ຂ່າວຫຼ້າສຸດ

ຮ່ວມ​ມື​ພັດທະນາ​ສິນຄ້າ​ສີຂຽວ ໃຫ້​ເປັນ​ທີ່​ຍອມຮັບ​ຂອງ​ຕະຫຼາດ

653 11 ພ.ຈ. 2019 ຂ່າວໜ້າ​ໜຶ່ງ
ຮ່ວມ​ມື​ພັດທະນາ​ສິນຄ້າ​ສີຂຽວ ໃຫ້​ເປັນ​ທີ່​ຍອມຮັບ​ຂອງ​ຕະຫຼາດ

    ກອງ​ປະຊຸມ​ແນະນຳ​ຜະລິດ​ຕະ​ພັນ​ສີຂຽວ ລາວ-ຈີນ (ຢຸນ​ນານ) ປະຈຳ​ປີ 2019 ຈັດ​ຂຶ້ນ​ວັນ​ທີ 7 ພະ ຈິກ 2019 ຢູ່​ສູນ​ການ​ຄ້າ​ລາວ-ໄອ​ເຕັກ ໂດຍ​ມີ​ທ່ານ ສັງຄົມ ຈັນ​ສຸກ ປະທານ​ສະພາ​ການ​ຄ້າ ແລະ ອຸດສາຫະກຳ ນະຄອນຫຼວງ​ວຽງ​ຈັນ (ນວ) ທ່ານ ຈ່າງ ໂຢ​ໂຈ້ ຫົວໜ້າ​ຫ້ອງການ​ຜູ້ຕາງໜ້າ​ທຸລະ​ກິດ​ແຂວງ ຢຸນ​ນານ ປະຈຳ ນວ ພ້ອມ​ດ້ວຍ​ພາກສ່ວນ​ກ່ຽວຂ້ອງ ເຂົ້າ​ຮ່ວມ.

   ເພື່ອ​ເພີ່ມ​ທະວີ​ການ​ບຸກເບີກ​ຕະຫຼາດ ແລະ ດຶງ​ດູດ​ນັກ​ລົງທຶນ ເພື່ອ​ພັດທະນາ​ເຄື່ອງໝາຍ​ສີຂຽວ​ຂອງ​ຢຸນ​ນານ ແລະ ຂະຫຍາຍ​ຊ່ອງ​ທາງ​ການຈຳໜ່າຍ​ອາຫານ​ສີຂຽວ​ຢູ່​ລາວ ໃຫ້​ນັບ​ມື້​ກວ້າງຂວາງ ນຳ​ເອົາ​ຜະລິດ​ຕະ​ພັນ​ທີ່​ເປັນ​ເອກະລັກ​ພິເສດ​ຂອງ​ລາວ​ເຂົ້າ​ໃນ​ຕະຫຼາດ​ຢຸນ​ນານ ເຮັດ​ໃຫ້ການ​ລົງທຶນ​ສອງ​ຝ່າຍ​ປາກົດ​ຜົນ​ເປັນ​ຈິງ ເນື່ອງ​ຈາກ​ລາວ​ມີ​ທີ່​ຕັ້ງ​ຍຸດ​ທະ​ສາດ​ເປັນ​ຈຸດ​ໃຈກາງ​ເຊື່ອມ​ຕໍ່ ລະຫວ່າງ ຈີນ ແລະ ອາ​ຊຽນ ມີ​ຄວາມ​ອຸດົມສົມບູນ​ດ້ານ​ຊັບພະຍາກອນ​ທຳ​ມະ​ຊາດ ແລະ ມີ​ຫຼາຍ​ຂະແໜງການ​ທີ່​ເປັນ​ທ່າແຮງ ການ​ຮ່ວມ​ມື​ໃນຕໍ່ໜ້າ​ຂອງ​ສອງ​ຝ່າຍ​ຈະ​ພ້ອມ​ກັນ​ຊຸກຍູ້​ໃຫ້​ຂະແໜງການ​ກ່ຽວຂ້ອງ​ທັງ​ສູນ​ກາງ ແລະ ທ້ອງ ຖິ່ນ​ສືບຕໍ່​ແລກປ່ຽນ ຢ້ຽມຢາມ​ຫຼາຍ​ລະດັບ ເພື່ອ​ເພີ່ມ​ທະວີ​ການ​ຮ່ວມ​ມື​ພັດທະນາ​ດ້ານ​ຊັບພະຍາກອນ​ມະນຸດ​ແຕ່​ລະ​ດ້ານ​ໃຫ້​ຫຼາຍ​ຂຶ້ນ ສົ່ງເສີມ​ການ​ຮ່ວມ​ມື​ດ້ານ​ເຕັກນິກ​ວິຊາ​ການ​ໃຫ້​ບັນດາ​ຂະແໜງການ ເປັນຕົ້ນ ຂະ  ແໜງ​ກະສິກຳ ເຊິ່ງ​ເປັນ​ຂະແໜງການ​ຜະລິດ​ພື້ນຖານ​ທີ່​ມີ​ທ່າແຮງ​ຂອງ​ລາວ ຮ່ວມ​ມື​ພັດທະນາ​ສີມື​ແຮງ​ງານ ທຸກ​ພາກ​ຂອງ​ລາວ ໃຫ້​ມີ​ລະດັບ​ເຕັກນິກ​ການ​ຜະລິດ​ກະສິກຳ​ສູງ ສ້າງ​ຍີ່ຫໍ້​ຂອງ​ສິນຄ້າ​ເພື່ອ​ໃຫ້​ສາມາດ​ພັດທະ​ນາ​ການ​ປຸງ​ແຕ່ງ​ຜະລິດ​ຕະ​ພັນ​ກະສິກຳ​ໃຫ້​ກາຍເປັນ​ສິນຄ້າ​ສົ່ງ​ອອກ.

   ກອງ​ປະຊຸມ​ຄັ້ງ​ນີ້ ຍັງ​ໄດ້​ປຶກສາ​ຫາລື​ຫຼາຍ​ບັນຫາ ເພື່ອ​ຊອກ​ຫາ​ຊ່ອງ​ທາງ​ການ​ຮ່ວມ​ມື​ກັນ​ໃນ​ຂະແໜງ ກະສິກຳ ລາວ-ຈີນ ໃຫ້​ມີ​ປະ​ສິດທິ​ຜົນ ແລະ ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະໂຫຍດ ປັດຈຸບັນ ລາວ-ຈີນ ເປັນ​ຄູ່​ຮ່ວມ​ສະ​ຕາ​ກຳ​ດຽວ​ກັນ ນັກທຸລະກິດ​ທັງ​ສອງ​ປະເທດ ຮັກແພງ​ກັນ ຊ່ວຍເຫຼືອ​ເຊິ່ງ​ກັນ ແລະ ກັນ ພ້ອມ​ກັນ​ພັດທະນາ​ປະເທດ​ຊາດ​ໃຫ້​ມີ​ການ​ຂະຫຍາຍຕົວ​ຂຶ້ນ​ເລື້ອຍໆ ເຊິ່ງ​ສະພາ​ການ​ຄ້າ ແລະ ອຸດສາຫະກຳ ສະໜັບສະໜູນ ແລະ ອຳນວຍ​ຄວາມ​ສະດວກ​ໃຫ້​ຫົວໜ່ວຍ​ທຸລະ​ກິດ ລາວ-ຈີນ ພ້ອມ​ກັນ​ຊອກ​ຫາ​ຊ່ອງ​ທາງ​ການ​ຮ່ວມ​ມື​ກັນ ຮ່ວມ​ກັນ​ຊອກ​ວິທີ​ທາງ​ໃນ​ການ​ແກ້​ໄຂ​ສິ່ງ​ກີດຂວາງ​ຕ່າງໆ ເພື່ອ​ໃຫ້​ມີ​ການ​ຮ່ວມ​ມື​ກັນ​ຢ່າງ​ແທ້​ຈິງ ແລະ ໄດ້​ຮັບ​ຜົນ​ປະໂຫຍດ​ຂອງ​ພາກ​ທຸລະ​ກິດ​ທັງ​ສອງ​ຝ່າຍ.

ຂ່າວທີ່ກ່ຽວຂ້ອງ