ຂ່າວຫຼ້າສຸດ

ຈັດ​ທຣຳ ໄດ້​ແຊັມ​ສະນຸກ​ເກີ World Open

789 06 ພ.ຈ. 2019 ວົງຈອນກີລາ
ຈັດ​ທຣຳ ໄດ້​ແຊັມ​ສະນຸກ​ເກີ World Open

   ການ​ແຂ່ງຂັນ​ສະນຸກ​ເກີ ລະດັບ​ໂລກ ລາຍການ World Open 2019 ຈັດ​ຂຶ້ນ​ຢູ່​ຢູ໋​ຊານ ​ສປ ຈີນ ວັນ​ທີ 28 ຕຸລາ-3 ພະຈິກ 2019 ຊີງ​ເງິນ​ລາງວັນ​ລວມ 772.000 ປອນ ຫຼື ປະມານ 8,78 ຕື້​ກີບ ເຊິ່ງ​ຮອບ​ຊີງ​ຊະນະ​ເລີດ ຈັດ​ທຣຳ ມື 1 ຂອງ​ໂລກ​ຈາກ​ອັງກິດ ຕັ້ງ​ເປົ້າ​ລ່າ​ແຊັມ​ລາຍການ​ນີ້​ຄັ້ງ​ທຳ​ອິດ ປະສົບ​ຜົນສຳເລັດ​ຕາມ​ເປົ້າ​ໝາຍ ເອົາ​ຊະນະ ເທບ​ໄຊ​ຍາ ອຸ່ນ​ໜູ ມື​ອັນ​ດັບ 37 ຂອງ​ໂລກ ຈາກ​ໄທ 10-5 ເຟຣມ ຈັດ​ທຣຳ ກາຍເປັນ​ນັກ​ສະນຸກ​ເກີ​ຊາວ​ອັງກິດ​ຄົນທີ 9 ທີ່​ໄດ້​ແຊັມ​ລາຍການ​ນີ້ ຕໍ່​ຈາກ ອາລີ ຄາ​​ຣ​ເຕີ ປີ 2016 ຮັບ​ຂັນ​ແຊັມ ພ້ອມ​ເງິນ​ລາງວັນ 150.000 ປອນ ຫຼື ປະມານ 1,7 ຕື້​ກີບ ຂະນະ​ທີ່ ເທບ​ໄຊ​ຍາ ສ້າງ​ປະຫວັດສາດ​ເປັນ​ນັກ​ສະນຸກ​ເກີ​ໄທ​ຄົນ​ທຳ​ອິດ ເຂົ້າ​ຊີງ​ລາຍການ​ນີ້ ຮັບ​ເງິນ​ລາງວັນ 75.000 ປອນ ຫຼື ປະມານ 854 ລ້ານ​ກີບ.

    ຈັດ​ທຣຳ ກ່າວ​ວ່າ: ມີ​ຄວາມສຸກ​ຢ່າງ​ຍິ່ງ​ທີ່​ສາມາດ​ຍາດ​ໄດ້​ແຊັມ​ລາຍການ​ນີ້ ເຖິງ​ວ່າ​ຕະຫຼອດ​ການ​ແຂ່ງ ຂັນ​ໃນ​ອາທິດ​ນີ້ ເຮັດ​ໄດ້​ບໍ່​ດີ​ປານໃດ ຜ່ານ​ຄູ່​ແຂ່ງ​ແບບ​ຫວຸດ​ຫວິດ​ໃນ​ຮອບ​ຜ່ານ​ມາ ແຕ່​ການ​ຫຼິ້ນ​ໃນ​ຮອບ​ຊີງ​ດີ​ຂຶ້ນ​ຫຼາຍ ແລະ ເປັນ​ການ​ເຮັດ​ວຽກ​ທີ່​ໜັກ​ສົມຄວນ​ຈຶ່ງ​ສາມາດ​ໄດ້​ແຊັມ​ມາ​ໄດ້.

    ຈັດ​ທຣຳ ຍາດ​ໄດ້​ແຊັມ​ນີ້​ເປັນ​ແຊັມ​ລາຍການ​ທີ 6 ຂອງ​ໃນ​ປີ​ນີ້ ລາຍການ​ຕໍ່​ໄປ​ຈະ​ເຂົ້າ​ຮ່ວມ​ລາຍການ Champions of Champions ວັນ​ທີ 4-10 ພະຈິກ 2019 ຢູ່​ໂຄ​ເວັນ​ທຣີ ປະເທດ​ອັງກິດ.

ຂ່າວທີ່ກ່ຽວຂ້ອງ