ຂ່າວຫຼ້າສຸດ

ບັນດາກະຊວງ ຊີ້ແຈງຕໍ່ຄຳຊັກຖາມຂອງສະມາຊິກສະພາ

1.220 14 ພ.ຈ. 2019 ຂ່າວໜ້າ​ໜຶ່ງ
ບັນດາກະຊວງ ຊີ້ແຈງຕໍ່ຄຳຊັກຖາມຂອງສະມາຊິກສະພາ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 8 ຂອງ​ສະ­ພາ​ແຫ່ງ​ຊາດ​ຊຸດ​ທີ VIII ວັນ​ທີ 13 ພະ­ຈິກ 2019 ຢູ່​ຫໍ​ປະ­ຊຸມ​ສະ­ພາ​ແຫ່ງ​ຊາດ (ຫຼັກ 6) ໂດຍ​ເປັນ​ປະ­ທານ​ຂອງ​ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ມີ​ຮອງ​ປະ­ທານ​ສະ­ພາ ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ປະ­ຈຳ​ເຂດ​ເລືອກ​ຕັ້ງ​ຕ່າງໆ ເຂົ້າ​ຮ່ວມ.

    ໃນ​ກອງ​ປະ­ຊຸມ ບັນ­ດາ ສສຊ ໄດ້​ຮັບ​ຟັງ​ຄຳ​ຊີ້​ແຈງ​ຈາກ​ບັນ­ດາ​ກະ­ຊວງ​ທີ່​ກ່ຽວ­ຂ້ອງ​ຂອງ​ລັດ­ຖະ­ບານ​ກ່ຽວ​ກັບ​ການ​ສຸມ​ໃສ່​ການ​ແກ້​ໄຂ ແລະ ການ​ພັດ­ທະ­ນາ​ຂະ­ແໜງ­ການ​ຕ່າງໆ​ຂອງ​ລັດ​ໃນ​ໄລ­ຍະ​ຜ່ານ​ມາ ໂດຍ​ສະ­ເພາະ ກະ­ຊວງ​ອຸດ ສາ​ຫະ​ກຳ ແລະ ການ​ຄ້າ (ອຄ) ໄດ້​ຊີ້​ແຈງ​ຕໍ່​ຄຳ​ຖາມ​ເຈາະ​ຈິ້ມ​ຂອງ ສສຊ ແລະ ປະ­ທານ​ສະ­ພາ ກ່ຽວ​ກັບ​ການ​ແກ້​ໄຂ​ບັນ­ຫາ​ສິ່ງ​ກີດ­ຂວາງ​ໃນ​ຂະ­ແໜງ­ການ​ຄ້າ​ລະ­ຫວ່າງ​ຊາຍ​ແດນ  ບັນ­ຫາ​ການ​ນຳ​ເຂົ້າ​ລົດ​ທີ່​ມີ​ລາ­ຄາ​ສູງ  ການ​ອະ­ນຸ ຍາດ​ນຳ​ເຂົ້າ​ປະ­ເພດ​ສິນ­ຄ້າ​ກະ­ສິ­ກຳ​ຈາກ​ປະ­ເທດ​ຫວຽດ­ນາມ ບັນ­ຫາ​ອາ­ຊີບ​ທີ່​ສະ­ຫງວນ​ໄວ້​ໃຫ້​ຄົນ​ລາວ  ແລະ ການ​ຄຸ້ມ​ຄອງ​ລາ­ຄາ​ສິນ­ຄ້າ  ຄ່າ​ບໍ­ລິ­ການ ແລະ ມາດ​ຕະ­ການ​ແກ້​ໄຂ ເພື່ອ​ຫຼຸດ­ຜ່ອນ​ຜົນ​ກະ­ທົບ​ຕໍ່​ການ​ຜະ­ລິດ ແລະ ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ ໂດຍ​ຜ່ານ​ມາ​ເຫັນ​ວ່າ​ວຽກ​ງານ​ດັ່ງ­ກ່າວ​ຍັງ​ບໍ່​ທັນ​ໄດ້​ຮັບ​ການ​ແກ້​ໄຂ​ເທົ່າ​ທີ່​ຄວນ  ໃນ​ນີ້ ສະ­ເພາະ​ການ​ແກ້​ໄຂ ການ​ຄຸ້ມ​ຄອງ​ລາ­ຄາ​ສິນ­ຄ້າ  ຄ່າ​ບໍ­ລິ­ການ ແລະ ມາດ​ຕະ­ການ​ແກ້​ໄຂ ເພື່ອ​ຫຼຸດ­ຜ່ອນ​ຜົນ​ກະ­ທົບ​ຕໍ່​ການ​ຜະ­ລິດ  1 ປີ­ຜ່ານ­ມາ ກະ­ຊວງ ອຄ ໄດ້​ວາງ 5 ແຜນ​ງານ​ໃນ​ການ​ແກ້​ໄຂ ເປັນ­ຕົ້ນ ແຜນ​ງານ​ຄຸ້ມ​ຄອງ​ລາ­ຄາ​ສິນ­ຄ້າ ແລະ ແຜນ​ງານ​ນິ­ຕິ​ກຳ ໂດຍ​ໄດ້​ແຕ່ງ­ຕັ້ງ​ຄະ­ນະ​ຊີ້​ນຳ​ວຽກ​ງານ​ຄຸ້ມ​ຄອງ​ລາ­ຄາ​ສິນ­ຄ້າ ແລະ ຄ່າ​ບໍ­ລິ­ການ ແຜນ​ງານ​ຄຸ້ມ​ຄອງ ແລະ ສົ່ງ­ເສີມ​ລະ­ບົບ​ຕາ​ໜ່າງ​ການ​ຕະ­ຫຼາດ ໂດຍ​ໄດ້​ມອບ​ໃຫ້​ຂະ­ແໜງ​ອຸດ­ສາ­ຫະ­ກຳ ແລະ ການ​ຄ້າ​ແຂວງ ນະ­ຄອນ­ຫຼວງ​ເປັນ​ເຈົ້າ​ການ​ຮ່ວມ​ກັບ​ຂະ­ແໜງ­ການ​ກ່ຽວ­ຂ້ອງ ແລະ ຜູ້​ປະ­ກອບ​ການ​ລົງ​ຈັດ​ຕັ້ງ​ປະ­ຕິ­ບັດ​ຕົວ​ຈິງ ໂດຍ​ຍົກ​ເອົາ​ຕະ­ຫຼາດ​ໃນ​ເທ­ສະ​ບານ​ແຂວງ ແລະ ເມືອງ ເພື່ອ​ສ້າງ​ເປັນ​ຕະ­ຫຼາດ​ຕົວ​ແບບ​ໃຫ້​ໄດ້​ຕາມ​ມາດ­ຖານ​ເງື່ອນ­ໄຂ​ຕົວ​ຈິງ.

    ນອກ​ນີ້ ບັນ­ດາ​ແຂວງ ກໍ​ໄດ້​ແຕ່ງ­ຕັ້ງ​ຄະ­ນະ​ຊ່ວຍ​ວຽກ ເພື່ອ​ຄຸ້ມ​ຄອງ ຄົ້ນ­ຄວ້າ ວິ­ໄຈ ສາ​ເຫດ­ການ​ເໜັງ​ຕີງ​ຂອງ​ລາ­ຄາ​ສິນ­ຄ້າ ໄດ້​ກຳ­ນົດ​ໂຄງ​ປະ­ກອບ​ລາ­ຄາ​ຂາຍ­ຍົກ-ຂາຍ­ຍ່ອຍ​ຂອງ​ສິນ­ຄ້າ ຄວບ​ຄຸມ ເຊັ່ນ: ເຂົ້າ ຊີ້ນ ປາ ເຫຼັກ ແລະ ຊີ­ມັງ ເປັນ­ຕົ້ນ ໂດຍ​ແຈ້ງ​ການ​ໃຫ້​ບັນ­ດາ​ຫ້ອງ­ການ​ອຸດ­ສາ­ຫະ­ກຳ-ການ​ຄ້າ​ເມືອງ ແລະ ເທ­ສະ​ບານ​ເອົາ­ໃຈ­ໃສ່​ຕິດ­ຕາມ​ກວດ­ກາ​ຄຸ້ມ​ຄອງ​ຢ່າງ​ໃກ້​ສິດ ສຳ­ລັບ​ການ​ກຳ­ນົດ​ລາ­ຄາ​ສິນ­ຄ້າ​ຂາຍ­ຍົກ-ຂາຍ­ຍ່ອຍ ກົມ​ການ​ຄ້າ​ພາຍ​ໃນ ແລະ ພາກ­ສ່ວນ​ກ່ຽວ­ຂ້ອງ​ໄດ້​ສົມ­ທົບ​ກັບ​ບໍ­ລິ­ສັດ​ນຳ​ເຂົ້າ-ສົ່ງ​ອອກ ຈຳ­ນວນ​ໜຶ່ງ ໃນ​ການ​ສ້າງ​ໂຄງ​ປະ­ກອບ​ລາ­ຄາ​ຂາຍ­ຍົກ-ຂາຍ­ຍ່ອຍ ເພື່ອ​ກ້າວ​ໄປ​ເຖິງ​ການ​ກຳ­ນົດ​ອັດ­ຕາ​ກຳ­ໄລ​ໃຫ້​ຜູ້​ປະ­ກອບ​ການ​ຢ່າງ​ສົມ​ເຫດ​ສົມ​ຜົນ (ກຳ­ໄລ​ໃຫ້​ບໍ­ລິ­ສັດ​ທີ່​ນຳ​ເຂົ້າ ຫຼື ຜະ­ລິດ 10-20%) ຂອງ​ຕົ້ນ​ທຶນ​ຕົວ​ຈິງ.

    ຜ່ານ​ການ​ປະ­ຕິ­ບັດ​ແຜນ​ງານ​ດັ່ງ­ກ່າວ​ເຫັນ​ວ່າ ຜ່ານ​ມາ​ເຮັດ​ໃຫ້­ການ​ປະ­ຕິ­ບັດ​ລາ­ຄາ​ສິນ­ຄ້າ ແລະ ການ​ບໍ­ລິ­ການ ມີ​ຄວາມ​ສະ­ຫງົບ​ດີ​ຂຶ້ນ​ໂດຍ​ພື້ນ­ຖານ ບໍ່​ມີ​ການ​ຂຶ້ນ​ລາ­ຄາ​ແບບ​ກະ­ໂດດ​ແຮງ ມີ​ພຽງ​ບາງ​ຊະ­ນິດ​ສິນ­ຄ້າ​ທີ່​ຂຶ້ນ​ລາ­ຄາ​ຕາມ​ລະ­ດູ​ການ.

    ປັດ­ຈຸ­ບັນ ຢູ່​ນະ­ຄອນ­ຫຼວງ​ວຽງ​ຈັນ ກະ­ຊວງ ອຄ ພະ​ແນກ ອຄ ນະ­ຄອນ­ຫຼວງ ແລະ ຫ້ອງ​ການ­ເມືອງ ໄດ້​ຢັ້ງ­ຢືນ​ມາດ­ຕະ­ຖານ​ຕະ­ຫຼາດ​ມາດ­ຕະ­ຖານ​ໄດ້​ທັງ​ໝົດ 5 ແຫ່ງ​ຄື: ຕະ­ຫຼາດ​ໂຊກ​ທະ­ວີ ຕະ­ຫຼາດ​ສົ່ງ­ເສີມ​ກະ­ສິ­ກຳ ເມືອງ​ນາ​ຊາຍ​ທອງ ຕະ­ຫຼາດ​ລາວ-ອົດ​ຊີ ເມືອງ​ສີ​ໂຄດ​ຕະ­ບອງ ຕະ­ຫຼາດ​ສະ­ອາດ ບ້ານ​ດົງ​ຄຳ​ຊ້າງ ເມືອງ​ຫາດ​ຊາຍ​ຟອງ ແລະ ຕະ­ຫຼາດ​ໂພນ​ຕ້ອງ-ຈອມ​ມະ­ນີ ເມືອງ​ຈັນ­ທະ​ບູ​ລີ ສຳ­ລັບ​ຢູ່​ທອງ​ຖິ່ນ ພະ​ແນກ ອຄ ແຂວງ ແລະ ເມືອງ​ໄດ້​ປະ­ສານ​ສົມ­ທົບ​ກັບ​ທ້ອງ­ຖິ່ນ​ກ່ຽວ­ຂ້ອງ ຄຸ້ມ​ຄອງ ແລະ ປັບ­ປຸງ​ຕະ­ຫຼາດ​ຈຳ­ໜ່າຍ​ຢູ່​ບັນ­ດາ​ເມືອງ ແລະ ຕະ­ຫຼາດ​ເຂດ​ຊຸມ​ຊົນ ຕະ­ຫຼາດ­ນັດ​ຈາກ​ເຂດ​ຊຸມ​ຊົນ ຕະ­ຫຼາດ­ນັດ​ຈາກ​ເຂດ​ຕົວ​ເມືອງ ຮອດ​ເຂດ​ຊົນ­ນະ­ບົດ​ຫ່າງ​ໄກ​ສອກ­ຫຼີກ ເພື່ອ​ເປັນ​ການ​ພັດ­ທະ­ນາ​ລະ­ບົບ​ຕາ​ໜ່າງ​ຕະ­ຫຼາດ​ໃຫ້​ກວ້າງ ແລະ ເຮັດ​ໃຫ້​ປະ­ຊາ­ຊົນ​ຜູ້​ຊົມ­ໃຊ້​ມີ​ບ່ອນ​ຊື້-ຂາຍ ຫຼາຍ​ຂຶ້ນ.

ຂ່າວທີ່ກ່ຽວຂ້ອງ