ຂ່າວຫຼ້າສຸດ

ຄວາມປະໝາດພາໃຫ້ເກີດອຸບັດເຫດ

2.272 01 ພ.ຈ. 2019 ນານາສາລະ

    ຖ້າ­ວ່າ​ພວກ​ເຮົາ​ຫາກ​ສັງ­ເກດ​ພິ­ຈາ­ລະ­ນາ​ໃຫ້​ຖີ່​ຖ້ວນ ກໍ​ຈະ​ພົບ​ວ່າ ສາ­ເຫດ​ຂອງ​ການ​ເກີດ​ອຸ­ບັດ­ເຫດນັ້ນ ເກີດ​ມາ​ຈາກ​ຄວາມ​ຄິດ​ທີ່​ປະ­ໝາດ​ໃນ​ການ​ດຳ­ເນີນ​ຊີ­ວິດ ເຊັ່ນ: ການ​ບໍ່​ໄດ້​ຜ່ານ​ການ​ຮຽນ​ຂັບ​ຂີ່ ການ​ບໍ່​ຮູ້​ກົດ​ລະ­ບຽບ​ຂອງ​ການ​ຈະ­ລາ­ຈອນ ການ​ຄິດ​ປະ­ໝາດ​ໃນ​ການ​ໃຊ້​ຊີ­ວິດ​ປະ­ຈຳ​ວັນ ເຊັ່ນ: ດື່ມ​ເຫຼົ້າ​ເມົາ​ສຸ­ລາ ໄປ​ຄ່ຳ​ມາ​ມືດ ໂດຍ​ບໍ່​ຈຳ­ເປັນ ຫຼື ບາງ​ກໍ­ລະ­ນີ ກໍ​ມີ​ນິ​ໃສ​ມັກ​ດື່ມ​ເປັນ​ປະ­ຈຳ ນີ້​ຄື​ຕົ້ນເຫດ​ຂອງ​ບັນ­ຫາ​ອຸ­ບັດ­ເຫດ.

    ພວກ​ເຮົາ​ລອງ​ມາ​ເບິ່ງ​ສະ­ຖິ­ຕິ​ອຸ­ບັດ­ເຫດ​ທີ່​ເຮັດໃຫ້​ຄົນ​ລາວ​ເສຍ​ຊີ­ວິດ ຫຼື ເກີດ​ອຸ­ບັດ­ເຫດສະ­ເລ່ຍຫຼາຍ​ກວ່າ 1.000 ຄົນ​ຕໍ່​ປີ ເຊິ່ງ​ເທົ່າ​ກັບ​ເສຍ​ຊີ­ວິດ 15 ຄົນ​ຕໍ່​ປະ­ຊາ­ກອນ 100.000 ຄົນ​ຕໍ່​ປີ ໃນ​ຂະນະ​ທີ່​ກຳ­ລັງ​ຂຽນ​ບົດ ຜູ້​ຂຽນ​ກໍ​ໄດ້​ຮັບ​ຂ່າວ​ຈາກ​ໝູ່ຄົນ​ໜຶ່ງ​ທີ່​ເກີດ​ອຸ­ບັດ­ເຫດ​ລົດ​ຕຳ​ກັນ​ຂາ​ຫັກ ແຂນ​ຫັກ ເຊິ່ງ​ຜູ້­ກ່ຽວ​ມີ​ນິ​ໃສ​ມັກ​ດື່ມ ແລະ ເວ­ລາ​ໄດ້​ດື່ມແລ້ວແມ່ນ​ຍາວ​ຈົນ​ເດິກ​ດື່ນ​ທ່ຽງ​ຄືນ ຈຶ່ງ​ພາ­ກັນເລີກ ເວ­ລາ​ຂັບ​ຂີ່​ລົດ​ກັບ​ບ້ານ ຈຶ່ງ​ມີ​ຄວາມ​ສ່ຽງ​ສູງ​ຕໍ່​ການ​ເກີດ​ອຸ­ບັດ­ເຫດ.

    ທ່ານ ບຸນ​ຈັນ ສິນ​ທະ​ວົງ ລັດ­ຖະ­ມົນ­ຕີ ຍທຂ ປະ­ທານ​ຄະ­ນະ​ກຳ­ມະ­ການ​ແຫ່ງ​ຊາດ ດ້ານ​ຄວາມ​ປອດ​ໄພ​ທາງ​ຫຼວງ ເປີດ­ເຜີຍ​ວ່າ: ໃນ​ໄລ­ຍະ 5 ປີ­ຜ່ານ­ມາ ຈຳ­ນວນ​ຜູ້​ເສຍ​ຊີ­ວິດ​ຈາກ​ອຸ­ບັດ­ເຫດ​ຕາມຖະ­ໜົນ ສະ­ເລ່ຍ​ຫຼາຍ​ກວ່າ 1.000 ຄົນ​ຕໍ່​ປີ ຖ້າ​ທຽບໃສ່​ປະ­ຊາ­ກອນ ປະ­ມານ 15 ຄົນ​ຕໍ່​ປະ­ຊາ­ກອນ 100.000 ຄົນ ໃນ​ນີ້ 80% ແມ່ນ​ຊາວ​ໜຸ່ມ​ນັກ­ຮຽນ-ນັກ​ສຶກ​ສາ ແລະ ຜູ້​ທີ່​ສາ­ມາດ​ອອກ­ແຮງງານ​ໄດ້ ເຊິ່ງ​ສາ­ເຫດ​ຂອງ​ອຸ­ບັດ­ເຫດ​ດັ່ງ­ກ່າວ ຍັງ​ເກີດ​ມາ​ຈາກ​ລະ­ບົບ​ການ​ສັນ­ຈອນ​ຂອງ​ທາງ​ຫຼວງ ບາງ​ບ່ອນ​ຍັງ​ສັບ­ສົນ ການ​ຂັບ​ຂີ່​ລົດ­ຈັກ ແລະ ລົດ​ບັນ­ທຸກຍັງ​ປົນ​ກັນ ຜູ້​ຂັບ​ຂີ່​ລົດ­ຈັກ​ບໍ່​ໃສ່​ໝວກ​ກັນ​ກະທົບ ບໍ່​ຮູ້​ກົດ​ຈະ­ລາ­ຈອນ ຫຼື ຮູ້​ແລ້ວແຕ່​ປະ­ໝາດ ເຊິ່ງ​ກວມ​ເອົາ​ທັງ​ຜູ້​ຂັບ​ຂີ່​ລົດ​ໃຫຍ່ ເຊັ່ນ: ຂັບ​ລົດ​ໄປ​ນຳ​ຫຼິ້ນ​ໂທລະ­ສັບ​ໄປ​ນຳ ຫຼື ບໍ່​ດັ່ງ­ນັ້ນ ກໍ​ແມ່ນ​ຄຶກ​ຄະນອງ ບໍ່​ສົນ­ໃຈ​ນຳ​ຄົນ​ອື່ນ ເຊິ່ງ​ນີ້​ຄື​ການ​ປະ­ໝາດ.

    ສັງ​ລວມ​ວ່າ​ເປັນ​ຫຍັງ​ຜູ້​ຂຽນຈຶ່ງ​ເວົ້າ​ວ່າ: ອຸ­ບັດ­ເຫດ​ສ່ວນ​ໃຫຍ່​ເກີດ​ມາ​ຈາກ​ການ​ຂັບ​ຂີ່​ແບບ​ປະ­ໝາດ ເພາະ­ວ່າຜູ້​ຂັບ​ຂີ່​ຫຼາຍ​ຄົນ​ກໍ​ບໍ່​ຜ່ານ​ການ​ຮຽນຮູ້​ດ້ານ​ລະ­ບຽບ​ຈະ­ລາ­ຈອນ ຂາດ​ຈິດ​ສຳ­ນຶກ​ຮັບ­ຜິດ­ຊອບ​ເວ­ລາ​ຂັບ​ຂີ່ ຫຼື ບໍ່​ຄິດ​ໃສ່­ໃຈ​ວ່າເວ­ລາ​ຂັບ​ຂີ່ຕາມ​ຖະ­ໜົນ​ແລ້ວ ຈະ​ຕ້ອງ​ໄດ້​ປະ­ຕິ­ບັດ​ຕາມ​ລະບຽບ​ເທົ່າ​ທຽມ​ກັນ ໂດຍ​ຄິດ​ແຕ່​ພຽງ​ວ່າມີ​ປະ­ກັນ​ໄພ ແລະ ເຫຼັກ​ຫຸ້ມ​ກະ­ດູກ​ໄວ້ແລ້ວ​ຢາກ​ຂັບ​ຕາມ­ໃຈ!.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ