ຂ່າວຫຼ້າສຸດ

ອີທີແອລ ເປີດໃຫ້ບໍລິການ 4.5G ຢ່າງເປັນທາງການ

675 19 ພ.ຈ. 2019 ຂ່າວໜ້າ​ໜຶ່ງ
ອີທີແອລ ເປີດໃຫ້ບໍລິການ 4.5G ຢ່າງເປັນທາງການ

   ບໍ­ລິ­ສັດ ອີ​ທີ​ແອ​ລ ຈຳ­ກັດ ໄດ້​ຈັດ​ພິ­ທີ​ແນະ­ນຳ​ເຄື່ອງ­ໝາຍ​ການ​ຄ້າ​ໃໝ່ ເຄືອ​ຄ່າຍ​ໃໝ່ ບໍ­ລິ­ການ​ໃໝ່ ແລະ ເປີດ​ໃຫ້​ບໍ­ລິ­ການ 4.5G ຢ່າງ​ເປັນ​ທາງ​ການ ໃນ​ວັນ​ທີ 15 ພະ­ຈິກ 2019 ທີ່​ໂຮງ­ແຮມ​ແລນ​ມາກ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ ບຸນ​ສະ­ເຫຼີມ​ໄຊ ເຄນ​ນາ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ໄປ­ສະ­ນີ​ຄົມ­ມະ­ນາ­ຄົມ ແລະ ການ​ສື່­ສານ ມີ​ທ່ານ ທັນ​ສະ­ໄໝ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ໄປ­ສະ­ນີ​ຄົມ­ມະ­ນາ­ຄົມ ແລະ ການ​ສື່­ສານ ທ່ານ ຮວງ ສູ​ຢຸນ ຜູ້­ອຳ­ນວຍ­ການ​ໃຫຍ່ ບໍ­ລິ­ສັດ ອີ​ທີ​ແອ​ລ ຈຳ­ກັດ ພ້ອມ​ຄະ­ນະ ຕະ­ຫຼອດ​ຮອດ​ຜູ້­ຕາງ­ໜ້າ​ຈາກ​ພາກ​ລັດ ແລະ ເອ­ກະ​ຊົນ ລູກ​ຄ້າ ແລະ ຮ້ານ​ຕົວ​ແທນ​ຈຳ­ໜ່າຍ​ເຂົ້າ​ຮ່ວມ.

   ການ​ເປີດ​ນຳ​ໃຊ້ 4.5G ຄັ້ງ​ນີ້ ຖື​ເປັນ​ຂີດ​ໝາຍ​ອັນ​ສຳ­ຄັນ​ຂອງ​ວຽກ​ງານ​ການ​ສື່­ສານ​ໂທລະ​ຄົມ ມະ​ນາ​ຄົມ​ຂອງ​ລາວ ເວົ້າ​ລວມ ເວົ້າ​ສະ­ເພາະ ກໍ​ຄື ອີ​ທີ​ແອ​ລ ແລະ ຜູ້​ຊົມ­ໃຊ້​ໃນ​ລາວ ຈະ​ໄດ້​ສຳ­ຜັດ​ກັບ​ເຕັກ​ໂນ​ໂລ​ຊີ​ທີ່​ບໍ່​ໃຊ້​ສາຍ ແລະ ສາ­ມາດ​ຕິດ­ຕໍ່​ກັນ​ແບບ​ບໍ່​ມີ​ຂີດ​ຈຳ­ກັດ ພ້ອມ​ນີ້ ບໍ­ລິ­ສັດ​ຍັງ​ໄດ້​ພັດ­ທະ­ນາ​ຜະ­ລິດ​ຕະ​ພັນ​ໃໝ່ ເຄືອ​ຄ່າຍ​ໃໝ່ ແລະ ບໍ­ລິ­ການ​ໃໝ່ ທີ່​ສາ­ມາດ​ຕອບ​ຜູ້​ຊົມ­ໃຊ້​ໂທລະ​ຄົມ­ມະ­ນາ­ຄົມ​ໄດ້​ຢ່າງ​ດີ ແລະ ແນ່­ນອນ​ວ່າ ອີ​ທີ​ແອ​ລ ຈະ​ບໍ່​ຢຸດ​ຢັ້ງ​ໃນ​ການ​ພັດ­ທະ­ນາ​ທາງ​ດ້ານ​ການ​ສື່­ສານ ເພື່ອ​ຕອບ​ສະ­ໜອງ​ການ​ຊົມ­ໃຊ້​ທີ່​ປ່ຽນ­ແປງ​ໄປ​ເລື່ອຍໆ ແລະ ກ້າວ​ໄປ​ສູ່​ຍຸກ​ຂອງ 5G ໃນ​ອະ­ນາ­ຄົດ​ອັນ​ໃກ້​ນີ້.

   ປັດ­ຈຸ­ບັນ ອີ​ທີ​ແອ​ລ ໄດ້​ເປີດ​ໃຫ້​ບໍ­ລິ­ການ 4.5G ຈຳ­ນວນ 1.336 ຈຸດ​ທົ່ວ​ປະ­ເທດ ນອກ​ນີ້​ຍັງ​ມີ​ແຜນ​ຈະ​ສືບ­ຕໍ່​ຂະ­ຫຍາຍ​ພື້ນ​ທີ່​ໃຫ້​ບໍ­ລິ­ການ 4.5G ຕື່ມ​ອີກ ເພື່ອ​ຕອບ​ສະ­ໜອງ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ລູກ​ຄ້າ​ທີ່​ເພີ່ມ​ຫຼາຍ​ຂຶ້ນ ຄຽງ​ຄູ່​ກັນ​ນັ້ນ ຈະ​ເຫັນ​ວ່າ­ການ​ສື່­ສານ​ແບບ​ບໍ່​ໃຊ້​ສາຍ​ໄດ້​ຖືກ​ພັດ­ທະ­ນາ​ໄປ​ຢ່າງ​ໄວ­ວາ ແລະ ເຮັດ​ໄດ້​ຫຼາຍ​ຢ່າງ​ດີ​ຂຶ້ນ​ໄປ​ເລື້ອຍໆ ໃນ​ນາມ​ບໍ­ລິ­ສັດ ອີ​ທີ​ແອ​ລ ທີ່​ເປັນ​ໜຶ່ງ​ໃນ​ຜູ້​ໃຫ້​ບໍ­ລິ­ການ​ດ້ານ​ການ​ສື່­ສານ​ໂທລະ​ຄົມ­ມະ­ນາ­ຄົມ​ໃນ​ລາວ ບໍ່​ໄດ້​ລົດ​ລະ​ໃນ​ການ​ພັດ­ທະ­ນາ​ຕົນ​ເອງ ເພື່ອ​ນຳ​ເອົາ​ເຕັກ​ໂນ​ໂລ​ຊີ​ໃໝ່​ທີ່​ທັນ​ສະ­ໄໝ ແລະ ກ້າວ­ໜ້າ​ມາ​ໃຫ້​ບໍ­ລິ­ການ​ແກ່​ສັງ­ຄົມ​ລາວ​ຕະ­ຫຼອດ​ມາ.

ຂ່າວທີ່ກ່ຽວຂ້ອງ