ຂ່າວຫຼ້າສຸດ

ສະມາຄົມ​ຮ້ານ​ອາຫານ ນວ-ສື່​ມວນ​ຊົນ​ສາຍ​ກີລາ ສ້າງ​ຂະ​ບວນ​ການ​ຕ້ອນຮັບ​ວັນຊາດ

2.283 15 ພ.ຈ. 2019 ວົງຈອນກີລາ
ສະມາຄົມ​ຮ້ານ​ອາຫານ ນວ-ສື່​ມວນ​ຊົນ​ສາຍ​ກີລາ ສ້າງ​ຂະ​ບວນ​ການ​ຕ້ອນຮັບ​ວັນຊາດ

    ສະມາຄົມ​ຮ້ານ​ອາຫານ​ນະຄອນຫຼວງ​ວຽງ​ຈັນ (ນວ) ພາຍ​ໃຕ້​ການ​ສະໜັບສະໜູນ​ຈາກ​ບໍລິສັດ ​ເບຍ​ລາວ ​ຈຳ ກັດ ຊຸກຍູ້​ເຄື່ອງ​ກີລາ 20 ຊຸດ ພ້ອມ​ທັງ​ແຂ່ງຂັນ​ກີລາ​ບານເຕະ ກັບ​ກຸ່ມ​ສື່​ມວນ​ຊົນ​ສາຍ​ກີລາ​ລາວ ເພື່ອ​ສ້າງຂະ​ບວນ​ການ​ຕ້ອນຮັບ​ວັນຊາດ (2 ທັນວາ) ຄົບຮອບ 44 ປີ ທີ່​ຈະ​ມາ​ເຖິງ ທັງ​ເປັນ​ການ​ສ້າງ​ໃຫ້​ມີ​ສຸຂະພາບ​ເຂັ້ມແຂງ ແລະ ຮັດ​ແໜ້ນ​ຄວາມ​ສາມັກຄີ​ຮັກແພງ​ເຊິ່ງ​ກັນ ແລະ ກັນ.

    ພິທີ​ມອບ-ຮັບ​ເຄື່ອງ​ກີລາ ແລະ ແຂ່ງຂັນ​ບານເຕະ​ນັດ​ມິດຕະພາບ​ດັ່ງກ່າວ ຈັດ​ຂຶ້ນ​ວັນ​ທີ 13 ພະຈິກ 2019 ຢູ່​ສະໜາມ​ກີລາ​ບານເຕະ​ເຈົ້າ​ອາ​ນຸ​ວົງ ເຊິ່ງ​ມອບ​ໂດຍ​ທ່ານ ສຸລະ​ສິດ ພາບ​ມີ​ໄຊ ຜູ້​ຈັດການ​ໂປ​ໂມ​ຊັນ ແລະ ສົ່ງເສີມ​ການ​ຂາຍ​ໃນ​ຮ້ານ​ຄ້າ ບໍລິສັດ​ເບຍ​ລາວ ຈຳກັດ ແລະ ຮັບ​ໂດຍ​ທ່ານ ສີ​ພອນ ຈັນທະ​ດາລາ ຮອງ ປະທານ​ກຸ່ມ​ສື່​ມວນ​ຊົນ​ສາຍ​ກີລາ​ລາວ ໂດຍ​ມີ​ທ່ານ ພູ​ວົງ ອິນ​ທະ​ວົງສາ ປະທານ​ສະມາຄົມ​ຮ້ານ​ອາຫານ​ນະ ຄອນ​ຫຼວງ​ວຽງ​ຈັນ-ເບຍ​ລາວ ທ່ານ ພຸດ​ດາ​ມອນ ຈັນທະ​ລາສີ ພິທີ​ກອນ​ສະຖານີ​ໂທລະພາບ​ລາວ​ສະ​ຕາ ຫົວ ໜ້າ​ທີມ​ສື່​ມວນ​ຊົນ​ສາຍ​ກີລາ​ລາວ ພ້ອມ​ດ້ວຍ​ສະມາຊິກ​ທັງ​ສອງ​ພາກສ່ວນເຂົ້າ​ຮ່ວມ. 

    ບັນຍາກາດ​ການ​ແຂ່ງຂັນ ເຕັມ​ໄປ​ດ້ວຍ​ໄມຕີ​ຈິດ​ມິດຕະພາບ ແລະ ມີ​ຄວາມ​ເບີກບານ​ມ່ວນຊື່ນ ໂດຍ​ໝົດ​ເວລາ​ການ​ແຂ່ງຂັນ ສະມາຄົມ​ຮ້ານ​ອາຫານ​ນະຄອນຫຼວງ​ວຽງ​ຈັນ-ເບຍ​ລາວ ເປັນ​ຝ່າຍ ເອົາ​ຊະນະ ທີມ​ສື່​ມວນ​ຊົນ​ສາຍ​ກີລາ​ລາວ 6-4 ປະຕູ. 

ຂ່າວທີ່ກ່ຽວຂ້ອງ