ຂ່າວຫຼ້າສຸດ

ສ້າງກິດຈະກໍາແລ່ນ ເພື່ອຢຸດຕິການໃຊ້ຄວາມຮຸນແຮງຕໍ່ແມ່ຍິງ

343 31 ຕ.ລ. 2019 ວົງຈອນກີລາ
ສ້າງກິດຈະກໍາແລ່ນ ເພື່ອຢຸດຕິການໃຊ້ຄວາມຮຸນແຮງຕໍ່ແມ່ຍິງ

    ວາ­ລະ­ສານ​ຂວັນ​ໃຈ ແລະ ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ​ຮ່ວມ​ກັບ ສະ­ຫະ­ພັນ​ແລ່ນ​ລານ​ແຫ່ງ​ຊາດ​ລາວ ​ໄດ້​ຈັດ​ກິດ­ຈະ­ກຳ ຣັນ​ຟໍ​ເຮີ (Run for Her) ເຊິ່ງ​ເປັນ​ກິດ­ຈະ­ກຳ​ແລ່ນ​ເພື່ອ​ຢຸດ­ຕິ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່­ຍິງ​ພາຍ​ໃຕ້​ຄຳ​ຂວັນ “ທຸກ​ບາດ­ກ້າວ​ຄື​ພະ­ລັງ​ຢຸດ​ຢັ້ງ​ຄວາມ​ຮຸນ​ແຮງ” ຂຶ້ນ​ວັນ​ທີ 27 ຕຸ­ລາ 2019 ທີ່​ເດີ່ນ​ພະ​ທາດ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ ນາງ ເກດ​ສະ­ຫວັນ ປັນ­ຍາ​ທິບ ຮອງ​ຜູ້­ອຳ­ນວຍ­ການ​ສ້າງ​ວາ­ລະ­ສານ​ອອນ​ລາຍ ມີ ທ່ານ ຈັນ​ດີ ພົມ​ມະ​ບຸດ ປະ­ທານ​ສະ­ຫະ­ພັນ​ກີ­ລາ​ແລ່ນ​ລານ​ແຫ່ງ​ຊາດ ພ້ອມ ດ້ວຍ​ຜູ້­ຕາງ­ໜ້າ​ຈາກ​ຂະ­ແໜງ­ການ​ພາກ​ລັດ ແລະ ເອ­ກະ​ຊົນ​ເຂົ້າ​ຮ່ວມ 1.800 ຄົນ.

    ການ​ຈັດ​ກິດ­ຈະ­ກຳ​ຄັ້ງ​ນີ້​ເພື່ອ​ປູກ​ຈິດ​ສຳ­ນຶກ​ໃຫ້​ສັງ­ຄົມ​ຫັນ​ມາ​ເອົາ­ໃຈ­ໃສ່ ແລະ ຮ່ວມ​ຢຸດ­ຕິ​ບັນ­ຫາ​ຄວາມ​ຮຸນ​ແຮງ​ຕໍ່​ແມ່­ຍິງ ແລະ ເດັກ­ນ້ອຍ ທັງ​ເປັນ ການ​ສ້າງ​ກິດ­ຈະ­ກຳ​ແຂ່ງ­ຂັນ​ແລ່ນ ແລະ ພັດ­ທະ­ນາ​ນັກ​ແລ່ນ​ຮຸ່ນ​ໃໝ່ ພ້ອມ​ນັ້ນ ຍັງ​ເປັນ​ການ​ຊຸກ­ຍູ້​ສົ່ງ­ເສີມ​ໃຫ້​ຄົນ​ຫັນ​ມາ​ອອກ­ກຳ­ລັງ​ກາຍ​ໃສ່­ໃຈ​ສຸ­ຂະ­ພາບ ເປັນ​ຮູບ​ແບບ​ການ​ອອກ­ກຳ­ລັງ​ກາຍ​ທຸກ​ເພດ​ທຸກ​ໄວ ເຊິ່ງ​ການ​ແລ່ນ​ໄດ້ ແບ່ງ​ອອກ​ເປັນ 3 ປະ­ເພດ​ຄື: ແລ່ນ​ໄລ­ຍະ​ທາງ 15 ກິ​ໂລ ແລະ 10 ກິ​ໂລ ແຕ່​ລະ​ໄລ­ຍະ​ທາງ​ປະ­ກອບ​ດ້ວຍ​ຮຸ່ນ​ອາ­ຍຸ 16-29 ປີ  30-39 ປີ 40-59 ປີ ແລະ ອາ­ຍຸ 50 ປີ​ຂຶ້ນ​ໄປ ນອກ​ນັ້ນ​ຍັງ​ມີ​ຍ່າງ​ເພື່ອ​ສຸ­ຂະ­ພາບ 5 ກິ​ໂລ​ທີ່​ບໍ່​ຈຳ ກັດ​ອາ­ຍຸ.

    ພາຍ​ໃນ​ງານ​ນັບ​ແຕ່​ຈຸດ​ປ່ອຍ​ຫາ​ເສັ້ນ​ໄຊ ຈະ​ມີ​ກິດ­ຈະ­ກຳ​ທີ່​ເປັນ​ກັນ​ເອງ ເປັນ­ຕົ້ນ ຫຼິ້ນ​ເກມ​ຮ້ານ​ຂອງ​ຜູ້​ສະ­ໜັບ­ສະ­ໜູນ​ງານ ອາ­ຫານ​ເບົາ ເຄື່ອງ​ດື່ມ ແລະ ພື້ນ​ທີ່​ໂອ້​ລົມ​ກັນ.

ຂ່າວທີ່ກ່ຽວຂ້ອງ