ຂ່າວຫຼ້າສຸດ

ທຳລາຍພືດຜັກທີ່ນຳເຂົ້າບໍ່ຖືກຕ້ອງຫຼາຍກວ່າ 1 ໂຕນ

657 14 ພ.ຈ. 2019 ຂ່າວໜ້າ​ໜຶ່ງ
ທຳລາຍພືດຜັກທີ່ນຳເຂົ້າບໍ່ຖືກຕ້ອງຫຼາຍກວ່າ 1 ໂຕນ

    ສະ­ຖາ­ນີ​ກັກ​ກັນ​ພືດ​ດົງ​ໂພ​ສີ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ທຳ­ລາຍ​ພືດ​ຜັກ​ທີ່​ນຳ​ເຂົ້າ​ບໍ່​ຖືກ​ລະ­ບຽບ​ກົດ­ໝາຍ ວັນ​ທີ 12 ພະ­ຈິກ 2019 ຢູ່​ສະ­ຖາ­ນີ​ດັ່ງ­ກ່າວ ໂດຍ​ມີ​ທ່ານ ວັນ­ນາ ຄຳ​ໂພ​ໂຊ ຫົວ  ໜ້າ​ດ່ານ​ປ້ອງ​ກັນ​ພືດ​ສາ­ກົນ​ດົງ​ໂພ​ສີ ທ່ານ ຄຳ​ພັດ ສີ​ລາ​ວົງ ຮອງ​ຫົວ­ໜ້າ​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບ ລາວ-ໄທ 1 ພ້ອມ​ດ້ວຍ​ຜູ້­ຕາງ­ໜ້າ​ຈາກ​ອົງ­ການ​ອາ­ຫານ ແລະ ຢາ ຂະ­ແໜງ​ປູກ­ຝັງ ແພດ​ປະ­ຈຳ​ດ່ານ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ພືດ​ຜັກ​ທີ່​ນຳ​ມາ​ທຳ­ລາຍ​ຄັ້ງ​ນີ້ ແມ່ນ​ພືດ​ທີ່​ເຈົ້າ​ໜ້າ­ທີ່​ພາ­ສີ​ປະ­ຈຳ​ຢູ່​ດ່ານ​ມິດ­ຕະ­ພາບ ລາວ-ໄທ 1 ກວດ​ພົບ ແລະ ຢຶດ​ໄດ້​ໃນ​ວັນ​ທີ 7 ພະ­ຈິກ 2019 ຈາກ​ການ​ນຳ​ເຂົ້າ​ຜ່ານ​ລົດ­ເມ​ປະ­ຈຳ​ທາງ​ອຸ­ດອນ-ວຽງ​ຈັນ 12 ລາຍ­ການ ໃນ​ນີ້ ມີ​ໝາກ­ເຜັດ 350 ກິ​ໂລ ໝາກ​ລີ້ນ­ໄມ້ 20 ກິ​ໂລ ຫອມ​ບົ່ວ 170 ກິ​ໂລ ດອກ​ຜັກ 100 ກິ​ໂລ ໝາກ­ແຕງ 50 ກິ​ໂລ ໝາກ​ງຸ​ງ້ຽວ 120 ກິ​ໂລ ໝາກ­ຖົ່ວ 80 ກິ​ໂລ ໝາກ­ຖົ່ວ​ພູ 20 ກິ​ໂລ ຜັກ​ກາດ 90 ກິ​ໂລ ໝາກ​ມະ­ລະ 30 ກິ​ໂລ ຫົວ​ຜັກ​ກາດ​ຂາວ 20 ກິ​ໂລ ເຜືອກ 20 ກິ​ໂລ ລວມ​ທັງ​ໝົດ 1.070 ກິ​ໂລ ເຊິ່ງ​ເປັນ​ຂອງ​ທ້າວ ໂຕ​ເລັກ ອາ­ຍຸ 30 ປີ ບ້ານ​ໜອງ​ສະ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ.

    ພືດ​ຜັກ​ທັງ​ໝົດ​ນີ້​ບໍ່​ມີ​ໃບ​ອະ­ນຸ­ຍາດ​ນຳ​ເຂົ້າ ບໍ່​ມີ​ໃບ­ຢັ້ງ­ຢືນ​ດ້ານ​ສຸ​ຂະ​ອະ­ນາ­ໄມ ແລະ ບໍ່​ເສຍ​ພາ­ສີ ເຊິ່ງ​ເຈົ້າ​ໜ້າ­ທີ່​ໄດ້​ແນະ­ນຳ​ໃຫ້​ປະ­ຕິ­ບັດ​ຕາມ​ລະ­ບຽບ​ໃຫ້​ຖືກ­ຕ້ອງ ແຕ່​ຜູ້­ກ່ຽວ​ບໍ່​ມາ​ຕິດ­ຕໍ່​ພົວ­ພັນ​ຈົນ​ຮອດ​ປັດ­ຈຸ­ບັນ  ພາກ­ສ່ວນ​ກ່ຽວ­ຂ້ອງ​ຈຶ່ງ​ໄດ້​ນຳ​ເອົາ​ພືດ​ຜັກ​ດັ່ງ­ກ່າວ ມາ​ທຳ­ລາຍ​ຖິ້ມ.

ຂ່າວທີ່ກ່ຽວຂ້ອງ