ຂ່າວຫຼ້າສຸດ

ເທ​ຄວັນ​ໂດ ເລືອກເຟັ້ນ​ນັກກີລາ​ທີມ​ຊາດ ຮ່ວມ​ຊີເກມ

694 07 ພ.ຈ. 2019 ວົງຈອນກີລາ
ເທ​ຄວັນ​ໂດ ເລືອກເຟັ້ນ​ນັກກີລາ​ທີມ​ຊາດ ຮ່ວມ​ຊີເກມ

    ການ​ແຂ່ງຂັນ​ກີລາ​ເທ​ຄວັນ​ໂດ ຮຸ່ນ​ອະນຸຊົນ ເຍົາວະ​ຊົນ ແລະ ຮຸ່ນ​ຊາວ​ໜຸ່ມ ທົ່ວ​ປະເທດ ຊີງ​ຂັນ​ທ່ານ​ເອກ​ອັກ​ຄະ​ລັດ​ຖະ​ທູດ ສ ເກົາຫຼີ ປະຈຳ ​ສປປ ລາວ ຄັ້ງ​ທີ V ປະຈຳ​ປີ 2019 ຈະ​ຈັດ​ຂຶ້ນ​ວັນ​ທີ 9-10 ພະຈິກ 2019 ຢູ່​ສະໜາມ​ກີລາ​ເທ​ຄວັນ​ໂດ​ຊົ່ວຄາວ ສູນ​ການ​ຄ້າ​ລາວ-ໄອ​ເຕັກ ເມືອງ​ໄຊ​ເຊດ​ຖາ ນະຄອນຫຼວງ​ວຽງ​ຈັນ ເພື່ອ​ເລືອກເຟັ້ນ​ນັກກີລາ​ທີມ​ຊາດ ເຂົ້າ​ຮ່ວມ​ມະຫາ​ກຳ​ຊີເກມ ຄັ້ງ​ທີ XXX ຢູ່​ປະເທດ​ຟີ​ລິບ​ປິນ ທ້າຍ​ປີ​ນີ້. 

    ການ​ແຂ່ງຂັນ​ດັ່ງກ່າວ ປະກອບ​ມີ​ຮຸ່ນ 8 ປີ 10 ປີ 12 ປີ 15 ປີ 17 ປີ ແລະ ຮຸ່ນ​ທົ່ວ​ໄປ ໂດຍ​ແຂ່ງຂັນ​ທັງ​ປະເພດ​ຕໍ່ສູ້ ແລະ ປະເພດ​ຟ້ອນ​ປຸ້ມ​ເຊ ລວມ 136 ລາຍການ ພິເສດ​ຈະ​ມີ​ລາຍການ​ສຳລັບ​ມື ໃໝ່ ແລະ ມີ​ນັກກີລາ​ຈາກ​ແຂວງ​ບໍ່​ແກ້ວ ຫຼວງ​ພະ​ບາງ ຊຽງ​ຂວາງ ອຸດົມ​ໄຊ ບໍ​ລິ​ຄຳ​ໄຊ ຄຳ​ມ່ວນ ແລະ ແຂວງ​ຈຳປາ​ສັກ ເຂົ້າ​ຮ່ວມ.

    ສຳລັບ​ລາງວັນ​ຊະນະ​ເລີດ ອັນ​ດັບ 2 ອັນ​ດັບ 3 ຈະ​ໄດ້​ຫຼຽນ​ຄຳ ຫຼຽນ​ເງິນ ແລະ ຫຼຽນ​ທອງ ຕາມ ລຳດັບ ພ້ອມ​ໃບຢັ້ງຢືນ​ສະຖິຕິ ນອກ​ນີ້​ຜູ້​ຊະນະ​ເລີດ ຍັງ​ຈະ​ມີ​ການ​ລວມ​ຄະແນນ ຜູ້​ທີ່​ໄດ້​ຄະແນນ​ສູງ​ສຸດ ທີ 1 ທີ 2 ທີ 3 ຈະ​ໄດ້​ຄອງ​ຂັນ​ລາງວັນ​ນັກກີລາ​ດີເດັ່ນ​ຕ່າງໆ ພ້ອມ​ທັງ​ໄດ້​ຄະແນນ​ສະ​ສົມ ເພື່ອ​ຄວ້າ​ສິດ​ເຂົ້າ​ຮ່ວມ​ງານ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ XI ຢູ່​ແຂວງ​ຊຽງ​ຂວາງ ໃນ​ຕົ້ນ​ປີ 2020.  

ຂ່າວທີ່ກ່ຽວຂ້ອງ