ຂ່າວຫຼ້າສຸດ

ເຈົ້າ​ໜ້າທີ່​ອາວຸໂສ​ອາ​ຊຽນ​ແລກປ່ຽນ​ວຽກ​ສະຫວັດດີ​ການ​ສັງຄົມ

773 20 ພ.ຈ. 2019 ຂ່າວໜ້າ​ໜຶ່ງ
ເຈົ້າ​ໜ້າທີ່​ອາວຸໂສ​ອາ​ຊຽນ​ແລກປ່ຽນ​ວຽກ​ສະຫວັດດີ​ການ​ສັງຄົມ

    ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ໃນ​ນາມ​ຮັບຜິດຊອບ​ວຽກ​ງານ​ສະຫວັດດີ​ການ​ສັງຄົມ ແລະ ການ​ພັດທະນາ​ອາ​ຊຽນ ໄດ້​ເປັນ​ເຈົ້າພາບ​ຈັດ​ກອງ​ປະຊຸມ​ເຈົ້າ​ໜ້າທີ່​ອາວຸໂສ ສະຫວັດດີ​ການ​ສັງຄົມ ແລະ ການ​ພັດທະນາ​ອາ​ຊຽນ ຄັ້ງ​ທີ 15 ຂຶ້ນ​ວັນ​ທີ 19 ພະຈິກ 2019 ທີ່​ໂຮງແຮມ​ດອນ​ຈັນ​ພາ​ເລດ ນະຄອນຫຼວງ​ວຽງ​ຈັນ ເພື່ອ​ກະກຽມ​ໃຫ້​ແກ່​ກອງ​ປະຊຸມ​ລັດຖະມົນຕີ​ສະຫວັດດີ​ການ​ສັງຄົມ ແລະ ການ​ພັດທະນາ​ອາ​ຊຽນ ຄັ້ງ​ທີ 10 ທີ່​ລາວ​ເຮົາ​ເປັນ​ເຈົ້າພາບ ເປັນ​ປະທານ​ຂອງ​ທ່ານ ທິບ​ພະ​ສອນ ສຸ​ຂະ​ທຳ​ມະ​ວົງ ຮອງ​ຫົວໜ້າ​ກົມ​ແຜນການ ແລະ ການ​ຮ່ວມ​ມື​ສາກົນ ຫົວໜ້າ​ເຈົ້າ​ໜ້າທີ່​ອາວຸໂສ​ສະຫວັດດີ​ການ​ສັງຄົມ ແລະ ການ​ພັດທະນາ​ອາ​ຊຽນ ແຫ່ງ ​ສປປ ລາວ ມີ​ບັນດາ​ຫົວໜ້າ​ເຈົ້າ​ໜ້າທີ່​ອາວຸໂສ ຈາກ​ປະເທດ​ສະມາຊິກ​ອາ​ຊຽນ ແລະ ຜູ້ຕາງໜ້າ​ກອງ​ເລຂາ​ອາ​ຊຽນ​ເຂົ້າ​ຮ່ວມ .

    ກອງ​ປະຊຸມ​ຄັ້ງ​ນີ້ ລາວ​ໄດ້​ຮັບ​ມອບ​ວາລະ​ການ​ເປັນ​ປະທານ​ເຈົ້າ​ໜ້າທີ່​ອາວຸໂສ ສະຫວັດດີ​ການ​ສັງຄົມ ແລະ ການ​ພັດທະນາ​ອາ​ຊຽນ ຄັ້ງ​ທີ 15 ຕໍ່​ຈາກ​ປະເທດ​ສິງ​ກາ​ໂປ ເຊິ່ງ​ກອງ​ປະຊຸມ​ໄດ້​ດຳເນີນ​ພາຍ​ໃຕ້​ຫົວຂໍ້ ການ​ສ້າງ​ຄວາມ​ເຂັ້ມແຂງ ວຽກ​ປົກ​ປ້ອງ​ສັງຄົມ​ສຳລັບ​ເດັກ​ດ້ອຍ​ໂອກາດ​ໃນ​ອາ​ຊຽນ ກອງ​ປະຊຸມ​ລະດັບ​ເຈົ້າ​ໜ້າທີ່​ອາວຸໂສ​ອາ​ຊຽນ ແມ່ນ​ໝູນວຽນ​ກັນ​ເປັນ​ເຈົ້າພາບ 1 ປີ​ຕໍ່​ຄັ້ງ ແລະ ທີ່​ຜ່ານ​ມາ​ລາວ​ເຮົາ​ໄດ້​ເປັນ​ເຈົ້າພາບ​ມາ​ແລ້ວ 2 ຄັ້ງ ຄື ປີ 2003 ແລະ ປີ 2014.

   ທ່ານ ທິບ​ພະ​ສອນ ສຸ​ຂະ​ທຳ​ມະ​ວົງ ກ່າວ​ວ່າ: ກອງ​ປະຊຸມ​ຄັ້ງ​ນີ້ ບັນດາ​ປະເທດ​ສະມາຊິກ​ອາ​ຊຽນ ໄດ້​ສະເໜີ​ຫຼາຍ​ບັນຫາ​ເປັນຕົ້ນ ບັນຫາ​ດ້ານ​ເອກະສານ​ການຈັດຕັ້ງ​ປະຕິບັດ​ວຽກ​ງານ​ສຳລັບ​ເດັກ​ດ້ອຍ​ໂອກາດ ສະເໜີ​ງົບປະມານ​ໃນ​ການຈັດຕັ້ງ​ປະຕິບັດ ເພື່ອ​ຊຸກຍູ້​ໃຫ້​ລັດຖະບານ​ເພີ່ມ​ງົບປະມານ ເພີ່ມ​ທະວີ​ເອົາໃຈໃສ່​ປຶກສາ​ຫາລື​ໃນ​ການ​ສ້າງ​ຫຼັກສູດ ເຝິກ​ອົບ​ຮົບ​ນັກ​ສັງຄົມ​ສົງເຄາະ ໄດ້​ສ້າງ​ແຜນ​ປັບປຸງ​ຫຼັກສູດ​ການ​ເຝິກອົບຮົມ ເພື່ອ​ຊຸກຍູ້​ສົ່ງເສີມ​ນັກ​ສັງຄົມ​ສົງເຄາະ ເພາະວ່າ​ປັດຈຸບັນ​ການຈັດຕັ້ງ​ປະຕິບັດ​ວຽກ​ງານ​ດັ່ງກ່າວ ຍັງ​ບໍ່​ພຽງພໍ​ກັບ​ຄວາມ​ຕ້ອງການ ນອກຈາກ​ພາກ​ລັດ​ແລ້ວ​ວຽກ​ດັ່ງກ່າວ​ຍັງ​ເປັນ​ວຽກ​ຂອງ​ທຸກ​ຂະແໜງການ ທັງ​ພາກ​ເອກະ​ຊົນ ແລະ ອົງ​ການຈັດຕັ້ງ​ທີ່​ບໍ່​ສັງກັດ​ລັດຖະບານ ຕ້ອງ​ໄດ້​ມີ​ສ່ວນ​ຮ່ວມ​ປະກອບສ່ວນ ສະເພາະ​ລາວ​ເຮົາ​ອີງ​ຕາມ​ເປົ້າ​ໝາຍ​ສະຫະ​ສະ​ວັດ​ໃນ​ການ​ພັດທະນາ ແຕ່​ນີ້​ຮອດ​ປີ 2030 ໄດ້​ວາງ​ເປົ້າ​ໝາຍ ເພີ່ມ​ທະວີ​ເອົາໃຈໃສ່​ພັດທະນາ​ເດັກ ໂດຍ​ບໍ່​ປະ​ຜູ້​ໃດ​ໄວ້​ທາງ​ຫຼັງ ເດັກ​ທຸກ​ຄົນ​ມີ​ສິດ​ໄດ້​ຮັບ​ການ​ພັດທະນາ.

    ກອງ​ປະຊຸມ​ຄັ້ງ​ນີ້ ໄດ້​ສຸມ​ໃສ່​ປືກ​ສາ​ຫາລື​ບັນຫາ​ທີ່​ຕິດ​ພັນ​ກັບ​ການ​ຮ່ວມ​ມື ເພື່ອ​ຈັດ​ຕັ້ງ​ປະຕິບັດ​ກິດຈະກຳ​ຕ່າງໆ ກ່ຽວ​ກັບ​ວຽກ​ສະຫວັດດີ​ການ​ສັງຄົມ ແລະ ການ​ພັດທະນາ​ອາ​ຊຽນ ໂດຍ​ສະເພາະ ການ​ສ້າງ​ຄວາມ​ເຂັ້ມແຂງ ວຽກ​ປົກ​ປ້ອງ​ສັງຄົມ​ສຳລັບ​ເດັກ​ດ້ອຍ​ໂອກາດ ຄວາມ​ຄືບ​ໜ້າ​ໃນ​ການຈັດຕັ້ງ​ປະຕິບັດ​ແຜນ​ຍຸດ​ທະ​ສາດ​ສະຫວັດດີ​ການ​ສັງຄົມ ແລະ ການ​ພັດທະນາ​ອາ​ຊຽນ (2016-2020) ແລະ ແຜນ​ໃນຕໍ່ໜ້າ ພ້ອມ​ດຽວ​ກັນ​ນີ້ ຄະນະ​ຜູ້​ແທນ​ເຂົ້າ​ຮ່ວມ​ກອງ​ປະຊຸມ ຍັງ​ໄດ້​ແລກປ່ຽນ​ບົດຮຽນ​ກ່ຽວ​ກັບ​ຜົນສຳເລັດ ໃນ​ການຈັດຕັ້ງ​ປະຕິບັດ​ກິດຈະກຳ​ທີ່​ເປັນ​ແບບຢ່າງ ການ​ສ້າງ​ຄວາມ​ອາດ​ສາມາດ ແລະ ບົດຮຽນ​ທີ່​ຖອດ​ຖອນ​ໄດ້ ພາຍ​ໃຕ້​ຂອບ​ການ​ຮ່ວມ​ມື​ວຽກ​ສະຫວັດດີ​ການ​ສັງຄົມ ແລະ ການ​ພັດທະນາ​ອາ​ຊຽນ ອາ​ຊຽນ​ກັບ​ບັນດາ​ອົງ​ການຈັດຕັ້ງ​ສາກົນ ແລະ ອົງ​ການຈັດຕັ້ງ​ບໍ່​ສັງກັດ​ລັດຖະບານ ໂດຍ​ການ​ສະໜັບສະໜູນ​ຮ່ວມ​ມື​ຂອງ​ບັນດາ​ຄະນະ​ຜູ້​ແທນ​ຈາກ​ແຕ່​ລະ​ປະເທດ​ສະມາຊິກ​ອາ​ຊຽນ ກອງ​ປະຊຸມ​ຄັ້ງ​ນີ້ ສາມາດ​ສັງ​ລວມ​ເອົາ​ບັນຫາ​ສຳຄັນ​ຕ່າງໆ​ທີ່​ກ່ຽວ​ພັນ​ກັບ​ວຽກ​ງານ​ສະຫວັດດີ​ການ​ສັງຄົມ ແລະ ການ​ພັດທະນາ​ອາ​ຊຽນ ເພື່ອ​ນຳ​ສະເໜີ​ໃນ​ກອງ​ປະຊຸມ​ລັດຖະມົນຕີ​ສະຫວັດດີ​ການ​ສັງຄົມ ແລະ ການ​ພັດທະນາ​ອາ​ຊຽນ ຄັ້ງ​ທີ 10 ທີ່​ຈະ​ຈັດ​ຂຶ້ນ​ວັນ​ທີ 21 ພະຈິກ 2019.

ຂ່າວທີ່ກ່ຽວຂ້ອງ