ຂ່າວຫຼ້າສຸດ

ມອບ​ເງິນ​ຊຸກຍູ້​ນັກກີລາ​ລົດຖີບ ກ່ອນ​ຮ່ວມ​ມະ​ຫະ​ກຳ​ກີລາ​ຊີເກມ

1.802 14 ພ.ຈ. 2019 ວົງຈອນກີລາ
ມອບ​ເງິນ​ຊຸກຍູ້​ນັກກີລາ​ລົດຖີບ ກ່ອນ​ຮ່ວມ​ມະ​ຫະ​ກຳ​ກີລາ​ຊີເກມ

   ທ່ານ ສຸກ​ສາຄອນ ໃສ​ທິ​ລາດ ປະທານ​ບໍລິສັດ ໃສ​ທິ​ລາດ ກຣຸບ ຮອງ​ປະທານ​ສະຫະພັນ​ລົດຖີບ​ແຫ່ງ​ຊາດ​ລາວ ປະທານ​ສະຫະພັນ​ລົດຖີບ​ນະຄອນຫຼວງ​ວຽງ​ຈັນ ແລະ ທ່ານ ທະນູ​ໄຊ ພູທອນ​ສີ ຮອງ​ປະທານ​ບໍລິສັດ ໃສ​ທິ​ລາດ ກຣຸບ ໄດ້​ເດີນທາງ​ໄປ​ແຂວງ​ຊຽງ​ໃໝ່ ປະເທດ​ໄທ ວັນ​ທີ 8-10 ພະຈິກ 2019 ເພື່ອ​ໃຫ້​ກຳລັງ​ໃຈ ນັກກີລາ​ລົດຖີບ​ທີມ​ຊາດ​ລາວ ທີ່​ໄດ້​ໄປ​ເຝິກຊ້ອມ​ຢູ່​ແຂວງ​ດັ່ງກ່າວ ເພື່ອ​ກຽມ​ຄວາມ​ພ້ອມ​ເຂົ້າ​ຮ່ວມ​ມະ​ຫະ​ກຳ​ກີລາ​ຊີເກມ ຄັ້ງ​ທີ 30 ຢູ່​ປະເທດ​ຟີ​ລິບ​ປິນ ທ້າຍ​ປີ​ນີ້.

    ການ​ໄປ​ເຝິ​​ິກ​ຊ້ອມ​ຄັ້ງ​ນີ້ ໃຊ້​ເວລາ 30 ວັນ ໂດຍ​ໃຊ້​ງົບປະມານ​ຕົນ​ເອງ ແລະ ອີກ 45 ວັນ ແມ່ນ​ໃຊ້​ງົບປະມານ​ຂອງ​ສະຫະພັນ​ລົດຖີບ​ແຫ່ງ​ຊາດ​ລາວ ເຊິ່ງ​ໂອກາດ​ໄປ​ຢ້ຽມຢາມ​ຄັ້ງ​ນີ້ ທ່ານ ສຸກ​ສາຄອນ ໃສ​ທິ​ລາດ ໄດ້​ມອບ​ເງິນ​ຊຸກຍູ້​ໃຫ້​ນັກກີລາ 30 ລ້ານ​ກີບ ເພື່ອ​ໃຊ້​ຈ່າຍ ແລະ ຊື້​ອຸປະກອນ​ລົດຖີບ.

    ວັນ​ດຽວ​ກັນ​ນີ້ ທ່ານ ຄຳ​ແພງ ໄຊ​ສົມ​ແພງ ລັດຖະມົນຕີ​ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ໄດ້​ຮ່ວມ​ຮັບ​ປະທານ​ອາຫານ​ທ່ຽງ​ນຳ​ນັກກີລາ​ລົດຖີບ​ທິມ​ຊາດ​ລາວ ທີ່​ໄປ​ເຝິກຊ້ອມ​ທີ່​ຊຽງ​ໃໝ່ ພ້ອມ​ທັງ​ໄດ້​ໃຫ້​ກຳລັງ​ໃຈ​ນັກກີລາ ເຊິ່ງ​ປະກອບ​ມີ ທ້າວ ອະລິຍາ ພູນ​ສະ​ຫວັດ ທ້າວ ອຸ່ນ​ເຮືອນ ເທບ​ວົງສາ ທ້າວ ຖາວອນ ພົນ​ອາສາ ແລະ ທ້າວ ທະວີ​ສັກ ສຸວັນນະ​ຣາຊ໌.

    ສຳລັບ​ນັກກີລາ ກໍ​ໄດ້​ໃຫ້​ສຳພາດ​ວ່າ: ການ​ເຝິກຊ້ອມ​ຄັ້ງ​ນີ້ ໄດ້​ເລີ່ມ​ແຕ່​ວັນ​ທີ 1 ກັນຍາ 2019 ເປັນຕົ້ນ​ມາ ເຊິ່ງ​ໃຊ້​ເວລາ​ເກືອບ 3 ເດືອນ ປັດຈຸບັນ ແມ່ນ​ພ້ອມ​ເກືອບ 95% ເວລາ​ທີ່​ເຫຼືອ​ນັກກີລາ​ກໍ​ຈະ​ເດີນທາງ​ກັບ​ມາ​ເຝິກຊ້ອມ​ຕໍ່​ຢູ່​ປະເທດ​ລາວ ຕື່ມ​ອີກ. 

ຂ່າວທີ່ກ່ຽວຂ້ອງ