ຂ່າວຫຼ້າສຸດ

ມະຫາວິທະຍາໄລຊູໂຈລາວ ຊ່ວຍສ້າງບຸຄະລາກອນໃຫ້ລາວ

999 21 ພ.ຈ. 2019 ຂ່າວໜ້າ​ໜຶ່ງ
ມະຫາວິທະຍາໄລຊູໂຈລາວ ຊ່ວຍສ້າງບຸຄະລາກອນໃຫ້ລາວ

   ພິ­ທີ​ເຊັນ​ສັນ­ຍາ​ຮ່ວມ​ມື​ລະ­ຫວ່າງ​ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ​ແຫ່ງ​ຊາດ​ລາວ ແລະ ມະ­ຫາ­ວິ­ທະ­ຍາ­ໄລ​ຊູ​ໂຈ​ລາວ ແລະ ພິ­ທີ​ເປີດ​ຫ້ອງ​ຮຽນ​ບຳ­ລຸງ​ພາ­ສາ​ຈີນ ຊຸດ​ທີ 31 ຂອງ​ມະ­ຫາ­ວິ­ທະ­ຍາ­ໄລ​ຊູ​ໂຈ​ລາວ (ມຊລ) ຈັດ​ຂຶ້ນ​ວັນ​ທີ 18 ພະ­ຈິກ 2019 ທີ່​ສຳ­ນັກ­ງານ ມຊລ ຮ່ວມ​ລົງ​ນາມ​ລະ­ຫວ່າງ​ທ່ານ ບຸນ​ລັດ ແກ້ວ​ອາ­ສາ ຫົວ­ໜ້າ​ຫ້ອງ­ການ​ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ​ແຫ່ງ​ຊາດ​ລາວ ແລະ ທ່ານ ຮວງ ຊີງ ຮອງ​ອະ­ທິ­ການ​ບໍ­ດີ ມຊລ ມີ​ພະ­ນັກ­ງານ​ທີ່​ກ່ຽວ­ຂ້ອງ​ສອງ​ຝ່າຍ ຄູ-ອາ­ຈານ ແລະ ນັກ​ສຶກ​ສາ​ເຂົ້າ​ຮ່ວມ.

   ການ​ຮ່ວມ​ມື​ກັນ​ສອງ​ຝ່າຍ​ຄັ້ງ​ນີ້ ແມ່ນ​ຝ່າຍ ມຊລ ຈະ​ເປັນ​ຜູ້​ສ້າງ​ບຸ​ຄະ­ລາ​ກອນ​ໃຫ້​ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ​ແຫ່ງ​ຊາດ​ລາວ 10 ທຶນ​ຕໍ່​ຊຸດ ໃນ​ການ​ຮຽນ​ພາ­ສາ​ຈີນ ເນື່ອງ​ຈາກ​ພາ­ສາ​ຈີນ ແມ່ນ​ມີ​ຄວາມ​ຈຳ­ເປັນ​ຕໍ່​ພະ­ນັກ­ງານ​ຂອງ​ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ​ແຫ່ງ​ຊາດ​ລາວ ທີ່​ເຮັດ​ວຽກ​ກັບ​ຫຼາຍ​ອົງ­ການ ໃນ​ນັ້ນ ຈີນ​ຫຼາຍ​ກວ່າ​ໝູ່​ຍ້ອນ​ວ່າ ຈີນ​ເປັນ​ປະ­ເທດ​ໜຶ່ງ​ທີ່​ມີ​ການ​ພົວ­ພັນ​ຮ່ວມ​ມື​ກັບ​ລາວ ແລະ ມາ​ລົງ­ທຶນ​ດຳ­ເນີນ​ທຸ­ລະ​ກິດ​ຢູ່​ລາວ​ຫຼາຍ​ສົມ­ຄວນ ນອກ​ນີ້ ມຊລ ເປັນ​ມະ­ຫາ ວິ­ທະ­ຍາ­ໄລ​ແຫ່ງ​ໜຶ່ງ​ຂອງ​ຈີນ ທີ່​ມີ​ຊື່​ສຽງ​ໄດ້​ມາ​ສ້າງ­ຕັ້ງ​ຢູ່​ລາວ ໂດຍ​ໄດ້​ຮັບ​ການ​ອະ­ນຸ­ມັດ​ຈາກ​ລັດ­ຖະ­ບານ​ລາວ ແລະ ຈີນ ເປັນ​ມະ­ຫາ­ວິ­ທະ­ຍາ­ໄລ​ລວມ​ສູນ ທີ່​ສາ­ມາດ​ເປີດ​ສອນ​ໄດ້​ໃນ​ຫຼາຍ​ສາ­ຂາ​ວິ­ຊາ ທັງ​ລະ­ດັບ​ປະ­ລິນ­ຍາ​ຕີ ປະ­ລິນ­ຍາ​ໂທ ແລະ ປະ­ລິນ­ຍາ​ເອກ ມຊລ ເປັນ​ມະ­ຫາ­ວິ­ທະ­ຍາ­ໄລ​ແຫ່ງ​ທຳ​ອິດ​ຂອງ​ຕ່າງ­ປະ­ເທດ ທີ່​ລັດ­ຖະ­ບານ​ລາວ​ໄດ້​ອະ­ນຸ­ຍາດ​ໃຫ້​ສ້າງ­ຕັ້ງ​ຢູ່​ນະ­ຄອນ­ຫຼວງ​ວຽງ​ຈັນ ແລະ ກໍ​ເປັນ​ມະ­ຫາ­ວິ­ທະ­ຍາ­ໄລ​ແຫ່ງ​ທຳ​ອິດ​ຂອງ​ຈີນ ທີ່​ລັດ­ຖະ­ບານ​ຈີນ​ໄດ້​ອະ­ນຸ­ຍາດ​ໃຫ້​ສ້າງ­ຕັ້ງ​ສາ­ຂາ​ຢູ່​ຕ່າງ­ປະ­ເທດ ເນື່ອງ​ຈາກ​ໄລ­ຍະ​ຜ່ານ​ມາ ກໍ​ຄື ປັດ­ຈຸ­ບັນ ມຊລ ຍັງ​ມີ​ຄວາມ​ຫຍຸ້ງ­ຍາກ​ທາງ​ດ້ານ​ສະ­ຖານ­ທີ່​ຄັບ ແຄບ ດັ່ງ­ນັ້ນ ມຊລ ຈຶ່ງ​ໄດ້​ເປີດ​ການ​ຮຽນ​ປີ​ທີ 1 ຢູ່​ລາວ ແລະ ປີ​ທີ 2 ທີ 3 ຕໍ່​ຢູ່​ຈີນ ແຕ່​ຖ້າ​ຫາກ​ອາ­ຄານ ມຊລ ແຫ່ງ ໃໝ່​ທີ່​ຕັ້ງ​ຢູ່​ບ້ານ​ຊຽງ​ດາ ເມືອງ​ໄຊ​ເສດ​ຖາ ນະ­ຄອນ­ຫຼວງ​ວຽງ​ຈັນ ສຳ­ເລັດ​ເປີດ​ນຳ​ໃຊ້​ປີ 2020 ຈະ​ເຮັດ​ໃຫ້​ມີ​ສະ­ຖານ­ທີ່​ກວ້າງ­ຂວາງ ແລະ ການ​ຮຽນ​ກໍ​ຈະ​ໄດ້​ຮຽນ​ຢູ່​ລາວ ເພື່ອ​ສ້າງ​ຄວາມ​ສະ­ດວກ​ໃຫ້​ແກ່​ນັກ​ສຶກ​ສາ ແລະ ການ​ຊ່ວຍ​ທຶນ​ສ້າງ​ບຸ​ຄະ­ລາ​ກອນ​ໃຫ້​ສະ​ຖາ​ບັນ​ຄົ້ນ­ຄວ້າ​ເສດ­ຖະ­ກິດ​ແຫ່ງ​ຊາດ​ລາວ​ກໍ​ຈະ​ເພີ່ມ​ຂຶ້ນ ເມື່ອ​ເຖິງ​ເວ­ລາ​ນັ້ນ ມຊລ ນອກ­ຈາກ​ຮຽນ​ລະ­ດັບ​ປະ­ລິນ­ຍາ​ຕີ​ແລ້ວ ຍັງ​ໄດ້​ບຳ­ລຸງ​ພາ­ສາ​ຈີນ​ໃຫ້​ພະ­ນັກ­ງານ ນັກ­ຮຽນ-ນັກ​ສຶກ​ສາ​ທີ່​ມີ​ຄວາມ​ສົນ­ໃຈ​ຮຽນ​ຮູ້​ພາ­ສາ​ຈີນ​ຕື່ມ​ອີກ ບໍ່​ວ່າ​ຈະ​ຮຽນ​ອາ­ທິດ​ໜຶ່ງ 3 ວັນ  ແລະ ຮຽນ​ພາກ​ຄ່ຳ​ແລ້ວ­ແຕ່​ຄວາມ​ສະ­ດວກ​ຂອງ​ແຕ່­ລະ­ຄົນ​ຕື່ມ​ອີກ.

ຂ່າວທີ່ກ່ຽວຂ້ອງ