ຂ່າວຫຼ້າສຸດ

ທົ່ວປະເທດມີຜູ້ຖືກຫາຫຼາຍກວ່າ 8 ພັນຄົນ

1.348 21 ພ.ຈ. 2019 ຂ່າວໜ້າ​ໜຶ່ງ
ທົ່ວປະເທດມີຜູ້ຖືກຫາຫຼາຍກວ່າ 8 ພັນຄົນ

   ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 8 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 20 ພະ­ຈິກ 2019 ໂດຍ​ເປັນ​ປະ­ທານ​ຂອງ​ທ່ານ​ນາງ ສີ­ໃສ ລື​ເດດ​ມູນ​ສອນ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ທ່ານ ຄຳ​ສານ ສຸ​ວົງ ຫົວ­ໜ້າ​ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ບັນ­ດາ​ສະ­ມາ­ຊິກ​ສະ­ພາ​ແຕ່​ລະ​ເຂດ​ເລືອກ​ຕັ້ງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

   ທ່ານ ຄຳ​ສານ ສຸ​ວົງ ໄດ້​ຂຶ້ນ​ລາຍ​ງານ​ການ­ເຄື່ອນ­ໄຫວ​ວຽກ​ງານ ປະ­ຈຳ​ປີ 2019 ແລະ ທິດ​ທາງ​ໜ້າ­ທີ່​ວຽກ​ງານ​ຈຸດ​ສຸມ ປີ 2020 ຂອງ​ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ວ່າ: ໂດຍ​ສືບ­ຕໍ່​ຈັດ​ຕັ້ງ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ X ຂອງ​ພັກ ມະ­ຕິ​ເລກ​ທີ 104 ຂອງ​ສະ­ພາ​ແຫ່ງ​ຊາດ ແລະ ສືບ­ຕໍ່​ຜັນ​ຂະ­ຫຍາຍ 5 ແຜນ​ງານ 21 ໂຄງ­ການ​ໄດ້​ວາງ​ອອກ ໃນ​ໜຶ່ງ​ປີ­ຜ່ານ­ມາ​ຄະ­ນະ​ພັກ ຄະ­ນະ​ນຳ ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ໄດ້​ສຸມ​ຄວາມ​ພະ­ຍາ­ຍາມ ຊີ້​ນຳ-ນຳ­ພາ​ຈັດ​ຕັ້ງ​ປະ­ຕິ­ບັດ​ມີ​ຈຸດ​ດີ ຜົນ­ສຳ­ເລັດ ເປັນ­ຕົ້ນ ໄດ້​ເພີ່ມ​ທະ­ວີ​ຕິດ­ຕາມ​ກວດ­ກາ​ການ​ປະ­ຕິ­ບັດ​ໜ້າ­ທີ່​ຂອງ​ອົງ­ການ​ໄອ​ຍະ​ການ​ປະ­ຊາ­ຊົນ​ຂັ້ນ​ລຸ່ມ ໂດຍ​ລົງ​ເລິກ​ບ່ອນ​ທີ່​ມີ​ຫາງ​ສຽງ​ສັງ­ຄົມ​ຕໍ່​ພະ­ນັກ­ງານ​ໄອ​ຍະ​ການ ຜ່ານ​ການ​ກວດ­ກາ​ເຫັນ​ວ່າ​ພະ­ນັກ­ງານ​ໄອ​ຍະ​ການ​ສ່ວນ​ຫຼາຍ ມີ​ຄວາມ​ຈົງ​ຮັກ​ພັກ­ດີ​ຕໍ່​ພັກ​ຕໍ່​ປະ­ເທດ​ຊາດ ແລະ ຮັບ​ໃຊ້​ປະ­ຊາ­ຊົນ​ດ້ວຍ​ຄວາມ​ຊື່­ສັດ​ທ່ຽງ​ທຳ ແລະ ຄົ້ນ­ຄວ້າ​ແກ້​ໄຂ​ຄະ­ດີ​ມີ​ຄວາມ​ຖືກ­ຕ້ອງ​ຍຸ­ຕິ​ທຳ ແຕ່​ພ້ອມ​ກັນ​ນັ້ນ ຍັງ​ມີ​ພະ­ນັກ­ງານ​ໄອ​ຍະ​ການ​ຈຳ­ນວນ​ໜຶ່ງ​ກຳ​ຫຼັກ­ການ​ກົດ­ໝາຍ​ບໍ່​ແໜ້ນ ຄວາມ​ຮັບ­ຜິດ­ຊອບ​ຕໍ່­ໜ້າ​ທີ່​ບໍ່​ສູງ ຂາດ​ຈັນ​ຍາ​ບັນ​ຈັນ­ຍາ­ທຳ ແລະ ບໍ່​ໂປ່ງ​ໃສ​ໃນ​ການ​ປະ­ຕິ­ບັດ​ໜ້າ­ທີ່ ຈຶ່ງ​ດຳ­ເນີນ​ການ​ກວດ­ກາ​ຖືກ​ສຳ​ຫຼວດ​ປະ­ຕິ­ບັດ​ວິ­ໄນ​ທາງ​ບໍ­ລິ­ຫານ​ດ້ວຍ​ຮູບ​ການ​ຕ່າງໆ ແລະ ຈຳ­ນວນ​ໜຶ່ງ​ຖືກ​ດຳ­ເນີນ​ຄະ­ດີ​ຕາມ​ກົດ­ໝາຍ.

   ໃນ​ໜຶ່ງ​ປີ­ຜ່ານ­ມາ​ໄດ້​ຮັບ​ຄຳ​ຮ້ອງ​ຂອງ​ປະ­ຊາ­ຊົນ ຄຳ​ສະ­ເໜີ​ຂອງ​ອົງ​ການ­ຈັດ­ຕັ້ງ​ຕ່າງໆ ແລະ ຂອງ​ພົນ­ລະ­ເມືອງ 290 ເລື່ອງ ໃນ​ນັ້ນ ໄດ້​ຄົ້ນ­ຄວ້າ​ແກ້​ໄຂ 257 ເລື່ອງ ຍັງ​ກຳ­ລັງ​ຄົ້ນ­ຄວ້າ 33 ເລື່ອງ ທັງ​ໄດ້​ລົງ​ຕິດ­ຕາມ​ກວດ­ກາ​ການ​ນຳ​ໃຊ້​ມາດ​ຕະ­ການ​ສະ­ກັດ​ກັ້ນ ເປັນ­ຕົ້ນ ການ​ກັກ​ຕົວ ຈັບ​ຕົວ ກັກ​ຂັງ​ພາງ ເພື່ອ​ຮັບ­ປະ­ກັນ​ໃຫ້​ຖືກ­ຕ້ອງ​ຕາມ​ກົດ­ໝາຍ​ໃນ 9 ເດືອນ​ຜ່ານ​ມາ ອົງ­ການ​ໄອ​ຍະ​ການ​ປະ­ຊາ­ຊົນ ໄດ້​ອອກ​ມາດ​ຕະ­ການ​ສະ­ກັດ​ກັ້ນ​ຕາມ​ການ​ສະ­ເໜີ​ຂອງ​ອົງ­ການ​ສືບ­ສວນ-ສອບ​ສວນ ເຊັ່ນ: ອອກ​ຄຳ​ສັ່ງ​ຈັບ​ຕົວ 1.494 ສະ­ບັບ ອອກ​ຄຳ​ສັ່ງ​ກັກ​ຂັງ​ພາງ 6.906 ສະ­ບັບ ອອກ​ຄຳ​ສັ່ງ​ຕໍ່​ເວ­ລາ​ກັກ​ຂັງ​ພາງ 4.850 ສະ­ບັບ ອອກ​ຄຳ​ສັ່ງ​ປ່ອຍ​ຕົວ​ພາງ 525 ສະ­ບັບ ອອກ​ຄຳ​ສັ່ງ​ກວດ​ຄົ້ນ​ເຄ­ຫາ​ສະ­ຖານ 528 ສະ­ບັບ ອອກ​ຄຳ​ສັ່ງ​ຢຶດ​ຊັບ 22 ສະ­ບັບ ນອກ​ນັ້ນ ຍັງ​ອອກ​ຄຳ​ສັ່ງ​ແນະ­ນຳ​ໃຫ້​ເຈົ້າ​ໜ້າ­ທີ່ ສືບ­ສວນ-ສອບ​ສວນ ດຳ­ເນີນ​ການ​ສືບ­ສວນ ແລະ ເກັບ​ກຳ​ຂໍ້​ມູນ​ຫຼັກ​ຖານ​ເພີ່ມ​ເຕີມ 1.218 ສະ­ບັບ ແລະ ມີ​ຜູ້​ຖືກ​ຂັງ​ເກີນ​ກຳ­ນົດ 306 ຄົນ ຍິງ 47 ຄົນ ທຽບ­ໃສ່​ປີ 2018 ຫຼຸດ​ລົງ 105 ຄົນ ແລະ ຍັງ​ສືບ­ຕໍ່​ແກ້​ໄຂ ທັງ​ໄດ້​ດຳ­ເນີນ​ກວດ­ກາ​ຂອງ​ກາງ​ຄະ­ດີ ນອກ​ນັ້ນ ໄດ້​ຮັບ​ສຳ­ນວນ​ຄະ­ດີ​ອາ­ຍາ​ຂັ້ນ​ຕົ້ນ 8.358 ເລື່ອງ ແກ້​ໄຂ 7.638 ເລື່ອງ ເທົ່າ​ກັບ 91,39% ຮັບ​ຄະ­ດີ​ແພ່ງ​ຂັ້ນ​ຕົ້ນ 795 ເລື່ອງ ແກ້​ໄຂ 733 ເລື່ອງ ເທົ່າ​ກັບ 92,2% ໄດ້​ຖະ­ແຫຼງ​ໃນ​ທີ່​ປະ­ຊຸມ​ສານ 529 ເລື່ອງ ສານ​ພິ­ຈາ­ລະ­ນາ​ຕັດ­ສິນ​ເອົາ​ຕາມ​ຖະ­ແຫຼງ 526 ເລື່ອງ ເທົ່າ​ກັບ 99,43% ສານ​ຕັດ­ສິນ​ບໍ່​ເອົາ​ຕາມ​ການ​ຖະ­ແຫຼງ 3 ເລື່ອງ ເທົ່າ​ກັບ 0,57% ຮັບ ສຳ­ນວນ​ຄະ­ດີ​ອາ­ຍາ​ຂັ້ນ​ອຸ­ທອນ 319 ເລື່ອງ ແກ້​ໄຂ​ແລ້ວ 304 ເລື່ອງ ເທົ່າ​ກັບ 95,30% ຖະ­ແຫຼງ​ສົ່ງ​ສານ​ຂັ້ນ​ອຸ­ທອນ 304 ເລື່ອງ ຖະ­ແຫຼງ​ໃນ​ທີ່​ປະ­ຊຸມ​ສານ 281 ເລື່ອງ ແລະ ສານ​ພິ­ພາກ­ສາ​ເອົາ​ຕາມ​ຄຳ​ຖະ­ແຫຼງ​ຂອງ​ໄອ​ຍະ​ການ 276 ເລື່ອງ ເທົ່າ​ກັບ 98,22% ໄດ້​ຮັບ​ຄະ­ດີ​ແພ່ງ​ອຸ­ທອນ 501 ເລື່ອງ ແກ້​ໄຂ 457 ເລື່ອງ ເທົ່າ​ກັບ 91,22% ນອກ​ນັ້ນ ຍັງ​ໄດ້​ຮັບ​ສຳ­ນວນ​ຄະ­ດີ​ອາ­ຍາ​ຂັ້ນ​ລົບ​ລ້າງ 199 ເລື່ອງ ແກ້​ໄຂ 131 ເລື່ອງ ເທົ່າ​ກັບ 65,83%.

   ໃນ​ຂອບ​ເຂດ​ທົ່ວ​ປະ­ເທດ ມີ​ຜູ້​ຖືກ​ຫາ ທັງ​ໝົດ 8.129 ຄົນ ຍິງ 871 ຄົນ ຕ່າງ­ປະ­ເທດ 242 ຄົນ ຍິງ 29 ຄົນ ໃນ​ນີ້ ມີ​ຜູ້​ຖືກ​ຫາ​ກັກ​ຂັງ​ເກີນ​ກຳ­ນົດ 306 ຄົນ ຍິງ 47 ຄົນ ຄົນ​ຕ່າງ­ປະ­ເທດ 13 ຄົນ ຍິງ 5 ຄົນ ທຽບ­ໃສ່​ເດືອນ​ກັນ­ຍາ 2018 ຫຼຸດ​ລົງ 105 ຄົນ ຜູ້​ຖືກ​ດັດ​ສ້າງ​ທັງ​ໝົດ 7.152 ຄົນ ຍິງ 155 ຄົນ ນັກ­ໂທດ​ທັງ​ໝົດ 14.909 ຄົນ ຍິງ 1.854 ຄົນ ຕ່າງ­ປະ­ເທດ 373 ຄົນ ຍິງ 36 ຄົນ ເພີ່ມ​ຂຶ້ນ 1.631 ຄົນ ໃນ​ນີ້ ໂທດ​ຢາ​ເສບ​ຕິດ ກວມ 77,52% ໄດ້​ຄົ້ນ­ຄວ້າ​ສະ­ເໜີ​ອະ­ໄພ​ຍະ​ໂທດ​ໃຫ້​ແກ່​ນັກ­ໂທດ ທັງ​ໝົດ 2.153 ຄົນ ແລະ ໄດ້​ເອົາ­ໃຈ­ໃສ່​ຕິດ­ຕາມ​ກວດ­ກາ​ການ​ປະ​ເມີນ​ຄຳ​ຕັດ­ສິນ​ຂອງ​ສານ​ທີ່​ໃຊ້​ໄດ້​ຢ່າງ​ເດັດ­ຂາດ ເອົາ­ໃຈ­ໃສ່​ສ້າງ ແລະ ປັບ­ປຸງ​ບັນ­ດາ​ນິ­ຕິ​ກຳ​ລຸ່ມ​ກົດ­ໝາຍ ສຳ­ເລັດ 8 ສະ­ບັບ.

   ສຳ­ລັບ​ທິດ​ທາງ​ແຜນ­ການ ປີ 2020 ສືບ­ຕໍ່​ເພີ່ມ​ທະ­ວີ​ການ​ປະ­ຕິ­ບັດ​ພາ­ລະ​ບົດ­ບາດ ຕິດ­ຕາມ​ກວດ­ກາ​ການ​ເຄົາ­ລົບ ແລະ ປະ­ຕິ­ບັດ​ກົດ­ໝາຍ ແລະ ສັ່ງ​ຟ້ອງ​ຄະ­ດີ ໂດຍ​ຮັບ­ປະ­ກັນ​ຄວາມ​ຖືກ­ຕ້ອງ​ຮອບ­ດ້ານ ຄົບ​ຖ້ວນ ແລະ ພາ­ວະ​ວິ­ໄສ ສືບ­ຕໍ່​ປັບ­ປຸງ​ກົງ­ຈັກ​ການ­ຈັດ­ຕັ້ງ​ຂັ້ນ​ຕ່າງໆ​ໃຫ້​ມີ​ປະ­ສິດ­ທິ­ພາບ ຕັ້ງ­ໜ້າ​ບຳ­ລຸງ​ກໍ່­ສ້າງ​ຖັນ​ແຖວ​ບຸ​ຄະ­ລາ​ກອນ ໃນ​ລະ­ບົບ​ອົງ­ການ​ໄອ​ຍະ​ການ​ປະ­ຊາ­ຊົນ ແລະ ອົງ­ການ​ໄອ​ຍະ​ການ​ທະ­ຫານ​ໃຫ້​ເຂັ້ມ­ແຂງ ໜັກ​ແໜ້ນ ແລະ ເອົາ­ໃຈ­ໃສ່​ພັດ­ທະ­ນາ​ພື້ນ­ຖານ​ໂຄງ​ລ່າງ ໂດຍ​ສືບ­ຕໍ່​ລົງ­ທຶນ​ກໍ່­ສ້າງ​ລະ­ບົບ​ຫ້ອງ­ການ​ເຮັດ​ວຽກ ໂດຍ​ບຸ­ລິ­ມະ­ສິດ​ໄດ້­ແກ່​ອົງ­ການ​ໄອ​ຍະ​ການ​ປະ­ຊາ­ຊົນ​ເຂດ​ແຂວງ-ນະ­ຄອນ­ຫຼວງ.

ຂ່າວທີ່ກ່ຽວຂ້ອງ