ຂ່າວຫຼ້າສຸດ

ຈະໃຊ້ມາດຕະການເຂັ້ມງວດ ຕໍ່ຜູ້ລະເມີດລະບຽບຊົ່ວຄາວ ບຸນທາດຫຼວງ

1.149 08 ພ.ຈ. 2019 ຂ່າວໜ້າ​ໜຶ່ງ
ຈະໃຊ້ມາດຕະການເຂັ້ມງວດ ຕໍ່ຜູ້ລະເມີດລະບຽບຊົ່ວຄາວ ບຸນທາດຫຼວງ

    ທ່ານ ພຸດ​ທະ​ພອນ ໂຄດ​ປັນ­ຍາ ຮອງ​ເຈົ້າ­ເມືອງ​ໄຊ​ເສດ​ຖາ ຮອງ​ອະ­ນຸ​ກຳ­ມະ­ການ​ຈັດ​ງານ​ວາງ​ສະແດງ​ສິນ­ຄ້າ ແລະ ກວດ­ກາ​ສິນ­ຄ້າ ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ ປະ­ຈຳ​ປີ 2019 ໃຫ້​ສຳ­ພາດ​ວັນ​ທີ 6 ພະ­ຈິກ 2019 ວ່າ: ການ​ຈັດ​ສັນ​ບ່ອນ​ຈອດ​ລົດ​ໃນ​ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ​ປີ​ນີ້ ຄະ­ນະ​ກຳ­ມະ­ການ​ຈັດ​ງານ​ໄດ້​ເອົາ­ໃຈ­ໃສ່​ເປັນ​ພິ­ເສດ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ກົດ​ລະ­ບຽບ​ຊົ່ວ­ຄາວ​ໃນ​ງານ​ບຸນ​ດັ່ງ­ກ່າວ ສະ­ເພາະ​ເມືອງ​ໄຊ​ເສດ​ຖາ​ຄຸ້ມ​ຄອງ ແມ່ນ​ຢູ່​ນອກ​ເດີ່ນ​ກົມ​ມະ​ລຽນ​ພະ​ທາດ­ຫຼວງ​ວຽງ​ຈັນ ກວມ​ເອົາ 11 ບ້ານ ເຊິ່ງ​ມີ​ຄອກ​ຝາກ​ລົດ​ບໍ­ລິ­ການ 57 ຄອກ ໃນ​ນີ້ ລົດ­ຈັກ 30 ຄອກ ລົດ​ໃຫຍ່ 27 ຄອກ ເພື່ອ​ຮອງ​ຮັບ​ລົດ​ຜູ້​ທີ່​ມາ​ທ່ຽວ​ງານ​ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ ນອກ​ນີ້ ຍັງ​ມີ​ຮ້ານ​ຄ້າ​ປະ­ເພດ​ອາ­ຫານ ແລະ ເຄື່ອງ­ນຸ່ງ​ຫົ່ມ 90 ຮ້ານ ສ່ວນ​ລາ­ຄາ​ສິນ­ຄ້າ ແລະ ຄ່າ​ບໍ­ລິ­ການ​ຝາກ​ລົດ ແມ່ນ​ປະ­ຕິ­ບັດ​ຕາມ​ກົດ​ລະ­ບຽບ​ຊົ່ວ­ຄາວ​ຂອງ​ນະ­ຄອນ­ຫຼວງ​ວຽງ​ຈັນ ຄື: ລົດ­ຈັກ 10 ພັນ​ກີບ ລົດ​ໃຫຍ່ 20 ພັນ​ກີບ.

    ການ​ຈັດ​ສະ­ຖານ­ທີ່​ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ​ໃນ​ໄລ­ຍະ​ຜ່ານ​ມາ ພົບ​ຄວາມ​ຫຍຸ້ງ­ຍາກ​ໃນ​ການ​ຈັດ​ສະ­ຖານ­ທີ່ ເປັນ­ຕົ້ນ ທາງ​ຮ່ອມ ທາງ​ຊອຍ ໄດ້​ມີ​ການ​ຕັ້ງ​ເຕັ້ນ​ກວມ​ເອົາ​ເສັ້ນ­ທາງ ເຮັດ​ໃຫ້­ການ​ສັນ ຈອນ​ແອ​ອັດ ໂດຍ​ສະ­ເພາະ ທາງ​ສີ່​ເລນ​ທີ່​ໃຊ້​ເປັນ​ທາງ​ເຂົ້າ-ອອກ​ຂອງ​ການ​ນຳ​ທີ່​ມາ​ຮ່ວມ​ງານ​ບຸນ​ດັ່ງ­ກ່າວ ເນື່ອງ​ຈາກ​ທາງ​ບ້ານ​ໄດ້​ຂາຍ​ສະ­ຖານ­ທີ່​ກ່ອນ​ງານ​ບຸນ ແຕ່​ປີ​ນີ້ ພວກ​ເຮົາ​ໄດ້​ຈັດ​ສຳ​ມະ​ນາ​ແຕ່​ຫົວ­ທີ ໂດຍ​ເອີ້ນ​ນາຍ­ບ້ານ 11 ບ້ານ​ມາ​ໂອ້​ລົມ ເພື່ອ​ໃຫ້​ພ້ອມ​ກັນ​ປະ­ຕິ­ບັດ​ກົດ​ລະ­ບຽບ​ຂອງ​ຄະ­ນະ​ກຳ­ມະ­ການ​ຈັດ​ງານ​ບຸນ​ຢ່າງ​ເຂັ້ມ​ງວດ ຖ້າ​ບ້ານ​ໃດ​ຂາຍ​ເນື້ອ­ທີ່​ກ່ອນ ແມ່ນ​ແນະ­ນຳ​ໃຫ້​ສົ່ງ​ເຈົ້າ​ຂອງ​ເງິນ​ຄືນ ແລະ ຜູ້​ໃດ​ທີ່​ເຮັດ​ຜິດ​ລະ­ບຽບ ຈະ​ໄດ້​ມີ​ການ​ຕັກ­ເຕືອນ ຖ້າ​ບໍ່​ປະ­ຕິ­ບັດ​ຈະ​ໃຊ້​ມາດ​ຕະ­ການ​ເຂັ້ມ​ງວດ ເພື່ອ​ເຮັດ​ໃຫ້​ສະ­ຖານ­ທີ່​ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ ແລະ ຄຸ້ມ​ຄອງ​ສະ­ດວກ​ສະ­ບາຍ ຄະ­ນະ​ກຳ­ມະ­ການ​ຂັ້ນ​ເມືອງ​ໄດ້​ຈັດ​ແບ່ງ​ເປັນ 11 ຈຸ ແຕ່​ລະ​ຈຸ​ມີ​ຫົວ­ໜ້າ​ຄະ­ນະ​ຮັບ­ຜິດ­ຊອບ ແນ­ໃສ່​ຕ້ອນ­ຮັບ​ນັກ​ທ່ອງ​ທ່ຽວ​ທີ່​ມາ​ທ່ຽວ​ງານ​ບຸນ​ໃຫ້​ມີ​ຄວາມ​ສະ­ດວກ​ສະ­ບາຍ ປາ­ສະ­ຈາກ​ສິ່ງ​ກີດ­ຂວາງ.

ຂ່າວທີ່ກ່ຽວຂ້ອງ