ຂ່າວຫຼ້າສຸດ

ສຳເລັດ​ແຂ່ງຂັນ​ບານສົ່ງ​ຫາດ​ຊາຍ​ຊີງ​ຂັນ​ປະທານ ​ສບລ

1.649 19 ພ.ຈ. 2019 ວົງຈອນກີລາ
ສຳເລັດ​ແຂ່ງຂັນ​ບານສົ່ງ​ຫາດ​ຊາຍ​ຊີງ​ຂັນ​ປະທານ ​ສບລ

    ການ​ແຂ່ງຂັນ​ກີລາ​ບານສົ່ງ​ຫາດ​ຊາຍ​ຊີງ​ຂັນ​ປະທານ​ສະຫະພັນ​ບານສົ່ງ​ແຫ່ງ​ຊາດ​ລາວ (​ສບລ) ປະຈຳ​ປີ 2019 ເພື່ອ​ສ້າງ​ຂະ​ບວນ​ການ​ສະເຫຼີມສະຫຼອງ​ວັນຊາດ ຄົບຮອບ 44 ປີ (2/12/1975-2/12/2019) ຈັດ​ຂຶ້ນ​ວັນ​ທີ 15-17 ພະຈິກ 2019 ຢູ່​ສະໜາມ​ບານສົ່ງ​ຫາດ​ຊາຍ ມະຫາວິທະຍາໄລ​ແຫ່ງ​ຊາດ (​ມຊ) ມອບ​ລາງວັນ​ໂດຍ​ທ່ານ ຈັນ​ສະໝອນ ຜ່ອງ​ຈັນທາ ປະທານ​ສະຫະພັນ​ບານສົ່ງ​ແຫ່ງ​ຊາດ​ລາວ ມີ​ຄະນະ​ບໍລິຫານ​ງານ ​ສບລ ຄະນະ​ນຳ​ແຕ່​ລະ​ພາກສ່ວນ ແລະ ຄູ​ເຝິກ ນັກກີລາ ຕະຫຼອດ​ຮອດ​ກອງ​ເຊຍ​ເຂົ້າ​ຮ່ວມ.

    ຜ່ານ​ການ​ແຂ່ງຂັນ​ຜົນ​ປາກົດ​ວ່າ: ປະເພດ​ທີມ​ຊາຍ ທີ 1 ລາວ​ສະ​ກາຍ​ເວ 2 ເອົາ​ຊະນະ​ລາວ​ສະ​ກາຍ​ເວ 3 ໄປ​ໄດ້ 2-0 ເຊັດ ດ້ວຍ​ຄະແນນ 21-16 ແລະ 21-19 ຄະແນນ ສ່ວນ​ທີ 3 ຕົກ​ເປັນ​ຂອງ​ທີມ​ອິນ​ທະ​ສອນ ວີ​ຊີ ແລະ ທີ 4 ທີມ​ສວນ​ອາຫານ​ຕາດ​ຖ້ຳ​ເສືອ ຂະນະ​ທີ່​ນັດ​ຊີງ​ຊະນະ​ເລີດ​ປະເພດ​ຍິງ ທີມ​ກົມ​ວິທະຍາສາດ-ປະຫວັດສາດ​ການ​ທະຫານ ພິກ​ແຊງ​ຊະນະ​ແຊັມ​ເກົ່າ​ກອງທັບ 2-1 ເຊັດ 17-21 21-19 ແລະ 15-12 ຄະແນນ ຄອງ​ແຊັມ​ເປັນ​ຄັ້ງ​ທຳ​ອິດ ສ່ວນ​ທີ 3 ວິທະຍາໄລ​ພະລະສຶກສາ ແລະ ທີ 4 ທີມ​ແຟັງ​ມິງ​ໂກ້. 

    ການ​ແຂ່ງຂັນ​ລາຍການ​ນີ້ 2 ປະເພດ ໄດ້​ຮັບ​ລາງວັນ​ເທົ່າ​ກັນ​ຄື: ໄດ້​ຮັບ​ຂັນ ພ້ອມ​ຫຼຽນ​ຄຳ ແລະ ເງິນ​ທີມ​ລະ 2 ລ້ານ​ກີບ ທີ 2 ໄດ້​ຮັບ​ຫຼຽນ​ເງິນ ແລະ ເງິນ​ທີມ​ລະ 1,2 ລ້ານ​ກີບ ທີ 3 ໄດ້​ຮັບ​ຫຼຽນ​ທອງ ແລະ ເງິນ​ທີມ​ລະ 8 ແສນ​ກີບ ແລະ ທີ 4 ໄດ້​ຮັບ​ລາງວັນ​ຊົມເຊີຍ​ເງິນ 4 ແສນ​ກີບ. 

ຂ່າວທີ່ກ່ຽວຂ້ອງ