ຂ່າວຫຼ້າສຸດ

ລາວ-ອິນ​ໂດ​ເນ​ເຊຍ ສືບຕໍ່​ຮ່ວມ​ມື​ຂົງເຂດ​ວຽກ​ງານ​ກົດໝາຍ

590 11 ພ.ຈ. 2019 ຂ່າວໜ້າ​ໜຶ່ງ
ລາວ-ອິນ​ໂດ​ເນ​ເຊຍ ສືບຕໍ່​ຮ່ວມ​ມື​ຂົງເຂດ​ວຽກ​ງານ​ກົດໝາຍ

    ທ່ານ ໄຊ​ສີ ສັນຕິ​ວົງ ລັດຖະມົນຕີ​ກະຊວງ​ຍຸຕິ​ທຳ ພ້ອມ​ຄະນະ ເດີນທາງ​ໄປ​ຢ້ຽມຢາມ ແລະ ເຮັດ​ວຽກ ຢູ່ ສ ອິນ​ໂດ​ເນ​ເຊຍ ວັນ​ທີ 4-5 ພະຈິກ 2019 ເພື່ອ​ເສີມ​ຂະຫຍາຍ​ສາຍ​ພົວພັນ ຮັດ​ແໜ້ນ​ການ​ຮ່ວມ​ມື​ກັນ​ໃນ​ລະດັບ​ພາກ​ພື້ນ ພາຍ​ໃຕ້​ເສົາຄ້ຳ​ການເມືອງ-ຄວາມ​ໝັ້ນຄົງ​ຂອງ​ປະຊາ​ຄົມ​ອາ​ຊຽນ​ໃຫ້  ແໜ້ນ​ແຟ້ນ​ຂຶ້ນ​ກວ່າ​ເກົ່າ ໂດຍ​ສະເພາະ ດ້ານ​ກົດໝາຍ ລະຫວ່າງ​ສອງ​ປະເທດ ສ້າງ​ຄວາມ​ເຂົ້າໃຈ​ເຊິ່ງ​ກັນ ແລະ ກັນ ສ້າງ​ກົນ​ໄກ​ດ້ານ​ກົດໝາຍ​ທີ່​ມີ​ປະ​ສິດທິ​ຜົນ ແລະ ແທດເໝາະ​ກັບ​ສະພາບ​ຈຸດ​ພິເສດ​ຂອງ​ສອງ​ປະເທດ​ຍິ່ງ​ຂຶ້ນ ບົນ​ພື້ນຖານ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະໂຫຍດ.

    ການ​ເດີນທາງ​ໄປ​ຢ້ຽມຢາມ ແລະ ເຮັດ​ວຽກ​ຄັ້ງ​ນີ້ ຄະນະ​ຜູ້​ແທນ​ລາວ​ໄດ້​ເຂົ້າ​ຮ່ວມ​ພິທີ​ເປີດ​ການ​ຮ່ວມ​ມື​ໃນ​ການ​ເສີມ​ສ້າງ ແລະ ການ​ເຝິກອົບຮົມ​ສ້າງ​ຄວາມ​ອາດ​ສາມາດ ລະຫວ່າງ ​ສປປ ລາວ ແລະ ສ ອິນ​ໂດ​ເນ​ເຊຍ ພ້ອມ​ທັງ​ລົງ​ນາມ​ບົດ​ບັນທຶກ​ຊ່ວຍ​ຈຳ ລະຫວ່າງ​ລັດຖະມົນຕີ​ກະຊວງ​ຍຸຕິ​ທຳ ​ສປປ ລາວ ແລະ ລັດຖະມົນຕີ​ກົດໝາຍ ແລະ ສິດທິ​ມະນຸດ ສ ອິນ​ໂດ​ເນ​ເຊຍ.

    ສຳລັບ​ເນື້ອ​ໃນ​ບົດ​ບັນທຶກ​ການ​ຮ່ວມ​ມື​ດັ່ງກ່າວ ປະກອບ​ມີ​ການ​ຮ່ວມ​ມື​ຂົງເຂດ​ກົດໝາຍ ການ​ຊ່ວຍເຫຼືອ​ເຊິ່ງ​ກັນ ແລະ ກັນ ໃນ​ການ​ແກ້​ໄຂ​ບັນຫາ​ຄະດີ​ອາຍາ ການ​ສົ່ງ​ຜູ້​ຮ້າຍ​ຂ້າມ​ແດນ ແລະ ການ​ສ້າງ​ຄວາມ ສາມາດ ເຊິ່ງ​ການ​ລົງ​ນາມ​ບົດ​ບັນທຶກ​ການ​ຮ່ວມ​ມື​ຄັ້ງ​ນີ້ ເປັນ​ການ​ເພີ່ມ​ທະວີ​ການ​ຮ່ວມ​ມື ລະຫວ່າງ​ກະຊວງ​ສຳລັບ​ການ​ຮ່ວມ​ມື​ວຽກ​ງານ​ໃນ​ແຕ່​ລະ​ດ້ານ​ໃນຕໍ່ໜ້າ. 

ຂ່າວທີ່ກ່ຽວຂ້ອງ