ຂ່າວຫຼ້າສຸດ

ສ້າງຂະບວນການ ໃນໂອກາດວັນສັກຢາກັນພະຍາດສັດແຫ່ງຊາດ

966 14 ພ.ຈ. 2019 ຂ່າວໜ້າ​ໜຶ່ງ
ສ້າງຂະບວນການ ໃນໂອກາດວັນສັກຢາກັນພະຍາດສັດແຫ່ງຊາດ

    ເພື່ອ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ວັນ​ບຸນ​ສຳ­ຄັນ​ຂອງ​ຊາດຂອງ​ພັກ ແລະ ຕ້ອນ­ຮັບ​ກອງ​ປະ­ຊຸມ​ໃຫຍ່ 3 ຂັ້ນ​ຂອງ​ພັກ ເຊິ່ງ​ປັດ­ຈຸ­ບັນ​ກຳ­ລັງ​ຫ້າງ​ຫາ​ກະ­ກຽມ ແລະ ຈັດ​ຕັ້ງ​ປະ­ຕິ­ບັດ​ຢູ່​ຂັ້ນ​ຮາກ​ຖານ ທັງ​ເປັນ​ການ​ປູກ​ຈິດ​ສຳ­ນຶກ​ໃຫ້​ປະ­ຊາ­ຊົນ​ບັນ­ດາ­ເຜົ່າ​ພາຍ​ໃນ​ນະ­ຄອນ­ຫຼວງ​ວຽງ​ຈັນ (ນວ) ເວົ້າ​ສະ­ເພາະ​ປະ­ຊາ­ຊົນ ຜູ້​ປະ­ກອບ​ການ​ລ້ຽງ­ສັດ ພາຍ​ໃນ​ເມືອງ​ສັງ​ທອງ ຮູ້​ໄດ້​ຄວາມ​ໝາຍ​ສຳ­ຄັນ​ຂອງ​ວັນ​ສັກ​ຢາ​ກັນ​ພະ­ຍາດ​ສັດ​ແຫ່ງ​ຊາດ ເຊິ່ງ​ໄດ້​ກຳ­ນົດ​ເອົາ​ວັນ​ທີ 11 ພະ­ຈິກ ຂອງ​ທຸກໆ​ປີ.

    ວັນ​ທີ 12 ພະ­ຈິກ 2019 ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ສົມ­ທົບ​ກັບ​ເມືອງ​ສັງ​ທອງ ຈັດ​ພິ­ທີ​ສັກ​ຢາ​ກັນ​ພະ­ຍາ​ສັດ­ລ້ຽງ ໃນ​ໂອ­ກາດ​ວັນ​ສັກ​ຢາ​ກັນ​ພະ­ຍາດ​ສັດ​ແຫ່ງ​ຊາດ ປະ­ຈຳ​ປີ 2019 ຂຶ້ນ ຢູ່​ບ້ານ​ທ່າ​ນາ​ຂາມ ເມືອງ​ສັງ​ທອງ ໂດຍ​ມີ​ທ່ານ ດາວ​ເພັດ ອາ​ລຸນ ເຈົ້າ­ເມືອງ​ສັງ​ທອງ ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ຫຼ້າ​ສາຍ ນວນ​ທາ​ສິງ ກ່າວ​ວ່າ: ປະ­ຊາ­ຊົນ​ລາວ​ມີ​ມູນ­ເຊື້ອ​ການ​ລ້ຽງ­ສັດ​ມາ​ແຕ່​ດົນ​ນານ ຂະ​ບວນ​ການ​ສັກ​ຢາ​ກັນ​ພະ­ຍາດ​ສັດ ໄດ້​ຈັດ​ຕັ້ງ​ປະ­ຕິ­ບັດ​ແຕ່​ປີ 2008 ເປັນ­ຕົ້ນ​ມາ ສະ­ເພາະ ປີ 2018 ຂະ​ບວນ​ການ​ສັກ​ຢາ​ກັນ​ພະ ຍາດ​ສັດ​ຂອງ​ປະ­ຊາ­ຊົນ​ໃນ ນວ ສາ­ມາດ​ສັກ​ຢາ​ກັນ​ພະ­ຍາດ​ເຕົ້າ­ໂຮມ​ເລືອດ ພະ­ຍາດ​ໄຂ້​ບວມ ພະ­ຍາດ​ປາກ​ເປື່ອຍ​ລົງ​ເລັບ ພະ­ຍາດ​ອະ­ຫິ​ວາ​ໝູ ພະ­ຍາດ​ວໍ້ ພະ­ຍາດ​ອະ­ຫິ​ວາ​ສັດ​ປີກ ພະ­ຍາດ​ອະ­ຫິ​ວາ​ເປັດ ແລະ ພະ­ຍາດ​ນິວ​ຄາ​ເຊີນ ໄດ້​ຄື: ຄວາຍ 8.011 ໂຕ ງົວ 44.864 ໂຕ ແບ້ 7.138 ໂຕ ໝູ 173.334 ໂຕ ໝາ 25.620 ໂຕ ສັດ​ປີກ 1.389.790 ໂຕ ການ​ສັກ​ຢາ​ກັນ​ພະ­ຍາດ​ສັດ​ໃນ ນວ ປະ­ຕິ­ບັດ​ໄດ້ 76,25% ຂອງ​ຝູງ​ສັດ ສ່ວນ​ສັດ­ລ້ຽງ​ທີ່​ລ້ຽງ​ແບບ​ເປັນ​ຟາມ​ຜະ­ລິດ​ເປັນ​ສິນ­ຄ້າ ສັກ​ໄດ້ 100% ສຳ­ລັບ​ປີ 2019 ຈະ​ຈັດ​ພິ­ທີ​ສັກ​ຢາ​ກັນ​ພະ­ຍາດ​ສັດ​ຢູ່ 9 ເມືອງ​ເຖິງ​ວ່າ​ໄດ້​ສັກ​ຢາ​ປ້ອງ​ກັນ​ແລ້ວ ແຕ່​ກໍ​ຍັງ​ບໍ່​ທົ່ວ​ເຖິງ ໂດຍ​ໄລ­ຍະ​ຜ່ານ​ມາ​ໄດ້​ມີ​ການ​ລະ­ບາດ​ຂອງ​ພະ­ຍາດ​ສັດ​ຕາມ​ລະດູ​ການ ຍ້ອນ​ການ​ລ້ຽງ­ສັດ​ຂອງ​ປະ­ຊາ­ຊົນ​ສ່ວນ​ໜຶ່ງ ຍັງ​ມີ​ການ​ລ້ຽງ​ແບບ​ປ່ອຍ​ຕາມ​ທຳ​ມະ​ຊາດ ຂາດ​ຄວາມ​ເອົາ­ໃຈ ໃສ່​ຮັກ­ສາ​ສຸ­ຂະ­ພາບ​ສັດ​ເປັນ​ລະ­ບົບ​ຕໍ່​ເນື່ອງ ພະ­ນັກ­ງານ​ວິ­ຊາ​ການ ການ​ລົງ​ສູ່​ຄອບ­ຄົວ​ລ້ຽງ­ສັດ​ຍັງ​ບໍ່​ທົ່ວ​ເຖິງ ຈຶ່ງ​ພາ­ໃຫ້​ເກີດ​ມີ​ພະ­ຍາດ​ເຕົ້າ­ໂຮມ​ເລືອດ​ງົວ-ຄວາຍ ໄຂ້​ບວມ ງົວ-ຄວາຍ ປາກ​ເປື່ອຍ​ລົງ​ເລັບ ງົວ-ຄວາຍ-ໝູ ແລະ ອື່ນໆ ສະ­ເພາະ​ມື້­ນີ້​ໄດ້​ສັກ​ຢາ​ໃຫ້​ງົວ 126 ໂຕ ແລະ ສັດ­ລ້ຽງ​ອື່ນໆ​ຈຳ­ນວນ​ໜຶ່ງ.

ຂ່າວທີ່ກ່ຽວຂ້ອງ