ຂ່າວຫຼ້າສຸດ

ປະ­ທານ​ປະ­ເທດ ແລະ ສະ­ມາ­ຊິກ​ສະ­ພາ​ແຫ່ງ​ຊາດ ຢ້ຽມ​ຊົມ​ບຸນ​ພະ​ທາດ­ຫຼວງ

581 11 ພ.ຈ. 2019 ຂ່າວໜ້າ​ໜຶ່ງ
ປະ­ທານ​ປະ­ເທດ ແລະ ສະ­ມາ­ຊິກ​ສະ­ພາ​ແຫ່ງ​ຊາດ ຢ້ຽມ​ຊົມ​ບຸນ​ພະ​ທາດ­ຫຼວງ

   ທ່ານ ບຸນ​ຍັງ ວໍ­ລະ​ຈິດ ປະ­ທານ​ປະ­ເທດ ພ້ອມ​ຄະ­ນະ ຢ້ຽມ​ຊົມ​ງານ​ວາງ­ສະ­ແດງ​ສິນ­ຄ້າ ແລະ ບຸນ​ນະ ມັດ​ສະ­ການ​ພະ​ທາດ­ຫຼວງ ປະ­ຈຳ​ປີ 2019 ວັນ​ທີ 8 ພະ­ຈິກ 2019 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ຄະ­ນະ​ກຳ­ມະ­ການ​ຈັດ​ງານ​ບຸນ ແລະ ພາກ­ສ່ວນ​ກ່ຽວ ຂ້ອງ.

    ຈຸດ­ປະ­ສົງ​ເພື່ອ​ຊຸກ­ຍູ້-ສົ່ງ­ເສີມ​ບັນ­ດາ​ຜະ­ລິດ​ຕະ​ພັນ​ສິນ­ຄ້າ​ຂອງ​ຫົວ­ໜ່ວຍ​ທຸ­ລະ​ກິດ ແລະ ຜູ້​ປະ­ກອບ​ການ​ທີ່​ໄດ້​ນຳ​ມາ​ຮ່ວມ​ວາງ­ສະ­ແດງ ແລະ ຈຳ­ໜ່າຍ​ໃນ​ບຸນ​ດັ່ງ­ກ່າວ ທັງ​ເປັນ​ການ​ສົ່ງ­ເສີມ​ວຽກ​ງານ​ການ­ທ່ອງ­ທ່ຽວ ແນ ໃສ່​ດຶງ​ດູດ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ ສປປ ລາວ ກໍ​ຄື ນະ­ຄອນ­ຫຼວງ​ວຽງ​ຈັນ​ໃຫ້​ນັບ​ມື້​ເພີ່ມ​ຂຶ້ນ ໃນ​ນີ້ ທ່ານ​ປະ­ທານ​ປະ­ເທດ ແລະ ຄະ­ນະ ໄດ້​ຢ້ຽມ​ຊົມ​ສວນ​ຂຽວ​ນະ­ຄອນ­ຫຼວງ​ວຽງ​ຈັນ ຂອງ​ບໍ­ລິ­ສັດ​ເພັດ​ຖາ­ວອນ​ກໍ່­ສ້າງ​ຈຳ­ກັດ ໂຄງ­ການ​ຈຳ­ລອງ​ລົດ­ໄຟ​ຄວາມ​ໄວ​ສູງ ລາວ-ຈີນ ໝູ່​ບ້ານ​ເຮືອນ​ລາວ​ຂອງ​ກຸ່ມ​ບໍ­ລິ­ສັດ​ຊີ​ເອັນ​ພີ ພ້ອມ​ນີ້ ໄດ້​ຢ້ຽມ​ຊົມ​ຜະ­ລິດ​ຕະ​ພັນ​ສິນ­ຄ້າ​ອຸດ­ສາ­ຫະ­ກຳ​ປຸງ​ແຕ່ງ​ຂອງ​ບໍ­ລິ­ສັດ​ຕ່າງໆ ເປັນ­ຕົ້ນ ບໍ­ລິ­ສັດ​ຊີ​ພີ​ລາວ​ຈຳ­ກັດ ບໍ­ລິ­ສັດ​ມິດ­ຕະ­ພາບ​ກະ­ສິ­ກຳ​ຈຳ­ກັດ ແລະ ບໍ­ລິ­ສັດ​ດາວ­ເຮືອງ ນອກ​ນີ້ ຍັງ​ໄດ້​ຢ້ຽມ​ຊົມ​ຜະ­ລິດ​ຕະ​ພັນ​ສິນ­ຄ້າ​ໂອ​ດ໋ອບ​ຂອງ 17 ແຂວງ ແລະ ນະ­ຄອນ­ຫຼວງ​ວຽງ​ຈັນ ໂດຍ​ສະ­ເພາະ ໂຮງ­ງານ​ຄຳ​ສິງ​ຜະ­ລິດ​ຕະ​ພັນ​ປອດ​ສານ­ພິດ ຫ້ອງ​ປຸງ​ແຕ່ງ​ຢາ­ພື້ນ­ເມືອງ​ກາ​ເສືອ 1 ໂຕ ຮ້ານ​ອາ​ນຸ​ສອນ​ຫັດ­ຖະ­ກຳ​ຜະ­ລິດ ແລະ ຈຳ­ໜ່າຍ​ກະ­ເປົາ​ຫວາຍ​ທຸກ​ຊະ­ນິດ ກົງ​ທອງ​ຫັດ­ຖະ­ກຳ​ເສື້ອ​ໄໝ ກຸ່ມ​ຫັດ­ຖະ­ກຳ​ຕ່ຳ­ຫູກ​ທີ່​ຜະ­ລິດ​ເປັນ​ສິນ­ຄ້າ ບ້ານ​ໂພນ​ສະ­ອາດ ແຂວງ​ຊຽງ​ຂວາງ ຫັດ­ຖະ­ກຳ​ໄມ້­ປ່ອງ ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ໂຮງ­ງານ​ທາ​ນິນ​ຄວັດ​ໂຖ​ດອກ​ໄມ້ ແລະ ແກະ­ສະ­ຫຼັກ ບ້ານ​ທົ່ງ​ນ້ອຍ ເມືອງ​ປາກ​ຊັນ ແຂວງ​ບໍ​ລິ​ຄຳ​ໄຊ ໂຮງ­ງານ​ຜະ­ລິດ​ນ້ຳ​ສະ­ກັດ​ໝາກ​ຂາມ­ປ້ອມ ກຸ່ມ​ປຸງ​ແຕ່ງ​ຢາ­ພື້ນ­ເມືອງ​ລາວ​ສ່ວນ​ບຸກ­ຄົນ ບ້ານ​ໂພນ​ສະ­ຫວ່າງ ເມືອງ​ວຽງ​ຄຳ ແຂວງ​ວຽງ​ຈັນ ໂຮງ­ງານ​ປາ­ແດກ​ຮຸ່ງ­ເຮືອງ​ສິນ ແລະ ຫົວ­ໜ່ວຍ​ທຸ­ລະ​ກິດ​ອື່ນໆ​ອີກ.

    ວັນ​ດຽວ​ກັນ​ນີ້ ທ່ານ ອາ­ນຸ­ພາບ ຕຸ​ນາ​ລົມ ປະ­ທານ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ ຊຸດ​ທີ I ກໍ​ໄດ້ ນຳ­ພາ​ຄະ­ນະ​ສະ­ມາ­ຊິກ​ສະ­ພາ​ແຫ່ງ​ຊາດ ຊຸດ​ທີ VIII ໃນ​ໂອ­ກາດ​ທີ່​ເຂົ້າ​ຮ່ວມ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 8 ຂອງ​ສະ­ມາ­ຊິກ​ສະ­ພາ​ແຫ່ງ​ຊາດ ຊຸດ​ທີ VIII ຢ້ຽມ​ຊົມ​ງານ​ວາງ­ສະ­ແດງ​ສິນ­ຄ້າ ແລະ ບຸນ​ນະ­ມັດ­ສະ­ການ​ພະ ທາດ­ຫຼວງ​ວຽງ​ຈັນ ປະ­ຈຳ​ປີ 2019 ເຊັ່ນ​ດຽວ​ກັນ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ ຫົວ­ໜ້າ​ໜ່ວຍ​ງານ​ກອງ​ເລ­ຂາ​ຊ່ວຍ​ວຽກ​ຈັດ​ງານ​ບຸນ​ພະ​ທາດ­ຫຼວງ​ວຽງ​ຈັນ ເຊິ່ງ​ນອກ­ຈາກ​ໄດ້​ຢ້ຽມ​ຊົມ​ຜະ­ລິດ​ຕະ​ພັນ​ສິນ­ຄ້າ​ແລ້ວ ຄະ­ນະ​ສະ­ມາ­ຊິກ​ສະ­ພາ​ແຫ່ງ​ຊາດ ຊຸດ​ທີ VIII ຍັງ​ໄດ້​ຢ້ຽມ​ຊົມ​ຫ້ອງ​ວາງ­ສະ­ແດງ​ຜະ­ລິດ​ຕະ​ພັນ​ດ້ານ​ການ​ທ່ອງ ທ່ຽວ ເປັນ­ຕົ້ນ ບ້ານ​ສວນ​ມະ­ນີ​ຈັນ ແລະ ເຄືອ​ຄ່າຍ​ສີ່​ຫຼ່ຽມ​ລ້ານ​ຊ້າງ ລາວ-ໄທ ຢ້ຽມ​ຊົມ​ຮູບ​ພາບ​ການ​ສ້າງ ແລະ ປະ­ຕິ­ສັງ­ຂອນ​ພະ​ທາດ­ຫຼວງ​ວຽງ​ຈັນ ແຕ່​ອະ­ດີດ​ຈົນ​ເຖິງ​ປັດ­ຈຸ­ບັນ ແລະ ກາບ​ໄຫວ້​ສັກ­ກະ​ລະ​ບູ­ຊາ​ອົງ​ພະ​ທາດ­ຫຼວງ ຕື່ມ​ອີກ.

ຂ່າວທີ່ກ່ຽວຂ້ອງ