ຂ່າວຫຼ້າສຸດ

ມອບ-ຮັບ​ໂຄງການ​ນຳ​ໃຊ້​ພະລັງງານ​ແສງ​ຕາເວັນ​ຜະລິດ​ໄຟຟ້າ​ໃສ່​ບ່ອນ​ຈອດ​ລົດ

733 11 ພ.ຈ. 2019 ຂ່າວໜ້າ​ໜຶ່ງ
ມອບ-ຮັບ​ໂຄງການ​ນຳ​ໃຊ້​ພະລັງງານ​ແສງ​ຕາເວັນ​ຜະລິດ​ໄຟຟ້າ​ໃສ່​ບ່ອນ​ຈອດ​ລົດ

   ພິ­ທີ​ມອບ-ຮັບ ແລະ ເປີດ​ນຳ​ໃຊ້​ໂຄງ­ການ​ທົດ​ລອງ​ນຳ​ໃຊ້​ພະ­ລັງ­ງານ​ແສງ​ຕາ­ເວັນ​ຜະ­ລິດ​ໄຟ­ຟ້າ​ໃສ່​ບ່ອນ​ຈອດ​ລົດ ພາຍ​ໃຕ້​ໂຄງ­ການ​ກໍ່­ສ້າງ​ສູນ​ຮ່ວມ​ມື​ດ້ານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ນະ​ວັດ­ຕະ​ກຳ​ພະ ລັງ​ງານ​ແສງ​ຕາ­ເວັນ ລາວ-ຈີນ ຈັດ​ຂຶ້ນ​ວັນ​ທີ 7 ພະ­ຈິກ 2019 ຢູ່​ສະ​ຖາ​ບັນ​ພະ­ລັງ­ງານ​ທົດ​ແທນ ແລະ ວັດ​ສະ​ດຸ​ໃໝ່ (ດົງ​ໝາກ­ຄາຍ) ເຊິ່ງ​ລົງ​ນາມ​ມອບ​ໂດຍ​ທ່ານ ໝ່າ​ໝິນ ຊຽງ ຫົວ­ໜ້າ​ສະ­ພາ​ບັນ­ດິດ​ເຕັກ­ນິກ​ຂໍ້​ມູນ​ຂ່າວ­ສານ ແລະ ວິ­ທະ­ຍາ­ສາດ​ແຂວງ​ຢຸນ​ນານ ສປ ຈີນ ແລະ ເຊັນ​ຮັບ​ໂດຍ​ທ່ານ​ນາງ ໄມ­ຕີ ວົງ​ຄຳ​ຊາວ ຫົວ­ໜ້າ​ສະ​ຖາ​ບັນ​ພະ­ລັງ­ງານ​ທົດ​ແທນ ແລະ ວັດ​ສະ​ດຸ​ໃໝ່ ມີ​ທ່ານ ບໍ່​ວຽງ​ຄຳ ວົງ​ດາ­ລາ ລັດ​ຖະ ມົນ­ຕີ​ກະ­ຊວງ​ວິ­ທະ­ຍາສາດ ແລະ ເຕັກ​ໂນ​ໂລ​ຊີ ທ່ານ ຝູ ຕິ່ງ​ເຫວິ່ນ ຜູ້​ຈັດ­ການ​ບໍ­ລິ­ສັດ​ເຕັກ​ໂນ​ໂລ​ຊີ​ພະ­ລັງ­ງານ​ສະ­ອາດ ແຂວງ​ຢຸນ​ນານ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ທ່ານ​ນາງ ໄມ­ຕີ ວົງ​ຄຳ​ຊາວ ກ່າວ​ວ່າ: ກົມ​ແຜນ­ການ ແລະ ຮ່ວມ​ມື ສະ​ຖາ​ບັນ​ພະ­ລັງ­ງານ​ທົດ​ແທນ ແລະ ວັດ​ສະ​ດຸ​ໃໝ່ ແລະ ສະ­ພາ​ບັນ­ດິດ​ເຕັກ­ນິກ​ຂໍ້​ມູນ​ຂ່າວ­ສານ ແລະ ວິ­ທະ­ຍາ­ສາດ ແຂວງ​ຢຸນ​ນານ ໄດ້​ລົງ​ນາມ​ບົດ​ບັນ­ທຶກ​ຮ່ວມ​ມື ວັນ​ທີ 24 ສິງ­ຫາ 2018 ຈາກ​ນັ້ນ ສອງ​ຝ່າຍ​ກໍ​ໄດ້​ປະ­ສານ​ສົມ­ທົບ​ກັນ​ຕະ­ຫຼອດ​ມາ ເພື່ອ​ປະ­ຕິ­ບັດ​ພັນ­ທະ​ໜ້າ­ທີ່​ຂອງ​ຕົນ​ໃນ​ການ­ຈັດ­ຕັ້ງ​ປະຕິ­ບັດ​ໂຄງ­ການ​ທົດ​ລອງ​ນຳ​ໃຊ້​ພະ­ລັງ­ງານ​ແສງ​ຕາ­ເວັນ​ຜະລິດ​ໄຟ­ຟ້າ​ໃສ່​ຫຼັງ­ຄາ​ບ່ອນ​ຈອດ​ລົດ ແລະ ສ້າງ​ສູນ​ຮ່ວມ​ມື​ດ້ານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ນະ​ວັດ­ຕະ​ກຳ​ພະ­ລັງ­ງານ​ແສງ​ຕາ­ເວັນ ລາວ-ຈີນ ເຊິ່ງ​ໄລ­ຍະ​ການ­ຈັດ­ຕັ້ງ​ປະ­ຕິ­ບັດ​ແຕ່​ປີ 2018-2019 ມູນ​ຄ່າ 423.286.250 ກີບ ໂດຍ​ຝ່າຍ​ຈີນ​ເປັນ​ຜູ້​ສະ­ໜອງ​ອຸ­ປະ­ກອນ​ທັງ​ໝົດ ແລະ ຮ່ວມ​ກັນ​ຕິດ​ຕັ້ງ.

   ສະ​ຖາ​ບັນ​ພະ­ລັງ­ງານ​ທົດ​ແທນ ແລະ ວັດ​ສະ​ດຸ​ໃໝ່ ໄດ້​ສຳ­ເລັດ​ການ​ອຳ­ນວຍ​ຄວາມ​ສະ­ດວກ​ດ້ານ​ເອ ກະ​ສານ​ການ​ຍົກ­ເວັ້ນ​ພາ­ສີ ແລະ ນຳ​ເຂົ້າ​ອຸ­ປະ­ກອນ​ຕ່າງໆ ພ້ອມ​ທັງ​ຕິດ​ຕັ້ງ​ລະ­ບົບ​ດັ່ງ­ກ່າວ​ເປັນ​ບ່ອນ​ຈອດ​ລົດ ທັງ​ເປັນ​ສະ­ຖາ­ນີ​ຜະ­ລິດ​ໄຟ­ຟ້າ​ດ້ວຍ​ພະ­ລັງ­ງານ​ແສງ​ຕາ­ເວັນ ສຳ­ເລັດ​ທ້າຍ​ເດືອນ​ກຸມ­ພາ 2019 ລະ­ບົບ​ດັ່ງ­ກ່າວ​ແມ່ນ​ນຳ​ໃຊ້​ລະ­ບົບ​ພະ­ລັງ­ງານ​ແສງ​ຕາ­ເວັນ​ປະເພດ Polycrystalise ຂະ­ໜາດ 70 W ຈຳ­ນວນ 120 ແຜ່ນ ກຳ­ລັງ​ຜະ­ລິດ​ໄຟ­ຟ້າ​ປະ­ມານ 32,4 ກິ​ໂລ​ວັດ ພາຍ­ຫຼັງ​ຕິດ​ຕັ້ງ​ສຳ­ເລັດ ກໍ​ໄດ້​ເປີດ​ທົດ​ລອງ​ນຳ​ໃຊ້ ເຊິ່ງ​ສາ­ມາດ​ນຳ​ໃຊ້​ໄດ້​ເປັນ​ໜ້າ​ພໍ­ໃຈ ລະ­ບົບ​ດັ່ງ­ກ່າວ​ໄດ້​ເຊື່ອມ​ຕໍ່​ກັບ​ລະ­ບົບ​ຕາ​ຂ່າຍ​ໄຟ­ຟ້າ​ລວມ​ຂອງ​ສະ​ຖາ​ບັນ ເຊິ່ງ​ສາ­ມາດ​ຜະ­ລິດ​ໄຟ­ຟ້າ​ປ້ອນ​ເຂົ້າ​ຕາ​ຂ່າຍ ເພື່ອ​ນຳ​ໃຊ້​ພາຍ​ໃນ​ສະ​ຖາ​ບັນ ຕາມ​ຄວາມ​ສາ­ມາດ ແລະ ປະ­ລິ­ມານ​ແສງ​ແດດ​ໃນ​ແຕ່​ລະ​ວັນ ເພື່ອ​ຊ່ວຍ​ຫຼຸດ­ຜ່ອນ​ການ​ຊົມ­ໃຊ້​ໄຟ­ຟ້າ​ຕາ​ຂ່າຍ​ລົງ 20-30% ໂຄງ­ການ​ນີ້​ຍັງ​ເປັນ​ສູນ​ການ​ຄົ້ນ­ຄວ້າ ທົດ​ລອງ​ນຳ​ໃຊ້ ສາ­ທິດ ແລະ ເຜີຍ­ແຜ່​ອອກ​ສູ່​ສັງ­ຄົມ ຕື່ມ​ອີກ.

ຂ່າວທີ່ກ່ຽວຂ້ອງ