ­ຍູ້​ໃຫ້​ຂະ­ແໜງ­ການ​ປິ່ນ​ອ້ອມ​ອື່ນໆ ໃຫ້​ມີ​ການ​ຂະ­ຫຍາຍ­ຕົວ​ໄປ​ພ້ອມ​ກັນ ທັງ​ເປັນ​ການ​ປະ­ກອບ­ສ່ວນ​ຊ່ວຍ​ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ທ້ອງ­ຖິ່ນ​ມີ​ຄຸນ​ນະ​ພາບ​ດີ​ຂຶ້ນ ນອກ​ນີ້ ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ​ກຳ­ລັງ​ພະ­ຍາ­ຍາມ​ຮ່ວມ​ກັນ​ປັບ­ປຸງ ແລະ ພັດ­ທະ­ນາ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ ເພື່ອ​ໃຫ້​ກາຍ­ເປັນ​ປະ­ຕູ​ທາງ​ເຂົ້າ­ຂອງ​ນັກ​ທ່ອງ​ທ່ຽວ​ຈາກ​ທົ່ວ​ໂລກ ແລະ ເພື່ອ​ກະ ຈາຍ​ນັກ​ທ່ອງ​ທ່ຽວ​ໄປ​ຍັງ​ພື້ນ​ທີ່​ອື່ນໆ​ໃນ​ຂອບ​ເຂດ​ທົ່ວ​ປະ­ເທດ.

   ປີ 2018 ນະ­ຄອນ­ຫຼວງ​ພະ​ບາງ ໄດ້​ຮັບ​ນາມ­ມະ­ຍົດ​ເປັນ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ ເປັນ​ແຫ່ງ​ທຳ​ອິດ​ຂອງ​ປະ­ເທດ​ລາວ ດັ່ງ­ນັ້ນ ການ​ພັດ­ທະ­ນາ​ເມືອງ​ທ່ອງ​ທ່ຽວ​ໃຫ້​ໄດ້​ຕາມ​ມາດ­ຕະ­ຖານ​ອາ​ຊຽນ ມັນ​ບໍ່​ແມ່ນ​ເລື່ອງ​ງ່າຍ​ປານ­ໃດ ແລະ ບໍ່​ສາ­ມາດ​ເຮັດ​ໄດ້​ໃນ​ເວ­ລາ​ສັ້ນ ມັນ​ຮຽກ­ຮ້ອງ​ໃຫ້​ມີ​ການ​ຮ່ວມ​ມື​ຢ່າງ​ຈິງ​ຈັງ ໃກ້­ຊິດ ແລະ ຕໍ່​ເນື່ອງ​ຈາກ​ທຸກ​ພາກ­ສ່ວນ​ໃນ​ຕົວ​ເມືອງ ແຕ່​ເຖິງ​ຢ່າງ­ໃດ​ກໍ​ຕາມ ບັນ­ດາ​ພື້ນ­ຖານ​ຕ່າງໆ​ທີ່ ນວ ມີ​ໃນ​ປັດ­ຈຸ­ບັນ​ໄດ້​ເປັນ​ເງື່ອນ­ໄຂ​ພື້ນ­ຖານ​ໃນ​ການ​ປັບ­ປຸງ ແລະ ພັດ­ທະ­ນາ​ເປັນ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ ໄດ້​ໃນ​ອະ­ນາ­ຄົດ​ອັນ​ໃກ້​ນີ້.

   ໃນ​ໄລ­ຍະ​ຜ່ານ​ມາ ຄະ­ນະ​ກຳ­ມະ­ການ​ເຜີຍ­ແຜ່ ແລະ ຈັດ​ຕັ້ງ​ປະ­ຕິ­ບັດ​ມາດ­ຕະ­ຖານ​ເມືອງ​ທ່ອງ​ທ່ຽວ​ອາ​ຊຽນ​ຂັ້ນ​ສູນ​ກາງ ໄດ້​ລົງ​ມາ​ສົມ­ທົບ​ກັບ​ພະ​ແນກ ຖວ​ທ ນວ ເພື່ອ​ເຜີຍ­ແຜ່​ໃຫ້​ຄະ­ນະ​ກຳ­ມະ­ການ​ຂັ້ນ ນວ ພາກ­ສ່ວນ​ກ່ຽວ­ຂ້ອງ​ຂອງ​ບັນ­ດາ 4 ຕົວ​ເມືອງ​ໃນ ນວ ໂດຍ​ພາຍ​ໃຕ້​ການ​ຊີ້​ນຳ-ນຳ­ພາ​ຂອງ​ຄະ­ນະ​ພັກ-ຄະ­ນະ​ນຳ ນວ ແລະ ການ​ຮ່ວມ​ມື​ຈາກ​ທຸກ​ພາກ­ສ່ວນ​ທີ່​ກ່ຽວ­ຂ້ອງ​ທົ່ວ ນວ ໃນ​ການ​ປັບ­ປຸງ​ເງື່ອນ­ໄຂ​ຕ່າງໆ​ໃຫ້​ໄດ້​ມາດ­ຕະ­ຖານ​ອາ​ຊຽນ ຈະ​ສາ­ມາດ​ນຳ​ສະ­ເໜີ ນວ ເປັນ​ເມືອງ​ທ່ອງ​ທ່ຽວ​ສະ­ອາດ​ອາ​ຊຽນ​ໃນ​ຕົ້ນ​ປີ 2020.

ຂ່າວທີ່ກ່ຽວຂ້ອງ