ຂ່າວຫຼ້າສຸດ

ຫາລືສົ່ງເສີມການທ່ອງທ່ຽວ ສີ່ລ່ຽມວັດທະນະທຳລ້ານຊ້າງ

778 14 ພ.ຈ. 2019 ຂ່າວໜ້າ​ໜຶ່ງ
ຫາລືສົ່ງເສີມການທ່ອງທ່ຽວ ສີ່ລ່ຽມວັດທະນະທຳລ້ານຊ້າງ

    ກອງ​ປະ­ຊຸມ​ປຶກ­ສາ​ຫາ­ລື​ເພື່ອ​ທົບ​ທວນ­ຄືນ ແລະ ວາງ​ແຜນ​ການ­ຈັດ­ຕັ້ງ​ປະ­ຕິ­ບັດ​ມາດ­ຕະ­ຖານ​ການ­ທ່ອງ­ທ່ຽວ​ແບບ​ປະ­ຊາ­ຊົນ​ມີ​ສ່ວນ​ຮ່ວມ ຈັດ​ຂຶ້ນ​ວັນ​ທີ 11 ພະ­ຈິກ 2019 ທີ່​ບ້ານ​ສວນ​ມະ­ນີ​ຈັນ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຮ່ວມ​ຂອງ​ທ່ານ ທະ­ວີ​ເພັດ ອຸ­ລາ ຮອງ​ຫົວ­ໜ້າ​ກົມ​ພັດ­ທະ­ນາ​ການ­ທ່ອງ­ທ່ຽວ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ຫົວ­ໜ້າ​ໂຄງ­ການ​ພັດ­ທະ­ນາ​ໂຄງ​ລ່າງ​ພື້ນ­ຖານ​ການ­ທ່ອງ­ທ່ຽວ ແລະ ທ່ານ ທຳ​ມະ­ນູນ ພັກ​ທູບ ຜູ້​ຈັດ­ການ​ອົງ­ການ​ບໍ­ລິ­ຫານ​ການ​ພັດ­ທະ­ນາ​ພື້ນ​ທີ່​ພິ­ເສດ​ເພື່ອ​ການ­ທ່ອງ­ທ່ຽວ​ທີ່​ຍືນ​ຍົງ ປະ­ເທດ​ໄທ ມີ​ສະ­ມາ­ຊິກ​ເຄືອ​ຄ່າຍ​ສີ່​ລ່ຽມ​ວັດ­ທະ­ນະ­ທຳ​ລ້ານ​ຊ້າງ​ທັງ​ພາກ​ລັດ ແລະ ພາກ​ທຸ­ລະ​ກິດ​ລາວ ແລະ ໄທ ເຂົ້າ​ຮ່ວມ.

   ໂຄງ­ການ​ເຄືອ​ຄ່າຍ​ສີ່​ລ່ຽມ​ວັດ­ທະ­ນະ­ທຳ​ລ້ານ​ຊ້າງ​ເປັນ​ການ​ຮ່ວມ​ມື​ລະ­ຫວ່າງ​ພາກ​ລັດ​ກັບ​ພາກ​ທຸ­ລະ​ກິດ​ເພື່ອ​ເຊື່ອມ​ໂຍງ​ການ​ທ່ອງ​ທ່ອງ​ເສັ້ນ­ທາງ​ສີ່​ລ່ຽມ​ວັດ­ທະ­ນະ­ທຳ​ລ້ານ​ຊ້າງ ເຊິ່ງ​ໄທ​ຈະ​ກວມ​ເອົາ 4 ຈັງ­ຫວັດ​ຄື: ຈັງ­ຫວັດ​ເລີຍ ບົວ​ລຳ​ພູ ອຸ­ດອນ​ທາ­ນີ ແລະ ໜອງ​ຄາຍ ສ່ວນ​ລາວ​ເຮົາ​ກໍ​ມີ 4 ແຂວງ​ຄື: ແຂວງ​ໄຊ​ຍະ​ບູ​ລີ ຫຼວງ​ພະ​ບາງ ວຽງ​ຈັນ ແລະ ນະ­ຄອນ­ຫຼວງ​ວຽງ​ຈັນ ໂຄງ­ການ​ນີ້​ເປັນ​ໂຄງ­ການ​ເປີດ​ກວ້າງ ທຸກ​ຄົນ​ສາ­ມາດ​ເຂົ້າ​ມາ​ເປັນ​ສະ­ມາ­ຊິກ​ບໍ່​ວ່າ​ຈະ​ເປັນ​ພາກ​ລັດ ແລະ ພາກ​ທຸ­ລະ​ກິດ ເພື່ອ​ເປັນ​ການ​ສົ່ງ­ເສີມ​ໂຄ­ສະ­ນາ​ເສັ້ນ­ທາງ​ສີ່​ລ່ຽມ​ວັດ­ທະ­ນະ­ທຳ​ລ້ານ​ຊ້າງ​ໃຫ້​ນັກ​ທ່ອງ​ທ່ຽວ​ໄດ້​ເຂົ້າ​ມາ​ເຊື່ອມ​ໂຍງ​ການ­ທ່ອງ­ທ່ຽວ​ລາວ ແລະ ໄທ ເຊິ່ງ​ຜູ້​ໃຫ້­ການ​ສະ­ໜັບ​ສະ­ໜັບ​ຫຼັກ​ໂຄງ­ການ​ນີ້ ຝ່າຍ​ລາວ​ແມ່ນ​ໂຄງ­ການ​ພັດ­ທະ­ນາ​ໂຄງ​ລ່າງ​ພື້ນ­ຖານ​ສົ່ງ­ເສີມ​ການ­ທ່ອງ­ທ່ຽວ ແລະ ຝ່າຍ​ໄທ​ແມ່ນ​ອົງ­ການ​ພັດ­ທະ­ນາ​ພື້ນ​ທີ່​ພິ­ເສດ​ເພື່ອ​ການ­ທ່ອງ­ທ່ຽວ​ແບບ​ຍືນ​ຍົງ.

   ສຳ­ລັບ​ກອງ​ປະ­ຊຸມ​ຄັ້ງ​ນີ້ ຈັດ​ຂຶ້ນ​ໃນ​ໂອ­ກາດ​ທີ່​ສອງ​ຝ່າຍ​ໄດ້​ມາ​ເຂົ້າ​ຮ່ວມ​ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ​ປະ­ຈຳ​ປີ 2019 ທີ່​ໂຄງ­ການ​ໄດ້​ເຂົ້າ​ຮ່ວມ​ວາງ­ສະ­ແດງ ແລະ ແຫ່​ຜາ­ສາດ​ເຜິ້ງ ຜ່ານ​ການ​ປຶກ­ສາ​ຫາ­ລື​ໄດ້​ຕົກ­ລົງ​ກັນ​ນັບ​ແຕ່​ນີ້​ຮອດ​ເດືອນ​ມີ­ນາ 2020 ໂຄງ­ການ​ມີ​ແຜນ​ເຂົ້າ​ຮ່ວມ​ງານ​ວາງ­ສະ­ແດງ​ທ່ຽວ​ທົ່ວ​ໄທ​ຈັດ​ຂຶ້ນ​ຢູ່​ກຸງ​ເທບ ປະ­ເທດ​ໄທ ເຂົ້າ​ຮ່ວມ​ງານ​ຂີ່​ລົດ­ຖີບ​ເພື່ອ​ສຸ­ຂະ­ພາບ ແລະ ຮັກ­ສາ​ສິ່ງ­ແວ­ດລ້ອມ​ຢູ່​ນະ­ຄອນ­ຫຼວງ​ພະ​ບາງ ຈະ​ຈັດ​ຂຶ້ນ​ວັນ​ທີ 21-24 ພະ­ຈິກ 2019 ເຂົ້າ​ຮ່ວມ​ງານ​ບຸນ​ດອກ​ຝ້າຍ​ຫວານ​ຢູ່​ຈັງ­ຫວັດ​ເລີຍ ເຂົ້າ​ຮ່ວມ​ງານ​ບຸນ​ຊ້າງ​ຢູ່​ແຂວງ​ໄຊ​ຍະ​ບູ​ລີ ເຊິ່ງ​ໄດ້​ຂໍ​ເອົາ​ຊ້າງ 1 ເຊືອກ ເພື່ອ​ເປັນ​ຕົວ​ແທນ​ໃຫ້​ໂຄງ­ການ​ທີ່​ຕິດ​ໂລ​ໂກ​ໃສ່​ຊ້າງ​ເພື່ອ​ແຫ່​ຂະ ບວນ​ໄປ​ນຳ ສຳ​ຫຼວດ​ເສັ້ນ­ທາງ​ໂຄງ­ການ​ສີ່​ລ່ຽມ​ວັດ­ທະ­ນະ­ທຳ​ລ້ານ​ຊ້າງ​ເພື່ອ​ການ​ໂຄ­ສະ­ນາ​ການ­ທ່ອງ­ທ່ຽວ ນອກ​ນີ້​ໂຄງ­ການ​ຈະ​ໄດ້​ມີ​ການ​ປະ​ເມີນ​ມາດ­ຕະ­ຖານ​ທີ່​ປະ­ຊາ­ຊົນ​ມີ​ສ່ວນ​ຮ່ວມ​ທີ່​ເອົາ​ມາດ­ຕະ­ຖານ​ໂລກ ແລະ ໄທ​ມາ​ເປັນ​ຕົວ​ຊີ້​ວັດ ເພື່ອ​ຈະ​ໄດ້​ປັບ​ໃຫ້​ມັນ​ສອດ­ຄ່ອງ​ກັບ​ພື້ນ​ທີ່​ບັນ­ດາ​ບ້ານ​ຕ່າງໆ​ຢູ່​ສອງ​ປະ­ເທດ​ລາວ ແລະ ໄທ ມີ​ການ​ສ້າງ­ຕັ້ງ​ຄະ­ນະ​ກຳ­ມະ­ການ​ມາ​ປະ​ເມີນ​ວ່າ ບ້ານ​ໃດ​ໄດ້​ມາດ­ຕະ­ຖານ​ຈະ​ໄດ້​ໃຫ້​ຢັ້ງ­ຢືນ ແລະ ຈະ​ນຳ​ເອົາ​ບ້ານ​ທີ່​ໄດ້​ໃບ­ຢັ້ງ­ຢືນ​ເພື່ອ​ໄປ​ຮັບ​ລາ­ງວັນ​ລະ­ດັບ​ສາ­ກົນ ໂດຍ​ລວມ​ແລ້ວ​ມີ​ຫຼາຍ​ກິດ­ຈະ­ກຳ​ທີ່​ໂຄງ­ການ​ໄດ້​ຈັດ​ຕັ້ງ​ປະ­ຕິ­ບັດ​ທີ່​ມີ​ພາກ​ລັດ​ພາກ​ທຸ­ລະ​ກິດ ແລະ ປະ­ຊາ­ຊົນ​ມີ​ສ່ວນ​ຮ່ວມ.

ຂ່າວທີ່ກ່ຽວຂ້ອງ