ຂ່າວຫຼ້າສຸດ

ຈີເອັມໂອ ພ້ອມໃຫ້ບໍລິການດ້ານເຄືອຄ່າຍອິນເຕີເນັດໃນລາວ

1.018 21 ພ.ຈ. 2019 ຂ່າວໜ້າ​ໜຶ່ງ
ຈີເອັມໂອ ພ້ອມໃຫ້ບໍລິການດ້ານເຄືອຄ່າຍອິນເຕີເນັດໃນລາວ

   ບໍ­ລິ­ສັດ ຈີ​ເອັມ​ໂອ ແຊັດ​ດ໋ອດ​ຄອມ​ລາວ ຈຳ­ກັດ (GMO-Z.comLao) ແມ່ນ​ບໍ­ລິ­ສັດ​ຮ່ວມ​ທຶນ ລະ­ຫວ່າງ ບໍ­ລິ­ສັດ GMO Internet ແລະ ກຸ່ມ​ບໍ­ລິ­ສັດ AMZ (AMZGroup) ໄດ້​ມີ​ພິ­ທີ​ເປີດ ແລະ ເລີ່ມ​ດຳ­ເນີນ​ທຸ­ລະ​ກິດ​ຢ່າງ​ເປັນ​ທາງ​ການ ວັນ​ທີ 19 ພະ­ຈິກ 2019 ຈັດ​ຂຶ້ນ​ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ມີ​ທ່ານ ບໍ່​ວຽງ​ຄຳ ວົງ​ດາ­ລາ ລັດ­ຖະ­ມົນ­ຕີ​ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ທ່ານ ບຸນ​ສະ­ເຫຼີມ​ໄຊ ເຄນ​ນາ​ວົງ ຮອງ​ລັດ­ຖະ­ມົນ­ຕີ ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ ທ່ານ​ອຸ­ປະ​ທູດ​ຍີ່­ປຸ່ນ​ປະ­ຈຳ​ລາວ ແລະ ນັກ­ທຸ­ລະ­ກິດ​ເຂົ້າ​ຮ່ວມ.

   ທ່ານ Futoshi EBATA ຜູ້­ອຳ­ນວຍ­ການ​ໃຫຍ່ ບໍ­ລິ­ສັດ GMO-Z.comLao ຈຳ­ກັດ ໄດ້​ກ່າວ​ວ່າ: GMO-Z.comLao ຕັ້ງ​ຢູ່​ຊັ້ນ 6 ອາ­ຄານ​ໂຮງ­ແຮມ​ວຽງ​ຈັນ​ພລາ​ຊາ ນະ­ຄອນ­ຫຼວງ​ວຽງ​ຈັນ ດ້ວຍ​ທຶນ​ຈົດ​ທະ­ບຽນ 2.400 ລ້ານ​ກີບ ເປັນ​ບໍ­ລິ­ສັດ​ທຳ​ອິດ​ທີ່​ໃຫ້​ບໍ­ລິ­ການ​ດ້ານ​ເຄືອ​ຄ່າຍ​ອິນ​ເຕີ​ເນັດ​ແບບ​ຄົບ​ວົງ​ຈອນ​ໃນ​ປະ­ເທດ​ລາວ ໂດຍ​ການ​ນຳ​ໃຊ້​ຄວາມ​ຮູ້ ແລະ ປະ­ສົບ​ການ​ໃນ​ການ​ພັດ­ທະ­ນາ​ການ​ບໍ­ລິ­ການ​ດ້ານ​ເຄືອ​ຄ່າຍ​ອິນ​ເຕີ​ເນັດ ແລະ ດຳ­ເນີນ​ທຸ­ລະ​ກິດ ໂດຍ​ບໍ­ລິ­ສັດ GMO Internet Group ເຊິ່ງ​ເປັນ​ກຸ່ມ​ບໍ­ລິ­ສັດ​ອິນ​ເຕີ​ເນັດ ໃນ​ປະ­ເທດ​ຍີ່­ປຸ່ນ​ທີ່​ມີ​ພະ­ນັກ­ງານ​ຫຼາຍ​ກວ່າ 6.000 ຄົນ ລວມ​ມີ 112 ບໍ­ລິ­ສັດ ໂດຍ​ບໍ­ລິ­ສັດ GMO Internet ຖືກ​ລະ­ບຸ​ໄວ້​ເປັນ​ພາກ­ສ່ວນ​ທຳ​ອິດ​ຂອງ​ຕະ­ຫຼາດ​ຫຼັກ​ຊັບ​ຂອງ​ໂຕ​ກຽວ ແລະ GMO Internet Group ໃຫ້​ບໍ­ລິ­ການ​ດ້ານ​ເຄືອ​ຄ່າຍ​ອິນ​ເຕີ​ເນັດ​ຄົບ​ວົງ​ຈອນ ເຊັ່ນ: ເປັນ​ຜູ້​ໃຫ້​ບໍ­ລິ­ການ (ISPs) ໂດ​ເມນ​ຄລາວ​ໂຮ​ສ​ຕິ້ງ Shopping carts ຫຼັກ​ຊັບ​ການ​ຊຳ­ລະ​ຕ່າງໆ ແລະ ບໍ­ລິ­ການ​ອື່ນໆ​ທີ່​ສາ­ມາດ​ນຳ​ໃຊ້​ໄດ້​ຢ່າງ​ປອດ​ໄພ ແລະ ສະ­ດວກ​ສະ­ບາຍ.

   ອີກ​ດ້ານ​ໜຶ່ງ ບໍ­ລິ­ສັດ AMZ Group ແມ່ນ​ມຸ່ງ​ໝັ້ນ​ທີ່​ຈະ​ເປັນ “ບໍ­ລິ­ສັດ ການ​ຄ້າ​ອັນ​ດັບ​ໜຶ່ງ​ໃນ​ປະ­ເທດ​ລາວ” ໂດຍ​ມີ 5 ທຸ­ລະ​ກິດ​ຫຼັກ ຄື: ອຸດ­ສາ­ຫະ­ກຳ​ການ​ຄ້າ ແລະ ເຄື່ອງ​ອຸ­ປະ­ໂພກ-ບໍ­ລິ­ໂພກ ອະ­ສັງ­ຫາ­ລິ­ມະ​ຊັບ ສັນ­ຍາ​ເຊົ່າ​ປະ­ກັນ​ໄພ ແລະ ການ​ເງິນ​ເຕັກ​ໂນ​ໂລ​ຊີ ແລະ ພະ­ລັງ­ງານ ແລະ ການ​ກະ­ສິ­ກຳ ໂດຍ​ຫຼາຍ​ທຸ­ລະ​ກິດ​ໄດ້​ຮັບ​ການ​ພັດ­ທະ­ນາ​ຜ່ານ​ການ​ຮ່ວມ​ທຶນ ກັບ​ບໍ­ລິ­ສັດ​ຊັ້ນ​ນຳ​ລະ­ດັບ​ໂລກ ນອກ​ນັ້ນ ຍັງ​ໃຫ້​ບໍ­ລິ­ການ​ຢ່າງ​ເຕັມ​ຮູບ​ແບບ​ທາງ​ດ້ານ​ຂໍ້​ມູນ​ການ​ຕິດ­ຕໍ່​ສື່­ສານ ແລະ ເງິນ​ທຶນ​ທີ່​ຈຳ­ເປັນ​ໃຫ້​ແກ່​ບໍ­ລິ­ສັດ​ຕ່າງໆ​ໃນ​ອາ​ຊຽນ ແລະ ຍັງ​ມີ​ການ​ໃຫ້​ບໍ­ລິ­ການ​ເພີ່ມ​ເຕີມ​ທີ່​ມີ​ຄຸນ­ຄ່າ ເຊັ່ນ: ດ້ານ​ຂໍ້​ມູນ​ຂ່າວ­ສານ​ການ​ຂົນ­ສົ່ງ​ພາ­ສີ ແລະ ອື່ນໆ.

   ສຳ­ລັບ​ແຜນ­ການ​ດຳ­ເນີນ​ທຸ­ລະ​ກິດ ບໍ­ລິ­ສັດ ຈີ​ເອັມ​ໂອ​ແຊັດ​ດ໋ອດ​ຄອມ​ລາວ ຈຳ­ກັດ ເລີ່ມ​ໃຫ້​ບໍ­ລິ­ການ​ຈົດ​ທະ­ບຽນ ໂດ​ເມນ​ໂຮ​ສ​ຕິ້ງ​ຄລາວ ອອກ​ໃບ­ຢັ້ງ­ຢືນ​ອີ​ເລັກ​ໂຕຣ​ນິກ ແລະ ອອກ​ແບບ​ເວັບ​ໄຊທ໌ ເພື່ອ​ທີ່​ຈະ​ສະ­ໜັບ­ສະ­ໜູນ​ຄົນ​ລາວ ແລະ ເງິນ­ຕາ​ຂອງ​ລາວ ສຳ­ລັບ​ການ​ດຳ­ເນີນ​ທຸ­ລະ​ກິດ​ໃນ​ປະ­ເທດ​ລາວ ພ້ອມ​ທັງ​ໄດ້​ວາງ​ແຜນ​ດ້ານ​ການ​ບໍ­ລິ­ການ​ຕ່າງໆ​ຂອງ GMO Internet Group ເພື່ອ​ການ​ພັດ­ທະ­ນາ​ບັນ­ດາ​ບໍ­ລິ­ການ​ຕ່າງໆ​ໃຫ້​ແທດ­ເໝາະ​ກັບ​ປະ­ເທດ​ລາວ ແລະ ເລີ່ມ​ຕົ້ນ​ທຸ­ລະ​ກິດ​ເພື່ອ​ຊ່ວຍ­ເຫຼືອ​ເຂົ້າ​ໃນ​ການ​ໃຊ້ ICT ໃນ​ປະ­ເທດ​ລາວ.

ຂ່າວທີ່ກ່ຽວຂ້ອງ