ຂ່າວຫຼ້າສຸດ

ສສຊ ສະ­ເໜີ​ໃຫ້​ລັດ­ຖະ­ບານ ຮີບ​ຮ້ອນ​ແກ້​ໄຂບັນ­ຫາ​ຄົງ​ຄ້າງ ການ​ຍູ້​ແຮງ​ເສດ­ຖະ­ກິດ-ສັງ­ຄົມ

748 11 ພ.ຈ. 2019 ຂ່າວໜ້າ​ໜຶ່ງ
ສສຊ ສະ­ເໜີ​ໃຫ້​ລັດ­ຖະ­ບານ ຮີບ​ຮ້ອນ​ແກ້​ໄຂບັນ­ຫາ​ຄົງ​ຄ້າງ ການ​ຍູ້​ແຮງ​ເສດ­ຖະ­ກິດ-ສັງ­ຄົມ

       ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 8 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ດຳ­ເນີນ​ມາ​ເປັນ​ມື້​ທີ 2 ວັນ​ທີ 8 ພະ­ຈິກ 2019 ຢູ່​ສະ­ພາ​ແຫ່ງ​ຊາດ (ຫຼັກ 6) ໂດຍ​ເປັນ​ປະ­ທານ​ຂອງ​ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ບັນ­ດາ​ລັດ­ຖະ­ມົນ­ຕີ ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ເຂດ​ເລືອກ​ຕັ້ງ​ຕ່າງໆ ເຂົ້າ​ຮ່ວມ.

   ສສຊ ໄດ້​ສືບ­ຕໍ່​ປະ­ກອບ​ຄຳ​ເຫັນ​ໃສ່​ບົດ​ລາຍ​ງານ​ຂອງ​ລັດ­ຖະ­ບານ ກ່ຽວ​ກັບ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ​ແຫ່ງ​ລັດ ແລະ ອົງ­ການ​ກວດ­ກາ​ລັດ­ຖະ­ບານ ໂດຍ​ສະ­ເພາະ ໄດ້​ສຸມ​ໃສ່​ປະ­ກອບ​ຄຳ​ເຫັນ​ເພື່ອ​ຊ່ວຍ​ລັດ­ຖະ­ບານ​ແກ້​ໄຂ​ບັນ­ຫາ​ໃຫ້​ຖືກ​ຈຸດ ເປັນ­ຕົ້ນ ການ​ຈັດ​ສັນ​ງົບ­ປະ­ມານ ປັບ­ປຸງ ແລະ ສົ່ງ­ເສີມ​ການ­ທ່ອງ­ທ່ຽວ ການ​ແກ້​ໄຂ ການ​ລົງ­ທຶນ​ຂອງ​ລັດ ການ​ຊຳ­ລະ​ສະ​ສາງ​ໜີ້​ສິນ ພ້ອມ​ທັງ​ປະ­ກອບ​ຄຳ​ເຫັນ​ໃສ່​ຂັ້ນ-ຂອດ​ທີ່​ເປັນ​ສິ່ງ​ກີດ­ຂວາງ​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ ເພື່ອ​ເນັ້ນ​ໃຫ້​ລັດ­ຖະ­ບານ​ເລັ່ງ​ແກ້​ໄຂ​ຂໍ້­ຄົງ­ຄ້າງ​ຕ່າງໆ ເພື່ອ​ສາ­ມາດ​ຮັກ­ສາ​ໄດ້​ສະ­ຖຽນ​ລະ​ພາບ​ຂອງ​ເສດ­ຖະ­ກິດ​ມະ­ຫາ​ພາກ ແລະ ສ້າງ​ເງື່ອນ­ໄຂ​ໃຫ້​ສາ­ມາດ​ສືບ­ຕໍ່​ພັດ­ທະ­ນາ​ຕາມ​ແຜນ​ພັດ­ທະ­ນາ ໂດຍ​ສະ­ເພາະ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ປີ 2020.

   ທ່ານ ຄຳ​ວອນ ບຸນ​ທະ​ວົງ ສສຊ ເຂດ 8 ແຂວງ​ຫົວ­ພັນ ປະ­ກອບ​ຄຳ​ເຫັນ​ວ່າ: ການ​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ ໃນ​ປີ 2020 ເຊິ່ງ​ລັດ­ຖະ­ບານ​ໄດ້​ກຳ­ນົດ​ສູ້​ຊົນ​ສ້າງ​ຄອບ­ຄົວ​ພົ້ນ​ທຸກ​ໃຫ້​ບັນ­ລຸ 3.234 ຄອບ­ຄົວ ແຕ່​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ​ແມ່ນ​ຈະ​ບໍ່​ສາ­ມາດ​ບັນ­ລຸ​ຕາມ​ແຜນ ຖ້າ​ອີງ­ໃສ່​ມາດ­ຖານ​ການ​ພົ້ນ​ທຸກ​ສະ­ບັບ​ໃໝ່ ກຳ­ນົດ​ຕົວ​ເລກ​ຂອນ​ຂ້າງ​ສູງ ສ່ວນ​ການ​ລົງ­ທຶນ​ຂອງ​ລັດ​ຜ່ານ​ມາ​ບໍ່​ມີ​ບັນ­ຍາ­ກາດ​ຟົດ­ຟື້ນ​ເທົ່າ​ທີ່​ຄວນ ຍ້ອນ​ບັນ­ຫາ​ທຶນ ແລະ ການ​ສະ­ໜອງ​ທຶນ​ຍັງ​ບໍ່​ຫຼາຍ ສ່ວນ​ໃຫຍ່​ແມ່ນ​ລົງ­ທຶນ​ໃສ່​ໂຄງ­ການ​ສືບ­ຕໍ່ ສ່ວນ​ໂຄງ­ການ​ໃໝ່​ບໍ່​ໄດ້​ຮັບ​ການ​ສະ­ໜອງ​ທຶນ​ທີ່​ພຽງ­ພໍ​ກັບ​ຄວາມ​ຕ້ອງ­ການ ໂດຍ​ສະ­ເພາະ ການ​ລົງ­ທຶນ​ໃສ່​ພື້ນ­ຖານ​ໂຄງ​ລ່າງ ການ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ​ຍັງ​ມີ​ໜ້ອຍ ເຊັ່ນ: ການ​ລົງ­ທຶນ​ໃສ່​ການ​ຜະ­ລິດ​ເປັນ​ສິນ­ຄ້າ ການ​ສ້າງ​ລາຍ​ຮັບ​ໃຫ້​ປະ­ຊາ­ຊົນ​ມີ​ໜ້ອຍ ສະ­ເໜີ​ໃຫ້​ພາກ­ສ່ວນ​ກ່ຽວ­ຂ້ອງ​ພິ­ຈາ­ລະ­ນາ​ແກ້​ໄຂ​ເພີ່ມ​ຕື່ມ.

   ທ່່ານ ຈັນ​ສີ ແສງ​ສົມ​ພູ ສສຊ ເຂດ 2 ແຂວງ​ຜົ້ງ​ສາ­ລີ ປະ­ກອບ​ຄຳ​ເຫັນ​ໃສ່​ການ​ພັດ­ທະ­ນາ​ຊົນ­ນະ­ບົດ ແລະ ແກ້​ໄຂ​ຄວາມ­ທຸກ​ຍາກ ອີງ​ຕາມ​ສະ­ພາບ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ​ໃນ​ການ​ແກ້​ໄຂ​ຄວາມ­ທຸກ​ຍາກ ແມ່ນ​ໄດ້​ເຮັດ​ແບບ​ລວມໆ ບໍ່​ໄປ​ຕາມ​ຈຸດ​ສຸມ​ຂອງ​ລັດ­ຖະ­ບານ ແລະ ອົງ­ການ​ປົກ­ຄອງ​ແຂວງ ຈຶ່ງ​ສະ­ເໜີ​ໃຫ້​ລັດ​ຖະ ບານ​ບິ​ແບ່ງ​ທຶນ­ຮອນ ພະ­ນັກ­ງານ ເວ­ລາ​ໃຫ້​ເໝາະ​ສົມ ເພື່ອ​ເຮັດ​ໃຫ້​ຈຸດ​ສຸມ​ດັ່ງ­ກ່າວ ໄດ້​ຮັບ​ການ​ປະ­ຕິ­ບັດ​ປະ ກົດ​ຜົນ​ເປັນ​ຈິງ ໂຄງ​ປະ­ກອບ​ເສດ­ຖະ­ກິດ​ຂອງ ສປປ ລາວ ຍັງ​ບໍ່​ເຂັ້ມ­ແຂງ​ເທົ່າ​ທີ່​ຄວນ ເພື່ອ​ເຮັດ​ໃຫ້​ບັນ­ດາ​ຂະ­ແໜງ​ເສດ­ຖະ­ກິດ​ມີ​ການ​ພັດ­ທະ­ນາ ມີ​ຄວາມ​ເຂັ້ມ­ແຂງ ສະ­ເໜີ​ໃຫ້​ລັດ­ຖະ­ບານ​ກຳ­ນົດ​ເປົ້າ​ໝາຍ​ການ​ຜະ ລິດ​ອື່ນໆ ຄຽງ​ຄູ່​ກັບ​ເປົ້າ​ໝາຍ​ການ​ຜະ­ລິດ​ເຂົ້າ 4,4 ລ້ານ​ໂຕນ ພ້ອມ​ທັງ​ສະ­ເໜີ​ໃຫ້​ກວດ­ຄືນ​ການ​ຈັດ​ເກັບ​ລາຍ​ຮັບ​ໃຫ້​ມີ​ປະ​ສິດ­ທິ​ຜົນ​ຂຶ້ນ ໂດຍ​ການ​ກຳ­ນົດ​ຖານ​ລາຍ​ຮັບ​ຢ່າງ​ຈະ­ແຈ້ງ.

   ທ່ານ ໄຊ​ພອນ ຄຸນ​ສີ​ລິ​ເຮືອງ ສສຊ ເຂດ 3 ແຂວງ​ຫຼວງ​ນ້ຳ​ທາ ປະ­ກອບ​ຄຳ​ເຫັນ​ວ່າ: ໃນ​ແຜນ​ພັດ​ທະ ນາ​ເສດ­ຖະ­ກິດ-ສັງ­ຄົມ​ຂອງ​ລັດ­ຖະ­ບານ ໄດ້​ຍົກ​ໃຫ້​ເຫັນ​ວ່າ​ມີ​ຄວາມ​ແຕກ​ໂຕນ​ກັນ ລະ­ຫວ່າງ ຕົວ​ເມືອງ ແລະ ຊົນ­ນະ­ບົດ ຈຶ່ງ​ສະ­ເໜີ​ໃຫ້​ລັດ­ຖະ­ບານ​ເພີ່ມ​ການ​ລົງ­ທຶນ ເພີ່ມ​ກຳ­ລັງ​ຄົນ​ເຂົ້າ​ໃນ​ວຽກ​ງານ​ພັດ­ທະ­ນາ​ຊົນ­ນະ­ບົດ ແລະ ແກ້​ໄຂ​ຄວາມ­ທຸກ​ຍາກ​ໃຫ້​ປະ­ຊາ­ຊົນ​ຫຼາຍ​ຂຶ້ນ ລົງ­ທຶນ​ພັດ­ທະ­ນາ​ຈຸດ​ສຸມ ແລະ ສ້າງ​ຈຸດ​ສຸມ ໃຫ້​ເປັນ​ຕົວ​ແບບ​ໃນ​ການ​ພັດ­ທະ­ນາ ແລະ ສ້າງ​ກຸ່ມ​ບ້ານ​ນ້ອຍ​ໃຫ້​ກາຍ­ເປັນ​ຕົວ​ເມືອງ​ໃນ​ຊົນ­ນະ­ບົດ ແລະ ເອົາ­ໃຈ­ໃສ່​ປັບ­ປຸງ​ຂັ້ນ​ຕອນ​ການ​ລົງ­ທຶນ​ໃຫ້​ສະ­ດວກ​ຂຶ້ນ. 

ຂ່າວທີ່ກ່ຽວຂ້ອງ