ຂ່າວຫຼ້າສຸດ

ສ້າງຕັ້ງຄະນະເຮັດວຽກຮ່ວມ ເພື່ອກະກຽມສ້າງຕັ້ງບໍລິສັດ EDL-T

1.167 14 ພ.ຈ. 2019 ຂ່າວໜ້າ​ໜຶ່ງ
ສ້າງຕັ້ງຄະນະເຮັດວຽກຮ່ວມ ເພື່ອກະກຽມສ້າງຕັ້ງບໍລິສັດ EDL-T

   ພິ­ທີ​ເປີດ​ປ້າຍ​ບໍ­ລິ­ສັດ​ລົງ­ທຶນ​ພະ­ລັງ­ງານ​ໄຟ­ຟ້າ ລາວ-ຈີນ ຈຳ­ກັດ ແລະ ສ້າງ­ຕັ້ງ​ຄະ­ນະ​ເຮັດ​ວຽກ​ຮ່ວມ ເພື່ອ​ກະ­ກຽມ​ສ້າງ­ຕັ້ງ​ບໍ­ລິ­ສັດ​ສາຍ​ສົ່ງ​ໄຟ­ຟ້າ​ແຫ່ງ​ຊາດ​ລາວ (EDL-T) ຈັດ​ຂຶ້ນ​ວັນ​ທີ 8 ພະ­ຈິກ 2019 ຢູ່​ລັດ​ວິ​ສາ​ຫະ​ກິດ​ໄຟ­ຟ້າ​ລາວ (ຟຟລ) ໂດຍ​ມີ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ (ພບ) ທ່ານ ບຸນ​ອູ້ມ ສີ​ວັນ­ເພັງ ຜູ້­ອຳ­ນວຍ­ການ​ໃຫຍ່ ຟຟລ ທ່ານ Jiang Zai dong ເອກ​ອັກ​ຄະ​ລັດ​ຖະ​ທູດ ສປ ຈີນ ປະ­ຈຳ ສປປ ລາວ ທ່ານ Bi Ya xiong ຮອງ​ປະ­ທານ​ບໍ­ລິ­ສັດ​ໄຟ­ຟ້າ​ພາກ​ໃຕ້ ສປ ຈີນ (CSG) ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ທ່ານ ບຸນ​ອູ້ມ ສີ​ວັນ­ເພັງ ກ່າວ​ວ່າ: ໄລ­ຍະ​ຜ່ານ​ມາ ຟຟລ ແລະ CSG ໄດ້​ລົງ​ນາມ​ຮ່ວມ​ມື​ກັນ​ສຶກ​ສາ​ຄວາມ​ເປັນ​ໄປ​ໄດ້​ໂຄງ­ການ​ສະ­ໜອງ​ໄຟ​ໃຫ້​ໂຄງ­ການ​ເສັ້ນ­ທາງ​ລົດ­ໄຟ ລາວ-ຈີນ ແລະ ສຶກ​ສາ​ຄວາມ​ເປັນ​ໄປ​ໄດ້​ໃນ​ການ​ສ້າງ­ຕັ້ງ EDL-T ເພື່ອ​ຮັບ­ປະ­ກັນ​ການ​ສະ­ໜອງ​ໄຟ​ໃຫ້​ມີ​ສະ­ຖຽນ​ລະ​ພາບ ແລະ ຮັບ ປະ­ກັນ​ຄວາມ​ໝັ້ນ­ຄົງ​ຂອງ​ລະ­ບົບ​ໄຟ­ຟ້າ​ລາວ ຈຶ່ງ​ໄດ້​ຮ່ວມ​ກັນ​ສ້າງ­ຕັ້ງ​ບໍ­ລິ­ສັດ​ລົງ­ທຶນ​ພະ­ລັງ­ງານ​ໄຟ­ຟ້າ ລາວ-ຈີນ ຈຳ­ກັດ ໂດຍ ຟຟລ ຖື​ຮຸ້ນ 10% CSG ຖື​ຮຸ້ນ 90% ແລະ ອະ­ນາ­ຄົດ ຟຟລ ສາ­ມາດ​ຊື້​ຮຸ້ນ​ຕື່ມ​ອີກ​ຖ້າ​ມີ​ຄວາມ​ຕ້ອງ­ການ ໃນ​ນີ້ ເບື້ອງ​ຕົ້ນ​ບໍ­ລິ­ສັດ​ດັ່ງ­ກ່າວ ຈະ​ສະ­ໜອງ​ໄຟ​ໃຫ້​ໂຄງ­ການ​ລົດ­ໄຟ ລາວ- ຈີນ​ໃນ​ຮູບ​ແບບ BOT ໂຄງ­ການ​ນີ້​ຈະ​ເລີ່ມ​ກໍ່­ສ້າງ​ທ້າຍ​ປີ 2019 ແລະ ສຳ­ເລັດ​ໃນ​ເດືອນ​ມີ­ນາ 2020 ສ່ວນ​ໂຄງ­ການ​ສຶກ​ສາ​ຄວາມ​ເປັນ​ໄປ​ໄດ້​ໃນ​ການ​ສ້າງ­ຕັ້ງ EDL-T ໄດ້​ລົງ​ນາມ​ຮ່ວມ​ມື​ກັນ​ສຶກ​ສາ​ຄວາມ​ເປັນ​ໄປ​ໄດ້​ໃນ​ເດືອນ​ສິງ­ຫາ 2019 ປັດ­ຈຸ­ບັນ ຟຟລ CSG ສຳ­ເລັດ​ບົດ​ສຶກ​ສາ FS ແລະ ໄດ້​ສົ່ງ​ໃຫ້​ກະ­ຊວງ ພບ ເພື່ອ​ກວດ­ກາ ແລະ ຮັບ­ຮອງ​ເອົາ​ຜົນ​ການ​ສຶກ​ສາ​ຄວາມ​ເປັນ​ໄປ​ໄດ້​ໃນ​ເບື້ອງ​ຕົ້ນ.

   ເມື່ອ​ບໍ່​ດົນ​ມາ​ນີ້ ຟຟລ ແລະ ໄຟ­ຟ້າ​ກຳ­ປູ­ເຈຍ ໄດ້​ລົງ​ນາມ​ຊື້-ຂາຍ​ໄຟ­ຟ້າ​ຮ່ວມ​ກັນ ໂຄງ­ການ​ເຊື່ອມ​ຕໍ່​ລະ­ບົບ​ສາຍ​ສົ່ງ​ໄຟ­ຟ້າ​ແຮງ​ສູງ ລະ­ຫວ່າງ ລາວ-ກຳ­ປູ­ເຈຍ ຈຶ່ງ​ມີ​ຄວາມ​ຈຳ­ເປັນ​ຕ້ອງ​ກໍ່­ສ້າງ​ໃຫ້​ສຳ­ເລັດ​ໂດຍ​ໄວ ເພື່ອ​ສະ­ໜອງ​ໄຟ­ຟ້າ​ໃຫ້​ມີ​ຄວາມ​ໝັ້ນ­ຄົງ ນອກ​ນີ້ ໂຄງ­ການ​ສາຍ​ສົ່ງ​ເຊື່ອມ​ຕໍ່ 500 ກິ​ໂລ​ໂວນ ລາວ-ຈີນ ກໍ​ມີ​ຄວາມ​ຈຳ­ເປັນ​ເພື່ອ​ຮັບ­ປະ­ກັນ​ການ​ສະ­ໜອງ​ໄຟ​ໃຫ້​ໂຄງ­ການ​ລົດ­ໄຟ ລາວ-ຈີນ ມີ​ຄວາມ​ໝັ້ນ­ຄົງ ແລະ ມີ​ສະ­ຖຽນ​ລະ​ພາບ ເພື່ອ​ເຮັດ​ໃຫ້­ການ​ສ້າງ­ຕັ້ງ EDL-T ມີ​ຄວາມ​ຄືບ​ໜ້າ ຈຶ່ງ​ມີ​ຄວາມ​ຈຳ­ເປັນ​ຕ້ອງ​ໄດ້​ສ້າງ­ຕັ້ງ​ຄະ­ນະ​ເຮັດ​ວຽກ​ຮ່ວມ EDL-T ລະ­ຫວ່າງ ຟຟລ ແລະ CSG ໂດຍ​ຄະ­ນະ​ດັ່ງ­ກ່າວ ມີ­ໜ້າ​ທີ່​ຊຸກ­ຍູ້​ໂຄງ­ການ​ກໍ່­ສ້າງ​ສາຍ​ສົ່ງ​ເຊື່ອມ​ຕໍ່ ລາວ-ກຳ­ປູ­ເຈຍ ແລະ ໂຄງ­ການ​ສາຍ​ສົ່ງ​ເຊື່ອມ​ຕໍ່ ລາວ-ຈີນ ປັບ­ປຸງ​ບົດ​ສຶກ​ສາ​ຄວາມ​ເປັນ​ໄປ​ໄດ້​ໃນ​ການ​ສ້າງ EDL-T ໃຫ້​ສຳ­ເລັດ ແລະ ສຶກ​ສາ​ຄວາມ​ເປັນ​ໄປ​ໄດ້​ດ້ານ​ເສດ­ຖະ­ກິດ-ເຕັກ­ນິກ​ຂອງ​ໂຄງ­ການ​ສາຍ​ສົ່ງ​ເຊື່ອມ​ຕໍ່​ກັບ​ປະ­ເທດ​ເພື່ອນ​ບ້ານ.

ຂ່າວທີ່ກ່ຽວຂ້ອງ