ຂ່າວຫຼ້າສຸດ

ການ​ນຳ​ນະ­ຄອນ­ຫຼວງ ຮ່ວມ​ສືບ​ສານ​ປະ­ເພ­ນີ​ແຫ່​ຜາ­ສາດ​ເຜິ້ງ

555 11 ພ.ຈ. 2019 ຂ່າວໜ້າ​ໜຶ່ງ
ການ​ນຳ​ນະ­ຄອນ­ຫຼວງ ຮ່ວມ​ສືບ​ສານ​ປະ­ເພ­ນີ​ແຫ່​ຜາ­ສາດ​ເຜິ້ງ

   ການ​ແຫ່​ຜາ­ສາດ​ເຜິ້ງ ແມ່ນ​ປະ­ເພ­ນີ​ອັນ​ດີ­ງາມ​ໜຶ່ງ​ຂອງ​ລາວ ເຊິ່ງ​ກ່ຽວ­ຂ້ອງ​ກັບ​ພິ­ທີ​ທາງ​ສາ­ສະ­ໜາ ເປັນ​ວັດ­ທະ­ນະ­ທຳ​ອັນ​ດີ­ງາມ​ທີ່​ສະ­ແດງ​ເຖິງ​ຄວາມ​ພາກ​ພຽນ ການ​ປະ­ດິດ​ຄິດ​ສ້າງ ແລະ ການ​ເຕົ້າ­ໂຮມ​ຄວາມ​ສາ ມັກ​ຄີ ລະ­ຫວ່າງ​ປະ­ຊາ­ຊົນ​ລາວ​ບັນ­ດາ­ເຜົ່າ ໂດຍ​ສະ­ເພາະ ຊາວ​ນະ­ຄອນ­ຫຼວງ​ວຽງ​ຈັນ ທີ່​ໄດ້​ສືບ​ທອດ ປະ­ຕິ­ບັດ​ກັນ​ມາ​ແຕ່​ບູ­ຮານ​ນະ​ການ ເຊິ່ງ​ທຸກໆ​ປີ​ພິ­ທີ​ດັ່ງ­ກ່າວ​ໄດ້​ຈັດ​ຂຶ້ນ​ໃນ​ມື້​ຂຶ້ນ 14 ຄ່ຳ ເດືອນ 12 (ລາວ) ໃນ​ໂອກາດ​ງານ​ສະ­ເຫຼີມ­ສະ­ຫຼອງ​ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ ເຊິ່ງ​ປີ​ນີ້​ກົງ​ກັບ​ວັນ​ທີ 10 ພະ­ຈິກ 2019 ໂດຍ​ມີ​ການ​ເຕົ້າ­ໂຮມ​ຜາ­ສາດ​ເຜິ້ງ​ຈາກ​ບັນ­ດາ​ເມືອງ ສຳ­ນັກ­ງານ-ອົງ​ການ­ຈັດ­ຕັ້ງ ພະ­ແນກ­ການ ລວມ​ທັງ​ຊາວ​ພຸດ​ທະ​ສາ​ສະ​ນິ​ກະ​ຊົນ ໄດ້​ເຂົ້າ​ຮ່ວມ​ຂະ​ບວນ​ແຫ່​ຢ່າງ​ເປັນ​ຂະ​ບວນ​ຄຶກ­ຄື້ນ ແລະ ມ່ວນ­ຊື່ນ.

    ສຳ­ລັບ​ປີ​ນີ້ ໄດ້​ເຄື່ອນ​ຍ້າຍ​ຂະ​ບວນ​ແຫ່​ຜາ­ສາດ​ເຜິ້ງ ຢູ່​ຖະ­ໜົນ 23 ສິງ­ຫາ ແລ້ວ​ເຂົ້າ​ສູ່​ກົມ​ມະ​ລຽນ​ພະ ທາດ­ຫຼວງ ທາງ​ທິດ­ຕາ­ເວັນ­ອອກ ເຊິ່ງ​ນຳ​ໜ້າ​ດ້ວຍ​ຂະ​ບວນ​ຂອງ​ພະ­ສົງ ສຳ​ມະ​ເນນ ຂະ​ບວນ​ການ​ນຳ​ນະ­ຄອນ ຫຼວງ​ວຽງ​ຈັນ ເຊິ່ງ​ນຳ­ພາ​ໂດຍ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ຂະ​ບວນ​ອົງ­ການ ຈັດ​ຕັ້ງ​ມະ­ຫາ­ຊົນ ເຖົ້າ​ແກ່​ແນວ​ໂຮມ ຂະ​ບວນ​ດົນ­ຕີ​ພື້ນ­ເມືອງ ຂະ​ບວນ​ເມືອງ​ຕ່າງໆ ສຳ­ນັກ­ງານ-ອົງ­ການ ແລະ ປະ­ຊາ­ຊົນ​ລາວ​ບັນ­ດາ­ເຜົ່າ ພ້ອມ​ກັນ​ແຫ່​ອ້ອມ​ພະ​ທາດ­ຫຼວງ 3 ຮອບ ຈາກ​ນັ້ນ ກໍ​ຖວາຍ​ຜາ­ສາດ​ເຜິ້ງ ຟັງ​ທຳ​ມະ​ເທ­ສະ­ໜາ 1 ກັນ ແລ້ວ​ສິ້ນ​ສຸດ​ພິ­ທີ ເຊິ່ງ​ໂດຍ​ລວມ​ແລ້ວ​ການ​ແຫ່​ຜາ­ສາດ​ເຜິ້ງ​ປີ​ນີ້ ມີ​ຄວາມ​ຄຶກຄື້ນ ມ່ວນ­ຊື່ນ ຮັກ­ສາ​ໄດ້​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ແລະ ຄວາມ​ສາ­ມັກ­ຄີ​ຮັກ­ແພງ​ເຊິ່ງ​ກັນ ແລະ ກັນ ລະ­ຫວ່າງ ປະ­ຊາ­ຊົນ​ລາວ​ບັນ­ດາ­ເຜົ່າ.

 

ຂ່າວທີ່ກ່ຽວຂ້ອງ