ຂ່າວຫຼ້າສຸດ

ມີ​ອີກ​ໜຶ່ງ​ລັດ​ໃນ​ອົດ​ສະ​ຕຣາ​ລີ ຫ້າມ​ໃຊ້​ໂທລະສັບ​ມື​ຖື​ຢູ່​ໃນ​ໂຮງຮຽນ

8.372 04 ພ.ຈ. 2019 ຂ່າວຕ່າງປະເທດ
ມີ​ອີກ​ໜຶ່ງ​ລັດ​ໃນ​ອົດ​ສະ​ຕຣາ​ລີ ຫ້າມ​ໃຊ້​ໂທລະສັບ​ມື​ຖື​ຢູ່​ໃນ​ໂຮງຮຽນ

   ເມື່ອ​ບໍ່​ດົນ​ມາ​ນີ້ ອຳນາດ​ການ​ປົກຄອງ​ລັດ​ອົດ​ສະ​ຕຣາ​ລີ​ຕາເວັນຕົກ ຫຼື ເວ​​ສ​ເທິນ ອົດ​ສະ​ຕຣາ​ລີ (Western Australia) ໄດ້​ມີ​ຂໍ້​ຕົກລົງ​ອອກ​ມາ ກ່ຽວ​ກັບ​ການ​ຫ້າມ​ນຳ​ໃຊ້​ໂທລະສັບ​ມື​ຖື​ໃນ​ໂມງ​ຮຽນ ຢູ່​ໃນ​ໂຮງຮຽນ​ຂອງ​ລັດ​ທຸກໆ​ແຫ່ງ ເພື່ອ​ເປັນ​ການ​ຫຼຸດຜ່ອນ​ການ​ຖືກ​ນາບ​ຂູ່​ທາງ​ອິນ​ເຕີ​ເນັດ ແລະ ສົ່ງເສີມ​ການ​ການ​ສົນທະນາ​ໂດຍ​ກົງ​ລະຫວ່າງ​ພວກ​ນັກຮຽນ​ດ້ວຍ​ກັນ. ຄຳ​ສັ່ງ​ຫ້າມ​ດັ່ງກ່າວ ຈະ​ໄດ້​ຮັບ​ການ​ປະຕິບັດ​ນັບ​ແຕ່​ຕົ້ນ​ປີ 2020 ເປັນຕົ້ນ​ໄປ ຢູ່​ໃນ​ບັນດາ​ໂຮງຮຽນ​ຊັ້ນ​ປະຖົມ ແລະ ຊັ້ນ​ມັດທະຍົມ​ຂອງ​ລັດ​ທຸກໆ​ແຫ່ງ ໃນ​ທົ່ວ​ລັດ​ດັ່ງກ່າວ.

    ລັດ​ເວ​​ສ​ເທິນ ອົດ​ສະ​ຕຣາ​ລີ ເປັນ​ລັດ​ທີ​ສາມ ຖັດ​ຈາກ​ສອງ​ລັດ​ທີ່​ມີ​ປະຊາກອນ​ຫຼາຍ​ສຸດ​ໃນ​ອົດ​ສະ​ຕຣາ​ລີ ນັ້ນ​ກໍ​ຄື​ລັດ ນີວ ເຊົາ ແວ​​ລ (New South Wales) ແລະ ລັດ​ວິກ​ຕໍ​ເຣຍ (Victoria) ທີ່​ຕ່າງ​ກໍ​ໄດ້​ຕົກລົງ​ຫ້າມ​ໃຊ້​ໂທລະສັບ ຢູ່​ໃນ​ບັນດາ​ໂຮງຮຽນ​ສາມັນ​ສຶກ​ສາ ໂດຍ​ເລີ່ມ​ແຕ່​ປີ 2020 ເປັນຕົ້ນ​ໄປ​ເຊັ່ນ​ກັນ.

    ທ່ານ ມາກ ແມັກ​ໂກ​ເວນ ຜູ້​ວ່າການ​ລັດ​ເວ​​ສ​ເທິນ ອົດ​ສະ​ຕຣາ​ລີ ໃຫ້​ຮູ້​ວ່າ ນະໂຍບາຍ​ຫ້າມ​ການ​ໃຊ້​ໂທລະສັບ​ຂອງ​ລັດ​ນີ້ ຈະ​ໄດ້​ນຳ​ໃຊ້​ນັບ​ແຕ່​ເວລາ​ທີ່​ນັກຮຽນ​ກ້າວ​ຂາ​ຂ້າມ​ປະຕູໂຂງ​ເຂົ້າ​ໄປ​ໃນ​ໂຮງຮຽນ ໄປ​ຈົນ​ຮອດ​ເວລາ​ທີ່​ໝົດ​ເວລາ​ຮຽນ​ພາຍ​ໃນ​ມື້ ຊຶ່ງ​ລວມ​ເຖິງ​ເວລາ​ພັກຜ່ອນ. ຄຳ​ສັ່ງ​ຫ້າມ​ນັ້ນ ສະເໜີ​ໃຫ້​ພວກ​ນັກຮຽນ​ຊັ້ນ​ມັດທະຍົມ ມອດ​ໂທລະສັບ​ໃນ​ເວລາ​ຮຽນ ແລະ ວາງ​ໂທລະສັບ​ໄວ້​ໃນ​ຈຸດ​ນອກ​ສາຍຕາ ໃນ​ຂະນະ​ທີ່​ນັກຮຽນ​ຊັ້ນ​ອະນຸບານ ແລະ ຊັ້ນ​ປະຖົມ ແມ່ນ​ບໍ່​ອະນຸຍາດ​ໃຫ້​ຖື​ໂທລະສັບ​ໄປ​ໂຮງຮຽນ. ໃນ​ຂະນະ​ດຽວ​ກັນ ຄຳ​ສັ່ງ​ຫ້າມ​ທີ່​ມີ​ອອກ​ມາ​ນັ້ນ​ກໍ​ຈຳກັດ​ການ​ນຳ​ໃຊ້​ໂມງ​ອັດ​ສະ​ລິ​ຍະ (ໂມງ​ສະຫຼາດ) ຄອມ​ພິວ​ເຕີ​ແທບ​ເລັດ (tablet computer) ແລະ ເຄື່ອງ​ຟັງ ໂດຍ​ຍົກເວັ້ນ​ແຕ່​ໄດ້​ຮັບ​ອະນຸຍາດ ແລະ ຕາມ​ການ​ແນະນຳ​ຂອງ​ຄູ​ອາຈານ.

ຂ່າວທີ່ກ່ຽວຂ້ອງ