ຂ່າວຫຼ້າສຸດ

ໂຄສະນາວັດທະນະທຳ ແລະ ການທ່ອງທ່ຽວ ຄຸນໝິງກ້າວສູ່ນະຄອນຫຼວງວຽງຈັນ

886 07 ພ.ຈ. 2019 ຂ່າວໜ້າ​ໜຶ່ງ
ໂຄສະນາວັດທະນະທຳ ແລະ ການທ່ອງທ່ຽວ ຄຸນໝິງກ້າວສູ່ນະຄອນຫຼວງວຽງຈັນ

    ພະ​ແນກ​ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ​ຄຸນ​ໝິງ ສປ ຈີນ ນຳ­ພາ​ຄະ­ນະ​ທ່ອງ​ທ່ຽວ​ຈີນ ມາ​ທ່ອງ​ທ່ຽວ ສປປ ລາວ ແລະ ໄດ້​ຈັດ​ງານ​ໂຄ­ສະ­ນາ​ວັດ­ທະ­ນະ­ທຳ ແລະ ການ­ທ່ອງ­ທ່ຽວ​ຂອງ​ນະ­ຄອນ​ຄຸນ​ໝິງ ຂຶ້ນ​ວັນ​ທີ 2 ພະ­ຈິກ ຜ່ານ​ມາ ຢູ່​ໂຮງ­ແຮມ​ດອນ​ຈັນ​ພາ​ເລດ ໂດຍ​ມີ​ທ່ານ​ນາງ ມະ­ນີ​ພັນ ຫຼວງ​ສີ​ສົງ­ຄາມ ຮອງ​ຫົວ­ໜ້າ​ກົມ​ຮ່ວມ​ມື​ສາ­ກົນ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ທ່ານ ກູ້ ຮຸ້ຍ​ວິນ ຜູ້​ຮັບ​ຜິດ ຊອບ​ໜ່ວຍ​ງານ​ພົວ­ພັນ​ຕ່າງ­ປະ­ເທດ ກຸ່ມ​ພັນ­ທະ​ມິດ​ການ­ທ່ອງ­ທ່ຽວ ເມືອງ​ມິດ­ຕະ­ພາບ​ນາ­ນາ​ຊາດ ນະ­ຄອນ​ຄຸນ​ໝິງ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ຄຸນ​ໝິງ ເປັນ​ເມືອງ​ມະ­ນຸດ­ສະ­ທຳ ມີ​ວັດ­ທະ­ນະ­ທຳ​ທາງ​ປະ­ຫວັດ­ສາດ ວັດ­ທະ­ນະ­ທຳ​ຊົນ­ເຜົ່າ ວັດ ທະ­ນະ​ທຳ​ດ້ານ​ສາ­ສະ­ໜາ ເປັນ​ເມືອງ​ທີ່​ມີ​ບຸກ​ຄະ​ລິກ​ດ້ານ​ວັດ­ທະ­ນະ­ທຳ “ລະ­ຫວ່າງ​ຕາ­ເວັນ­ຕົກ ແລະ ຕາ­ເວັນ​ອອກ ມີ​ທັງ​ດັ້ງ­ເດີມ ແລະ ຍຸກ​ປັດ­ຈຸ­ບັນ” ເປັນ​ເມືອງ​ທີ່​ຕັ້ງ​ຢູ່​ເທິງ​ພູ​ພຽງ ຖືກ​ຂະ­ໜານ​ນາມ​ວ່າ​ເປັນ​ເມືອງ “ລະ­ດູ­ບານ­ໃໝ່  ເມືອງ​ດອກ​ໄມ້” ເຊິ່ງ​ມີ​ອາ­ກາດ ໜອງ​ນ້ຳ​ທຳ​ມະ​ຊາດ​ເທິງ​ພູ​ພຽງ​ທີ່​ອຳ­ນວຍ​ຄວາມ​ສະ­ດວກ ເໝາະ​ແກ່​ການ​ຜ່ອນ­ຄາຍ ທ່ອງ​ທ່ຽວ ພັກ­ຜ່ອນ ມີ​ຮີດ­ຄອງ​ປະ­ເພ­ນີ​ຫຼາຍ​ຊົນ­ເຜົ່າ ເຊິ່ງ​ຍັງ​ຮັກ­ສາ​ໄດ້​ຮີດ­ຄອງ​ປະ­ເພ­ນີ ວິ­ຖີ​ຊີ­ວິດ ວັດ­ທະ­ນະ­ທຳ ສິ­ລະ​ປະ ຮີດ­ຄອງ​ປະ­ເພ­ນີ​ທີ່​ມີ​ເອ­ກະ­ລັກ ມີ​ອາ­ຫານ ທຳ­ນອງ​ເພງ ການ​ເຕັ້ນ​ລຳ ການ​ນຸ່ງ​ຖື​ທີ່​ເປັນ​ເອ­ກະ­ລັກ ມີ​ທີ່​ຕັ້ງ​ທີ່​ໂດດ​ເດັ່ນ ເປັນ​ປະ­ຕູ ແລະ ຕະ­ຫຼາດ​ທີ່​ສຳ­ຄັນ ລະ­ຫວ່າງ​ບັນ­ດາ​ແຂວງ​ຂອງ​ຈີນ ໄປ​ຍັງ​ອາ­ຊີ​ຕາ­ເວັນ​ອອກ­ສຽງ​ໃຕ້ ແລະ ອາ­ຊີ​ໃຕ້ ໂດຍ​ມີ​ລະ­ບົບ​ຄົມ­ມະ­ນາ­ຄົມ​ທີ່​ສະ­ດວກ ສາຍ​ການ­ບິນ​ໄປ​ສູ່​ອາ­ຊີ​ໃຕ້ ແລະ ອາ­ຊີ​ຕາ­ເວັນ​ອອກ­ສຽງ​ໃຕ້ 34 ແຫ່ງ (ອັນ​ດັບ​ໜຶ່ງ​ຂອງ​ຈີນ) ນອກ​ນີ້ ຍັງ​ເປັນ​ເມືອງ​ທີ່​ອຸ­ດົມ­ສົມ­ບູນ​ໄປ​ດ້ວຍ​ຊັບ­ພະ­ຍາ­ກອນ​ທຳ​ມະ​ຊາດ ຊີ­ວະ​ນາໆພັນ ສັດ ແລະ ເປັນ​ສູນ​ຜະ­ລິດ​ດອກ​ໄມ້​ສົດ​ທີ່​ໃຫຍ່​ທີ່​ສຸດ​ໃນ​ອາ­ຊີ.

    ການ​ມາ​ຢ້ຽມ­ຢາມ​ລາວ​ຄັ້ງ​ນີ້ ເພື່ອ​ຂະ­ຫຍາຍ​ການ​ໄປ-ມາ​ຫາ​ສູ່​ຂອງ​ປະ­ຊາ­ຊົນ​ຈີນ ແລະ ລາວ ສົ່ງ­ເສີມ​ການ​ຮ່ວມ​ມື ແລະ ການ​ແລກ­ປ່ຽນ ລະ­ຫວ່າງ​ນະ­ຄອນ​ຄຸນ​ໝິງ​ກັບ​ອາ­ຊີ​ໃຕ້ ອາ­ຊີ​ຕາ­ເວັນ​ອອກ­ສຽງ​ໃຕ້ ເຊິ່ງ​ມີ​ຄວາມ​ໝາຍ​ຍຸດ​ທະ​ສາດ​ໃນ​ການ​ສ້າງ​ແຜນ​ຄູ່​ຮ່ວມ​ຊະ​ຕາ​ກຳ​ດ້ານ​ການ­ທ່ອງ­ທ່ຽວ ລາວ-ຈີນ ຊຸມ​ປີ­ຜ່ານ­ມາ​ທິວ​ທັດ​ທຳ​ມະ​ຊາດ ແລະ ວັດ­ທະ­ນະ­ທຳ ທີ່​ເປັນ​ເອ­ກະ­ລັກ​ຂອງ​ລາວ ໄດ້​ກາຍ­ເປັນ​ສະ­ຖານ­ທີ່​ທ່ອງ​ທ່ຽວ​ທີ່​ໜ້າ​ສົນ­ໃຈ​ຂອງ​ນັກ​ທ່ອງ​ທ່ຽວ​ຈີນ​ນັບ​ມື້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ