ໝູ່ບ້ານເຮືອນລາວ ມີຫຼາຍກິດຈະກຳໃຫ້ທ່ຽວຊົມ

621 06 ພ.ຈ. 2019 ຂ່າວໜ້າ​ໜຶ່ງ
ໝູ່ບ້ານເຮືອນລາວ ມີຫຼາຍກິດຈະກຳໃຫ້ທ່ຽວຊົມ

   ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ​ແຕ່​ລະ​ປີ​ໄດ້​ຈັດ​ໃຫ້​ມີ​ຫຼາຍ​ກິດ­ຈະ­ກຳ ແນ­ໃສ່​ສ້າງ​ຄວາມ​ເບີກ ບານ​ມ່ວນ­ຊື່ນ​ໃຫ້​ຜູ້​ເຂົ້າ​ມາ​ທ່ຽວ​ຊົມ ທັງ​ຮັກ­ສາ​ໄດ້​ວັດ­ທະ­ນະ­ທຳ​ອັນ​ດີ­ງາມ ດຶງ​ດູດ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ມາ​ທ່ອງ​ທ່ຽວ​ລາວ​ໃຫ້​ນັບ​ມື້​ເພີ່ມ​ຂຶ້ນ ສະ­ເພາະ​ປີ 2019 ງານ​ບຸນ​ດັ່ງ­ກ່າວ​ຈັດ​ຂຶ້ນ​ວັນ​ທີ 5-11 ພະ­ຈິກ 2019 ຫຼາຍ​ຂະ­ແໜງ­ການ ກໍ​ຄື ບັນ­ດາ​ຜູ້​ປະ­ກອບ​ການ​ໄດ້​ມີ​ຫຼາຍ​ກິດ­ຈະ­ກຳ​ແຕກ​ຕ່າງ​ຈາກ​ປີ­ຜ່ານ­ມາ ໃນ​ນີ້ ໝູ່​ບ້ານ​ເຮືອນ​ລາວ ກໍ​ເປັນ​ອີກ​ພື້ນ​ທີ່​ໜຶ່ງ​ທີ່­ຢູ່​ໃນ​ເດີ່ນ​ກົມ​ມະ​ລຽນ​ດ້ານ​ນອກ​ພະ​ທາດ­ຫຼວງ ທີ່​ໄດ້​ຕົບ­ແຕ່ງ​ປະ­ດັບ​ປະ­ດາ ໂດຍ​ເນັ້ນ​ໃສ່­ເຄື່ອງ​ຈັກ­ສານ​ທີ່​ເຮັດ​ດ້ວຍ​ໄມ້­ປ່ອງ ຫວາຍ ຜ້າ​ຝ້າຍ ແລະ ອື່ນໆ.

   ທ່ານ​ນາງ ຈັນ​ນະ­ພາ ວົງ​ສະ­ໝໍ­ລະ­ພູມ ປະ­ທານ​ກຸ່ມ​ບໍ­ລິ­ສັດ​ຊີ​ເອັນ​ພີ ຜູ້​ສຳ​ປະ­ທານ​ເຮັດ​ໝູ່​ບ້ານ​ເຮືອນ​ລາວ​ໃຫ້​ສຳ­ພາດ​ວັນ​ທີ 4 ພະ­ຈິກ​ນີ້​ວ່າ: ເປັນ​ປີ​ທີ 4 ທີ່​ກຸ່ມ​ບໍ­ລິ­ສັດ​ຊີ​ເອັນ​ພີ ໄດ້​ມີ​ສ່ວນ​ຮ່ວມ​ໃນ​ການ​ຕົບ­ແຕ່ງ​ໜູ່​ບ້ານ​ເຮືອນ​ລາວ ເຊິ່ງ​ເປັນ​ກິດ­ຈະ­ກຳ​ໜຶ່ງ​ທີ່­ຢູ່​ໃນ​ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ ພິ­ເສດ​ປີ​ນີ້ ເປັນ​ປີ​ສະ­ຫຼຸບ​ການ​ປະ­ຕິ­ສັງ­ຂອນ​ພະ​ທາດ­ຫຼວງ​ວຽງ​ຈັນ ຄັ້ງ​ທີ IV ໝູ່​ບ້ານ​ເຮືອນ​ລາວ​ໄດ້​ມີ​ການ​ຕົບ­ແຕ່ງ​ທີ່​ເນັ້ນ​ໃສ່​ການ​ສົ່ງ­ເສີມ​ວັດ­ທະ­ນະ­ທຳ ສີ­ໄມ້­ລາຍ­ມື ແລະ ຮີດ­ຄອງ​ປະ­ເພ­ນີ​ທີ່​ເປັນ​ເອ­ກະ­ລັກ​ຂອງ​ແຕ່​ລະ​ຊົນ­ເຜົ່າ ເປັນ­ຕົ້ນ ສະ­ຖານ­ທີ່​ອ້ອມ​ຮອບ​ຈະ​ຕົບ­ແຕ່ງ​ດ້ວຍ​ດອກ​ໄມ້ ໂຄມ­ໄຟ ແລະ ຫວດ ນອກ​ນີ້ ຕາມ​ເຮືອນ​ຈະ​ຕົບ ແຕ່ງ​ດ້ວຍ​ເຄື່ອງ​ຈັກ­ສານ​ທີ່​ເຮັດ​ດ້ວຍ​ໄມ້­ປ່ອງ ແລະ ຫວາຍ ປະ­ເພດ​ສຸ່ມ ກະ­ຕ່າ ກະ­ບຸງ ຂັນ ແລະ ປະ­ດັບ​ປະ­ດາ​ດ້ວຍ​ຜ້າ­ໄໝ ຜ້າ​ຝ້າຍ​ທີ່​ເປັນ​ສີ­ໄມ້­ລາຍ­ມື​ຂອງ​ຄົນ​ລາວ ພາຍ​ໃນ​ເຮືອນ​ແຕ່​ລະ​ຫຼັງ​ຈະ​ບໍ­ລິ­ການ​ນຸ່ງ​ຊຸດ​ຂອງ​ແຕ່​ລະ​ຊົນ­ເຜົ່າ ແລະ ບໍ­ລິ­ການ​ຖ່າຍ­ຮູບ ຄາດ​ວ່າ​ປີ​ນີ້​ຈະ​ມີ​ຜູ້​ເຂົ້າ​ຊົມ 200.000-250.000 ຄົນ.

   ໝູ່​ບ້ານ​ເຮືອນ​ລາວ ສ້າງ​ຂຶ້ນ​ເພື່ອ​ເປັນ​ການ​ອະ­ນຸ​ຮັກ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ແລະ ເສີມ​ຂະ­ຫຍາຍ​ສິ­ລະ​ປະ​ວັດ­ທະ­ນະ­ທຳ​ຂອງ​ຊາດ​ລາວ​ໃຫ້​ຄົນ​ຮຸ່ນ​ຫຼັງ​ໄດ້​ສືບ​ທອດ ໃນ​ນີ້ ຈະ​ເລີ່ມ​ເປີດ​ໃຫ້​ເຂົ້າ​ທ່ຽວ​ຊົມ​ແຕ່​ວັນ​ທີ 5 ເປັນ­ຕົ້ນ​ໄປ ໂດຍ​ເກັບ​ຄ່າ​ບໍ­ລິ­ການ 10.000 ກີບ​ຕໍ່​ຄົນ ເຊິ່ງ​ຜູ້​ເຂົ້າ​ຊົມ​ຍັງ​ມີ​ສິດ​ໄດ້​ຮັບ​ລາ­ງວັນ​ລົດ­ຈັກ 1 ລາ­ງວັນ ແລະ ລາ­ງວັນ​ອື່ນໆ​ອີກ ພາຍ­ຫຼັງ​ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ​ສຳ­ເລັດ ແຕ່​ໝູ່​ບ້ານ​ເຮືອນ​ລາວ​ຍັງ​ຈະ​ເປີດ​ບໍ­ລິ­ການ​ໃຫ້​ທ່ຽວ​ຊົມ​ໄດ້​ຕາມ​ປົກ­ກະ­ຕິ ສະ­ເພາະ​ວັນ​ທີ 9 ພະ­ຈິກ 2019 ເວ­ລາ 16:00 ໂມງ ໝູ່​ບ້ານ​ເຮືອນ​ລາວ​ຈະ​ໄດ້​ເຂົ້າ​ຮ່ວມ​ແຫ່​ຜາ­ສາດ​ເຜິ້ງ​ທີ່​ເປັນ​ເອ­ກະ­ລັກ​ຂອງ​ແຕ່​ລະ​ເຜົ່າ​ອ້ອມ​ພະ​ທາດ­ຫຼວງ​ວຽງ​ຈັນ ຈຶ່ງ​ຂໍ​ເຊີນ­ຊວນ​ປະ­ຊາ­ຊົນ​ຜູ້​ທີ່​ມີ​ຈິດ­ໃຈ​ໃສ​ສັດ­ທາ​ເຂົ້າ​ຮ່ວມ​ຂະ​ບວນ​ການ​ດັ່ງ­ກ່າວ ແລະ ຂໍ​ເຊີນ­ຊວນ​ຜູ້​ທີ່​ມາ​ທ່ຽວ​ຫຼິ້ນ​ບຸນ​ນະ­ມັດ­ສະ­ການ​ພະ​ທາດ­ຫຼວງ​ວຽງ​ຈັນ ເຂົ້າ​ຢ້ຽມ​ຊົມ​ໝູ່​ບ້ານ​ເຮືອນ​ລາວ ເພື່ອ​ສຳ­ຜັດ​ວັດ­ທະ­ນະ­ທຳ​ທີ່​ເປັນ​ເອ­ກະ­ລັກ​ຂອງ​ຊາດ​ລາວ​ດ້ວຍ.

ຂ່າວທີ່ກ່ຽວຂ້ອງ