ຂ່າວຫຼ້າສຸດ

ລ໋ອບ ສະ​ເຕ​ດ້ຽມ ໄດ້​ແຊັມ U-15 ບານເຕະ​ຕ້ອນຮັບ​ວັນຊາດ

503 05 ພ.ຈ. 2019 ວົງຈອນກີລາ
ລ໋ອບ ສະ​ເຕ​ດ້ຽມ ໄດ້​ແຊັມ U-15 ບານເຕະ​ຕ້ອນຮັບ​ວັນຊາດ

   ການ​ແຂ່ງຂັນ​ກີລາ​ບານເຕະ 4 ພາກສ່ວນ 2 ຊາດ ລາວ-ໄທ ຊີງ​ຂັນ​ທ່ານ​ປະທານ​ຝ່າຍ​ພັດທະນາ​ກີລາ​ບານເຕະ​ອາ​ນຸ​ຊົນ ແລະ ເຍົາວະ​ຊົນ ນະຄອນຫຼວງ​ວຽງ​ຈັນ (ນວ) ປະຈຳ​ປີ 2019 ເພື່ອ​ສ້າງ​ຂະ​ບວນ​ການ​ຄຳນັບ​ຮັບ​ຕ້ອນ​ວັນຊາດ (ທີ 2 ທັນວາ) ຄົບຮອບ 44 ປີ ແລະ ສືບຕໍ່​ຮັດ​ແໜ້ນ​ສາມັກຄີ​ຮັກແພງ​ມິດຕະພາບ ລະຫວ່າງ 2 ຊາດ ກໍ​ຄື ນວ ແລະ ສະໂມສອນ​ວໍລະ​ວີ ຈາກ​ນະຄອນຫຼວງ​ບາງກອກ ປະເທດ​ໄທ ຈັດ​ຂຶ້ນ​ວັນ​ທີ 2-3 ພະຈິກ 2019 ຢູ່​ສະໜາມ​ກີລາ​ບານເຕະ​ເຈົ້າ​ອາ​ນຸ​ວົງ.

    ທ່ານ ອາ​ລ໋ອບ ມະນີ​ບົດ ຮອງ​ປະທານ​ຝ່າຍ​ພັດທະນາ​ກີລາ​ເຕະບານ​ອາ​ນຸ​ຊົນ ແລະ ເຍົາວະ​ຊົນ ນວ ໃຫ້​ສຳພາດ​ວ່າ: ການ​ແຂ່ງຂັນ​ຄັ້ງ​ນີ້ ແມ່ນ​ເປັນ​ຄັ້ງ​ທີ 4 ເຊິ່ງ​ປີ​ນີ້​ມີ​ຄວາມ​ໝາຍ​ຄວາມ​ສຳຄັນ​ທີ່​ສຸດ​ຕໍ່​ການ​ສົ່ງເສີມ​ນັກກີລາ​ຂອງ​ສະໂມສອນ​ຕ່າງໆ​ອ້ອມ​ຂ້າງ ນວ ໄດ້​ເຄື່ອນ​ໄຫວ ແລະ ແລກປ່ຽນ​ບົດຮຽນ​ກັບ​ນັກກີລາ​ຈາກ​ສະໂມສອນ​ວໍລະ​ວີ ເຊິ່ງ​ເປັນ​ທີມ​ທີ່​ໄດ້​ມາດຕະຖານ ເຮັດ​ໃຫ້​ເຍົາວະ​ຊົນ ນວ ໄດ້​ບົດຮຽນ ແລະ ເຊື່ອ​ວ່າ​ໃນ​ອະນາຄົດ​ຈະ​ສາມາດ​ກ້າວ​ຂຶ້ນ​ໄປ​ແທນ​ນັກກີລາ​ຮຸ່ນ​ອ້າຍ ກໍ​ຄື​ລະດັບ​ຊາດ.

    ການ​ແຂ່ງຂັນ​ລາຍການ​ນີ້ ປະກອບ​ມີ​ຮຸ່ນ​ອາຍຸ 13 ປີ ແລະ ຮຸ່ນ​ອາຍຸ 15 ປີ ແຕ່​ລະ​ຮຸ່ນ​ມີ 4 ທີມ​ເຂົ້າ​ຮ່ວມ ຜ່ານ​ການ​ແຂ່ງຂັນ​ຮຸ່ນ​ອາຍຸ 15 ປີ ທີ 1 ທີມ​ລ໋ອບ ສະ​ເຕ​ດ້ຽມ ລົງ​ສະໜາມ 3 ນັດ ຊະນະ 3 ນັດ ມີ 9 ຄະແນນ ທີ 2 ສະໂມສອນ​ທະ​ເວັນ​ຕີ​ຊີກ ແຂ່ງ 3 ນັດ ຊະນະ 2 ນັດ ເສຍ 1 ນັດ ມີ 6 ຄະແນນ ທີ 3 ທີມ ນວ ແຂ່ງ 3 ນັດ ຊະນະ 1 ນັດ ເສຍ 2 ນັດ ມີ 3 ຄະແນນ ສ່ວນ​ຮຸ່ນ​ອາຍຸ 13 ປີ ທີ 1 ທີມ​ວໍລະ​ວີ ໄທ ແຂ່ງ 3 ນັດ ຊະນະ 3 ນັດ ມີ 9 ຄະແນນ ທີ 2 ທີມ​ວຽງ​ຈັນ​ເອ​​ັຟ​ທີ ແຂ່ງ 3 ນັດ ຊະນະ 1 ສະເໝີ 1 ເສຍ 1 ນັດ ມີ 4 ຄະແນນ ທີ 3 ທີມ​ລ໋ອບ ສະ​ເຕ​ດ້ຽມ ແຂ່ງ 3 ນັດ ຊະນະ 1 ນັດ ເສຍ 2 ນັດ ມີ 3 ຄະແນນ. 

ຂ່າວທີ່ກ່ຽວຂ້ອງ