ຂ່າວຫຼ້າສຸດ

ປະຊາຊົນ ຊະນະ ພະນັກງານ 4-3 ປະຕູ ກີລາ​ຕີຄີ​ບຸນທາດຫຼວງ

1.657 12 ພ.ຈ. 2019 ວົງຈອນກີລາ
ປະຊາຊົນ ຊະນະ ພະນັກງານ 4-3 ປະຕູ ກີລາ​ຕີຄີ​ບຸນທາດຫຼວງ

   ປີ​ນີ້ ເປັນ​ອີກ​ປີ​ໜຶ່ງ​ທີ່​ຝ່າຍ​ປະຊາຊົນ ຍັງ​ຮັກສາ​ລະບົບ​ການ​ຫຼິ້ນ​ທີ່​ເຂັ້ມແຂງ ແລະ ສາມາດ​ເອົາ​ຊະນະ ຝ່າຍ​ພະນັກງານ ໄປ​ໄດ້​ແບບ​ມ່ວນຊື່ນ 4-3 ປະຕູ ໃນ​ການ​ແຂ່ງຂັນ​ກີລາ​ຕີຄີ ໂອກາດ​ບຸນ​ນະມັດສະການ​ພະ​ທາດຫຼວງ​ວຽງ​ຈັນ ວັນ​ທີ 11 ພະຈິກ 2019 ຢູ່​ເດີ່ນ​ພະ​ທາດຫຼວງ.

    ບຸນ​ນະມັດສະການ​ພະ​ທາດຫຼວງ​ວຽງ​ຈັນ ໃນ​ທຸກໆ​ປີ​ພໍ​ມາ​ເຖິງ​ມື້​ສຸດ​ທ້າຍ ມື້​ຂຶ້ນ 15 ຄ່ຳ ເດືອນ 12 ລາວ ຕອນ​ເຊົ້າ​ຈະ​ມີ​ພິທີ​ໃສ່​ບາດ ສ່ວນ​ຕອນ​ບ່າຍ​ຈະ​ມີ​ການ​ແຂ່ງຂັນ​ຕີຄີ ເຊິ່ງ​ປີ​ນີ້​ມີ​ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ໃຫ້​ກຽດ​ເຂົ້າ​ຮ່ວມ ແລະ ເຂ່ຍ​ລູກ​ຄີ ໂດຍ​ມີ​ການ​ນຳ​ພັກ-ລັດ ພ້ອມ​ດ້ວຍ​ມວນ​ຊົນ​ຊາວ​ນະຄອນຫຼວງ​ວຽງ​ຈັນ ແລະ ຊາວ​ຕ່າງປະເທດ​ເຂົ້າ​ຮ່ວມ​ຊົນ-ຮ່ວມ​ເຊຍ​ຢ່າງ​ຫຼວງຫຼາຍ.

    ການ​ແຂ່ງຂັນ​ກີລາ​ຕີຄີ​ຄັ້ງ​ນີ້ ກໍ່​ເໜືອ​ກັບ​ປີ​ຜ່ານໆ​ມາ ທີ່​ສ້າງ​ຄວາມ​ປະ​ທັບ​ໃຈ​ໃຫ້​ມວນ​ຊົນ ກໍ່​ຄື​ຜູ້​ເຂົ້າ​ຊົມ ເຊິ່ງ​ຝ່າຍ​ປະຊາຊົນ ແລະ ຝ່າຍ​ພະນັກງານ ຕ່າງ​ກໍ​ໄດ້​ແຂ່ງຂັນ​ກັນ​ສຸດ​ຄວາມ​ສາມາດ ຜັດປ່ຽນ​ກັນ​ບຸກ-ຮັບ​ແຕ່​ກໍ​ບໍ່​ເໜືອ​ຄວາມ​ແຂງ​ແກ່ນ​ຂອງ​ຝ່າຍ​ປະຊາຊົນ ທີ່​ສາມາດ​ເອົາ​ຊະນະ ຝ່າຍ​ພະນັກງານ​ໄປ​ໄດ້ ເປັນ​ອັນ ວ່າ​ປີ​ນີ້​ບ້ານ​ເມືອງ​ຈະ​ມີ​ຄວາມ​ຢູ່​ເຢັນ​ເປັນ​ສຸກ ບໍ່​ອຶດ​ເຂົ້າ ບໍ່​ອຶດ​ປາ ເຂົ້າ​ເຕັມ​ນາ ປາ​ເຕັມ​ໜອງ ເສດຖະກິດ​ຈະ​ຮຸ່ງເຮືອງ ບ້ານ​ເມືອງ​ມີ​ຄວາມ​ສະຫງົບ ປອດ​ໄພ ການ​ທຳ​ມາ​ຫາ​ກິນ​ມີ​ຄວາມ​ລາບ​ລື້ນ ແລະ ບ້ານ​ເມືອງ​ຈະ​ມີ​ແຕ່​ຄວາມ​ຈະເລີນ​ຮຸ່ງເຮືອງ​ສີວິໄລ.

    ກ່ອນ​ຈະ​ແຂ່ງຂັນ​ຕີຄີ​ແຕ່​ລະ​ປີ ບັນດາ​ເຖົ້າ​ແກ່​ແນວ​ໂຮມ ອາຍາ ​ອາຈານ ໄດ້​ພ້ອມ​ກັນ​ຈັດ​ພິທີ​ຕາມ​ຮີດ ຄອງ​ປະເພນີ​ຄື​ກັບ​ທຸກ​ປີ ເພື່ອ​ອັງ​ເຊີນ​ລູກ​ຄີ​ລົງ​ມາ ແລ້ວ​ແຫ່​ອ້ອມ​ກົມ​ມະ​ລຽນ​ພະ​ທາດຫຼວງ 3 ຮອບ ຈາກ​ນັ້ນ​ຈຶ່ງ​ມີ​ການ​ແຂ່ງຂັນ​ຕີຄີ ເມື່ອ​ແຂ່ງຂັນ​ສຳເລັດ​ແລ້ວ ກໍ​ໄດ້​ແຫ່​ລູກ​ຄີ​ກັບ​ຄືນ ແລະ ອັງ​ເຊີນ​ລູກ​ຄີ​ໄວ້​ບ່ອນ​ເກົ່າ ເຊິ່ງ​ບົ່ງ​ບອກ​ເຖິງ​ຄວາມ​ສັກສິດ ຕາມ​ການ​ເຊື່ອ​ຖື​ກັນ​ມາ​ແຕ່​ບູຮານ​ນະ​ການ. 

ຂ່າວທີ່ກ່ຽວຂ້ອງ