ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 06-11-2019

1.042 06 ພ.ຈ. 2019 ຫົວຂໍ້ຂ່າວອື່ນໆ

   ມື້­ນີ້ ຂໍ​ເລີ່ມ​ຈາກ​ເລື່ອງ​ວິ­ທີ​ການ​ດີໆຂອງ​ອົດ​ສະ​ຕຣາ​ລີ ເພື່ອ​ຜ່ອນ­ຄາຍ​ຄວາມ​ຄຽດ​ຂອງ​ນັກ​ສຶກ​ສາ ນະ­ໂຍ­ບາຍ​ໃຫ້​ຄົນ​ຕ່າງ­ປະ­ເທດ​ເປັນ​ເຈົ້າ​ຂອງ​ທີ່​ດິນ​ຢູ່​ມັນ​ດິບ ແລະ ມາດ​ຕະ­ການ​ຕອນ​ທາງ​ເຄ​ມີ​ຕໍ່​ຜູ້​ຂົ່ມ­ຂືນ​ເດັກ​ຢູ່​ລັດ​ອະ​ລາ​ບາ​ມາ ສ ອາ​ເມ​ຣິ​ກາ.

   ທີ່ ອົດ​ສະ​ຕຣາ​ລີ: ມີ​ຂ່າວ​ໃນ​ທ້າຍ​ປີ 2017 (ວຽງ​ຈັນ​ທາມ 4 ພະ­ຈິກ 2017) ກ່ຽວ​ກັບ​ນະ­ໂຍ­ບາຍ​ດີໆຂອງ​ມະ­ຫາ­ວິ­ທະ­ຍາ­ໄລ​ແຄນ​ເບີ​ຣາ ເພື່ອ​ຊ່ວຍ​ຫຼຸດ­ຜ່ອນ​ອາ­ການ​ຄຽດ ອາ­ການ​ສະ­ໝອງ ແລະ ອາ­ລົມ​ເຄັ່ງ​ຕຶງ ຈາກ​ການ​ຮຽນ​ຂອງ​ນັກ​ສຶກ​ສາ ນັ້ນ ກໍ​ຄື ການ​ສ້າງ​ສວນ­ສັດ​ນ້ອຍໆ​ໄວ້​ບໍ­ລິ­ເວນ​ເດີ່ນ​ໂຮງ­ຮຽນ ເພື່ອ​ໃຫ້​ນັກ​ສຶກ​ສາ​ໄດ້​ຜ່ອນ­ຄາຍ​ກັບ​ການ​ຢອກ​ຫຼິ້ນ ຫຼື ຊົມ​ກັບ​ບັນ­ດາ​ສັດ​ທີ່​ຕົນ​ຮັກ ທ່ານ ໂທ​ມັດ ເນນ​ສັນ ຊ່ຽວ­ຊານ​ດ້ານ​ຄວາມ​ຜາ​ສຸກ​ສຳ­ລັບ​ຄົນ ກ່າວ​ກັບ​ນະ­ໂຍ­ບາຍ​ນີ້​ວ່າ: ການ​ໃຫ້​ນັກ​ສຶກ​ສາ​ກັບ​ສັດ​ໄດ້​ມີ​ການ​ພົວ­ພັນ​ກັນ​ນັ້ນ ແມ່ນ​ປັດ​ໄຈ​ສຳ­ຄັນ​ໃນ​ການ​ຊ່ວຍ​ຫຼຸດ­ຜ່ອນ​ຄວາມ​ຄຽດ... ພຽງ​ແຕ່​ໄດ້​ມີ​ໂອ­ກາດ​ລູບ­ຄຳ​ສັດ​ກໍ​ພໍ­ແລ້ວ ຄົນ​ເຮົາ​ເມື່ອ​ເຄັ່ງ​ຄຽດ​ກັບ​ວຽກ ກໍ​ຕ້ອງ​ມີ​ເວ­ລາ​ເຄື່ອນ​ໄຫວ​ອື່ນໆ ນັ້ນ​ເປັນ​ວິ­ທີ​ທີ່​ດີ ທ້າວ ໄອ​ເດັນ ພອຍ​ເຕີ (Ayden Poynter) ນັກ​ສຶກ​ສາ​ມະ­ຫາ­ວິ­ທະ­ຍາ­ໄລ​ປີ​ທີ​ສອງ ວິ­ຊາ​ສື່­ສານ ເວົ້າ​ວ່າ ການ​ມີ​ເວ­ລາ​ພັກ­ຜ່ອນ​ສັ້ນໆ​ນັ້ນ ຊ່ວຍ​ໃຫ້​ເຂົາ​ຈົດ­ຈໍ່​ໃສ່​ການ​ຮຽນ​ໄດ້​ດີ​ຂຶ້ນ ໃນ​ເວ­ລາ​ມີ​ອາ­ການ​ເຄັ່ງ​ຕຶງ (ຍ້ອນ​ການ​ຮຽນ) ນີ້ ຖ້າ​ໄດ້​ຫຼິ້ນ​ກັບ​ສັດ­ຈະ​ເປັນ​ການ​ພັກ­ຜ່ອນ​ທີ່​ດີ “ຂ້າ­ພະ­ເຈົ້າ​ມັກ​ຢອກ​ຫຼິ້ນ​ກັບ​ໝາ” ລາວ​ວ່າ: ໃນ​ປີ 2017 ອົງ­ການ​ເພື່ອ​ການ​ຮ່ວມ​ມື​ດ້ານ​ເສດ­ຖະ­ກິດ ແລະ ການ​ພັດ­ທະ­ນາ (OECD) ໄດ້​ເຮັດ​ການ​ສຶກ​ສາ​ກ່ຽວ​ກັບ​ວິ­ຖີ​ຊີ­ວິດ​ຂອງ​ນັກ​ສຶກ​ສາ​ໃນ 72 ປະ­ເທດ​ທົ່ວ​ໂລກ ແລະ ໄດ້​ພົບ​ວ່າ ນັກ​ສຶກ​ສາ​ອົດ​ສະ​ຕຣາ​ລີ ມີ​ຄວາມ​ກັງ­ວົນ ແລະ ທຸກ​ອົກ​ທຸກ​ໃຈ​ເລື່ອງ​ການ​ສອບ­ເສັງ​ຫຼາຍ​ກວ່າ​ນັກ​ສຶກ​ສາ​ໃນ​ປະ­ເທດ​ອື່ນໆ

   ທີ່ ມັນ​ດິບ: ເຖິງ​ຈະ​ເປັນ​ປະ­ເທດ​ເກາະ­ດອນ​ຂະ ໜາດ​ນ້ອຍໆ​ໃນ​ກາງ​ມະ­ຫາ​ສະ­ໝຸດ​ອິນ​ເດຍ ປະ ເທດ​ມັນ​ດິບ (Maldives) ກໍ​ໃຈ​ໃຫຍ່​ອະ­ນຸ­ຍາດ​ໃຫ້ ຊາວ​ຕ່າງ­ປະ­ເທດ​ມີ​ສິດ​ເປັນ​ເຈົ້າ​ທີ່​ດິນ​ໄດ້ ຂ່າວ​ກ່ຽວ​ກັບ​ເລື່ອງ​ນີ້​ເກີດ​ຂຶ້ນ​ແຕ່​ກາງ​ປີ 2015 ເມື່ອ​ປະ­ທາ­ນາ­ທິ­ບໍ­ດີ​ຂອງ​ປະ­ເທດ​ນີ້​ໄດ້​ລົງ​ນາມ​ໃສ່​ຮ່າງ​ກົດ­ໝາຍ​ອະ­ນຸ­ຍາດ​ໃຫ້​ບໍ­ລິ­ສັດ​ຕ່າງ­ປະ­ເທດ​ທີ່​ມີ​ເງິນ​ລົງ­ທຶນ​ຫຼາຍ​ກວ່າ 1 ຕື້​ໂດ​ລາ​ສະ­ຫະ­ລັດ ສາ­ມາດ​ເປັນ​ເຈົ້າ​ຂອງ​ທີ່​ດິນ​ໃນ​ມັນ​ດິບ​ໄດ້... ແຕ່​ມີ​ເງື່ອນ­ໄຂ​ວ່າ 70% ຂອງ​ເນື້ອ­ທີ່ ທີ່​ຕ່າງ­ປະ­ເທດ​ຈະ​ເປັນ​ເຈົ້າ​ຂອງ​ນັ້ນ​ຕ້ອງ​ເປັນ​ເນື້ອ­ທີ່​ສ້າງ​ຂຶ້ນ​ໃໝ່ ໂດຍ​ຜູ້​ລົງ­ທຶນ​ຊອກ​ດິນ​ມາ​ຖົມ​ທະ­ເລ​ເອົາ​ເອງ ແນວ­ໃດ​ກໍ​ດີ ພັກ​ຝ່າຍ​ຄ້ານ​ເຫັນ​ວ່າ ກົດ­ໝາຍ​ສະ­ບັບ​ນີ້​ອາດ​ມີ​ຊ່ອງ​ຫວ່າງ​ເຮັດ​ໃຫ້​ເກີດ​ການ​ແຍ່ງ​ຊີງ​ອຳ­ນາດ​ຂອງ​ບັນ­ດາ​ປະ­ເທດ​ທີ່​ມີ​ອິດ​ທິ​ພົນ​ໃນ​ພາກ​ພື້ນ​ທີ່​ຕ້ອງ­ການ​ມັນ​ດິບ ເປັນ​ເຂດ​ຍຸດ​ທະ​ສາດ ໃນ​ທີ່​ສຸດ​ທາງ​ຝ່າຍ​ລັດ­ຖະ­ບານ​ກໍ​ອອກ​ມາ​ສະ­ແດງ​ເຫດ­ຜົນ​ວ່າ ກົດ­ໝາຍ​ສະ­ບັບ​ນີ້​ມີ​ຈຸດ­ປະ­ສົງ​ພຽງ​ເພື່ອ​ດຶງ​ດູດ ນັກ​ລົງ­ທຶນ​ຕ່າງ­ປະ­ເທດ​ໃຫ້​ເຂົ້າ​ມາ​ລົງ­ທຶນ​ໃນ​ປະ ເທດ​ເພີ່ມ​ຂຶ້ນ​ເທົ່າ​ນັ້ນ.

   ທີ່ ສ ອາ​ເມ​ຣິ​ກາ: ໜັງ­ສື­ພິມ​ຜູ້​ແທນ​ປະ­ຊາ­ຊົນ (ສະ­ພາ​ແຫ່ງ​ຊາດ) ສະ­ບັບ 591 ໃນ​ອາ­ທິດ​ທີ 3 ມິ­ຖຸ­ນາ 2019 ໃຫ້​ຮູ້​ວ່າ ຜູ້​ວ່າ­ການ​ລັດ​ອະ​ລາ​ບາ​ມາ ສ ອາ​ເມ​ຣິ​ກາ ໄດ້​ລົງ​ນາມ​ຜ່ານ​ຮ່າງ​ກົດ­ໝາຍ​ອະ­ນຸ­ຍາດ​ໃຫ້​ໃຊ້​ວິ­ທີ​ການ​ຕອນ​ດ້ວຍ​ສານ​ເຄ​ມີ​ກັບ​ນັກ­ໂທດ​ຄະ­ດີ​ຂົ່ມ­ຂືນ​ເດັກ­ນ້ອຍ ທີ່​ມີ​ອາ­ຍຸ​ຕ່ຳ​ກວ່າ 13 ປີ ວິ­ທີ​ການ​ຕອນ ກໍ​ຄື ສີດ​ຢາ ເພື່ອ​ຢຸດ​ການ​ສ້າງ​ຮໍ​ໂມນ​ເພດ​ຊາຍ ເຮັດ​ໃຫ້​ມີ​ຄວາມ​ຕ້ອງ­ການ​ທາງ​ເພດ​ຫຼຸດ​ລົງ ການ​ຕອນ​ດ້ວຍ​ເຄ​ມີ​ນີ້​ຈະ​ເຮັດ​ໃຫ້​ກ່ອນ​ປ່ອຍ​ຕົວ​ນັກ­ໂທດ​ທີ່​ກ່ຽວ­ຂ້ອງ​ອອກ​ຈາກ​ຄຸກ ເພື່ອ​ບໍ່​ໃຫ້​ຜູ້­ກ່ຽວ​ສືບ­ຕໍ່​ກະ­ທຳ​ຜິດ​ແບບ​ຊ້ຳ​ຊາກ​ອີກ ແຕ່​ກ່ອນ​ຈະ​ສີດ​ຢາ​ຕອນ ຍັງ​ຕ້ອງ​ໄດ້​ຮັບ​ການ​ພິ­ຈາ­ລະ­ນາ​ຈາກ​ສານ​ອີກ​ຕໍ່​ໜຶ່ງ ນອກ­ຈາກ​ລັດ​ອະ​ລາ​ບາ​ມາ ແລ້ວ ຍັງ​ມີ​ອີກ 6 ລັດ​ຂອງ ສ ອາ​ເມ​ຣິ​ກາ ທີ່​ມີ​ການ​ລົງ­ໂທດ​ດ້ວຍ​ການ​ຕອນ ກັບ​ຜູ້​ມີ​ໂທດ​ຂົ່ມ­ຂືນ​ເດັກ.

ຂ່າວທີ່ກ່ຽວຂ້ອງ