ຂ່າວຫຼ້າສຸດ

​ສສຊ ຮັບຮອງ​ເອົາ​ບົດ​ລາຍ​ງານ​ຜົນ​ການ​ຕິດຕາມ​ກວດກາ​ທີ່​ດິນ

700 20 ພ.ຈ. 2019 ຂ່າວໜ້າ​ໜຶ່ງ
​ສສຊ ຮັບຮອງ​ເອົາ​ບົດ​ລາຍ​ງານ​ຜົນ​ການ​ຕິດຕາມ​ກວດກາ​ທີ່​ດິນ

   ກອງ​ປະຊຸມ​ສະໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 19 ພະຈິກ 2019 ໂດຍ​ເປັນ​ປະທານ​ຂອງ​ທ່ານ ບຸນ​ປອນ ບຸດ​ຕະ​ນະ​ວົງ ຮອງ​ປະທານ​ສະພາ​ແຫ່ງ​ຊາດ ເຊິ່ງ​ທ່ານ ບຸນ​ປອນ ສີ​ສຸ​ລາດ ປະທານ​ກຳມາ​ທິ​ການ​ເສດຖະກິດ ເຕັກ​ໂນ​ໂລ​ຊີ ແລະ ສິ່ງແວດລ້ອມ ໄດ້​ຂຶ້ນ​ລາຍ​ງານ​ກ່ຽວ​ກັບ​ຜົນ​ການ​ຕິດຕາມ​ກວດກາ ການຈັດຕັ້ງ​ປະຕິ ບັດ​ນິຕິ​ກຳ​ທີ່​ພົວພັນ​ກັບ​ການ​ເຊົ່າ ແລະ ສຳ​ປະທານ​ທີ່​ດິນ ຈາກ​ນັ້ນ ບັນດາ​ສະມາຊິກ​ສະພາ​ແຫ່ງ​ຊາດ (​ສສຊ) ໄດ້​ສຸມ​ໃສ່​ປະກອບ​ຄຳ​ເຫັນ​ຕາມ​ຄຳ​ຖາມ​ເຈາະ​ຈີ້ມ​ຂອງ​ປະທານ​ກອງ​ປະຊຸມ ພ້ອມ​ທັງ​ເຫັນ​ດີ​ເປັນ​ເອກະ​ພາບ​ຮັບຮອງ​ເອົາ​ບົດ​ລາຍ​ງານ ດັ່ງກ່າວ​ດ້ວຍ​ຄະແນນ​ສຽງ​ເຫັນ​ດີ​ເປັນ​ສ່ວນ​ຫຼາຍ.

    ທ່ານ ບຸນ​ປອນ ສີ​ສຸ​ລາດ ລາຍ​ງານ​ໃຫ້​ຮູ້​ວ່າ: ການ​ຄຸ້ມ​ຄອງ ແລະ ນຳ​ໃຊ້​ທີ່​ດິນ​ໃນ​ໄລຍະ​ຜ່ານ​ມາ ລັດຖະບານ​ໄດ້​ເອົາ ໃຈ​ໃສ່​ປັບປຸງ​ບັນດາ​ກົດໝາຍ ແລະ ນິຕິ​ກຳ​ໃຕ້​ກົດໝາຍ​ຫຼາຍ​ສະບັບ ທີ່​ຕິດ​ພັນ​ກັບ​ການ​ຄຸ້ມ​ຄອງ ແລະ ນຳ​ໃຊ້​ຊັບ​ພະຍາ ກອນ​ທຳ​ມະ​ຊາດ ແລະ ສິ່ງແວດລ້ອມ ໂດຍ​ສະເພາະ ການ​ເຊົ່າ ແລະ ສຳ​ປະທານ​ທີ່​ດິນ ເປັນຕົ້ນ ໄດ້​ຄົ້ນຄວ້າ​ປັບປຸງ​ກົດໝາຍ​ວ່າ​ດ້ວຍ​ທີ່​ດິນ ກົດໝາຍ​ວ່າ​ດ້ວຍ​ການ​ສົ່ງເສີມ​ການ​ລົງທຶນ ກົດໝາຍ​ວ່າ​ດ້ວຍ​ການ​ໄຟຟ້າ ກົດໝາຍ​ວ່າ​ດ້ວຍ​ກະສິກຳ ແລະ ປ່າໄມ້ ໄປ​ຄຽງ​ຄູ່​ກັນ​ນີ້ ລັດຖະບານ​ຍັງ​ໄດ້​ອອກ​ນິຕິ​ກຳ​ໃຕ້​ກົດໝາຍ ເພື່ອ​ຈັດ​ຕັ້ງ​ຜັນ​ຂະຫຍາຍ​ບັນດາ​ກົດໝາຍ ເພື່ອ​ເປັນ​ບ່ອນ​ອີງ​ໃນ​ການຈັດຕັ້ງ​ປະຕິບັດ​ອັນ​ພົ້ນ​ເດັ່ນ ລັດຖະບານ​ໄດ້​ສຳເລັດ​ການ​ສ້າງ​ແຜນ​ແມ່​ບົດ​ຈັດ​ສັນ​ທີ່​ດິນ​ແຫ່ງ​ຊາດ ໄປ​ຄຽງ​ຄູ​ກັບ​ການ​ປັບປຸງ​ບັນດາ​ກົດໝາຍ​ທີ່​ກ່ຽວຂ້ອງ ພ້ອມ​ນັ້ນ ລັດຖະບານ​ຍັງ​ໄດ້​ປັບປຸງ​ລະບົບ​ການຈັດຕັ້ງ​ຄຸ້ມ​ຄອງ​ທີ່​ດິນ ລວມ ທັງ​ການ​ແບ່ງປັນ​ຄຸ້ມ​ຄອງ​ລະຫວ່າງ​ສູນ​ກາງ ແລະ ທ້ອງຖິ່ນ ໂດຍ​ການ​ກຳນົດ​ສິດ ຂອບ​ເຂດ ແລະ ໜ້າທີ່​ໃນ​ການ​ຄຸ້ມ​ຄອງ​ທີ່​ດິນ​ແຕ່​ລະ​ຂັ້ນ​ໃຫ້​ຈະແຈ້ງ ແທດເໝາະ​ກັບ​ສະພາບ​ເສດຖະກິດ​ໃນ​ແຕ່​ລະ​ໄລຍະ ເຊິ່ງ​ເປັນ​ເຄື່ອງມື​ໃຫ້​ແກ່​ສູນ​ກາງ ແລະ ທ້ອງຖິ່ນ ນຳ​ໃຊ້​ເຂົ້າ​ໃນ​ການ​ຄຸ້ມ​ຄອງ​ສິດ-ຄຸ້ມ​ຄອງ​ສັງຄົມ ໃນ​ໄລຍະ​ຜ່ານ​ມາ​ຈົນ​ເຖິງ​ປັດຈຸບັນ ລັດຖະບານ​ໄດ້​ອະນຸ ຍາດ​ໃຫ້​ນັກ​ລົງທຶນ​ທັງ​ພາຍ​ໃນ ແລະ ຕ່າງປະເທດ​ສຳ​ປະທານ​ທີ່​ດິນ​ຂອງ​ລັດ 1.758 ໂຄງການ ກວມ​ເນື້ອທີ່ 11.754.417 ເຮັກຕາ (ແຕ່​ເນື້ອທີ່​ນຳ​ໃຊ້​ຕົວ​ຈິງ​ແມ່ນ 549.248 ເຮັກຕາ) ໃນ​ນັ້ນ ເປັນ​ໂຄງການ​ເຊົ່າ​ທີ່​ດິນ 173 ໂຄງ ການ ສຳ​ປະທານ​ທີ່​ດິນ 1.569 ໂຄງການ ແລະ ສັນຍາ​ຜະລິດ​ແບບ​ມີ​ສ່ວນ​ຮ່ວມ​ກັບ​ປະຊາຊົນ 16 ໂຄງການ ໃນ​ນັ້ນ ສູນ​ກາງ​ອະນຸມັດ 427 ໂຄງການ  ແຂວງ​ອະນຸມັດ 956 ໂຄງການ ເມືອງ​ອະນຸມັດ 185 ໂຄງການ ບ້ານ​ອະນຸມັດ 2 ໂຄງການ ເຊິ່ງ​ກວມ​ເອົາ 4 ຂະແໜງການ ຄື: ຂະແໜງ​ກະສິກຳ 449 ໂຄງການ  ຂະແໜງ​ປ່າໄມ້ 328 ໂຄງການ ຂະ ແໜງ​ບໍ່​ແຮ່​ອະນຸຍາດ​ໃຫ້​ຂຸດ​ຄົ້ນ​ບໍ່​ແຮ່ 622 ໂຄງການ ແລະ ອະນຸຍາດ​ໃຫ້​ຊອກ​ຄົ້ນ​ສຳ​ຫຼວດ​ແຮ່​ທາດ 237 ໂຄງການ ແລະ ຂະແໜງ​ໄຟຟ້າ 122 ໂຄງການ.

    ພາຍຫຼັງ​ສຳເລັດ​ຂຶ້ນ​ລາຍ​ງານ​ບັນດາ ​ສສຊ ໄດ້​ສຸມ​ໃສ່​ປະກອບ​ຄຳ​ຄິດ​ຄຳ​ເຫັນ​ໃນ​ຫຼາຍ​ບັນຫາ ເຊິ່ງ​ໂດຍ​ລວມ​ແລ້ວ ແມ່ນ​ເຫັນ​ດີ​ເປັນ​ເອກະ​ພາບ​ຕໍ່​ບົດ​ລາຍ​ງານ​ດັ່ງກ່າວ ແຕ່​ຍັງ​ມີ​ບາງ​ບັນຫາ​ທີ່ ​ສສຊ ສະເໜີ​ໃຫ້​ລັດຖະບານ​ສືບຕໍ່​ປັບປຸງ​ແກ້​ໄຂ ເປັນຕົ້ນ ໃຫ້​ລັດຖະບານຄົ້ນຄວ້າ​ປັບປຸງ​ລະບຽບ​ການ​ທີ່​ພົວພັນ​ເຖິງ​ການ​ໃຫ້​ເຊົ່າ ແລະ ສຳ​ປະທານ​ທີ່​ດິນ​ຂອງ​ລັດ​ໃຫ້​ຮັດກຸມ​ກວ່າ​ເກົ່າ ການ​ອະນຸຍາດ​ໃຫ້​ເຊົ່າ ແລະ ສຳ​ປະທານ​ທີ່​ດິນ​ຂອງ​ລັດ ຕ້ອງ​ໃຫ້​ສອດຄ່ອງ​ກັບ​ແຜນ​ແມ່​ບົດ ຈັດ​ສັນ​ນຳ​ໃຊ້​ທີ່​ດິນ ແລະ ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ ແລະ ທ້ອງຖິ່ນ ໃນ​ແຕ່​ລະ​ໄລຍະ​ດຳເນີນ​ການ​ຕິດຕາມ​ກວດກາ ແລະ ປະ​ເມີນ​ຜົນ​ການ​ນຳ​ໃຊ້​ທີ່​ດິນ​ໃນ​ບັນດາ​ໂຄງການ​ລົງທຶນ​ຕ່າງໆ​ໃນ​ຂອບ​ເຂດ​ທົ່ວ​ປະເທດ ພ້ອມ​ທັງ​ມີ​ມາດ​ຕະການ​ແກ້​ໄຂ​ຢ່າງ​ເດັດຂາດ​ຕໍ່​ຜູ້​ລະເມີດ​ສັນຍາ​ກົດໝາຍ​ລະບຽບ​ການ ແລະ ບໍ່​ປະຕິບັດ​ຕາມ​ສັນຍາ​ຢ່າງ​ເຄັ່ງ​ຂັດ.

ຂ່າວທີ່ກ່ຽວຂ້ອງ