ຂ່າວຫຼ້າສຸດ

ແຂ່ງຂັນ​ບານເຕະ​ມິດຕະພາບ ສະຫຼອງ​ວັນ​ສຳຄັນ​ຂອງ​ຊາດ

409 05 ພ.ຈ. 2019 ວົງຈອນກີລາ
ແຂ່ງຂັນ​ບານເຕະ​ມິດຕະພາບ ສະຫຼອງ​ວັນ​ສຳຄັນ​ຂອງ​ຊາດ

   ເພື່ອ​ສ້າງ​ຂະ​ບວນ​ການ​ຄຳນັບ​ຮັບ​ຕ້ອນ​ວັນ​ສຳຄັນ​ຕ່າງໆ​ຂອງ​ຊາດ ໂດຍ​ສະເພາະ ​ວັນຊາດ (ທີ 2 ທັນວາ) ຄົບຮອບ 44 ປີ ໃຫ້​ມີ​ບັນຍາກາດ​ຟົດຟື້ນ​ມ່ວນຊື່ນ ທັງ​ເປັນ​ການ​ແລກປ່ຽນ​ບົດຮຽນ​ດ້ານ​ກີລາ ແລະ ຮັດ​ແໜ້ນ​ຄວາມ​ສາມັກຄີ​ເຊິ່ງ​ກັນ ແລະ ກັນ ວັນ​ທີ 1 ພະຈິກ 2019 ຢູ່​ສະໜາມ​ກີລາ​ບານເຕະ​ເມືອງ​ສັງ​ທອງ ນະຄອນຫຼວງ​ວຽງ​ຈັນ (ນວ) ໄດ້​ຈັດ​ແຂ່ງຂັນ​ກີລາ​ບານເຕະ​ມິດຕະພາບ ຂຶ້ນ​ລະຫວ່າງ​ທີມ​ສະມາຄົມ​ກີລາ ນວ ກັບ​ທີມ​ຫ້ອງການ​ສຶກ​ສາ​ທິ​ການ ແລະ ກີລາ ເມືອງ​ສັງ​ທອງ.

    ບັນຍາກາດ​ການ​ແຂ່ງຂັນ​ຄັ້ງ​ນີ້ ເຕັມ​ໄປ​ດ້ວຍ​ຄວາມ​ເບີກບານ​ມ່ວນຊື່ນ ແລະ ຄວາມ​ສາມັກຄີ​ເຊິ່ງ​ກັນ ແລະ ກັນ ໝົດ​ເວລາ​ການ​ແຂ່ງຂັນ​ທັງ​ສອງ​ຝ່າຍ​ສະເໜີ​ກັນ​ແບບ​ມ່ວນຊື່ນ 9-9 ປະຕູ.

   ໂອກາດ​ນີ້​ທີມ​ສະມາຄົມ​ກີລາ ນວ ກໍ​ໄດ້​ມອບ​ເຄື່ອງ​ກີລາ 17 ຊຸດ ບານເຕະ 2 ໜ່ວຍ ກະຕໍ້ 2 ໜ່ວຍ ແລະ ຕາ​ໜ່າງ​ກະຕໍ້ 1 ຊຸດ ຫ້ອງການ​ສຶກ​ສາ​ທິ​ການ ແລະ ກີລາ ເມືອງ​ສັງ​ທອງ ເຊິ່ງ​ມອບ​ໂດຍ​ທ່ານ ຄຳ​ສຸກ ພົມມາ​ລາ ຕາງໜ້າ​ສະມາຄົມ​ກີລາ ນວ ແລະ ຮັບ​ໂດຍ​ທ່ານ ສຸ​ລິ​ແສງ ສີ​ຫາ​ລາດ ຫົວໜ້າ​ຫ້ອງການ​ສຶກ​ສາ​ທິ​ການ ແລະ ກີລາ ເມືອງ​ສັງ​ທອງ ມີ​ທ່ານ ຄຳ​ສວຍ ອຸ່ນ​ດາລາ ຮອງ​ເຈົ້າເມືອງ​ສັງ​ທອງ ພາກສ່ວນ​ກ່ຽວ​ຂ້ອງເຂົ້າ​ຮ່ວມ. 

ຂ່າວທີ່ກ່ຽວຂ້ອງ