ຂ່າວຫຼ້າສຸດ

ສົ່ງເສີມການຄົ້ນຄວ້າເພື່ອການພັດທະນາແບບຍືນຍົງ

845 06 ພ.ຈ. 2019 ຂ່າວໜ້າ​ໜຶ່ງ
ສົ່ງເສີມການຄົ້ນຄວ້າເພື່ອການພັດທະນາແບບຍືນຍົງ

    ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ຮ່ວມ​ກັບ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ (ຊສ) ຈັດ​ກອງ​ປະ­ຊຸມ​ສາ­ກົນ ຫົວ­ຂໍ້: ວິ­ທະ­ຍາ­ສາດ ເຕັກ​ໂນ​ໂລ​ຊີ ແລະ ນະ​ວັດ­ຕະ​ກຳ ເພື່ອ​ການ​ພັດ­ທະ­ນາ​ແບບ​ຍືນ​ຍົງ ວັນ​ທີ 5-6 ພະ­ຈິກ 2019 ຢູ່ ມຊ ໂດຍ​ມີ​ທ່ານ ສົມ​ມາດ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ ຊສ ທ່ານ ກອງ​ສີ ແສງ​ມະ­ນີ ຮອງ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ ທ່ານ ສົມ​ສີ ຍໍ​ພັນ​ໄຊ ອະ­ທິ­ການ​ບໍ­ດີ ມຊ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ສົມ​ສີ ຍໍ​ພັນ​ໄຊ ກ່າວ​ວ່າ: ເພື່ອ​ສະ­ເຫຼີມ­ສະ­ຫຼອງ​ການ​ສ້າງ­ຕັ້ງ ມຊ ຄົບ­ຮອບ 23 ປີ (ວັນ​ທີ 5/11/1996-5/11/2019) ແລະ ສ້າງ​ເວ­ທີ​ໃຫ້​ຄູ-ອາ­ຈານ ນັກ​ສຶກ​ສາ ແລະ ນັກ​ຄົ້ນ­ຄວ້າ​ຂອງ ມຊ ມີ​ໂອ ກາດ​ເຜີຍ­ແຜ່ ແລກ­ປ່ຽນ​ຜົນ­ງານ ແລະ ຜະ­ລິດ​ຕະ​ພັນ​ຂອງ​ນັກ​ຄົ້ນ­ຄວ້າ​ພາຍ​ໃນ ແລະ ຕ່າງ­ປະ­ເທດ ສ້າງ​ຄວາມ​ເຂົ້າ­ໃຈ​ເລິກ­ເຊິ່ງ​ກ່ຽວ​ກັບ​ການ​ຄຸ້ມ​ຄອງ ຊສ ແບບ​ຍືນ​ຍົງ ເພື່ອ​ສ້າງ​ເຄືອ​ຄ່າຍ​ລະ­ຫວ່າງ​ນັກ​ຄົ້ນ­ຄວ້າ​ພາຍ​ໃນ ແລະ ຕ່າງ­ປະ­ເທດ ໄດ້​ຄົ້ນ­ຄວ້າ​ຮ່ວມ​ກັນ​ໃນ​ອະ­ນາ­ຄົດ ສ້າງ​ວັດ­ທະ­ນະ­ທຳ​ໃຫ້​ຄົນ​ລາວ​ຫັນ​ມາ​ໃຫ້​ຄວາມ​ສຳ­ຄັນ ແລະ ຮັກ​ໃນ​ການ​ຄົ້ນ­ຄວ້າ ແລະ ຫັນ​ມາ​ນຳ​ໃຊ້​ຜົນ​ການ​ຄົ້ນ­ຄວ້າ​ໃຫ້​ຫຼາຍ​ຂຶ້ນ ຖື​ເອົາ​ການ​ຄົ້ນ ຄວ້າ​ວິ­ທະ­ຍາ­ສາດ ເປັນ​ຫົວ​ສະ­ໝອງ ແລະ ຈິດ​ວິນ​ຍານ​ຂອງ ມຊ ໂດຍ​ໄດ້​ມີ​ວິ­ໄສ​ທັດ ແລະ ພາ­ລະ­ກິດ​ສຳ ຄັນ​ຕົ້ນ­ຕໍ​ໃນ​ການ​ຄົ້ນ­ຄວ້າ ຄື: ປ່ຽນ​ວັດ­ທະ­ນະ­ທຳ ນັກ​ສຶກ​ສາ ຄູ-ອາ­ຈານ ແລະ ສັງ­ຄົມ ໃຫ້​ເຫັນ​ຄວາມ​ສຳ­ຄັນ​ໃນ​ການ​ຄົ້ນ­ຄວ້າ​ວິ­ທະ­ຍາ­ສາດ ເພື່ອ​ສ້າງ​ບັນ­ດິດ ຫຼື ນັກ​ຄົ້ນ­ຄວ້າ​ວິ­ທະ­ຍາ­ສາດ​ທີ່​ໄດ້​ມາດ­ຕະ­ຖານ ແລະ ມີ​ຈັນ­ຍາ­ທຳ​ສູງ ສ້າງ​ໂຄງ­ການ​ຜະ­ລິດ­ຜົນ​ງານ​ການ​ຄົ້ນ­ຄວ້າ​ທີ່​ມີ​ຄຸນ​ນະ​ພາບ ຜົນ​ປະ­ໂຫຍດ​ສູງ​ເພື່ອ​ຍົກ​ຖາ­ນະ​ບົດ­ບາດ​ຂອງ ມຊ ໃຫ້​ສູງ​ຂຶ້ນ​ໃນ​ເວ­ທີ​ສາ­ກົນ ແລະ ເພື່ອ​ດຳ­ເນີນ​ການ​ຄົ້ນ­ຄວ້າ ເຜີຍ­ແຜ່ ແລະ ໝູນ​ໃຊ້​ຜົນ​ການ​ຄົ້ນ­ຄວ້າ​ວິ­ທະ­ຍາ­ສາດ​ໃນ​ການ​ປົກ​ປັກ​ຮັກ­ສາ ແລະ ພັດ­ທະ­ນາ​ສັງ­ຄົມ.

ຂ່າວທີ່ກ່ຽວຂ້ອງ